Marjea ma Sundut na so Manangihon

Sangap do dibahen Jesus si Johannes Pandidi. Alai songon dia do pangkilalaan ni na asing tu ibana? Jesus mandok, “Tudos do sundut on songon dakdanak na hundul di onan na manjoujou dongan saparmeamanna na mandok, ‘Dipalu hami do suling, alai ndang manortor hamu. Dibahen hami do andung-andung, alai ndang dipatudu hamu na marlungun ni roha hamu.’”​—Mateus 11:16, 17.

Aha do lapatan ni hatana i? Didok Jesus ma muse, “Songon i ma, ro si Johannes ndang mangan jala ndang minum, alai didok halak, ‘Na sinonggopan ni suru-suruan na jahat do ibana.’ Ia ro Anak ni jolma i mangan jala minum, didok halak do, ‘Ida ma, simongkus jala sisobur anggur do ibana, dongan ni sijalo pajak dohot angka pardosa.’” (Mateus 11:18, 19) Halak Nasir do si Johannes, ndang diinum ibana anggur. Alai didok halak do ibana na sinonggopan ni suru-suruan na jahat. (4 Musa 6:2, 3; Lukas 1:15) Asing do molo Jesus, mangan do ibana jala minum songon halak na asing. Alai didok halak do ibana simongkus. Tangkas ma, maol do pasonangkon roha ni angka jolma.

Dipatudos Jesus do “sundut on” manang halak di tingki i tu dakdanak na hundul di onan. Ndang olo nasida manortor tingki marsuling donganna, jala ndang lungun rohana tingki mangandungi donganna. Didok Jesus ma, “Nang pe songon i, tarida do bisuk sian parniulaonna.” (Mateus 11:16, 19) Tangkas ma ‘parniulaon’ ni si Johannes Pandidi dohot Jesus patuduhon, ndang sintong na nidok ni angka jolma i.

Dung dipatorang Jesus taringot tu sundut i, dipinsang ibana ma angka kota inganan ni ibana hea mangulahon mukjizat manang tanda halongangan. Dipinsang ma kota Korasin, Betsaida, dohot Kapernaum. Didok Jesus ma, autsugari dibahen ibana tanda halongangan i di Sidon dohot di Tirus, i ma kota na di Penisia, nunga muba angka jolma na disi. Songon i ma nang kota Kapernaum. Nang pe hea Jesus tinggal disi, alai ndang godang halak na manjalo barita na uli. Alani i, taringot tu kota i didok Jesus ma, “Umborat do panguhuman tu hamu sian tu Sodom di Ari Paruhuman.”​—Mateus 11:24.

Dung i, dipuji Jesus ma Amana ala ditabunihon Ibana do hasintongan i “sian angka na bisuk dohot na pistar”. Alai dipapatar Ibana do i tu angka na “serep marroha na songon dakdanak”. (Mateus 11:25) Didok Jesus ma, “Ro ma hamu tu ahu, hamu angka na loja jala na mamboan boban na borat, asa hupargogoi hamu. Tuhuk ma augangku jala marsiajar ma hamu sian ahu. Ai na lambok jala na serep roha do ahu, asa dapotmuna hasonangan. Ai lambok do augangku jala neang do bobanku.”​—Mateus 11:28-30.

Songon dia do Jesus pasonangkon nasida? Ndang diajarhon Jesus adat tu nasida. Diajarhon Jesus do hasintongan taringot tu Debata. Jala diapuli ibana do roha ni angka halak na marsitaonon alani pamarenta dohot na susa alani dosa. Dipaboa do tu nasida, songon dia asa disesa dosa ni nasida jala asa boi mardame dohot Debata. Alai, dibahen pamimpin ni agama do adat na mambahen angka jolma maol mangulahon Patik ni Debata. Umpamana songon aturan taringot tu ari Sabbat.

Halak na rade manjalo auga ni Jesus, dilehon do diri ni nasida laho marhobas tu Debata, Ama parasi roha i. Ndang borat ulahonon ni nasida i, ai ndang maol mangulahon angka parenta ni Debata.​—1 Johannes 5:3.