Ikkon Tahaholongi do Jahowa

1-2. Boasa jala songon dia do Jahowa mambahen hita gabe bagian sian keluargana?

DIGOKKON Jahowa do hita gabe bagian sian keluargana. Sada hasangapon do on di hita! Akka na gabe bagian sian keluarga i, i ma akka halak na mangalehon dirina tu Debata jala na patuduhon haporseaon tu tobusan ni Jesus. Las do rohatta gabe bagian sian keluarga i. Adong do tujuan ni ngolutta, jala las do rohatta ala marpakkirimon lao mangolu salelengna di surgo manang di Paradeiso di tano on.

² Alani holongna, dibahen Jahowa pengorbanan na massai balga asa boi hita gabe bagian sian keluargana. (Joh. 3:16) Jala, arga do hita dituhor Ibana. (1 Kor. 6:20) Marhite tobusan, gabe boi ma hita marale-ale tu Ibana. Jala sada hasangapon do di hita boi manjou Ama tu Debata Natumimbul i. Songon naung taulas di parsiajaran na salpu, Jahowa i ma Ama na massai burju tu hita.

 3. Ra, aha do na gabe tasukkun tu diritta? (Ida kotak “Diparrohahon Jahowa do Au?”)

³ Songon sahalak panurat ni Bibel, ra sukkun-sukkun do rohatta, “Aha ma sibahenonku tu Jahowa, balos ni na denggan na binahenNa tu ahu?” (Ps. 116:12, Bibel siganup ari) Tutu, dang boi hita mambalos haburjuon ni Jahowa. Alai, taronjar do rohatta lao makkaholongi Ibana. Apostel Johannes mandok, “Marholong ni roha do hita ala parjolo do Debata mangkaholongi hita.” (1 Joh. 4:19) Songon dia hita boi patuduhon holong tu Jahowa?

 4. Hombar tu Jakobus 4:8, boasa ikkon marsitutu hita gabe ale-ale ni Jahowa?

⁴ Lomo do roha ni Jahowa asa marale-ale hita tu Ibana jala jotjot makkatai tu Ibana. (Jaha Jakobus 4:8.) Dijujui Ibana do hita asa ‘toktong martangiang’, jala sai rade do Ibana manangihon hita. (Rom 12:12) Sai rade do Jahowa jala dang hea loja Ibana lao manangihon hita. Hita pe porlu manangihon Ibana marhite manjaha Bibel dohot publikasi na mangurupi hita mangattusi aha na tajaha sian Bibel. Asing ni i, taparrohahon ma akka na dipasahat di parpunguan. Songon dakdanak na jonok tu natua-tuana ala jotjot makkatai, hita pe boi toktong jonok tu Jahowa molo jotjot makkatai tu Ibana.

 5. Songon dia asa boi lam denggan tangiangta tu Jahowa?

⁵ Pikkirhon ma songon dia do tangiangmuna tu Jahowa saleleng on. Lomo do roha ni Jahowa asa tapaboa sude na di rohatta di bagasan tangiang. (Ps. 62:9) Alani i, tasukkun ma diritta: ‘Sai mulak-ulak do na hudok di tangiangku? Manang sian ias ni roha do au martangiang?’ Tontu massai holong do rohamuna tu Jahowa jala marsitutu do hamu asa toktong togu parale-aleonmuna tu Ibana. Asa boi songon i, jotjot ma hamu martangiang. Pos ma roham tu Ibana. Paboa ma las ni roha dohot holso ni roham tu Ibana. Jala boi do pangidoonmu asa diurupi Ibana hamu.

 6. Aha do na ikkon taulahon asa toktong jonok tu Debata?

⁶ Asa boi toktong jonok tu Debata, ikkon jotjot do tadok mauliate tu Ibana. Tontu setuju do hita tu sahalak panurat psalmen na mandok, “Godang do naung binahenMu tu hami ale Jahowa Debatangku, ndang adong tudosanMu, nunga godang dibahen Ho angka ulaon halongangan tu hami. Molo taringotanku sudena i, tung so habilangan ahu do.” (Ps. 40:6, Bibel siganup ari) Alai dang sae holan mandok mauliate di bagasan rohatta, ikkon tapatudu do i sian pakkataion dohot parniulaotta. On mambahen hita gabe imbar sian akka halak di portibi on. Alana godang akka halak saonari dang olo mandok mauliate tu sude na diulahon Debata tu nasida. Jala on ma na patuduhon molo hita mangolu “di ari parpudi”, tikki akka halak dang diboto mandok mauliate. (2 Tim. 3:1, 2) Unang ma tatiru nasida!

 7. Aha do na dihalomohon Jahowa lao taulahon jala boasa?

⁷ Dang lomo roha ni natua-tua molo marbadai ianakkonna. Alai lomo rohana asa marsihaholongan nasida. Suang songon i ma, lomo do roha ni Jahowa asa sude hita marsihaholongan. Gariada, holong do na gabe tanda ni halak Kristen. (Joh. 13:35) Tontu setuju do hita tu sahalak panurat psalmen na mandok, “Ida ma, dengganna i dohot sonangnai, molo tung pungu sahundulan angka na marhahamaranggi!” (Ps. 133:1) Tikki tahaholongi akka dongatta, on patuduhon na holong do rohatta tu Jahowa. (1 Joh. 4:20) Massai las do rohatta ala boi gabe bagian ni keluarga sian akka dongan na ‘burju tu na asing jala marasi ni roha’!​—Eps. 4:32.

 8. Hombar tu 1 Johannes 5:3, boasa taoloi Jahowa?

⁸ Dipangido Jahowa do akka dakdanak asa unduk tu natua-tuana. Jala hita pe dipangido Jahowa asa unduk tu Ibana. (Eps. 6:1) Tama do hita sude mangoloi Jahowa ala Ibana do Sipanompa, Silehon hangoluan, jala Ibana do na umbisuk sian sude akka natua-tua. Alai na rumikkot, taoloi Jahowa ala holong do rohatta tu Ibana. (Jaha 1 Johannes 5:3.) Nang pe godang na mambahen hita ikkon mangoloi Jahowa, alai dang hea dipaksa asa unduk hita tu Ibana. Dipaloas Jahowa do hita bebas mamillit. I do alana massai las do rohana molo taoloi Ibana alani holong ni rohatta.

9-10. Boasa rikkot mamboto aturan ni Jahowa jala mangulahon i di ngolutta?

⁹ Lomo do roha ni natua-tua asa denggan ngolu ni ianakkonna. I do alana dibahen nasida do aturan taringot pangalaho na denggan na boi manjaga nasida. Molo diihuthon ianakkon aturan na dibahen natua-tuana, on patuduhon molo nasida porsea jala mangargai natua-tuana. Alani i, massai rikkot do taboto jala taihutton aturan na dibahen Jahowa. Molo taulahon i, on patuduhon na holong do rohatta tu Jahowa jala tapasangap Ibana. Marlaba do i tu hita. (Jes. 48:17, 18) Alai halak na so mangoloi Jahowa dohot aturanna, mambahen susa dirina sandiri.​—Gal. 6:7, 8.

¹⁰ Molo tabahen las roha ni Jahowa di ngolutta, on manjaga hita sian akka na boi manegai pamatangta, pikkiranta, dohot parale-aleonta tu Debata. Diboto Jahowa do aha na dumenggan tu hita. Si Aurora na tading di Amerika Serikat mandok, “Huboto ma, lam denggan do ngolukku molo mangoloi Jahowa.” Tutu do boi tahilala i. Hea do hamu mandapot laba ala mangoloi paretta ni Jahowa?

11. Songon dia tangiang boi mangurupi hita?

¹¹ Di situasi na maol, tangiang boi mangurupi hita asa toktong unduk. Ala mardosa hita, sipata maol do mangoloi Jahowa. Alai ikkon toktong do hita unduk tu Ibana. Sahalak panurat psalmen mandok di tangiangna, “Togu ma ahu marhitehite tondi ni haringgason.” (Ps. 51:14) Sahalak perintis biasa na margoar si Denise mandok, “Tikki maol au mangoloi sada paretta ni Jahowa, martangiang do au asa diurupi mangulahon na sittong.” Pos ma rohatta, dialusi Jahowa do tangiang sisongon i.​—Luk. 11:9-13.

12. Hombar tu Epesus 5:1, aha do na ikkon taulahon?

¹² Jaha Epesus 5:1. Ala “angka anak na dihaholongi” Jahowa do hita, marsitutu ma hita lao maniru Ibana. Boi do i taulahon marhite patuduhon holong, haburjuon, jala rade manalpuhon hasalaan. Molo diida halak na so mananda Jahowa pangalahotta na denggan, on boi mangonjar roha ni nasida mananda Debata. (1 Ptr. 2:12) Ikkon ditiru natua-tua do Jahowa tikki mangajari ianakkonna. Molo diulahon nasida i, on boi mangurupi akka ianakkon asa marale-ale tu Debata.

13. Aha do na boi taulahon asa barani?

¹³ Somalna, bangga do dakdanak tu bapakna jala lomo do rohana paboahon taringot bapakna tu na asing. Suang songon i ma, bangga do hita tu Jahowa. Las do rohatta paboahon taringot Ibana tu na asing. Ra, sarupa do pakkilalaanta songon Raja Daud na mandok, “Ingkon pujionku ma [Jahowa].” (Ps. 34:3, Bibel siganup ari) Alai songon dia molo parila hita? Songon dia carana asa boi hita barani? Pikkirhon ma las ni roha ni Jahowa dung tapaboa taringot Ibana tu na asing. Jala rimangi ma laba na didapot halak na asing molo marsiajar taringot Jahowa. Molo taulahon i, boi do i mambahen hita gabe barani. Diurupi Jahowa do halak Kristen di abad na parjolo asa toktong barani. Hita pe, urupanna do asa toktong barani.​—1 Tes. 2:2.

14. Boasa massai rikkot hita marbarita na uli?

¹⁴ Dang mardikkan Jahowa. Gariada las do rohana molo diida Ibana hita marsihaholongan dohot akka dongan na sian marragam bangso. (Ul. 10:34, 35) Sada cara na dumenggan lao patuduhon holong tu halak na asing, i ma paboahon barita na uli tu nasida. (Mat. 28:19, 20) Aha do laba ni ulaon on? Molo olo sasahalak manangihon barita na uli, gabe lam denggan ma ngoluna jala dapotna ma pakkirimon lao mangolu salelengna di Paradeiso.​—1 Tim. 4:16.

15-16. Aha do na boi mambahen hita marlas ni roha?

¹⁵ Ama na parholong do Jahowa. Lomo do rohana asa marlas ni roha keluargana. (Jes. 65:14) Nang pe godang hasusaan na taadopi saonari, alai gumodang do na boi mambahen hita marlas ni roha. Umpamana, pos do rohatta massai holong do roha ni Jahowa tu hita. Tadapot do parbinotoan na sittong sian Bibel. (Jer. 15:16) Dohot do hita gabe bagian sian keluarga na makkaholongi Jahowa, Patikna, dohot akka dongan.​—Ps. 106:4, 5.

¹⁶ Boi do hita toktong marlas ni roha ala taboto lam denggan do ngolutta haduan. Jala taboto do lao dipasiding Jahowa do sude hajahaton. Marhite Harajaonna, bahenon ni Debata ma saluhut tano on gabe Paradeiso. Jala las do rohatta lao paheheonna do haduan akka halak naung mate jala boi do hita pajuppang dohot nasida. (Joh. 5:28, 29) On mambahen las rohatta! Jala na rumikkot, pos do rohatta molo sude na di surgo dohot na di tano on holan pasangappon, mamuji, jala manomba Jahowa.