“Nungnga Hupillit be Ho Gabe Panjaga”

 1. Ceritahon ma aha na diulahon panjaga na dipillit i jala aha na masa dukkon i.

JONGJONG ma sahalak panjaga di atas tembok Jerusalem. Huhut dilinggomi ibana matana sian cahaya ni mataniari, diida ibana ma tu na dao. Pittor dibuat ibana ma tarompetna, ditarik ma bagas hosana, diombusson ibana ma tarompetna i paboahon na ro bahaya. Ai nungnga ro tentara ni Babel. Alai dang boi be malua akka halak na di kota i. Ai dang diparrohahon nasida sipasingot na dilehon panjaga i. Saleleng marpulu taon, dipillit Jahowa do akka panjaga manang akka panurirang lao paingotton. Alai dang parduli jala dang porsea nasida tu akka panurirang i. Disomba nasida do patung. Saonari, nungnga dikepung be nasida. Holan piga-piga bulan, nungnga dihancurhon tentara ni Babel tembok ni Jerusalem dohot bagas joro. Dipamate jala ditakkup nasida do pendudukna.

2, 3. (a) Situasi na songon dia do lao masa tu penduduk ni tano on, jala aha do na ikkon diulahon nasida saonari? (b) Aha do sukkun-sukkun na lao tabahas?

² Di tikkinta on, pasukan tentara ni Jahowa na di surgo nungnga maju be lao marporang mangalo akka halak na so porsea na di tano on. (Pgk. 17:12-14) Lao masa ma porang i di ujung ni hasusaan bolon, na so hea masa dope tu jolma. (Mat. 24:21) Alai saonari adong dope tikki dilehon tu akka halak lao mangulahon sipasingot sian panjaga na dipillit Jahowa.

³ Boasa pola dipillit Jahowa akka panjaga? Barita aha do na dipaboa nasida? Akka ise do panjaga i jala aha do na ikkon taulahon? Tabahas ma alus ni sukkun-sukkun on.

 4. Boasa dipillit Jahowa akka panjaga? (Ida gambar di mula ni parsiajaran.)

⁴ Jaha Hesekiel 33:7. Najolo, jongjong do akka panjaga di atas ni tembok lao manjaga penduduk ni kota. Dipillit akka pamimpin ni kota do akka panjaga lao patuduhon na parduli nasida tu rakyat i. Nang pe soara ni tarompet i boi mambahen nengel pinggol jala mambahen tarsonggot halak na modom, alai soara ni tarompet on do na mambahen selamat akka halak. Dos songon i ma nang tujuan ni Jahowa mamillit akka panjaga. Dang na lao mambahen asa gaor halak Israel umbahen na dipaboa nasida barita panguhuman i. Alai na parduli do Ibana tu naposona, asa selamat nasida.

5, 6. Aha do na patuduhon adil Jahowa?

⁵ Tikki dipillit Jahowa si Hesekiel gabe panjaga, sasittongna Jahowa patuduhon parange na mambahen dame rohatta. Tabahas ma dua sian parangena i.

⁶ Adil: Tarida do na adil Jahowa, ala dang dibeda-bedahon Ibana hita. Umpamana, nang pe godang halak dang manangihon barita ni si Hesekiel, dang dianggap Jahowa sude halak Israel pangalo. Dilehon Jahowa do kesempatan tu nasida lao manangihon sipasingotna. Lomo do rohana naeng mangida keputusan ni sasahalak. Alani i ma sai mulak-hulak dipasingot Ibana “halak na jahat” dohot “halak na sittong”. Jadi, Jahowa mangalehon hukuman i, tergantung tu cara ni setiap halak manangihon sipasingotna do.​—Hes. 33:8, 18-20.

 7. Songon dia do cara ni Jahowa manguhumi sasahalak?

⁷ Tarida do muse na adil Jahowa sian carana manguhumi. Dang diuhumi Ibana akka halak alani hasalaan ni nasida di tikki naung salpu. Alai Ibana manguhumi tergantung tu cara ni sasahalak manangihon sipasingotna. Didok Jahowa do tu si Hesekiel, “Molo hudok tu halak na jahat, ‘Pasti mate do ho.’ Alai gabe ditinggalhon ibana dosana i jala diulahon ibana na tigor dohot na sittong . . . Dang na lao mate ibana.” Didok Jahowa do muse, “Dang diingot be nanggo sada pe akka dosa na diulahon ibana najolo i.” (Hes. 33:14-16) Asing ni i, molo diulahon sasahalak na sittong dang boi dibahen ibana i gabe sidalian lao mangalo. Ai taringot halak na mangulahon na sittong, didok Jahowa do molo “gabe diasakkon ibana ulaonna na sittong i jala gabe diulahon ibana na sala, dang diingot be akka ulaonna na sittong i. Ikkon mate do ibana alani ulaon na sala naung diulahonna i”.​—Hes. 33:13.

 8. Songon dia do Jahowa patuduhon na adil Ibana?

⁸ Adong dope muse na patuduhon adil Jahowa. Torus do dilehon Ibana sipasingot leleng andorang so dibahen Ibana na masa tu sada luat. Hira-hira onom taon andorang so ro tentara ni Babel manghancurhon Jerusalem, nungnga dipaboa si Hesekiel hian aha na lao masa. Alai dang si Hesekiel panurirang na parjolo paingotton nasida. Hira-hira 200 taon andorang so dihancurhon Jerusalem, nungnga disuru Jahowa Panurirang Hosea, Jesaya, Mika, Oded, dohot Panurirang Jeremia martugas songon panjaga tu nasida. Disuru Jahowa do si Jeremia paingotton halak Israel, didok do, “Hupillit do akka panjaga lao mandok, ‘Parrohahon ma soara ni tarompet na sian tanduk!’” (Jer. 6:17) Jadi dang boi disalahon halak be Jahowa manang akka panjaga i, molo adong halak na mate tikki dihukum Ibana nasida marhite tentara ni Babel.

 9. Aha do na patuduhon na toktong holong roha ni Jahowa tu naposona?

⁹ Holong: Takkas do tarida na toktong holong roha ni Jahowa sian carana paingotton akka halak. Disuru do akka panjaga paingotton halak na sittong alai dang holan i, dohot do halak na jahat. Hape nungnga dibahen nasida haccit rohana, jala dibahen marlea goarna. Diboto godang halak do molo Israel i bangso ni Jahowa. Alai mulak-hulak do nasida maninggalhon Ibana, jala diihutton nasida do akka debata na so sittong. Dipatudos Jahowa ma haccit ni rohana i songon pakkilalaan ni sahalak suami na mangalakkup istrina. (Hes. 16:32) Nang pe songon i, dang marnaloja Jahowa manganju nasida. Lomo do rohana asa mulak muse nasida tu Ibana. Dang hea pittor naeng diuhum Ibana nasida. Molo dipakaluar pe podang lao manghukum nasida, na so adong be cara na asing lao manganju nasida. Ai didok Ibana do tu si Hesekiel, “Dang lomo rohakku molo mate parjahat i, unlomo do rohakku molo muba ibana sian pangalahona na jahat i jala toktong mangolu.” (Hes. 33:11) Songon i ma akkilalaan ni Jahowa sahat tu saonari.​—Mal. 3:6.

10, 11. Aha do parsiajaran na boi tadapot sian na dibahen Jahowa tu naposona?

¹⁰ Aha do parsiajaran na boi tadapot sian cara ni Debata na adil dohot sian holong ni rohana tu halak Israel? Na parjolo, unang ma taanggap na sarupa sude roha ni halak na tajuppangi tikki marbarita. Asing be do roha ni ganup halak. Unang ma tadok na so cocok sasahalak manangihon barita na uli, alani pangalahona najolo, manang alani adat, marga, bahasa, ala mora, manang ala pogos. Hata ni Jahowa tu Apostel Petrus marlakku dope sahat tu saonari. Didok do, “[Dang] marimbar jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.”​—Ul. 10:34, 35.

¹¹ Parsiajaran na paduahon, hita sandiri pe porlu do manat. Porlu do taboto, hita pe boi do mura mangulahon dosa, dos songon halak na tajuppangi tikki marbarita. Taihutton ma hata ni Apostel Paulus tu huria Korint. Didok do, “Manang ise na mandok tu dirina sandiri, ‘Hot do au jongjong,’ manat ma ibana asa unang madabu. Sude sitaonon na masa tu hamu, sitaonon na somal masa do i tu akka jolma.” (1 Kor. 10:12, 13) Asing ni i, pangalahotta “na sittong” dang boi gabe sidalianta lao mangulahon na sala. Unang ma ro tu pikkiratta, ala hea taulahon na denggan gabe bebas hita mangulahon na sala. (Hes. 33:13) Jadi dang soal sadia leleng hita manomba Jahowa, ikkon torus do serep rohatta mangoloi hatana.

12. Molo hea taulahon dosa na balga, aha do na porlu taingot?

¹² Songon dia do molo sai tasalahon diritta ala hea taulahon dosa na balga? Sian bukku Hesekiel hita boi marsiajar, halak na mangulahon dosa jala na so olo muba do na dihukum Jahowa. Debata parholong do Ibana, dang lomo rohana mangingot-ingot hasalaanta. (1 Joh. 4:8) Molo nungnga tapatudu sian pangalahotta naung muba hita, unang ma hea ro tu pikkiratta na so olo Jahowa manesa dosatta. (Jak. 5:14, 15) Disesa Jahowa do dosa ni halak Israel na so setia, jadi Ibana pe pasti olo do manesa dosatta.​—Ps. 86:5.

13, 14.(a) Barita aha do na ikkon dipasahat sahalak panjaga? (b) Barita aha do na dipasahat si Jesaya?

¹³ Jaha Hesekiel 33:2, 3. Barita na songon dia do na ikkon dipasahat akka panjaga na dipillit Jahowa? Nang pe barita sipasingot i tugas na massai penting tu nasida, alai dibaritahon nasida do muse barita na denggan. Taparrohahon ma piga-piga contoh.

¹⁴ Manurirangi do si Jesaya mulai sian hira-hira taon 778 SM sahat tu 732 SM. Dipaingot ibana do na lao ro tentara ni Babel manaluhon Jerusalem jala manakkup pendudukna. (Jes. 39:5-7) Jala disuru Debata do ibana manurat on, “Tangihon hamu ma! Nungnga dipagogo panjagamuna be soarana. Rap marsurak ma nasida, ai idaon ni nasida nama takkas papunguon ni Jahowa muse Sion.” (Jes. 52:8) Jadi barita na massai denggan do dipaboa si Jesaya. Dipaboa do na lao dipadenggan muse ibadat na sittong i!

15. Barita aha do na dipasahat si Jeremia?

¹⁵ Manurirangi do si Jeremia mulai sian taon 647 SM sahat tu 580 SM. Ditanda halak do ibana siboan barita taringot jea. Pasti na marsitutu do si Jeremia paingotton halak Israel taringot jea na lao dibahen Jahowa tu nasida.a Alai, adong do barita na denggan dipaboa ibana. Dipaboa do na lao diboan Debata mulak naposona tu huta ni nasida, jala na lao dipadenggan ibadat na sittong disi.​—Jer. 29:10-14; 33:10, 11.

16. Aha do guna ni barita ni si Hesekiel tu halak Jahudi na ditawan?

¹⁶ Taon 613 SM dipillit ma si Hesekiel gabe panjaga. Diulahon ma tugasna i sahat tu taon 591 SM. Songon na tabahas di Pasal 5 dohot 6, marsitutu do si Hesekiel paboahon barita panguhuman tu halak Israel. Alani i, dang martanggung jawab ibana tu akka halak na mate na hona hukum i. Dipaboa ibana do tu halak Jahudi na ditawan i na lao dihukum penduduk ni Jerusalem na murtad. Alai dang holan i dipaboa, diurupi do nasida asa marale-ale tu Jahowa. On mangurupi nasida rade mangulahon tugas di ari na naeng ro. Ai dung salpu 70 taon nasida ditawan, na lao boanon ni Jahowa do halak Israel mulak tu huta ni nasida. (Hes. 36:7-11) Godangan sian nasida, i ma akka pinoppar ni halak na manangihon barita ni si Hesekiel. Songon na tabahas di Bagian 3, adong do barita na denggan dipaboa si Hesekiel tu nasida, na lao dipadenggan do ibadat na sittong di Jerusalem.

17. Andigan do Jahowa manuru akka panjaga?

¹⁷ Jadi disuru Jahowa do akka panurirangna manang akka panjaga, lao paingotton naposona sebelum dihancurhon Jerusalem taon 607 SM. Alai holan akka panjaga i do na disuru Jahowa? Daong. Setiap adong peristiwa na penting lao pasautton lomo ni roha ni Jahowa, sai disuru Ibana do akka panjagana. Disuru do nasida mangalehon sipasingot dohot barita na denggan tu akka halak.

18. Aha do tugas ni si Johannes Pandidi?

¹⁸ Di abad na parjolo, disuru Debata do si Johannes Pandidi mangulahon tugas ni sahalak panjaga. Dipaingot ibana do halak Israel molo satokkin nai dang na lao dijalo Jahowa be nasida. (Mat. 3:1, 2, 9-11) Alai adong dope tugas na asing. Jesus mandok si Johannes i sahalak ‘utusan’ na paradehon dalan tu Messias. (Mal. 3:1; Mat. 11:7-10) On patuduhon, dibaritahon si Johannes do barita na denggan tu nasida. Dibaritahon do naung ro “Anak ni Biru-Biru ni Debata”, i ma Jesus lao “manesa dosa ni portibi on”.​—Joh. 1:29, 30.

19, 20. Songon dia do Jesus dohot akka siseanna mangulahon tugas ni sahalak panjaga?

¹⁹ Alai Jesus ma panjaga na uppetting sian sude panjaga na dipillit i. Songon si Hesekiel, tu “halak Israel” do ibana disuru Jahowa. (Hes. 3:17; Mat. 15:24) Dipasingot Jesus do halak Israel i, molo satokkin nai dang jaloon ni Jahowa be nasida, jala na lao dihancurhon nama Jerusalem. (Mat. 23:37, 38; 24:1, 2; Luk. 21:20-24) Alai tugas ni ibana na uppetting, i ma paboahon barita na uli.​—Luk. 4:17-21.

²⁰ Tikki di tano on Jesus, takkas do didokkon ibana tu akka siseanna, “Sai jaga ma hamu.” (Mat. 24:42) Dioloi nasida do parettana i, jala gabe songon panjaga ma nasida. Dipaboa nasida ma tu halak Israel na so dijalo Jahowa be nasida gabe naposona, dohot Jerusalem na adong di tano on. (Rom 9:6-8; Gal. 4:25, 26) Dos songon panjaga na asing, dipaboa do barita na denggan. Dipaboa nasida do tu halak Israel naung boi sian bangso na asing gabe bagian sian Israel ni Debata. Jala dilehon do tu nasida hasangapon lao mangurupi Kristus padenggatton ibadat na sittong di tano on.​—Ul. 15:14; Gal. 6:15, 16; Pgk. 5:9, 10.

21. Songon dia do si Paulus mangulahon tugasna?

²¹ Si Paulus pe massai denggan do mandalatton tugasna gabe panjaga di abad na parjolo. Dos songon si Hesekiel, diboto si Paulus do molo dang diulahon ibana denggan tugasna i, ikkon martanggung jawab do ibana tu parmate ni akka halak. (Ul. 20:26, 27) Dang holan sipasingot na dipaboa si Paulus, alai dipaboa ibana do barita na denggan. (Ul. 15:35; Rom 1:1-4) Marhite tondi parbadia, dikutip ibana do surirang ni si Jesaya, “Las situtu do roha mangida halak na mardalan mamboan barita na uli!” Si Paulus mandok saut ma surirang ni si Jesaya i tikki dibaritahon akka siihutton Kristus Harajaon ni Debata.​—Jes. 52:7, 8; Rom 10:13-15.

22. Aha do na masa dung mate sude apostel?

²² Dos songon naung disurirangkon, dung mate sude apostel, rarat ma ajaran ni halak na murtad tu sude huria Kristen. (Ul. 20:29, 30; 2 Tes. 2:3-8) Gabe unggodang ma halak Kristen na so sittong sian halak Kristen na sittong. Dos ma nasida songon eme di tonga-tonga ni simareme-eme. Leleng do barita taringot Harajaon ni Debata songon na so tarida alani ajaran na so sittong. (Mat. 13:36-43) Alai adil do Jahowa, jala holong do rohana tu naposona. Alani i, tikki naeng juppang tikkina diurupi Ibana akka naposona, dipillit ma muse akka panjaga. Disuru ma nasida paboahon sipasingot na takkas dohot barita na uli. Akka ise ma panjaga na dipillit i?

23. Aha do tugas ni si C. T. Russell dohot akka donganna?

²³ Andorang so taon 1914, si Charles Taze Russell dohot akka donganna ma na gabe ‘utusan’ lao paiasson dalan andorang so jongjong Harajaon ni Messias.b (Mal. 3:1) Nasida do muse dipillit lao mangulahon tugas ni panjaga. Dilehon nasida do sipasingot dohot barita na uli marhite majalah “Joujou Paboahon Zion dohot Pengumuman Taringot Haroro ni Kristus” (Zion’s Watch Tower and Herald of Christ’s Presence). Dipasingot ma halak taringot panguhuman ni Debata, dohot barita na uli taringot Harajaonna.

24. (a) Songon dia do naposo haposan i mandalatton tugasna songon panjaga? (b) Aha do parsiajaran na boi dapot hamu sian akka panjaga najolo? (Ida kotak “Akka Panjaga Sitiruon”.)

²⁴ Dung jongjong Harajaon ni Debata, dipillit Jesus ma piga-piga halak lao gabe naposo haposan. (Mat. 24:45-47) Mulai sian i, naposo haposan ma na mangulahon tugas ni panjaga. Saonari digoari ma nasida Punguan Na Mangaradoti Organisasi. Dipaboa nasida do sipasingot taringot ‘ari ni Debata lao mambalos akka musuna’. Alai dang holan i, dipaboa do barita taringot “taon na dihalomohon Jahowa”.​—Jes. 61:2; ida muse 2 Korint 6:1, 2.

25, 26. (a) Aha do tugas na ikkon diulahon siihutton Kristus, jala songon dia do nasida mangulahon i? (b) Aha do na lao tabahas di pasal na mangihut?

²⁵ Naposo haposan do na martanggung jawab mangulahon tugas ni panjaga. Alai disuru Jesus do asa sude siihutton ibana “sai dungo”. (Mrk. 13:33-37) Taulahon ma paretta i marhite toktong marale-ale tu Debata, jala mangurupi ulaon ni panjaga na adong saonari on. Martanggung jawab ma hita mangulahon tugasta, i ma marbarita na uli. (2 Tim. 4:2) Taronjar do rohatta lao mangulahon i, ala lomo do rohatta sude halak selamat. (1 Tim. 4:16) Taboto do satokkin nai godang halak lao dipamate ala dang mangulahon sipasingot sian panjaga na adong di tikkinta on. (Hes. 3:19) Alai alasanta na uppetting mangulahon i, ala naeng tabaritahon do barita na dumenggan i ma barita taringot naung dipadenggan ibadat na sittong. Saonari ma “taon na dihalomohon Jahowa” i. Saleleng dang marujung dope tikkina, godang dope halak na boi dohot manomba Jahowa, Debata na adil jala parholong i. Satokkin nai, sude halak na malua sian Armagedon mandapot pasu-pasu di pamarettaon ni Kristus Jesus Anakna i. Pasti lomo do rohatta mangulahon sian nasa tolapta mangurupi akka panjaga di tikkinta on, lao paboahon barita na uli i!​—Mat. 24:14.

²⁶ Alai di ujung ni ari parpudi on, nungnga dibahen Jahowa marsada sude naposona. Tottu sada mukjizat do on! Di pasal na mangihut tabahas ma sada surirang taringot dua tukkot. Surirang i ma na patuduhon songon dia naposo ni Debata boi marsada.