KISAH HIDUP
Aha pe na Huulahon, na Patut do i Ulahononku
LOBI sian tolu pulu taon, si Donald Ridley gabe sahalak pengacara na membela kasus hukum ni Sitindangi Ni Jahowa di pengadilan. Diurupi ibana do akka dokter dohot hakim asa mamboto na marhak do pasien menolak transfusi darah. Diurupi ibana do organisasitta monang di godang kasus hukum di Mahkamah Agung di Amerika Serikat. Dijou akka donganna do ibana si Don. Ringgas do ibana, serep rohana jala rela berkorban.
Di taon 2019, didok dokter adong sahit na langka di sistem saraf ni si Don. Jala dang adong dope ubatna. Dang sadia leleng, lam posi ma sahitna. Jala marujung ngolu ma ibana tanggal 16 Agustus 2019. On ma ceritana.
Au tubu taon 1954 di St. Paul, Minnesota, Amerika Serikat. Sederhana do natua-tuakku jala maragama Katolik do hami. Adong sada abangku, sada anggikku jala dua itokku. Tikki dakdanak, di sikkola Katolik do au marsikkola. Jala au do na mangurupi pastor tikki adong upacara di gereja. Alai dang godang na huboto taringot Bibel. Memang porsea do au adong do Debata na manompa saluhutna, alai dang pos rohakku tu gereja.
MAMPARSIAJARI HASITTONGAN
Di taon na parjolo au kuliah di jurusan hukum, ro ma dua Sitindangi tu jabukku. Tikki i, lagi sibuk do au manussi abit. Jadi didok halak i ro do muse annon nasida. Tikki ro muse halak i, husukkun ma, “Boasa ussonang ngolu ni halak na jahat sian halak na burju?” jala “Songon dia hita asa boi marlas ni roha?” Dilehon ma tu au bukku Kebenaran Yang Membimbing Kepada Hidup Yang Kekal dohot Kitab Suci Terjemahan Dunia Baru na marsampul hijau. Jala setuju do au lao marsiajar Bibel. Godang do na huboto sian parsiajaran on. Las do rohakku dung huboto Harajaon ni Debata do na lao mamaretta di tano on. Gabe huboto ma, alani pamarettaon ni jolma do umbahen godang hasusaan di portibi on.
Di mula ni taon 1982, hulehon ma dirikku tu Jahowa jala tardidi ma au di Kebaktian “Kebenaran Kerajaan” na dibahen di gedung na balga di St. Paul. Saminggu dukkon i, ro ma muse au tu gedung i lao ujian asa boi gabe pengacara. Di mula ni bulan Oktober, lulus ma au sian ujian i. Jala boi ma au gabe sahalak pengacara.
Di Kebaktian “Kebenaran Kerajaan” i, pajuppang ma au dohot si Mike Richardson, sahalak anggota Betel. Didok ibana ma nungnga adong be departemen hukum di kantor pusat. Gabe huingot ma hata ni sahalak Etiopia na disurat di Ulaon ni Apostel 8:36, jala husukkun ma dirikku, “Aha dope na mangambati au asa karejo di Departemen Hukum?” Ujungna, karejo ma au di Betel.
Dang lomo roha ni natua-tuakku ala gabe Sitindangi Ni Jahowa au. Disukkun bapakku ma au, aha do haroa untungna di au molo karejo di Betel. Hudok ma tu ibana na karejo gabe relawan do au disi. Jala hupaboa ma, adong do dilehon nasida tu au tunjangan 75 dolar AS ganup bulan.
Ala nungnga sanga hian au karejo di pengadilan, dang boi langsung au karejo di Betel. Jadi taon 1984 ma au mulai karejo di Betel Brooklyn, New York. Ditugashon ma au di Departemen Hukum. Ala nga hudapot pengalaman karejo di pengadilan, gabe lam rade ma au karejo di departemen on.
RENOVASI STANLEY THEATER
Stanley Theater tikki baru dituhor organisasi
Di bulan November taon 1983, dituhor organisasi ma Stanley Theater na adong di Jersey City, New Jersey. Dipangido akka donganta ma ijin lao paturehon sistem listrik dohot aek ni bangunan i. Tikki pajuppang nasida dohot pejabat pemerintah disi, dipaboa nasida ma na lao dipakke do Stanley Theater on gabe inganan kebaktian ni Sitindangi Ni Jahowa. Hape adong masalah. Hombar tu hukum ni Jersey City, holan di inganan ni penduduk do boi dibahen inganan lao beribadah. Hape Stanley Theater on di pusat bisnis do ingananna. Jadi dang olo pamaretta mangalehon ijin. Dipangido akka donganta ma naik banding, alai dang dilehon.
Di minggu na parjolo au karejo di Betel, diboan organisasi ma parsoalan on tu pengadilan. Ala nungnga hea au dua taon karejo di Pengadilan ni St. Paul, Minnesota, nungnga somal hubege akka parsoalan sisongon on. Sada sian kuasa hukumnami mandok nungnga hea Stanley Theater on dipakke tu marragam ulaon. Hea do dipakke gabe bioskop jala hea do dipakke gabe inganan ni konser musik. Jadi boasa gabe dang boi dipakke i lao gabe inganan beribadah? Dipertimbangkon pengadilan ma parsoalan on. Jala diputushon nasida ma molo pamaretta Jersey City nungnga mangalanggar kebebasan beragama. Dipangido pengadilan ma asa dilehon pamaretta i ijin di hami. Mulai sian i, boi ma huida songon dia Jahowa mamasu-masu organisasi marhite departemen hukum. Las do rohakku gabe bagian sian departemen i.
Mulai ma dipature akka donganta bangunan i. Jala godang do na dipature nasida. Dang sahat dope sataon dung dipature bangunan i, nga dibahen disi acara wisuda sikkola Gilead kelas 79, tanggal 8 September 1985. Sada hasangapon do di au ala boi mangurupi ulaon Harajaon di bagian departemen hukum. Jala las situtu do rohakku. Huhilala dang hea dapothu las ni roha sisongon on tikki gabe pengacara au najolo. Jala dipakke Jahowa do au muse lao mangurupi godang kasus hukum na asing.
MEMBELA HAK NI SITINDANGI ASA DANG MANJALO TRANSFUSI DARAH
Di taon 1980an, jotjot do akka dokter dohot rumah sakit dang mangargai keputusan ni Sitindangi na so olo manjalo transfusi darah. On tarlumobi masa tu akka donganta borua na naeng partus. Alana godang do hakim na marpikir dang adong hak ni borua i asa dang manjalo transfusi darah. Didok akka hakim, molo dang dilehon transfusi darah, gabe mate ma omakna. Tubu pe gellengna alai dang marina be.
Tanggal 29 Desember taon 1988, adong ma donganta borua na godang habis murdarna dung sae partus. I ma donganta si Denise Nicoleau. Hemoglobinna pe dang sahat tu 5. Jadi dipangido dokter ma asa ditransfusi ibana. Alai dang olo donganta si Nicoleau. Manogotna i, dipangido rumah sakit ma tu hakim asa dilehon ijin tu nasida lao mangalehon transfusi darah. Dang jolo disukkun hakim i pandapot ni donganta si Nicoleau. Gariada, dang adong dipaboa taringot i tu nasida. Pittor dilehon nasida do ijin tu rumah sakit i lao mangalehon transfusi darah.
Ari Jumat, tanggal 30 Desember, dilehon dokter ma transfusi darah tu donganta si Nicoleau. Hape, sasittongna dang setuju suami dohot keluargana. Botarina i, ditakkup ma donganta on dohot piga-piga sintua, ala marsitutu nasida mangambati dokter tikki naeng mangalehon transfusi tu donganta si Nicoleau. Jala di ari Sabtu manogot, tanggal 31 Desember, muncul ma barita taringot i di TV dohot Radio ni kota New York.
Dohot si Philip Brumley
Ari Senin manogot, makkatai ma au tu hakim ketua na margoar si Milton Mollen. Hupaboa ma taringot kasus i, jala hupaboa ma muse na dilehon hakim i do ijin lao mangalehon transfusi darah, hape dang jolo disukkun tu donganta na marsahit i. Dung i, dipangido si Mollen ma asa ro au tu kantorna lao mangulas taringot kasus i, dohot hukum na marlakku tusi. Dohot do si Philip Brumley, pengawasnami, lao mandongani au ro tu kantor ni Hakim Mollen i. Jala digokkon hakim Mollen i do tong pengacara ni rumah sakit i. Gabe tegang ma situasina. Dung i dibahen donganta si Brumley ma catatan jala dipatudu ma tu au. Isina, “Tenang hamu da.” Poda na denggan do i. Alana tikki i hira na naeng muruk do au lao patuduhon na sala do pengacara ni rumah sakit i.
Sian kiri tu kanan: Richard Moake, Gregory Olds, Paul Polidoro, Philip Brumley, au, dohot Mario Moreno—tim kuasa hukum ni organisasi tikki menangani kasus Watchtower v. Village of Stratton di Mahkamah Agung Amerika Serikat.—Ida Sedarlah! 8 Januari 2003
Dung sajom hami makkatai, didok hakim Mollen ma asa kasus on na parjolo diulas sogot. Tikki naeng mulak hami sian kantor i, didok hakim i ma pasti borat do sogot tugas ni pengacara ni rumah sakit i. Pasti maol do di pengacara i lao mambuktihon marhak do rumah sakit mamaksa donganta si Nicoleau asa manjalo transfusi darah. Hira na dipapos Jahowa do rohakku, na lao monang hami sogot. Las do rohakku ala olo Jahowa mamakke hami lao mangulahon lomo ni rohana.
Karejo ma hami sampe borngin lao pasahatton hatorangan na lao dipasahat hami di pengadilan sogot. Dang pola dao jarak ni kantor pengadilan i tu kantor Betel Brooklyn. Jadi godang do akka donganta sian departemen hukum na ro tusi. Dung ditangihon opat hakim hatorangannami, gabe diputushon nasida ma, sasittongna dang boi dilehon transfusi tu donganta i. Jala didok nasida, molo dilehon rumah sakit transfusi alai dang jolo disukkun pandapot ni halak na marsahit i, na melanggar hak asasi manusia do nasida disi.
Dipaboa pengadilan tertinggi New York marhak do donganta si Nicoleau dang manjalo transfusi darah. I ma sada sian opat kasus taringot darah na hea hutangani na sahat tu Mahkamah Agung. (Ida kotak “Piga-Piga Kasus na Monang di Mahkamah Agung.”) Jala hea do au rap dohot akka kuasa hukum Betel na asing menangani kasus taringot hak asuh anak, perceraian, sengketa bangunan dohot sengketa tanah.
KELUARGAKKU
Dohot istrikku, si Dawn
Pajuppang ma au dohot donganta borua na margoar si Dawn. Tikki i nungnga adong tolu ianakkonna alai nungnga marsirang be ibana dohot suamina na parjolo. Perintis do ibana, alai ibana do na mansari ngolu-ngolu di keluargana. Susa do ngoluna najolo. Alai gabe lomo do rohakku tu ibana ala marsitutu do ibana asa toktong manomba Jahowa. Taon 1992, tikki Kebaktian Distrik di New York na marjudul “Para Pembawa Terang”, hupaboa ma na lomo do rohakku tu ibana. Dung sataon, marhasohotan ma hami. Sada silehon-lehon sian Jahowa do istrikkon di au. Togu do parale-aleonna tu Jahowa, jala burju do halakna. Sai dibahen ibana do akka na denggan tu au ganup ari.—Poda 31:12.
Tikki marhasohotan hami, nungnga marumur 11, 13 dohot 16 taon ianakkonnami. Lomo do rohakku asa gabe ama na burju tu nasida. Jadi manat ma hujaha sude sijahaonta na mangulas taringot songon dia gabe orang tua tiri na denggan, jala huulahon do i. Memang saleleng martaon-taon sai adong do tantanganna, alai las do rohakku ala ujungna pos do roha ni akka dakdanak i tu au. Boi do au gabe dongan dohot bapakna. Las do rohanami manjalo akka dongan ni nasida ro tu jabunami jala lomo do rohanami mardongan dohot nasida.
Di taon 2013, pinda ma hami tu Wisconsin lao mangurus natua-tuanami. Alai tong do boi huurupi ulaon di Betel. Gabe sukarelawan sementara ma au lao mangurupi organisasitta di bidang hukum.
TOPPU MA MUBA NGOLUKKU
Di bulan September 2018, huhilala lam jotjot do au batuk. Tikki diperiksa dokter, dang boi diboto ibana aha do masalahna. Jadi dukkon i, didok dokter na asing ma asa lao au tu dokter saraf. Di bulan Januari 2019, didok dokter saraf ma na langka do hape sahitton. Jala boi do i berpengaruh tu sude dagingku.
Tolu ari dukkon i, tikki marolahraga au, madabu ma au jala gabe retak ma tangan kananhu. Sasittongna lomo hian do rohakku tu olahraga on, jala jago do au disi. Jadi tikki madabu au huboto ma, dang boi be hukendalihon akka otothu. Songgot do rohakku ala lam hatop do posi sahitton. Gabe lam maol ma au makkatai, mardalan dohot mangan.
Las hian do rohakku ala boi gabe sahalak pengacara na mangurupi organisasi ni Jahowa. Las hian do tong rohakku ala boi mambahen godang artikel na dijaha akka dokter, pengacara dohot hakim. Boi do muse au pasahatton hatorangan taringot hak ni Sitindangi Ni Jahowa lao mamillit pengobatan dohot operasi na so mamakke mudar di liat portibi on. Alai sarupa do pakkilalaanku songon hata ni si Lukas na disurat di Lukas 17:10, na mandok, ‘Hatoban na so marguna do au. Aha pe na huulahon, na patut do i ulahononku’.