Hamonangan ni Harajaon ni Debata​—Mandapot Hak laho Marbarita na Uli sian Pamarenta

TINGKI marbarita sian jabu tu jabu, dibege hamu ma soara ni sirene. Lam leleng lam jonok ma soara i. Tingki marbarita hamu tu sahalak parjabu, diida donganmu ma mobil ni polisi na so di pudimuna. Disungkun polisi i ma hamu, ”Hamu do na ro marbarita sian jabu tu jabu? Adong na mangaduhon hamu!” Denggan ma dialusi hamu, jala dipatandahon hamu ma dirimu Sitindangi Ni Jahowa. Aha do na masa dungkon i?

Alus ni sungkunsungkun on, hombar do tu sejarah. Songon dia do pamarenta di ingananmu maradophon Sitindangi Ni Jahowa? Dilehon nasida do hak laho maragama? Saleleng marpulu taon, marsitutu do angka donganta ”mampartahanhon dohot pahothon Barita Nauli”. (Plp. 1:7, Bibel siganup ari) Didia pe hita maringanan, lam togu do haporseaonta molo tarimangi songon dia Sitindangi Ni Jahowa pamonangkon parsoalan di Mahkamah Agung. Di bagian on, taulas ma angka parsoalan na diboan tu Mahkamah. Angka hamonangan i patuduhon na tutu do adong Harajaon ni Debata, alana molo mangasahon gogonta ndang tolap hita mangulahon i!