Boi do Hita Monang Mangalo Sibolis!

 1. (a) Boasa ringkot taalo Sibolis tarlumobi saonari on? (b) Sian dia taboto na boi do hita monang mangalo Sibolis?

SAONARI marsitutu do Sibolis laho mangaripashon halak Kristen na nimiahan ni tondi dohot ”birubiru na asing.” (Johannes 10:16) Ala otik na ma tingkina, marsitutu do ibana asa sega haporseaon ni godang angka naposo ni Jahowa. (Jaha Pangungkapon 12:9, 12.) Alai boi do hita monang. Bibel mandok: ”Alo hamu ma Sibolis i dung i maporus ma ibana sian hamu.”​—Jakobus 4:7.

2, 3. (a) Boasa lomo roha ni Sibolis molo dirimpu halak na so adong ibana? (b) Sian dia do taboto na tutu adong Sibolis?

² Godang halak ndang porsea molo didok na tutu adong Sibolis. Di nasida Sibolis dohot angka begu holan parange na roa na adong di bagasan roha, di film, dohot di buku. Didok nasida molo naung singkola na timbo sasahalak, ndang be porsea molo na tutu do adong angka begu. Susa do Sibolis molo angka jolma ndang porsea na adong Sibolis dohot angka begu? Daong. Gariada las rohana alana gabe ummura di ibana laho mangotootoi jolma. (2 Korint 4:4) Sasintongna Sibolis do na mambahen asa adong pingkiran sisongon i laho mangaliluhon angka jolma.

³ Ndang boi diotootoi angka naposo ni Jahowa. Taboto adong do Sibolis. Sian dia taboto? Bibel paboahon tu hita molo Sibolis hea manghatai tu si Hawa marhite ulok. (1 Musa 3:1-5) Ibana manghatai tu Jahowa jala disangsihon ibana haporseaon ni si Job. (Job 1:9-12) Marsitutu ibana laho mangunjuni Jesus. (Mateus 4:1-10) Dung gabe raja Jesus di taon 1914, dipungka ibana ma paraloan tu angka halak Kristen na nimiahan ni tondi na adong dope di tano on. (Pangungkapon 12:17) Dibahen ibana do paraloan i sahat tu saonari on, huhut marsitutu ibana laho manegai haporseaon ni halak Kristen na nimiahan ni tondi dohot birubiru na asing. Asa boi monang hita di paraloan i ingkon taalo ma Sibolis jala tajaga ma asa sai togu haporseaonta. Parsiajaran on mangulas tolu dalan na boi tabahen asa monang.

 4. Songon dia do Sibolis apala pas patuduhon parange na pasangaphon diri sandiri?

⁴ Lomo hian roha ni Sibolis pasangap dirina. Jala barani do ibana mangalo hak ni Debata mamarenta, marusaha do ibana mangelaela angka jolma asa manomba ibana ndang na manomba Jahowa. Ibana ma na apala pas patuduhon roha na teal dohot ginjang ni roha. Alani i asa boi taalo Sibolis porlu tabolonghon parange na pasangaphon diri sandiri jala patuduhon serep ni roha. (Jaha 1 Petrus 5:5.) Alai aha do parange na pasangaphon diri sandiri i? Sai na roa do lapatanna?

5, 6. (a) Sai na sala do na pasangaphon diri sandiri? Patorang ma. (b) Angka hasangapon na dia do na parohon jea, jala angka ise ma na disurat di Bibel na hea patuduhon parange sisongon on?

⁵ Sada kamus mandok pasangaphon diri sandiri lapatanna: porsea tu diri sandiri jala taargai dirinta. On pe marlapatan manghasabamhon aha na adong di hita manang sisolhotnta ala naung mangulahon na denggan jala ala adong na denggan di hita. Ndang na sala molo adong panghilalaan sisongon i di hita. Apostel Paulus mandok tu huria di Tessalonik: ”Pola hubaritahon hami hamu di angka huria ni Debata, mamuji habengeton dohot haporseaon muna, di na masa tu hamu ragam ni pangaleleon dohot haporsuhon, angka na pinataontaon muna.” (2 Tessalonik 1:4) Alani ni i, panghilalaan sonang ala adong parkarejoanta dohot na asing marlapatan do on tu hita. Boi mambahen hita mangargai dirinta sandiri. Ndang maila hita tu keluarganta, marganta, manang huta hatubuanta.​—Ul. 21:39.

⁶ Alai boi do sangap tu diri sandiri manegai paralealeonta, tarlumobi paralealeonta tu Jahowa. Ala pasangaphon diri, boi do hansit rohanta molo adong na mamodai. Jala ndang serep be rohanta manjalo pinsangpinsang i. (Psalmen 141:5) Panghilalaan on boi tubu ala pasangaphu hita tu dirinta sandiri ”manang roha haginjangon ala tarimpu umdenggan hita sian angka dongan na asing.” Sogo do roha ni Jahowa tu jolma na pasangaphu tu dirina sandiri. (Hesekiel 33:28; Amos 6:8) Las do roha ni Sibolis molo tapaginjang rohanta jala marhata manggang taringot dirinta sandiri. Pingkirhon ma las ni roha ni Sibolis tingki si Nimrod, si Firaun, dohot si Absalom marhata manggang taringot diri nasida sandiri! (1 Musa 10:8, 9; 2 Musa 5:1, 2; 2 Samuel 15:4-6) Ala pasangaphu do si Kain tu dirina sandiri umbahen ndang maraleale ibana tu Debata. Dipinsang Debata Jahowa do si Kain, alai ginjang do rohana ndang olo manangihon. Sijogal ateate do si Kain ndang lomo rohana manangihon poda ni Jahowa, jala ndang adong biar ni rohana mangulahon dosa tu Jahowa.​—1 Musa 4:6-8.

7, 8. (a) Aha do lapatan ni rasisme, jala songon dia do on martalian tu pasangaphu tu diri sandiri? (b) Patorang ma songon dia pasangaphu tu diri sandiri boi manegai hadameon di huria.

⁷ Saonari on, godang do jolma ala patuduhon hasangapon diri gabe parohon jea tu na asing. Holong tu diri sandiri dipatudos tu parange na holongan tu na samarga (Rasisme). Sada kamus mandok, rasisme i ma panghilalaan na so porsea tu angka halak sian marga na asing, on muse marlapatan ”paimbarimbarhon haboion ni sasahalak, jala ninna rohana umtimbo do marga na sada sian na asing.” Rasisme boi mambahen tubu parbadaan, parporangan dohot angka na mambunu.

⁸ Tontu ma, ndang masa angka parange sisongon on di huria. Alai, olo do sipata ndang saroha angka donganta di huria, alana adong na pasangaphu tu dirina sandiri jala ndang boi diorom panghilalaan i. On ma na masa tu halak Kristen di abad na parjolo. Disungkun si Jakobus ma: ”Sian dia do angka parbadaon dohot parmusuon na di hamu?” (Jakobus 4:1) Molo jut rohanta tu donganta na asing jala tarimpu dumenggan hita sian angka donganta, boi do on mambahen hita mandok manang mangulahon angka na pahansithon roha ni donganta. (Poda 12:18) Tangkas ma molo pasangaphu hita tu dirinta sandiri boi do on manegai hadameon di huria.

 9. Songon dia do Bibel mangurupi hita asa boi mambolonghon rasisme dohot parange pasangaphu tu diri sandiri? (Ida ma gombar di mula ni parsiajaran.)

⁹ Molo sai tarimpu dirinta na dumenggan sian angka donganta taingot ma ”Marbiasbias do roha ni Jahowa mida sude jolma na ginjang marroha.” (Poda 16:5) Porlu tapareso rohanta jala mambahen sungkunsungkun on tu dirinta sandiri: ’Na umdenggan do ahu huhilala sian angka dongan na asing margana, bangsona, dohot hatana?’ Molo adong panghilalaan sisongon i, na tahalupahon do molo ”sian sada jolma do dipatupa Ibana (Debata) saluhut bangso.” (Ul. 17:26) Sasintongna, samarga do sude hita alana sada do ompungta i ma si Adam. Ndang tutu Debata mambahen sadasada marga umtimbo sian marga na asing. Molo tapasombu adong pingkiran sisongon i di rohanta na paloas Sibolis do hita manegai holong dohot parsadaan di huria. (Johannes 13:35) Asa boi monang mangalo Sibolis ingkon tabolonghon ma sude panghilalaan na pasangaphon diri sandiri.​—Poda 16:18.

10, 11. (a) Boasa boi hita gabe olo manghaholongi portibi on? (b) Boha do ujung ni hangoluan si Demas ala dihaholongi ibana portibi on?

¹⁰ Didok do Sibolis ”raja ni portibi on.” (Johannes 12:31; 1 Johannes 5:19) Godang do angka na adong di portibi on maralo tu poda ni Bibel. Nang pe ndang sude sala angka na adong di portibi on, ingkon porsea do hita na boi do i pangkeon ni Sibolis laho patubutubu sangkap na sala jala boi mambahen hita mardosa. Manang bahenonna ma hita asa manghaholongi portibi on jala ndang be mangharingkothon paralealeon tu Jahowa.​—Jaha 1 Johannes 2:15, 16.

¹¹ Pigapiga halak Kristen di abad parjolo manghaholongi portibi on. Songon na disurat si Paulus: ”Ai ditadinghon si Demas i do ahu, ala naung holong rohana di portibi on.” (2 Timoteus 4:10) Ndang dipaboa Bibel sasintongna dia na dihaholongi si Demas sian portibi on, na mambahen ibana maninggalhon si Paulus. Olo do ra holongan ibana di arta sian paralealeonna tu Jahowa. Molo i do na mambahen, mago ma hak na sumurung na mansai arga di ibana, i ma gabe pangurupi ni si Paulus. Dos do na ditadinghon ibana i dohot na niaduna? Ndang dos. Ndang boi portibi on mangalehon lobi sian na nilehon ni Jahowa!​—Poda 10:22.

12. Songon dia do Sibolis mangotootoi hita marhite angka sangkap ni rohanta asa masihol di ”hamoraon”?

¹² Boi do masa angka sisongon i tu hita saonari. Toho do nian ndang sala molo tasarihon dirinta dohot keluarganta. (1 Timoteus 5:8) Taboto do Jahowa pe manghalomohon asa hita marlas ni roha di ngolunta, dilehon Ibana do tu si Adam dohot si Hawa Paradeiso na uli gabe inganan nasida. (1 Musa 2:9) Alai, boi do dipaotooto Sibolis hita mamangke sangkap ni rohanta asa masihol di ”hamoraon.” (Mateus 13:22) Dirimpu godangan halak, boi las roha nasida alani hepeng dohot arta. Molo dos do pingkiranta dohot nasida taringot hepeng, boi do sega paralealeonta na arga tu Jahowa. Dipasingot Jesus do hita: ”Ndang haoloan sada halak dua induk, sai hosomanna do na sada holonganna do na sadanari; Hombaranna do na sada toisanna do na sadanari. Ndang haoloan hamu Debata rap dohot Mammon” (Mateus 6:24) Molo arta do na tahaholongi, ndang tahaholongi be Jahowa. On ma na sasintongna dihalomohon Sibolis. Anggiat ma ndang tatinggalhon paralealeonta tu Jahowa alani hepeng manang arta. Asa boi hita monang mangalo Sibolis unang ma hita holongan di hepeng.​—Jaha 1 Timoteus 6:6-10.

13. Songon dia portibi on mangelaela asa pilit pangantusionta taringot parsaripeon?

¹³ Jorat ni Sibolis na asing i ma parmainanon. Ninna godangan halak, hatinggalan jaman do molo marsihohot hita tu sada tunggani doli manang sada tunggani boru. Jala songon na di hurungan ma dihilala nasida molo marhasohotan nasida. Songon na didok sada artis borua: ”Ndang tarbahen marsihohot tu sasahalak,” didokhon ibana muse: ”Ndang hea huida halak na marsihohot tu dongan saripena.” Sada artis baoa mandok: ”Ndang tarbahen ahu, hupasuda ariari ni ngolungku holan rap dohot sahalak borua.” Las roha ni Sibolis molo songon i pingkiranta maradophon silehonlehon ni Debata i ma parsaripeon. Ndang lomo roha ni Sibolis adong parsaripeon na togu, jala ndang lomo rohana martua angka parsaripeon. Alani i, asa boi hita monang mangalo Sibolis ingkon songon Debata ma hita mangida parsaripeon.

14, 15. Aha do na boi taulahon molo dielaela hita asa mangulahon parmainanon?

¹⁴ Naung marsaripe pe hita manang na ndang, ingkon marsitutu do hita manundalhon sude ragam ni parmainanon. Mura do i? Daong! Songon: Molo sahalak na poso do hamu, hea do ra dibege hamu dongan sasingkola muna mangulahon parmainanon. Manang olo do ra nasida manongos hata dohot gombar na so hasea marhite handphone. Sasintongna sarupa do i tu pornografi. (1 Korint 6:18) Olo do gabe marsahit alani mangulahon parmainanon. Susa ma hita alani sahit on jala boi mate. Angka na poso na mangulahon parmainanon mandok, manolsoli do nasida di parulaonna i. Angka film na adong di TV jotjot mangelaela hita asa porsea ndang manghorhon na roa molo taalo patik ni Debata. Molo tahaporseai gabus on, gabe diotootoi dosa ma hita.​—Heber 3:13.

¹⁵ Molo tarelaela hita laho mangulahon parmainanon, aha do na boi taulahon? Martangiang ma tu Jahowa laho mangido gogo. (Pilippi 4:6, 7, 13) Boto ma didia hagaleonta. (Rom 7:22, 23) Pasiding ma inganan manang situasi na boi mangelaela hita asa mangulahon parmainanon. (Poda 22:3) Jala, molo tompu ro elaela i, tundalhon ma!​—1 Musa 39:12.

16. Aha do didok Jesus tu Sibolis tingki dielaela ibana, jala aha ma na boi taparsiajari sian i?

¹⁶ Dilehon Jesus do sitiruon na boi taihuthon. Ndang olo ibana porsea tu gabus ni Sibolis. Jala ndang hea dipingkirpingkiri ibana elaela ni Sibolis. Pintor didok ibana tu Sibolis: ”Ai didok surat i do.” (Jaha Mateus 4:4-10.) Tangkas do diantusi Jesus hata ni Debata, on mangurupi Jesus asa pintor boi mangingot hata ni Debata tingki dielaela Sibolis ibana. Asa boi hita monang mangalo Sibolis, unang ma tapaloas dirinta dielaela asa mangulahon parmainanon.​—1 Korint 6:9, 10.

17, 18. (a) Angka aha ma muse jorat ni Sibolis jala boasa ndang pola songgot rohanta mangadopi i? (b) Aha ma na laho masa tu Sibolis, jala aha ma labana tu hita ala mamboto i?

¹⁷ Holan tolu dope na taulas sian angka jorat ni Sibolis, i ma pasangaphon diri, holongan di hepeng, dohot parmainanon. Alai godang dope angka joratna. Songon, olo do adong donganta na manaon paralaon sian keluargana manang sian pamarenta. Manang adong donganta na direhei dongan sasingkolana. Sude do hita ingkon manaon paraloan dohot parungkilon. Jesus pe paingothon hita: ”Hosoman ni saluhut jolma do hamu ala ni Goarhu; alai nasa na manahan ro di ujungna, i do paluaonna!”​—Mateus 10:22.

¹⁸ Songon dia do asa boi hita monang mangalo Sibolis? Jesus mandok: ”Marhitehite benget ni roha do malua hosa muna.” (Lukas 21:19) Ndang sahalak pe na boi manegai haporseaonta. Ndang adong agia aha pe na boi manegai paralealeonta tu Debata molo ndang hita sandiri na manegai. (Rom 8:38, 39) Nang pe ingkon mate ujungna halak na mangoloi Jahowa, ndang na monang Sibolis disi. Paheheon ni Jahowa do nasida. (Johannes 5:28, 29) Alai molo tu Sibolis, ndang adong panghirimon tu ibana. Dung diripashon halak parjahat sian portibi on, na laho dihurung do ibana saleleng saribu taon. (Pangungkapon 20:1-3) Di ujung ni Pamarentaon Saribu Taon i, ”malua ma Sibolis i sian hurunganna” laho sahali nai mangunjuni angka jolma na tipak. Dung i diripashon ma Sibolis i saleleng ni lelengna. (Pangungkapon 20:7-10) Molo Sibolis ndang marpanghirimon, hita marpanghirimon do! Sai tongtong ma alo Sibolis, jala sai jaga ma asa sai togu haporseaonta. Sai na boi do monang hita mangalo Sibolis!