Songon dia do Solhot ni Paralealeon Muna tu Jahowa?

 1. Boasa porlu tajaga paralealean na togu tu Jahowa?

MOLO nunga tardidi hamu gabe sahalak Sitindangi Ni Jahowa, dapotan arta na umarga ma hamu, i ma maraleale tu Jahowa. Alai paralealeanta on boi do sega manang lam dao alani portibi na nirajaan ni Sibolis dohot alani na so tipak be hita. Alani i ma, porlu sai tajaga paralealeanta na togu tu Jahowa.

 2. (a) Aha do paralealeon i? (b) Boha do bahenonta asa lam togu paralealeonta tu Jahowa?

² Tangkas do ditanda Hamu Jahowa? Boi do songon aleale Ibana di Hamu? Lomo do rohamu molo paralealeonmu tu Ibana lam togu? Jakobus 4:8 mandok aha do sibahenon ”Pajonok hamu ma tu Debata, dung i pajonohonna ma tu hamu.” Paralealeon tu Jahowa, i ma paralealeonta sandiri tu Ibana.a Molo tapajonok do tu Jahowa, Ibana pe pajonohonNa ma tu hita. Molo taulahon songon i, lam tangkas ma Ibana tu hita, paralealeonta pe lam jonok ma. Boi tahilala songon na nidok ni Jesus ”Alai anggo Ahu hutanda do Ibana.” (Johannes 7:28, 29) Alai aha do na boi tabahen asa lam jonok tu Jahowa?

 3. Songon dia do hita boi manghatai tu Jahowa?

³ Molo naeng jonok tu Jahowa, ringkot taratur martangiang tu Ibana. Alai boi do tutu songon i? Pingkirhon ma, songon dia do manghatai tu sada dongan na tading di inganan na dao. Boi do hamu marsitongosan surat manang martelepon. Songon na manghatai do hamu tu Jahowa tingki jotjot hamu martangiang tu Ibana. (Jaha Psalmen 142:3.) Alai songon dia do paloashon Jahowa manghatai tu hita? On boi taulahon molo ringgas hita manjaha jala mangarimangi hataNa, i ma Bibel. (Jaha Jesaya 30:20, 21.) Taida ma songon dia tangiangta tu Jahowa boi patoguhon paralealeonta tu Ibana jala mambahen patar Ibana di hita.

4, 5. Songon dia do Jahowa manghatai tu hita tingki taparsiajari Bibel? Bahen tudosan.

⁴ Taboto do molo Bibel i tona ni Jahowa tu ganup marsadasada. Alai boi do Bibel mangurupi hamu manjonok tu Jahowa? Boi! Molo ringgas manjaha dohot marsiajar Bibel, parateaatehon ma songon dia panghilalaanmu tu na jinahamu i. Jala pinghirhon ma songon dia do boi mangulahon on tingki marsiajar. Tingki taulahon on, na paloashon Jahowa do manghatai tu hita. Gabe alealenta ma Ibana na olo mangurupi hita, hita pe boi ma lam jonok tu Ibana.​—Heber 4:12; Jakobus 1:23-25.

⁵ Umpamana, boha do panghilalaanmu tingki manjaha hata ni Jesus: ”Unang ma papungupungu hamu arta di hamu di tano on” molo taulahon na dumenggan manjumolohon Jahowa di ngolunta tahilala ma songon dia panjanghonNa tu hita. Alai molo tajaha hata ni Jesus taantusi ma na ingkon taorui ulaonta asa boi talehon tingkinta gumodangan tu Debata. Molo songon i do, urupan ni Jahowa ma hita laho mangantusi aha do sibahenonta asa jonok tu Ibana.​—Mateus 6:19, 20.

6, 7. (a) Tingki taparsiajari Bibel, gabe boha do holongta tu Jahowa dohot holong ni Ibana tu hita? (b) Aha do tujuanta tingki taparsiajari Bibel?

⁶ Tutu do molo taparsiajari Bibel, taboto ma songon dia hita boi mambahen hamubaon asa lam denggan mangoloi Jahowa. Ndang holan i, hita pe marsiajar taringot holong sian angka na diulahon Ibana dohot parangeNa na denggan, holong ma rohanta tu Ibana. Lam tamba ma holongta songon i holong ni rohaNa tu hita, jala paralealeonta tu Ibana gabe lam togu.​—Jaha 1 Korint 8:3.

⁷ Molo olo hita jonok tu Jahowa, porlu hita marsiajar Bibel sian roha. Jesus mandok ”Alai na mananda Ho Debata na sasada i, na sintong i, dohot Jesus Kristus na sinurum, i do hangolan na salelenglelengna.” (Johannes 17:3) Boi taparsiajari godang angka na imbaru dohot angka na mambahen las roha tingki manjaha Bibel, alai na gabe tujuanta sasintongna asa lam tangkas mananda hadirion ni Jahowa.​—Jaha 2 Musa 33:13; Psalmen 25:4.

 8. (a) Aha do na mambahen hita sungkunsungkun, boasa Jahowa manguhum raja Azaria? (b) Molo tatanda Jahowa, songon dia do panghilalanta tu na diulahonNa?

⁸ Molo dung tatanda Jahowa songon sada aleale, ndang ganggu be rohanta tingki ndang sai dipatorang Bibel boasa Ibana mambahen sadasada ulaon. Umpamana, di tingki si Azaria raja ni Juda, torop halak manomba debata sileban. Ndang diihuthon si Azaria nasida. ”diulahon ibana ma lomo ni roha ni Jahowa.” (2 Raja 15:1-5) Alai diuhum Jahowa si Azaria gabe puruon ibana. Boasa? Ndang dipaboa di ayat on tu hita. Jadi songon dia do rohamu tu na binahen ni Jahowa i? Gabe ganggu do rohamu jala mandok ndang tigor Jahowa, diuhum si Azaria so adong alana? Daong. Molo tangkas do tatanda Jahowa, taboto do molo na sintong do uhumNa. Angka pinsangpinsangNa ”hombar tu uhum”. (Jeremia 30:11) Dibahen i, nang pe ndang taboto boasa diuhum Jahowa si Azaria, pos do rohanta sintong do parulaon ni Jahowa.

 9. Hatorangan na dia do na boi mangurupi hita mangantusi boasa diuhum Jahowa si Azaria gabe puruon?

⁹ Dipajojor Bibel do muse taringot parngoluon ni raja Azaria, manang na digoari raja Usia (2 Raja 15:7, 32) Hatorangan di 2 Kronika 26:3-5, 16-21 mandok ”diulahon ibana ma lomo ni roha ni Jahowa.” Alai dipaboa muse ”dipaginjang ma rohana mambahen hamagoanna.” Diulahon ibana sada ulaon na sasintongna i holan ulaon ni malim. Ualupulu malim paboahon jala mangorai ibana asa unang mangulahon i. Boha do alusna? Gabe ginjang do rohana jala tarrimas tu nasida! Hatorangan on mangurupi hita mangantusi boasa diuhum Jahowa raja i gabe puruon.

10. Boasa ndang pola sungkunsungkun be hita tu saluhut ulaonNa? Boha do asa boi porsea hita molo Jahowa sai mangulahon na sintong?

¹⁰ Aha ma na ringkot na boi taparsiajari sian on? Taringot Raja Azaria on, godang tadapot hatorangan na boi mangurupi hita mangantusi boasa diuhum Jahowa ibana. Alai molo so adong dipaboa Bibel hatorangan on, songon dia do panghilalaanta? Sungkunsungkun do rohanta na so sintong do parulaon ni Jahowa? manang alana godang do hatorangan dilehon Bibel umbahen na porsea hita na sintong do parulaon ni Jahowa? (5 Musa 32:4) Molo lam tatanda hadirion ni Jahowa, lam tahaholongi jala lam pos ma rohanta tu Ibana. Jala ndang sungkunsungkun be hita tu saluhut ulaonNa. Tingki taparsiajari Bibel, lam patar ma Jahowa di hita jala lam Jonok ma hita tu Ibana.​—Psalmen 77:13, 14.

11-13. Sian dia do taboto molo Jahowa manangihon tangiang? (Ida ma gombar di mula ni parsiajaran.)

¹¹ Tingki martangiang, hita manjonok tu Jahowa. Tapuji Ibana, tadok mauliate, jala tapangido pangurupion. (Psalmen 32:8) Alai molo naeng solhot paralealeonta tu Jahowa, ingkon porsea do hita tangihononNa tangiangta.

¹² Deba halak mandok ndang ditangihon Debata tangiang jala ninna tangiang i holan pamalum roha sambing. Nasida porsea otik do panghorhon ni tangiang, mangurupi asa manat mamingkiri alai ingkon hita sandiri do mangalului dalan asa malua sian sitaononta. Tutu, tangiang boi mangurupi hamu mambahen songon i. Alai tingki manghatai tu Jahowa marhite tangiang, tangihononNa do hamu. Boasa boi tahaporseai on?

¹³ Parrohahon ma on: Tagan so ro Jesus tu tano on, diida ibana do na dialusi Jahowa tangiang ni angka na mangoloi Ibana. Dung di tano on, Jesus martangiang tu Amana na di surgo i, taringot panghilalaan dohot pingkiranna. Di sada tingki, hea do ibana martangiang saborngin manipat. (Lukas 6:12; 22:40-46) Ulahonon ni Jesus do songon i molo diboto ndang tangihonon ni Jahowa ibana? Diajari Jesus do siseanna songon dia laho martangiang tu Jahowa. Dohononna do songon i, molo diboto ibana ndang tangihonon ni Jahowa tangiang? Tangkas ma diboto Jesus molo Jahowa manangihon tangiang. Ibana hea mandok: ”Ale Amang, mauliate ma hudok tu Ho, ala ditangihon Ho Ahu. Huboto do nian, na tongtong do ditangihon Ho Ahu.” Hita pe boi do porsea molo Jahowa manangihon tangiangta.​—Johannes 11:41, 42; Psalmen 65:3.

14, 15. (a) Aha do labana molo tapangido na ringkot di hita tingki martangiang? (b) Songon dia do tangiang si Kristina mangurupi ibana jonok tu Jahowa?

¹⁴ Alus ni tangiangmu sipata ndang pintor tarida. Alai molo tapangido angka na ringkot ditangiangta, boi ma lam tangkas alus ni Jahowa taida, jala lam tangkas ma Jahowa di hita. Molo tapaloas Jahowa mamboto saluhut holso ni rohanta, pajonohonNa do tu hamu.

¹⁵ Songon tudosan, jotjot do si Kristina lao marbarita na uli, alai hurang do las ni rohana.b Didok ibana: ”Ndang lomo rohangku marbarita na uli. Maksudhu, ndang pola haru lomo rohangku.” Tingki mangido so ibana sian parkarejoanna, sahalak sintua manjujui ibana asa gabe parintis sipitulu jom. Didok ibana: ”Dilehon sintua i ma formulir tu ahu. Huoloi ma gabe parintis, alai huhut ma martangiang ganup ari asa lomo rohangku marbarita na uli.” Dialusi Jahowa do tangiangna? Dung tolu taon ibana marintis, saonari didok ibana ma: ”Laba na hudapot ala godang tingki hupangke marbarita jala marsiajar sian angka dongan, lam leleng lam malo ma ahu marbarita. Saonari, ndang holan lomo sambing rohangku marbarita, alai i​—mansai huhalomohon. Aha dope muse, paralealeonku mansai solhot tu Jahowa ndang songon na sai laon.” Tutu ma tangiang ni si Kristina mangurupi ibana manjonok tu Jahowa.

16, 17. (a) Aha do na ingkon taulahon asa sai togu paralealeonta tu Jahowa? (b) Aha do siulasonta di parsiajaran na mangihut?

¹⁶ Boi do tajaga tongtong hita jonok tu Jahowa salelenglelengna. Antong sai tatangihon ma Ibana marhite ringgas marsiajar Bibel, jala tongtong ma hita manghatai tu Ibana marhite tangiang. Molo taulahon on, lam togu ma paralealeonta tu Jahowa, marhite pangurupionNa boi ma hita manaon pangunjunan.

¹⁷ Alai sipata ndang gira marujung sitaononta, nang pe taratur hita martangiang tu Jahowa. Di tingki sisongon i boi do mago pos ni rohanta tu Jahowa. Boi do tahilala songon na so ditangihon Jahowa tangiangta jala sungkunsungkun rohanta tutu do Ibana alealenta. Molo nunga songon i panghilalaanta, aha do ulahononta? Parsiajaran na mangihut boi mangurupi hita.