Dapothu ma Godang Pasu-Pasu Ala Marsiajar sian Akka Contoh na Denggan

Au tubu di Quebec City, i ma sada provinsi di Quebec na marbahasa Prancis di Kanada. Natua-tuakku i ma si Louis dohot si Zélia, burju jala holong do roha ni nasida tu au. Parila do bapakku jala lomo do rohana manjaha. Lomo do rohakku manurat jala marcita-cita do au gabe jurnalis.

Tikki marumur 12 taon au, ro ma dongan sakarejo ni bapakku i ma si Rodolphe Soucy dohot donganna tu jabunami. Sitindangi Ni Jahowa do nasida. Dang pola godang na huboto taringot Sitindangi jala dang pola lomo rohakku tu agama ni nasida. Alai, longang do rohakku tu cara ni nasida mamakke Bibel tikki mangalusi sukkun-sukkun. Suang songon i do na dihilala natua-tuakku. Alani i, gabe olo ma nasida marsiajar Bibel.

Di tikki i, di Katolik do au marsikkola. Sada tikki, makkatai ma au dohot dongan sakalashu taringot aha na huparsiajari sian Bibel. Ujungna, diboto akka gurukku ma i, jala pastor do nasida. Dang dipakke nasida ayat ni Bibel lao patuduhon na sala do na hudok. Tikki di kelas, adong sada sian nasida na mandok molo au sahalak pemberontak! Nang pe jut rohakku tikki i, alai ujungna huboto ma, denggan do i di au. Alana, gabe huboto ma maralo do na diajarhon di sikkola i tu na didok Bibel. Gabe huboto ma, ikkon kaluar do au sian sikkola i. Dung hudok tu natua-tuakku, pinda sikkola ma au.

Toktong do au marsiajar Bibel, alai leleng do au mambahen kemajuan ala mabiar au marbarita sian jabu tu jabu. Balga do pengaruh ni Gareja Katolik di luatnami, jala marsitutu do nasida mangorai ulaon marbarita. Adong sahalak pemimpin politik di Quebec, i ma si Maurice Duplessis. Kerja sama do ibana dohot gareja. Alani i, dijujui nasida do godang halak lao menganiaya Sitindangi. Tikki i, ikkon barani do hami lao marbarita.

Sahalak dongatta baoa na mangurupi au asa unang mabiar, i ma si John Rae. Lulusan Sikkola Gilead kelas na pasiahon do ibana. Godang do pengalaman ni si John, lambok do ibana, serep rohana jala mura dijonoki. Dang jotjot ibana mangalehon sipaingot tu au, alai godang do na boi hutiru sian ibana. Maol do si John marbahasa Prancis, alani i jotjot do au mandongani ibana tikki marbarita jala mangurupi ibana makkatai di bahasa i. Ala godang tikkiku rap dohot si John, gabe pos ma rohakku tu hasittongan. Sampulu taon dung parjolo sahali pajuppang dohot Sitindangi, tardidi ma au tanggal 26 Mei 1951.

Gelleng do hurianami di Quebec City, alai godang do akka dongan na merintis. Alani sitiruon sian nasida i, gabe taronjar ma rohakku lao merintis. Tikki i, holan Bibel do na dipakke hami lao marbarita sian jabu tu jabu. Ala dang adong publikasi na boi ditawarhon, ikkon malo do hami mamakke ayat ni Bibel. Alani i, marsitutu ma au mamparsiajari akka ayat ni Bibel asa boi paboahon hasittongan. Nang pe songon i, godang do halak na so olo manjaha Bibel asing ni na disetujui Gareja Katolik.

Taon 1952 marhasohotan ma au dohot sahalak dongatta borua di luat i, i ma si Simone Patry. Pinda ma hami tu Montreal, jala sataon dukkon i tubu ma borunami, i ma si Lise. Memang andorang so marhasohotan, dang merintis be au. Alai marsitutu do hami asa toktong sederhana ngolunami. Gabe godang ma tikkinami lao mangurupi akka ulaon di huria.

Sappulu taon dukkon i, gabe hurimangi ma songon dia carana asa boi merintis muse. Taon 1962, dohot ma au tu Sikkola Pakkobasion tu Harajaon tu akka sintua na dibahen di Betel Kanada saleleng sabulan. Sakamar ma au dohot dongatta si Camille Ouellette. Longang do rohakku mangida si Camille na ringgas marbarita, hape sahalak kepala keluarga do ibana. Tikki i, otik do akka dongan di Quebec na merintis huhut pagodang-godakkon ianakkon. Alai i do na diulahon si Camille. Saleleng rap hami, dijujui ibana do au asa merintis muse. Dung piga-piga bulan, hubahen ma keputusan asa gabe perintis biasa muse. Piga-piga dongatta mandok na hurang denggan do keputusan na hubahen on. Alai, toktong do au merintis. Pos do rohakku, urupan ni Jahowa do au asa boi toktong merintis.

Taon 1964, ditugashon ma hami gabe perintis istimewa di hutanami Quebec City saleleng piga-piga taon. Tikki i, nungnga lam denggan situasina, alai adong dope halak na marsogo ni roha tu ulaon marbarita.

Sada tikki di ari Sabtu botari, ditakkup ma au di Sainte-Marie, sada kota na gelleng dang dao sian Quebec City. Diboan sahalak petugas ma au tu kantor polisi jala dipamasuk au tu penjara ala dang jolo mangido ijin lao marbarita na uli. Dung i, diboan ma au tu sahalak hakim na margoar si Baillargeon. Diogapi ibana do au. Disukkun ibana ma ise na lao gabe pengacaraku. Tikki hupaboa goar ni si Glen How,a sahalak dongatta na gabe pengacara, gabe mabiar ma ibana. Didok ibana, “Bah! Boasa pola ibana!” Tikki i, ditanda do si Glen How sahalak pengacara na jotjot marhasil mangurupi Sitindangi di pengadilan. Dang leleng dukkon i, didok pengadilan ma dang marsala au.

Ala sogo do roha ni halak tu ulaon marbarita di Quebec, gabe maol ma hami lao manewa inganan lao marpungu. Alai ujungna, dapotnami ma sada gudang na so adong pemanas ruanganna. Asa boi toktong las saleleng musim dingin, dipakke akka dongatta ma pemanas ruangan na mamakke miak. Jotjot do hami marpungu makkaliangi pemanas i saleleng piga-piga jam andorang so marpungu huhut paboahon akka pengalaman na patoguhon roha.

Massai las do roha boi mangida hasil na denggan sian ulaon marbarita saleleng martaon-taon. Di taon 1960-an, adong piga-piga huria na gelleng di Quebec City. Dipasada do wilayah Côte-Nord dohot di Gaspé Peninsula. Alai saonari, adong lobi sian dua wilayah di akka luat i. Jala marpungu do akka dongatta di Bale Harajaon.

Taon 1970, ditugashon ma hami gabe pengawas wilayah. Dung i taon 1973, ditugashon ma hami gabe pengawas distrik. Saleleng martaon-taon, godang do na huparsiajari sian akka dongatta na berpengalaman songon si Laurier Saumurb dohot si David Splane.c Pengawas wilayah do nasida. Ganup sae kebaktian, makkatai ma au dohot si David taringot songon dia asa lam denggan caranami mangajari. Sada tikki hea do didok si David tu au, “Léonce, las do rohakku mambege jamitam na parpudi i. Denggan do i. Alai molo ahu, boi do hubahen i gabe tolu jamita.” Pagodangku do hatorangan na hubahen di jamitakki. Alani i, marsiajar do au asa toktong sederhana tikki pasahatton jamita.

Ditugashon do pengawas distrik lao patoguhon pengawas wilayah. Alai, godang do penyiar di Quebec na mananda au. Jotjot do ditogihon nasida au lao marbarita tikki ro au tu wilayah i. Nang pe las rohakku marbarita dohot nasida, alai dang godang tikki na hulehon rap dohot pengawas wilayah. Sada tikki, dipaingot sahalak pengawas wilayah ma au. Didok ibana ma, “Denggan do dilehon ho tikkim rap dohot akka dongan. Alai ingot ma, na naeng manjumpangi au do ho ro tuson di minggu on. Au pe porlu do dipatogu!” Sipaingot on mangurupi au asa toktong seimbang.

Taon 1976, tompu ma adong na masa na mambahen lungun rohakku. Posi ma sahit ni istrikku si Simone, dung i marujung ngolu ma ibana. Istri na massai burju do ibana ala dang makkarikkotton diri sandiri jala holong do rohana tu Jahowa. Ala toktong ringgas au di ulaon marbarita, boi ma au martahan nang pe marhabot ni roha. Mandok mauliate do au tu Jahowa ala diurupi saleleng mangadopi situasi na borat on. Dung i, marhasohotan ma au muse tu si Carolyn Elliott, sahalak perintis na marbahasa Inggris na ro mangurupi ulaon marbarita tu Quebec. Burju do ibana jala parduli tu na asing, tarlumobi tu akka na parila. Sada pasu-pasu do ibana di au tikki pengawas wilayah hami.

Di Januari 1978, ditugashon ma au gabe instruktur Sikkola Dinas Perintis na parjolo sahali di Quebec. Taroktokon do au, ala dang hea dope au dohot tu sikkola i manang mangida bukkuna. Alani i, songon na baru dope di au on sude, dos songon na dihilala akka na dohot tu sikkola i. Alai tuani ma, godang akka perintis na berpengalaman di kelas i. Nang pe au na gabe instruktur ni nasida, alai godang do na huparsiajari sian nasida!

Dung i, taon 1978 dibahen ma Kebaktian Internasional na marjudul, “Iman yang Berkemenangan” di Stadion Olimpiade Montreal. On ma kebaktian na umbalga na hea dibahen di Quebec jala lobi sian 80.000 halak na ro. Ditugashon ma au di bagian Departemen Kantor Berita. Makkatai ma au dohot godang jurnalis, jala las rohakku ala denggan komentar ni nasida taringot Sitindangi. Diwawancarai do hami jala disiarhon do i di TV dohot di radio lobi sian 20 jam, jala marratus artikel na dicetak nasida. Gabe sada kesaksian do on!

Taon 1996, adong ma situasi na muba di ngolukku. Sian mulai tardidi, di huria na marbahasa Prancis do au di Quebec. Alai tikki i, ditugashon ma au tu distrik di Toronto na marbahasa Inggris. Huhilala, dang tolap au mangulahon tugas i, jala mabiar do au marjamita ala dang pola malo au marbahasa Inggris. Ikkon lam jotjot do au martangiang jala mangasahon Jahowa.

Andorang so melayani di distrik na marbahasa Inggris, taroktokon do au. Alai saonari boi ma hudok, las hian do rohakku saleleng dua taon melayani di Toronto. Sabar do si Carolyn mangurupi au asa lam barani marbahasa Inggris. Asing ni i, diurupi jala dipatogu akka dongan do au. Pittor hatop do dapotnami akka dongan na baru.

Hubahen ma persiapan dohot akka ulaon na asing di akhir pekan kebaktian. Asing ni i, jotjot do hupakke sajom di ari Jumat botari lao marbarita sian jabu tu jabu. Ra adong do na marpikkir, ‘Boasa pola ikkon marbarita hape naeng kebaktian nama?’ Alai, tikki marbarita au gabe dipatogu do muse rohakku. Jala i do na huhilala sahat tu saonari.

Taon 1998, ditugashon ma hami gabe perintis istimewa di Montreal. Saleleng martaon-taon, ditugashon ma au lao mangatur kesaksian di inganan na ribur jala mangalusi sukkun-sukkun ni akka wartawan taringot Sitindangi Ni Jahowa. Las do rohanami marbarita tu akka halak na baru pinda tu Kanada jala na lomo rohana marsiajar Bibel.

Molo hurimangi nungnga 68 taon au gabe Sitindangi Ni Jahowa, massai godang do hape pasu-pasu na hudapot. Las hian do rohakku ala dang mabiar be tikki marbarita jala boi mangurupi godang halak mananda hasittongan. Dung marianakkon borukku si Lise, merintis biasa ma ibana dohot suamina. Las do rohakku ala toktong do ringgas ibana di ulaon marbarita. Mandok mauliate do au ala dilehon akka dongan sitiruon dohot sipaingot na mangurupi au asa lam togu parale-aleonku tu Jahowa jala boi mangulahon godang tugas di organisasina. Gabe huboto ma, boi do taulahon penugasatta molo mangasahon tondi parbadia ni Jahowa. (Ps. 51:13) Toktong do au mandok mauliate tu Jahowa ala dilehon Ibana hasangapon lao mamuji goarna!​—Ps. 54:8.