Diorganisasi laho Mangulahon Lomo ni Roha ni ”Debata Sipardame”

1, 2. Aha do na muba di Zion’s Watch Tower Januari 1895, jala songon dia do pandapot ni angka dongan?

LAS situtu do roha ni si John A. Bohnet sahalak Parsiajar Bibel manjalo majalah Zion’s Watch Tower Januari 1895. Bagak idaon sampul ni majalah na baru i, adong gombar ni menara mercusuar di tonga ni laut na marsinondang. Dipaboa do taringot tu sampul on di artikel na marjudul ”Sampul ni Bukunami na Baru” (Our New Dress).

² Alani las ni roha ni si Bohnet, ditongos ma surat tu donganta si Russell. Di suratna i didok, ”Las situtu roha mangida MENARA na marsinondang. Denggan situtu.” Donganta si John H. Brown, sahalak Parsiajar Bibel manurat taringot tu sampul ni majalah i, ”Jago hian. Hot do fondasi ni Menara i tung pe ro galumbang dohot halisungsung.” Sampul on ma hamubaon na parjolo na diida angka donganta tingki i, alai ndang i dope ujungna. Bulan November, adong do sada hamubaon na balga, jala dipatudos do on songon laut na margalumbang.

3, 4. Aha do hasusaan na diulas di Watch Tower 15 November 1895, jala perubahan aha do na mangkorhon tu huria?

³ Artikel di Watch Tower 15 November 1895, mangulas taringot tu hasusaan: Parsoalan na songon halisungsung na masa di huria mambahen humurang hadameon di organisasi ni angka Parsiajar Bibel. Marsoali do angka donganta taringot tu ise na gabe pamimpin di ganup huria. Asa boi diantusi angka donganta molo on mambahen huria ndang marsada, dipatudos ma di artikel i organisasi songon sada kapal. Dipatorang ma, nasida na mamimpin ndang tolap mangurupi organisasi asa rade mangadopi parsoalan, songon kapal na mangadopi halisungsung. Alani i, aha do na ingkon ulahonon ni nasida?

⁴ Dipaboa di artikel i, ingkon tangkas do diboto sahalak kapten naung diparade pelampung di kapal, jala sude parkarejo ni kapal i jaga mangadopi angka abatabat, songon halisungsung. Songon i ma, ingkon tangkas do botoon ni angka na mangaradoti ulaon di organisasi molo sude huria rade mangadopi abatabat na songon halisungsung. Laho mangulahon i, dipaboa artikel i do sada perubahan na mangkorhon tu huria. Disi didok, ”Ganup paguyuban, mamillit angka sintua” laho ”mangaradoti huria”.​—Ul. 20:28.

5. (a) Boasa tudutudu taringot tu sintua gabe mambahen lam denggan huria? (b) Aha do sungkunsungkun na laho taulas?

⁵ Tudutudu na baru taringot tu sintua, sada cara mambahen huria lam denggan. On mangurupi angka donganta martahan mangadopi hasusaan alani Porang Dunia I. Marpulu taon dungkon i, lam tu dengganna ma naposo ni Debata manomba Jahowa alani tudutudu na lam dipapatar. Surirang ni Bibel na dia do na manurathon taringot on? Aha do tudutudu na lam dipature na boi taida di organisasi on? Jala aha do labana di hita?

6, 7. (a) Aha do lapatan ni surirang na disurat di Jesaya 60:17? (b) Aha do na tinuju ni hata ’partogi’ dohot ’pangondian’?

⁶ Di Pasal 9 nunga taulas surirang ni si Jesaya taringot tu cara ni Jahowa mambahen asa lam torop naposoNa. (Jes. 60:22) Marjanji do Jahowa na lam martambatamba do muse nasida. Disurirangkon si Jesaya do muse, ”Singkat [ganti] ni tombaga boanonku ma sere, jala singkat ni bosi boanonku ma perak, jala singkat ni angka hau tombaga, jala singkat ni angka batu bosi, jala bahenonku ma angka partogim gok hadameon jala hatigoran gabe pangondianmu.” (Jes. 60:17) Aha do lapatan ni surirang on? Jala songon dia do on masa saonari?

⁷ Di surirang i, sada bahan diganti tu bahan na asing. Hamubaon na dibahen ndang sian na roa gabe na denggan, alai sian na denggan diganti tu na dumenggan. Mangganti tombaga tu sere patuduhon bahan i dibahen tu na lam denggan, jala songon i ma muse bahan na asing. Marhite gombaran on, Jahowa manurirangkon na lam tu dengganna do angka naposoNa. Ulaon na dia do na dipadenggan hombar tu surirang i? Dipatudu Jahowa do na lam tu dengganna cara ni naposoNa mangaradoti dohot mangorganisasi tingki didok ’partogi’ dohot ’pangondian’.

8. (a) Ise do na mambahen lam tu dengganna huria songon surirang ni si Jesaya? (b) Aha do labana tu hita? (Ida ma kotak ”Marserep ni Roha do Ibana Manjangkon Sipasingot”.)

⁸ Ise do na mambahen tudutudu asa lam denggan organisasi on? Jahowa mandok, ”Boanonku ma sere, . . . boanonku ma perak, . . . jala bahenonku ma angka partogim gok hadameon.” Ndang jolma na mambahen lam tu dengganna huria, alai Jahowa do. Dung gabe Raja Jesus, lam denggan ma huria i dibahen Jahowa marhite Jesus Kristus. Aha do labana di hita? Di ayat i dipaboa angka na dipatupa parohon dame dohot hatigoran. Molo taihuthon tudutudu sian Debata jala olo mambahen hamubaon, mian ma hadameon di hita. Jala holong ni roha tu hatigoran mangonjar rohanta laho manomba Jahowa, ”Debata Sipardame”.​—Plp. 4:9.

9. Aha do ojahan na mangurupi asa maratur jala marsada ni roha huria jala boasa?

⁹ Taringot tu Jahowa, disurat si Paulus do, ”Ai ndang dihalomohon Debata na gaor, dame i do!” (1 Kor. 14:33) Tangkas do dipatudu si Paulus molo alo ni hata gaor, i ma dame ndang hata taratur. Boasa songon i? Pingkirhon ma: Nang pe taratur, ndang sai patuduhon na dame. Umpamana, angka tentara jojor jala taratur mardalan laho tu parporangan, taratur pe nasida ndang na laho parohon dame alai porang. Alani i, sai taingot ma: Molo ndang marojahan tu hadameon sada organisasi na taratur, ndang sadia leleng sursar do organisasi i. Balik ni i, hadameon na sian Debata mambahen organisasi taratur jala hot salelengna. Tahamauliatehon ma ala ditogutogu jala diurupi ”Debata Pardame” do organisasinta on! (Rom 15:33) Hadameon na sian Debata gabe ojahan na mangurupi ganup huria maratur jala marsada ni roha di liat portibi on. On ma na mambahen las rohanta.​—Ps. 29:11.

10. (a) Tudutudu aha do na mambahen lam tu dengganna organisasi tingki sian mulana dipungka organisasi on? (Ida ma kotak ”Lam tu Dengganna ma Ulaon Mangaradoti”.) (b) Aha do sungkunsungkun na laho taulas?

¹⁰ Taboto ma sian kotak ”Lam tu Dengganna ma Ulaon Mangaradoti” taringot tudutudu na lam denggan na mangurupi organisasi taratur sian mulai dipungka organisasi ni Parsiajar Bibel. Alai aha do tudutudu taringot tu ’tombaga na gabe sere’ na diparade Jahowa marhite Rajanta? Songon dia do tudutudu taringot tu na mangaradoti patoguhon dame dohot sada ni roha di huria di liat portibi on? Songon dia do tudutudu i mangurupi hita manomba ”Debata Sipardame”?

11. (a) Aha do pangkorhon ni manulingkit isi ni Bibel tu pangantusion ni organisasi? (b) Songon dia do punguan na mangaradoti organisasi manjangkon tudutudu on?

¹¹ Sian taon 1964 sahat tu 1971, dibahen punguan na mangaradoti organisasi ma sada parsiajaran Bibel laho manulingkiti isi ni Bibel. Umpamana, diparsiajari ma songon dia huria Kristen di abad na parjolo diorganisasi.a Hombar tu tudutudu on, diboto ma molo huria na adong di abad na parjolo diradoti punguan ni angka sintua, ndang holan sahalak sintua. (Jaha Pilippi 1:1; 1 Timoteus 4:14.) Dung lam diantusi, diboto punguan na mangaradoti organisasi ma na diurupi Jesus do nasida mambahen lam denggan aturan di organisasi, jala marsitutu do nasida asa unduk tu tudutudu on. Pintor diulahon nasida ma angka na porlu, asa hombar ulaon ni sintua tu Bibel. Aha do tudutudu na dipadenggan di mula ni taon 1970-an?

12. (a) Aha do tudutudu na dipadenggan hombar tu Punguan na Mangaradoti Organisasi? (b) Patorang ma songon dia do Punguan na Mangaradoti Organisasi diatur. (Ida ma ”Punguan na Mangaradoti Organisasi Mangaradoti Ulaon ni Harajaon”.)

¹² Tudutudu na dipadenggan i hombar tu punguan na mangaradoti organisasi. Di tingki i, adong pitu halak anggota dewan direksi Watch Tower Bible and Tract Society of Pennsylvania, na dohot tu punguan na mangaradoti on. Alai taon 1971, ditambai ma gabe 11 halak anggota, jala nasida ndang digoari dewan direksi. Di punguan i, ndang adong na sumurung dibahen, jala na dipillit gabe ketua diganti ganup taon hombar tu abjad ni goarna.

13. (a) Aha do tudutudu na diihuthon saleleng 40 taon? (b) Aha do na diulahon Punguan na Mangaradoti Organisasi taon 1972?

¹³ Tudutudu na dipadenggan muse hombar tu ganup huria. Sian taon 1932 sahat tu 1972, holan sahalak donganta baoa do na mangaradoti ulaon di huria. Sahat tu taon 1936, digoari do ibana direktur dinas. Di pudian ni ari, diganti ma gabe hamba paguyuban, dung i hamba sidang, jala ujungna gabe pengawas sidang. Marsitutu do angka donganta on mangaradoti huria. Somalna, pengawas sidang ndang porlu mangido pandapot sian donganta na asing di huria laho mamillit siulahononna di huria. Alai, saleleng taon 1972, marsitutu ma Punguan na Mangaradoti Organisasi mambahen tudutudu na imbaru. Aha ma i?

14. (a) Aha do tudutudu na baru ditontuhon mulai sian 1 Oktober 1972? (b) Songon dia do koordinator ni punguan ni angka sintua mangulahon prinsip di Pilippi 2:3?

¹⁴ Ndang holan sahalak donganta baoa be na dipillit gabe pengawas sidang di huria. Saonari, dipillit do angka donganta baoa na marparange hombar tu Bibel gabe sintua di huria. Nasida ma na gabe punguan ni angka sintua na mangaradoti huria. Tudutudu on ditontuhon mulai sian 1 Oktober 1972. Saonari, koordinator ni punguan ni angka sintua ndang mangkilala molo diri ni nasida rumingkot sian sintua na asing, alai dibahen do dirina ”ummetmet” sian na asing. (Luk. 9:48) Pasupasu do on di hita ala marsaor dohot angka dongan na marserep ni roha!​—Plp. 2:3.

15. (a) Aha do labana dung dibahen punguan ni angka sintua di huria? (b) Sian dia do taboto na marbisuk Jesus Rajanta?

¹⁵ Molo marbagi tugas do angka sintua, lam tu dengganna ma huria i. Adong tolu laba molo diihuthon tudutudu on. Na parjolo, nang pe godang tanggung jawab ni sintua, diurupi do nasida mangantusi Jesus do ulu ni huria. (Eps. 5:23) Songon Poda 11:14, ”Hatuaon [manang, ”Marhasil”] do i, molo torop panuturi.” Tingki diulas angka sintua na ringkot tu huria, ditangihon nasida do angka pandapot ni donganna. On mangurupi nasida boi mambahen haputusan hombar tu prinsip ni Bibel. (Poda 27:17) Marhite cara i, dipasupasu Jahowa ma ulaon ni nasida. Na patoluhon, molo lam godang na boi gabe sintua, boi ma digohi organisasi angka na porlu di huria dohot di ulaon penggembalaan. (Jes. 60:3-5) Rimangi ma, martambatamba do huria di liat portibi on. Taon 1971 holan 27.000 do, alai taon 2013 nunga lobi sian 113.000 huria! On patuduhon, na marbisuk do Jesus Rajanta, ala diparade angka sintua di huria di tingki na dihaporluhon.​—Mik. 5:4.

16. (a) Aha do tanggung jawab ni angka sintua? (b) Songon dia do angka Parsiajar Bibel manjangkon poda ni Jesus taringot ’marmahani birubiru’ ni Jesus?

¹⁶ Sian mulai adong Parsiajar Bibel, diantusi angka sintua do molo tanggung jawab nasida, i ma mangurupi dongan sahaporseaon manomba Jahowa. (Jaha Galatia 6:10.) Taon 1908, artikel Watch Tower mangulas poda ni Jesus na mandok, ”Parmahan i ma angka birubirungku.” (Joh. 21:15-17) Artikel i paboahon tu angka sintua, ”Mansai ringkot do asa tapatujolohon poda ni Tuanta taringot tu birubiruna. Sada hasurungan do on di hita ala pos roha ni Tuan tu hita laho manjaga, mangaramoti, jala mangalehon mangan angka siihuthon ibana.” Taon 1925, The Watch Tower paingothon muse ringkot ni mangulahon ulaon ni sahalak parmahan marhite sipaingot tu angka sintua, ”Gareja ni Debata, i ma ampunaNa sandiri, . . .  jala jaloonNa do partanggungjawaban sian nasida na mandapot hak na sumurung mangaradoti huria.”

17. Songon dia do angka sintua diurupi asa gabe parmahan na dihalomohon Debata?

¹⁷ Songon dia do organisasi ni Jahowa mangurupi angka sintua asa lam denggan mamparmahani, na dipatudos songon ’bosi gabe perak’? Marhite angka singkola. Taon 1959, dibahen ma singkola na parjolo sahali tu angka pangaradoti, i ma Singkola Pangkobasion tu Harajaon. Sada parsiajaran di kelas mangulas taringot tu ”Mangalehon Roha”. Dijujui do angka sintua na martanggung jawab mambahen jadwal laho manjumpangi angka penyiar di jabuna be. Di parsiajaran i, dibahen do pertunjukan taringot tu cara laho manjumpangi angka penyiar. Taon 1966, dimulai ma muse Singkola Pangkobasion tu Harajaon na lam denggan. Di singkola i, diulas ma sada judul ”Ringkot ni Ulaon Penggembalaan”. Aha do na rumingkot diulas di sesi on? Nasida na manguluhon ”ingkon patuduhon holong tu angka birubiru ni Debata, alai ndang na laho gabe ndang disarihon keluargana dohot ulaon marbarita”. Tu taon na mangihut, lam godang ma singkola na dipatupa tu angka sintua. Aha do laba ni angka singkola on? Saonari, marribu donganta na malo marhobas gabe sintua di angka huria di liat portibi on.

18. (a) Aha do tanggung jawab na borat na dilehon tu angka sintua? (b) Boasa dihaholongi Jahowa dohot Jesus angka sintua na marsitutu mangulahon ulaon di huria?

¹⁸ Nunga ditontuhon Jahowa marhite Jesus Kristus Rajanta, angka sintua ma na mangulahon ulaon na borat di huria. Ulaon aha i? Manguluhon birubiru ni Debata mangadopi hasusaan saonari on. (Eps. 4:11, 12; 2 Tim. 3:1) Dihaholongi Jahowa dohot Jesus do angka sintua ala marsitutu mangihuthon na nidok ni Bibel, ”Parmahan i hamu ma punguan ni Debata na di hamu, . . . sian las ni roha . . . , sian ringkot ni roha . . . , gabe tiruan ma hamu di angka na pinarmahan!” (1 Ptr. 5:2, 3) Taulas ma dua cara na pinatudu ni angka parmahan na gabe sitiruon tu birubiru, jala na parohon dame dohot las ni roha di huria.

19. Songon dia do pangkilalaanta rap marbarita na uli dohot angka sintua?

¹⁹ Na parjolo, masiurupan do angka sintua dohot angka penyiar di huria. Na manurat buku Lukas mandok taringot tu Jesus, ”Dibolus Ibana ma angka huta dohot lumban marjamita, laho mamaritahon harajaon ni Debata; na sampuludua i do donganna.” (Luk. 8:1) Songon Jesus na rap marbarita na uli dohot angka apostelna, angka sintua pe rap masiurupan do dohot angka penyiar laho marbarita na uli. Diboto nasida do molo ulaon on boi parohon hiras ni roha di huria. Songon dia do pangkilalaan ni penyiar tu sintua na mangulahon i? Si Jeannine, donganta na marumur hirahira 90 taon mandok, ”Rap marbarita na uli dohot sintua mangurupi ahu lam mananda nasida.” Si Steven, sahalak donganta na marumur 30-an mandok, ”Tingki sahalak sintua rap marbarita na uli dohot ahu huboto do na lomo rohana mangurupi ahu. Pangurupion i mambahen ahu marhiras ni roha.”

20, 21. Songon dia do angka sintua maniru parmahan na adong di tudosan ni Jesus? Paboa ma pengalaman. (Ida ma kotak ”Kunjungan Mingguan na Parohon Las ni Roha”.)

²⁰ Na paduahon, dilatik organisasi ni Jahowa do angka sintua laho mamparrohahon na mandao sian huria. (Heb. 12:12) Boasa ingkon urupan ni angka sintua na gale di partondion, jala songon dia do nasida mangulahon i? Tudosan na dibahen Jesus taringot tu parmahan dohot birubiru na mago boi mangurupi hita mamboto alusna. (Jaha Lukas 15:4-7.) Tingki diida parmahan i adong birubiru na mago, marsak jala marsitutu do ibana mangalului birubiru i. Songon dia do angka sintua maniru parmahan i saonari? Songon parmahan i, tongtong do arga jala dihaholongi birubiruna na mago i. Dos songon i ma angka sintua, tongtong do arga jala dihaholongi nasida halak na mandao sian huria. Halak na gale di partondion dipatudos ma tu birubiru na mago. Alai laho do parmahan ”mangalului na so tarida i, paima jumpangsa”, angka sintua pe marsitutu mangalului jala mangurupi nasida na gale di partondion.

²¹ Songon dia do pangkilalaan ni parmahan tingki jumpangna birubiru na mago i? Lambok do ibana mangabing, ”diampehon ma tu abarana”, jala diboan ma muse mulak tu punguan ni birubiru i. Songon i ma, angka sintua mamparrohahon penyiar na gale di partondion, lambok mangurupi nasida asa mulak tu huria. I ma na dihilala si Victor sahalak donganta sian Afrika. Ibana mandok, ”Ualu taon ma lelengna ahu ndang aktif, alai marsitutu do angka sintua mangurupi ahu.” Aha do na mangonjar rohana asa mulak tu huria? Ibana mandok, ”Sada tingki, dijumpangi si John ma ahu, ibana sintua na hea rap Singkola Dinas Perintis dohot ahu. Dipatudu ma fotonami tingki singkola. Gabe huingot ma na hea masa jala masihol ma ahu mangkilala las ni roha songon na hea huhilala ala mangulahon lomo ni roha ni Jahowa.” Ndang sadia leleng dung ro si John, pintor marpungu ma si Victor. Saonari nunga gabe perintis ibana. Tutu ma, marsitutu do angka sintua mangurupi hita asa tongtong marlas ni roha.​—2 Kor. 1:24.b

22. Songon dia do hatigoran dohot hadameon patoguhon huria Kristen? (Ida ma kotak ”Longang Situtu do Rohanami”.)

²² Songon di mula ni pasal on, disurirangkon Jahowa do na sai martambatamba hatigoran dohot dame di angka naposo ni Debata. (Jes. 60:17) Hadameon dohot hatigoran boi mangurupi huria tongtong marsada. Songon dia carana? Taringot tu hatigoran, ”Jahowa Debatanta i, Jahowa Sasadasa do”. (5 Mus. 6:4) Dos do aturan taringot tu hatigoran di sude huria di liat portibi on. Holan sada do aturan ni Debata taringot tu na sintong dohot na sala jala dos do i di ”saluhut huria ni angka na badia”. (1 Kor. 14:33) Alani i, lam martambatamba do penyiar di huria molo diulahon aturan ni Debata. Taringot tu hadameon, na dihalomohon Rajanta ndang holan asa adong dame di huria, alai ingkon gabe ”sibahen dame” ma hita. (Mat. 5:9) Alani i, ingkon ”taeahi ma na tau padamehon”. Molo adong parsoalan tu dongan na asing, masijolojoloanan ma hita mangalului dame. (Rom 14:19) Molo taulahon i, dame jala marsada ni roha ma huria.​—Jes. 60:18.

23. Aha do na dihilala sude naposo ni Debata saonari on?

²³ Bulan November 1895, Watch Tower paboahon tudutudu na baru tu angka sintua. Mangkirim do angka donganta asa boi tudutudu on mangurupi naposo ni Debata ”pintor marsada di haporseaon”. Saleleng martaontaon, tudutudu na pinarade ni Jahowa marhite Jesus mangurupi huria marsada ni roha. (Ps. 99:4) Ujungna, saonari sude naposo ni Debata di liat portibi on marlas ni roha mangihuthon ”sisada tondi . . .  sisada bogas”, jala masiurupan manomba ”Debata Sipardame”.​—2 Kor. 12:18; jaha Sepania 3:9.