Arga do di Jahowa Naposona na Marserep ni Roha

 1. Songon dia do pangkilalaan ni Jahowa tu halak na serep roha? Patorang ma.

DIHAHOLONGI Jahowa do halak na serep roha, jala holan nasida do na boi marale-ale tu Ibana. Alai, “ditanda do sian na dao na ginjang roha”. (Ps. 138:6) Tontu, lomo do rohanta mambahen las roha ni Jahowa jala mangkilala holongna. Alani i, taparsiajari ma songon dia carana patuduhon serep ni roha.

 2. Aha do na laho taulas di parsiajaran on?

² Di parsiajaran on, laho taulas ma tolu sungkun-sungkun on: (1) Aha do serep ni roha i? (2) Boasa ingkon tapatudu serep ni roha? (3) Jala di situasi na songon dia do hita maol patuduhon serep ni roha? Taulas ma muse, tingki tapatudu serep ni roha, boi do i mambahen las roha ni Jahowa jala tadapot ma laba na denggan.​—Poda 27:11; Jes. 48:17.

 3. Aha do serep ni roha i?

³ Serep ni roha, i ma parange na patuduhon ndang mangkaringkothon diri sandiri jala ndang marginjang ni roha. Bibel mandok, diharingkothon halak na serep roha do parale-aleonna tu Debata dohot tu angka dongan. Jala diboto halak na serep roha do, dumenggan do halak na asing sian ibana.​—Plp. 2:3, 4.

4-5. Boasa ndang pintor boi tadok na serep roha ni sasahalak?

⁴ Boi do sasahalak songon na serep rohana idaon. Ra, ala parsipsip ibana manang parila. Manang, gabe pantun nasida idaon ala songon i do na diajarhon natua-tuana. Hape sasintongna, olo do ra ginjang rohana. Alai di sada tingki, tarida do aha na adong di bagasan rohana.​—Luk. 6:45.

⁵ Asing ni i, adong do na barani paboahon na adong di rohana. Alai on ndang patuduhon na ginjang rohana. (Joh. 1:46, 47) Alai, halak sisongon i ingkon manat do asa unang sai marpos ni roha tu dirina sandiri. Parila manang na ndang, ingkon marsitutu do hita sude asa tongtong marserep ni roha.

 6. Songon na didok 1 Korint 15:10, aha do na boi taparsiajari sian apostel Paulus?

⁶ Pingkirhon ma contoh sian apostel Paulus. Dipangke Jahowa do ibana laho mambahen angka huria na baru di godang kota. Ra, gumodang do naung diulahon ibana di ulaon marbarita sian angka apostel na asing. Alai ndang hea didok roha ni si Paulus na umsangap ibana sian nasida. Gariada didok ibana do, “Ahu do na ummetmet sian sude apostel, jala ndang tama ahu didok apostel, ai hubahen do na hansit tu huria ni Debata.” (1 Kor. 15:9) Jala ndang ala na ummalo si Paulus manang ala gumodang na diulahon umbahen na boi ibana marale-ale tu Jahowa. Alai, alani asi ni roha ni Debata na mansai balga i do. (Jaha 1 Korint 15:10.) Sitiruon na denggan do si Paulus taringot patuduhon serep ni roha. Tingki mambahen surat tu halak Kristen di Korint, adong do piga-piga halak di huria na so marlomo ni roha tu si Paulus. Alai ndang dibahen ibana umsangap dirina sian nasida!​—2 Kor. 10:10.

 7. Songon dia do sahalak donganta di tingkinta saonari patuduhon serep ni roha?

⁷ Sada sitiruon na denggan taringot patuduhon serep ni roha, i ma donganta si Karl F. Klein, na tingki i gabe anggota Punguan na Mangaradoti Organisasi. Disurat ibana do kisah hidup na patoguhon roha. Jujur do ibana paboahon angka hahuranganna dohot ambat-ambat na hea diadopi saleleng martaon-taon. Umpamana di taon 1922, i ma tingki na parjolo sahali ibana marbarita sian jabu tu jabu. Alai ala maol dihilala, gabe ndang olo ibana marbarita saleleng dua taon. Dung i, tingki karejo di Betel, hea do ibana dipasingot sahalak donganta, alai muruk do ibana tingki dipasingot. Jala hea do ibana depresi. Alai, dapotna do muse godang tugas na ringkot jala na mambahen las roha. Nang pe godang halak na mananda donganta si Klein, alai serep do rohana. Olo do ibana paboahon angka hahuranganna! Godang do angka donganta na dipatogu sian kisah hidup ni donganta si Klein.b

 8. Songon dia do 1 Petrus 5:6 mangurupi hita mamboto molo serep ni roha mambahen las roha ni Jahowa?

⁸ Ingkon tapatudu do serep ni roha, alana boi do i mambahen las roha ni Jahowa. Tangkas do disurat si Petrus taringot on. (Jaha 1 Petrus 5:6.) Hombar tu na didok si Petrus, buku “Mari Jadilah Pengikutku” mandok, “Ginjang ni roha dipatudos do songon racun. Mansai berbahaya do i. Nang pe malo manang jago sasahalak, molo ndang serep rohana ndang marguna ibana di Jahowa. Alai halak na lea di adopan ni jolma, marguna situtu do di adopan ni Jahowa molo serep rohana. . . . Las do roha ni [Debata] . . . jala pasu-pasuonna do hamu molo serep rohamuna.”c Tutu, mambahen las roha ni Jahowa, i ma sada ulaon na dumenggan!​—Poda 23:15.

 9. Boasa lomo roha ni halak marale-ale tu halak na marserep ni roha?

⁹ Asing ni mambahen las roha ni Jahowa, tadapot ma godang laba molo tapatudu serep ni roha. Molo serep rohanta, gabe olo do halak na asing marale-ale dohot hita. Boasa songon i? Pingkirhon ma, halak na songon dia do na dihalomohon rohamu gabe ale-ale. (Mat. 7:12) Tontu, ndang lomo rohanta marale-ale tu halak na sai mamaksa na asing asa mangihuthon lomo ni rohana jala ndang olo manangihon pandapot ni na asing. Alai, las do rohanta marale-ale tu dongan na patuduhon roha “sapangkilalaan, masihaholongan, marasi ni roha, jala marserep ni roha”. (1 Ptr. 3:8) Molo las rohanta tu halak na serep roha, tontu las do roha ni halak na asing molo serep rohanta.

10. Boasa serep ni roha mambahen hita ndang mura marsak?

¹⁰ Molo serep rohanta, gabe mura do taadopi angka hasusaan na masa tu hita. Sipata, olo do tahilala dibahen na so denggan tu hita manang tu halak na asing. Didok Raja Salomo, “Huida do angka hatoban marsihundul hoda, hape ia angka na sangap mardalan pat songon hatoban.” (Pjm. 10:7) Sipata, halak na malo ndang hea dipuji. Alai halak na so pola malo do na gabe jotjot dipuji. Nang pe songon i, didok Salomo ingkon rade do hita mangadopi aha pe na masa di ngolunta jala unang ma sai tapingkirhon taringot i. (Pjm. 6:9) Molo serep rohanta, gabe mura ma hita mangadopi aha pe na masa di ngolunta.

11. Aha do na ingkon taulahon tingki dipasingot?

¹¹ Boi do tapatudu serep ni roha ganup ari. Pingkirhon ma piga-piga situasi on. Tingki dipasingot hita. Taingot ma, molo adong donganta na marsitutu pasingothon hita, ra ala balga do hasalaan na taulahon i. Ra, mulana ndang lomo rohanta manangihon sipasingot i. Gariada, gabe muruk do hita tu na mangalehon sipasingot i manang tu carana pasahathon i. Alai molo serep rohanta, marsitutu do hita manjalo sipasingot i.

12. Hombar tu Poda 27:5, 6, boasa ingkon mandok mauliate hita molo adong na pasingothon hita? Bahen ma tudosan.

¹² Diargai halak na serep roha do sipasingot. Umpamana: Bayangkon ma molo di parpunguan hamu. Tingki mangkatai dohot piga-piga dongan, sada sian nasida manat paboahon tu hamu na adong saotik sipanganon na longkot di iponmuna. Tontu maila do hamu. Alai mandok mauliate do hamu tu ibana ala nunga dipaboa i tu hamu. Gariada ra didok rohamu do, tuani ma adong na hatop paboahon i tu hamu! Suang songon i ma, molo serep rohanta, mandok mauliate do hita molo adong dongan na barani pasingothon hita di tingki na pas. Ale-alenta do ibana, ndang musunta.​—Jaha Poda 27:5, 6; Gal. 4:16.

13. Songon dia do hita patuduhon serep ni roha tingki na asing na mandapot tanggung jawab di huria?

¹³ Tingki na asing mandapot tanggung jawab di huria. Sahalak sintua na margoar si Jason mandok, “Tingki huida na asing mandapot tanggung jawab di huria, sipata didok rohangku do, boasa ndang ahu na dipillit.” Hea do dihilala hamu songon i? Tutu, ndang sala hita “marsitutu” laho mandapot tanggung jawab di huria. (1 Tim. 3:1) Alai, ingkon tajaga do caranta marpingkir. Molo ndang manat hita, boi do gabe ginjang rohanta. Umpamana, boi do sahalak donganta baoa marpingkir, holan ibana do na tama mandapot sada tanggung jawab di huria. Manang, boi do sahalak donganta borua marpingkir, ‘Dumenggan do suamikku sian halak na asing!’ Molo serep rohanta, ndang songon i caranta marpingkir.

14. Aha do na boi taparsiajari sian na diulahon si Musa tingki na asing mandapot tanggung jawab?

¹⁴ Boi do hita marsiajar sian na diulahon si Musa tingki na asing mandapot tanggung jawab. Mansai arga do di si Musa tanggung jawabna laho gabe pamimpin ni bangso Israel. Alai songon dia do pangkilalaan ni si Musa tingki dilehon Jahowa piga-piga tanggung jawab ni si Musa tu halak na asing? Ndang mangiburu ibana. (4 Mus. 11:24-29) Serep do roha ni si Musa jala olo do ibana diurupi na asing laho mangadili bangso i. (2 Mus. 18:13-24) Ala godang baoa na boi mangadili bangso Israel, gabe ndang porlu be leleng bangso i paimahon keputusan sian si Musa. On patuduhon, rumingkot do di si Musa mangurupi na asing sian tanggung jawab na dilehon tu ibana. Sitiruon na denggan do on tu hita! Taingot ma, asa boi hita marguna di Jahowa, rumingkot do serep ni roha sian tanggung jawabta. Nang pe mansai sangap Jahowa, alai ditatap do na serep roha i.​—Ps. 138:6.

15. Aha do angka situasi na muba na diadopi angka donganta?

¹⁵ Tingki muba situasi di ngolunta. Di piga-piga taon na parpudi on, godang angka donganta naung leleng melayani mandapot penugasan na baru. Umpamana di taon 2014, dipaboa organisasi ma ndang adong be pengawas distrik. Alani i, donganta baoa dohot istrina na hea gabe pengawas distrik, mandapot penugasan na asing. Jala di taon i muse, donganta baoa naung marumur 70 taon, ndang boi be gabe pengawas wilayah. Jala donganta baoa naung marumur 80 taon manang lobi, ndang boi be gabe koordinator punguan ni angka sintua di huria. Asing ni i, di piga-piga taon na parpudi on, godang angka donganta na karejo di Betel ditugashon tu lapangan gabe perintis. Jala angka donganta na asing, ndang dohot be tu dinas sepenuh waktu khusus ala marsahit, alani tanggung jawab di keluarga manang na asing.

16. Songon dia angka donganta patuduhon serep ni roha tingki muba situasi di ngolu ni nasida?

¹⁶ Maol do dihilala angka donganta i tingki muba situasi di ngolu ni nasida. Nunga dihaholongi nasida penugasanna najolo, jala nunga diulahon i saleleng martaon-taon. Adong do muse piga-piga sian nasida na lungun rohana ala ingkon manadingkon penugasan naung dihaholongi i. Alai lam leleng, ndang songon i be na dihilala nasida. Boasa? Ala holong do roha ni nasida tu Jahowa. Marjanji do nasida laho marhobas tu Jahowa, ndang alani tanggung jawab manang penugasan na dilehon tu nasida. (Kol. 3:23) Ala serep do roha ni nasida, tongtong do nasida marlas ni roha marhobas tu Jahowa aha pe penugasan na dilehon tu nasida. Dipasahat nasida do sude holso ni roha ni nasida tu Jahowa, ala diboto na disarihon do nasida.​—1 Ptr. 5:6, 7.

17. Boasa mandok mauliate hita tu Bibel ala dijujui hita laho patuduhon serep ni roha?

¹⁷ Mandok mauliate do hita tu Bibel ala dijujui hita laho patuduhon serep ni roha. Molo tapatudu serep ni roha, parohon laba do i tu dirinta dohot tu na asing. Gabe rade ma hita mangadopi angka hasusaan di ngolunta. Jala na rumingkot, gabe lam togu ma parale-aleonta tu Jahowa. Nang pe “Debata Natumimbul jala Nabadia” Jahowa, las do rohanta mamboto na dihaholongi jala diargai Ibana do naposona na marserep ni roha!​—Jes. 57:15, Bibel siganup ari.