Alat na Dipangke Marbarita Publikasi na Diparade tu Ulaon Marbarita

1, 2. (a) Di abad na parjolo, aha do na mambahen tarsar barita na uli di Imperium Rom? (b) Aha do na patuduhon na diurupi Jahowa dope hita saonari? (Ida ma kotak ”Barita na Uli Dipasahat di bagasan Lobi sian 670 Bahasa”.)

SUNGKUNSUNGKUN do roha ni halak na ro tu Jerusalem di ari Pentakoste taon 33 M. Dibege nasida halak Galilea mangkatai mamangke marragam bahasa. Boi masa i, ala songgop tondi parbadia tu sisean ni Jesus. Laos i ma patuduhon na didongani Debata do nasida. (Jaha Ulaon ni Apostel 2:1-8, 12, 15-17.) Godang do sian nasida, ro sian luat na dao. Ujungna, dung mulak nasida tu ingananna be, tarsar ma barita na uli i di Imperium Rom.​—Kol. 1:23.

² Saonari ndang adong be tanda halongangan songon na masa di abad na parjolo i, alai gumodang do bahasa dipangke marbarita saonari sian abad na parjolo. Diterjemahon do barita taringot tu Harajaon tu lobi sian 670 bahasa. (Ul. 2:9-11) Godang do buku naung dipabinsar mamangke marragam bahasa na mambahen barita Harajaon i tarsar di liat portibi on.a Tarida ma sian on, Jesus Kristus, Raja Messias do na manguluhon hita marbarita na uli. (Mat. 28:19, 20) Taparsiajari ma angka alat naung dipangke marbarita saleleng 100 taon on. Taparrohahon ma songon dia Raja i mangajari hita sian tingki tu tingki asa boi mangurupi ganup halak, jala asa denggan mangajarhon Bibel.​—2 Tim. 2:2.

 3. Boasa tapangke godang alat di ulaon marbarita?

³ Dipatudos Jesus do ”hata Harajaon i”, songon boni. Dung i, roha ni jolma songon tano. (Mat. 13:18, 19) Songon sahalak pangula, mamangke marragam alat laho paradehon tano inganan panuanan ni boni, songon i ma naposo ni Debata mamangke godang alat mambahen roha ni marjuta halak rade manjangkon barita Harajaon. Deba sian alat on ndang dipangke be sahat tu saonari, alai adong dope na tongtong dipangke songon buku dohot majalah. Ndang songon angka cara na taulas di Pasal 7, angka alat na laho taulas di pasal on mangurupi parbarita boi pajumpang jala mangkatai dohot ganup halak.​—Ul. 5:42; 17:2, 3. 

4, 5. Songon dia do rekaman ni jamita dipangke, alai songon dia do alat i hurang denggan tingki mangajar?

⁴ Jamita naung direkam. Taon 1930-an sahat tu taon 1940-an, rekaman ni jamita do diputar angka penyiar tingki marbarita mamangke fonograf. Ndang lobi sian lima minut ganjang ni jamita i. Jotjot do jempek judul ni jamita i. Umpamana, ”Debata Sitolu Sada”, ”Api Parpitapitaan”, ”Harajaon ni Debata”. Songon dia do mamangke rekaman ni jamita on? Donganta si Clayton Woodworth, Jr., na tardidi taon 1930 di Amerika Serikat mandok, ”Huboan ma fonograf na songon koper na gelleng, di bagasan adong alat pemutar piringan, dung i adong muse alat na asing na boi ditanggal manang dilohothon. Tingki laho mamalu fonograf, ingkon hupatongon do ujung ni alat na boi ditanggal dohot dilohothon i tu topi ni piringan i asa tangkas soarana. Laho ma ahu sian jabu tu jabu, hubungka ma koper i, huparade ma fonograf i, jala hutekan ma bel. Molo adong parjabu na mambungka pintu, hudok ma, ’Adong barita na ringkot na laho huputarhon tu hamu.’” Songon dia do alus ni parjabu i? Didok si Woodworth, ”Godang do na olo mambege, alai adong do na pintor manutup pintu. Adong muse do na marpingkir ahu panggadis fonograf.”

⁵ Taon 1940, adong lobi sian 90 rekaman ni jamita na diparade. Jala lobi sian sajuta piringan hitam dipatupa. Si John E. Barr na merintis di Inggris jala na gabe sahalak sian Punguan na Mangaradoti Organisasi mandok, ”Fonograf do na jotjot huboan tingki marbarita sian taon 1936 sahat tu 1945. Ndang tabo pangkilalaanku molo ndang huboan fonograf i tingki marbarita. Songon na di lambungku do si Rutherford molo huputar soarana tingki marbarita, jala on patoguhon rohangku. Alai, hurang denggan dope mamangke fonograf laho mangajar dohot mandodo roha ni halak tingki marbarita.”

6, 7. (a) Aha do laba ni kartu kesaksian, alai aha do hahuranganna? (b) Aha do lapatanna dilehon Jahowa hataNa tu pamanganta?

⁶ Kartu kesaksian. Sian taon 1933, dijujui do angka penyiar mamangke kartu kesaksian marbarita. Ukuran ni kartu kesaksian on 8 hali 13 sentimeter. Isina barita na jempek sian Bibel dohot hatorangan taringot tu angka sijahaon na boi dipangido parjabu. Holan kartu i do na dilehon tu parjabu. Si Lilian Kammerud, na gabe utusan injil di Puerto Rico dohot di Argentina mandok, ”Las do rohangku mamangke kartu kesaksian.” Boasa? Didok ibana muse, ”Ndang sude sian hami malo mangkatai tingki marbarita. Alani i, kartu on mangurupi ahu mura marbarita tu na asing.”

⁷ Donganta si David Reusch na tardidi taon 1918 mandok, ”Kartu kesaksian on mangurupi donganta marbarita, ala godang do na so malo mamungka pangkataion tingki marbarita. Alai sipata, dipingkir halak do hami halak na ngungu. Nang pe godang sian hami na so malo mangkatai, diurupi Jahowa do hami asa gabe parhobas na rade mangkatai tu halak na asing. Ndang leleng dungkon i, dihilala hami ma pangurupion sian Jahowa marhite hataNa na dibahen tu bagasan pamangannami. Diajari do hami mamangke Bibel marhite Singkola Pangkobasion Teokratis na dipungka taon 1940-an.”​—Jaha Jeremia 1:6-9.

 8. Aha do na patuduhon na rade hita diajari Kristus?

⁸ Buku. Sian taon 1914, nunga dipabinsar naposo ni Jahowa lobi sian 100 ragam ni buku na mangulas isi ni Bibel. Deba sian buku on dipangke laho mangajari penyiar asa lam malo marbarita. Si Anna Larsen sian Denmark, naung gabe penyiar lobi sian 70 taon mandok, ”Diurupi Jahowa do hami gabe penyiar na lam malo marhite Singkola Pangkobasion Teokratis dohot angka buku na asing naung diparade hombar tusi. Huingot buku na parjolo, i ma Theocratic Aid to Kingdom Publishers na dipatandahon taon 1945. Dung i, adong buku ”Equipped for Every Good Work”, na dipabinsar taon 1946. Saonari hita mamangke buku Mendapat Manfaat dari Pendidikan Sekolah Pelayanan Teokratis na dipabinsar taon 2001.” Singkola Pangkobasion Teokratis dohot angka buku on mangurupi angka penyiar gabe parhobas na denggan. (2 Kor. 3:5, 6) Nunga dohot hamu tu Singkola Pangkobasion Teokratis? Diboan hamu do buku Sekolah Pelayanan tu parpunguan ganup minggu, jala dibungka hamu do buku i tingki dipaboa na mangaradoti singkola tudutudu sian i? Patuduhon na rade do hita diajari Kristus molo taulahon songon i.​—2 Kor. 9:6; 2 Tim. 2:15.

9, 10. Songon dia do angka buku mangurupi hita manuan dohot maniram barita hasintongan taringot tu Harajaon?

⁹ Diurupi Jahowa do muse hita marhite organisasiNa, diparade do angka buku na mangurupi hita patorangkon isi ni Bibel. Buku Kebenaran yang Membimbing kepada Hidup yang Kekal na dipabinsar taon 1968, parohon laba tu angka penyiar. Dipaboa di Panghobasion Harajaon November 1968, ”Godang na manjalo buku on. Alani i, di bulan September percetakan ni Lembaga di Brooklyn karejo sahat tu borngin.” Dipaboa muse di artikel i, ”Buku Kebenaran na diparade bulan Agustus adong sada satonga juta eksemplar, alai na mangido buku i gumodang do sian buku na diparade!” Taon 1982, lobi sian 100 juta eksemplar buku i dipabinsar di bagasan 116 bahasa. Alani buku i, lobi sian sajuta penyiar na tamba saleleng 14 taon, sian taon 1968 sahat tu 1982.b

¹⁰ Taon 2005, dipatandahon ma muse buku Apa yang Sebenarnya Alkitab Ajarkan? Na dipabinsar hirahira 200 juta eksemplar di bagasan 256 bahasa! Aha do pangkorhonna? Saleleng pitu taon, sian taon 2005 sahat tu taon 2012, adong hirahira 1,2 juta halak na gabe penyiar. Saleleng i muse, tamba ma na marsiajar Bibel sian 6 juta gabe lobi sian 8,7 juta halak. On patuduhon Jahowa do na mangurupi hita manuan dohot maniram barita hasintongan taringot tu Harajaon i.​—Jaha 1 Korint 3:6, 7.

11, 12. Tu ise do angka majalah diparade?

¹¹ Majalah. Mulana, majalah Joujou Paboahon diparade tu ”punguan na metmet”, na mangkirim mangolu di surgo. (Luk 12:32; Heb. 3:1) Tanggal 1 Oktober 1919, dipabinsar organisasi ma muse majalah na asing na dipatupa tu sude halak. Saleleng martaontaon gumodang do majalah on disarhon sian majalah Joujou Paboahon, ala lomo roha ni Parsiajar Bibel dohot halak na asing manjaha majalah on. Parjolo dipabinsar, goar ni majalah on, i ma The Golden Age. Alai taon 1937, diganti ma goar ni majalah on gabe Consolation. Dung i, taon 1946 diganti ma muse goarna gabe Awake! manang Sadarlah!

¹² Saleleng marpulu taon, mubauba do bentuk dohot format ni Joujou Paboahon dohot Sadarlah! Alai na tinujuna ndang hea muba, i ma paboahon Harajaon ni Debata jala paposhon roha ni jolma tu Bibel. Saonari, Joujou Paboahon nunga dipabinsar di edisi siparsiajaran dohot edisi umum. Edisi siparsiajaran diparade tu ”angka naposona”, i ma ”punguan na metmet” dohot ’birubiru na asing’.c (Mat. 24:45; Joh. 10:16) Edisi umum diparade tu na so mananda hasintongan, alai porsea tu Debata dohot tu isi ni Bibel. (Ul. 13:16) Majalah Sadarlah! diparade tu na so mananda Bibel dohot Debata na sintong, i ma Jahowa.​—Ul. 17:22, 23.

13. Songon dia do angka majalahta parohon las ni roha tu hita? (Ulas ma bagian ”Publikasi na Gabe Rekor Dunia”.)

¹³ Di mula ni taon 2014, lobi sian 44 juta eksemplar Sadarlah! jala hirahira 46 juta eksemplar majalah Joujou Paboahon dipabinsar ganup bulan. Sadarlah! dipabinsar lobi sian 100 bahasa, jala Joujou Paboahon dipabinsar lobi sian 200 bahasa. Alani i, majalah na dua on ma na gumodang diterjemahon jala disarhon di liat portibi on! Ndang longang rohanta mangida godang ni majalahta na disarhon, ala angka majalah on marisi barita na sinuru ni Jesus dibaritahon di liat portibi on.​—Mat. 24:14.

14. Aha do na diulahon naposo ni Debata dung muba goar ni badan hukum i?

¹⁴ Bibel. Taon 1896, diuba si Russell dohot angka donganna ma goar ni badan hukum na dipangke pabinsarhon angka buku asa tarida hata Bibel di goar ni badan hukum na baru i. Goarna, Lembaga Alkitab dan Risalah Menara Pengawal (Watch Tower Bible and Tract Society). Tingki pasahathon barita na uli taringot tu Harajaon, nasida jotjot mamangke Bibel. Alani i, hombar do goar na baru i tu ulaon ni nasida. (Luk. 24:27) Marsitutu do naposo ni Debata mansarhon jala manjujui halak manjaha Bibel. Umpamana, taon 1926 nunga dicetak organisasi Angka Buku Junani Kristen sian Bibel The Emphatic Diaglott na diterjemahon si Benjamin Wilson. Sian taon 1942, nunga dicetak jala disarhon hirahira 700.000 eksemplar Bibel King James Version. Dua taon nai muse, dicetak ma Bibel American Standard Version, na manurat goar ni Debata, i ma Jahowa, godangna 6.823 hali. Taon 1950, nunga tasarhon lobi sian 250.000 Bibel.

15, 16. (a) Aha do na mambahen las rohamu tu Bibel Terjemahan Dunia Baru? (b) Songon dia do Hata ni Jahowa boi hona tu rohanta?

¹⁵ Taon 1950, dipatandahon ma Bibel New World Translation of the Christian Greek Scriptures. Dung i, taon 1961 dipatandahon ma muse Bibel New World Translation of the Holy Scriptures naung lengkap. Terjemahan on pasangaphon Jahowa ala disurat do muse goarNa songon na adong di teks aslina. Tarida do muse goar ni Debata 237 hali di teks ni Angka Buku Junani Kristen. Asa lam mura diantusi, terjemahan on nunga hea direvisi jala na parpudi, i ma taon 2013. Sahat tu taon 2013, nunga lobi sian 201 juta eksemplar Terjemahan Dunia Baru na lengkap manang sabagian naung dipabinsar di bagasan 121 bahasa.

¹⁶ Songon dia do pangkilalaan ni na manjaha Terjemahan Dunia Baru di bahasana sandiri? Sahalak baoa sian Nepal mandok, ”Bibel na dipangke hami saleleng on mamangke hata najolo. Alani i, gabe maol antusan. Alai saonari, lam mura ma hami mangantusi Bibel ala diterjemahon mamangke hata siganup ari.” Tingki sahalak borua sian Afrika Tengah manjaha Bibel di bahasa Sango, ro iluna ala ni las ni rohana. Didok ibana ma, ”On ma bahasa na hona tu rohangku.” Hata ni Jahowa boi hona tu rohanta molo tajaha Bibel ganup ari.​—Ps. 1:2; Mat. 22:36, 37.

17. Songon dia do hita patuduhon na taargai alat dohot pangajarion na tajalo, jala aha do laba na tadapot ala mangulahon i?

¹⁷ Diargai hamu do pangajarion dohot alat naung diparade tu hita? Dijaha hamu do lektur na pinarade ni organisasi? Jala, dipangke hamu do i mangurupi na asing? Molo songon i, dos ma pangkilalaanta dohot si Opal Betler naung tardidi tanggal 4 Oktober 1914 na mandok, ”Saleleng martaontaon, ahu dohot tungganedolingku [si Edward] mamangke fonograf dohot kartu kesaksian. Hami marbarita sian jabu tu jabu mamangke buku, buku kecil, dohot majalah. Dohot do hami muse kampanye, jongjong marbaris mambagihon sijahaon. Dung i, diajari do hami laho manjumpangi muse dohot mambahen parsiajaran Bibel di jabu. Nang pe godang ulaonnami, las do rohanami.” Songon na nidok ni Jesus, godang do ulaon ni rayat ni harajaonna, manuan dohot manggotil. Jala nasida rap marlas ni roha tingki mangulahon i. Songon si Opal, marjuta halak mangkilala na nidok ni Jesus i.​—Jaha Johannes 4:35, 36.

18. Aha do hak na sumurung na dilehon tu hita?

¹⁸ Dirimpu godang halak do naposo ni Jahowa halak ”na so sijama surat jala na so marsiajar”. (Ul. 4:13) Alai, rimangi ma! Diurupi Raja i do naposo ni Jahowa gabe sada organisasi na balga na pabinsarhon buku na gumodang tarsar di liat portibi on! Na rumingkot, diajari jala dijujui do hita mamangke alat naung diparade laho pasahathon barita na uli tu sude bangso. Hak na sumurung do di hita rap saulaon dohot Kristus di ulaon marbarita, jala mangurupi halak gabe sisean ni Jesus!