Arga do Hamu di Jahowa!

 1. Aha do na diida Jahowa sian akka naposona?

“LAS do roha ni Jahowa mangida bangsona.” (Ps. 149:4) Pasti las do tong rohatta mamboto i! Akka sifat na denggan do na diparrohahon Jahowa sian hita. Diboto Ibana do aha na boi taulahon jala lomo do rohana asa jonok hita tu Ibana. Molo setia hita tu Jahowa, toktong ma hita marale-ale tu Ibana salelengna!​—Joh. 6:44.

 2. Boasa adong halak na marpikkir dang holong roha ni Jahowa tu ibana?

² Adong do ra na mandok, ‘Pos do rohakku na dihaholongi Jahowa akka naposona. Alai anggo secara pribadi, dang pos dope rohakku na dihaholongi Jahowa do au.’ Boasa adong na marpikkir songon i? Si Okta,b na hea dijahati tikki gelleng mandok, “Tikki tardidi au, las hian do rohakku. Alani i merintis ma au. Alai dung 15 taon au tardidi, sai huingot ma muse akka na jahat na dibahen tu au tikki gelleng. Alani i, dang pos be rohakku na dihaholongi Jahowa au, jala merasa ma au dang boi be hubahen las rohana.” Si Juli, sahalak perintis na tong songon si Okta pengalamanna tikki gelleng mandok, “Lomo do rohakku mambahen las roha ni Jahowa. I do makana hulean ngolukku tu Ibana. Alai sipata, dang pos rohakku na dihaholongi Jahowa au.”

 3. Aha do na lao taulas di artikel on?

³ Songon si Okta dohot si Juli, pasti holong hian do rohatta tu Jahowa. Alai sipata, olo do dang pos be rohatta na dihaholongi Jahowa hita. Alai boasa berbahaya molo songon i perasaanta? Jala aha do na boi mangurupi hita tikki ro pikkiran negatif sisongon i? Taulas ma akka sukkun-sukkun i di artikel on.

 4. Boasa berbahaya molo dang pos be rohatta na dihaholongi Jahowa do hita?

⁴ Molo pos do rohatta na dihaholongi Jahowa hita, gabe semangat ma hita. Alai molo dang pos rohatta, ‘moru ma gogotta’. (Poda 24:10) Molo nungnga gale hita, dang porsea be hita tu holong ni Debata, gabe mura ma hita diserang Sibolis.​—Eps. 6:16.

 5. Songon na didok piga-piga donganta, aha do akibatna molo ragu hita tu holong ni Jahowa?

⁵ Adong do piga-piga donganta na ragu tu holong ni Jahowa jala merasa dang dipardulihon Jahowa ibana. Alani i, gabe gale ma haporseaonna. Misalna si James sahalak sintua mandok, “Nang pe karejo di Betel au jala melayani di sidang na marbahasa asing, alai ragu do au boi do sude na hubahen on mambahen las roha ni Jahowa? Jala hea do ragu au, ditangihon Jahowa do tangiakku manang na dang.” Si Eva, sahalak pelayan sepenuh waktu mandok, “Berbahaya do molo torus tadok di rohatta, dang dihaholongi Jahowa be hita. Alana, boi do gabe dang sian nasa rohatta be hita mangulahon tugasta. Dang holan i, boi do gabe dang olo be hita mangulahon tugas i jala dang tahilala las ni roha manomba Jahowa.” Si Mikael, sahalak sintua jala perintis biasa mandok, “Molo dang pos be rohatta na dihaholongi Jahowa hita, boi do gabe tatinggalhon Ibana.”

 6. Aha do na ikkon taulahon molo dang pos be rohatta na dihaholongi Jahowa hita?

⁶ Sian pengalaman ni akka donganta on, taboto ma boi do gabe sega haporseaotta molo dang pos rohatta na dihaholongi Jahowa hita. Molo songon i do pakkilalaatta, aha do na ikkon taulahon? Pittor hatop ma tabolokkon pikkiran sisongon i. Tapangido ma tu Jahowa, asa digatti ‘arsak ni rohatta’ i dohot ‘hadameon na so boi diattusi jolma, na boi manjaga roha dohot pikkiranta’. (Ps. 139:23; Plp. 4:6, 7) Ingot ma, dang holan hamu na makkilala sisongon i. Akka donganta na asing pe tong do berjuang mangalo pikkiran negatif i. Naposo ni Jahowa najolo pe, berjuang do mangatasi i. Saonari taparsiajari ma pengalaman ni Apostel Paulus.

 7. Aha do tantangan ni si Paulus?

⁷ Hea do hamu merasa paborattu tanggung jawabmuna? Molo hea, pasti boi do diattusi hamu pakkilalaan ni si Paulus. Hea do si Paulus marsak alani “sude huria”. (2 Kor. 11:23-28) Marsahit na parah do hamu nuaeng? Marsak do hamu alani i? Si Paulus pe hea do marsahit na parah. Didok ibana ma sahitna i ‘suga di bagasan daging’. Jala ditangiakkon ibana do asa malum sahitna i. (2 Kor. 12:7-10) Hea do metmet rohamuna alani kelemahanmuna? Si Paulus pe hea do songon i. Didok ibana, “Jolma na dangol do au.” Alana ikkon berjuang do ibana asa boi mangulahon na sittong.​—Rom 7:21-24.

 8. Boasa boi si Paulus toktong setia?

⁸ Nang pe godang tantanganna, alai toktong do setia si Paulus manomba Jahowa. Boasa boi ibana setia? Nang pe metmet rohana alani kelemahanna, alai porsea do ibana tu tobusan. Diingot ibana do janji ni Jesus na mandok, “Ganup na patuduhon haporseaon tu [Jesus] . . . mandapot hangoluan na saleleng ni lelengna.” (Joh. 3:16; Rom 6:23) Sian godang halak na porsea i, termasuk do si Paulus. Porsea do si Paulus, molo bertobat sasahalak nang pe hea mangulahon dosa na balga, sesaon ni Jahowa do dosana i.​—Ps. 86:5.

 9. Parsiajaran aha do na tadapot sian hata ni si Paulus di Galatia 2:20?

⁹ Porsea do si Paulus na dihaholongi Jahowa ibana. Alana diboto si Paulus do, dilehon Jahowa do Anakna i mate humokkop ibana. (Jaha Galatia 2:20.) Taparrohahon ma hata ni si Paulus di ayat i na mandok, ‘Anak ni Debata i makkaholongi au jala mangalehon ngoluna humokkop au.’ Dang gabe didok roha ni si Paulus dang layak ibana dihaholongi. Jala dang dipasombu si Paulus ro pikkiran sisongon on tu rohana, ‘Boi do huida dihaholongi Jahowa akka dongan. Alai dang boi hurasahon na dihaholongi Jahowa au.’ Alani i, dipaingot si Paulus ma akka dongan na di Rom, “Mate do Kristus i humokkop hita tikki mardosa dope hita.” (Rom 5:8) Takkas ma massai balga do holong ni Jahowa tu hita!

10. Aha do na boi taparsiajari sian Rom 8:38, 39?

¹⁰ Jaha Rom 8:38, 39. Diboto si Paulus do, massai balga do holong ni roha ni Debata. I do alana disurat ibana, “Dang adong na boi manirang hita sian holong ni Debata.” Diingot si Paulus do songon dia sabar ni Jahowa tu halak Israel. Diingot ibana do muse songon dia Jahowa patuduhon asi ni rohana tu ibana. Hira na didok si Paulus ma songon on, ‘Nungnga dilean Jahowa Anakna i mate lao manobus au. Attong boasa ma gabe ragu au muse tu holong ni Jahowa?’​—Rom 8:32.

11. Nang pe hea diulahon si Paulus dosa na balga songon na disurat di 1 Timoteus 1:12-15, aha do na mambahen pos rohana na dihaholongi Jahowa ibana?

¹¹ Jaha 1 Timoteus 1:12-15. Molo diingot si Paulus hasalaanna sebelum halak Kristen, pasti manolsoli hian do ibana. Hea do diakkui si Paulus, “Dosakku ma na unggodang.” Sebelum mananda hasittongan, jotjot do si Paulus menganiaya halak Kristen sian kota tu kota. Adong do na dipenjarahon ibana. Jala didukung ibana do molo dipamate halak Kristen. (Ul. 26:10, 11) Bayangkon hamu ma songon dia perasaan ni si Paulus tikki pajuppang dohot akka na poso di huria naung mate natua-tuana alani ibana. Pasti sai disolsoli si Paulus do pambahenanna i. Alai disadari ibana do, dang tarbahenna be manguba situasi i. Porsea do si Paulus, mate do Jesus humokkop dosana. Alani i do umbahen na disurat ibana, “Alai ala asi ni roha ni Debata na massai balga i do umbahen na boi au songon saonari on.” (1 Kor. 15:3, 10) Aha do parsiajaranna tu hita? Pos ma rohatta, mate do tong Jesus humokkop hita asa boi hita marale-ale tu Jahowa. (Ul. 3:19) Molo di Jahowa, na penting aha na taulahon saonari dohot di ari na naeng ro do, dang aha na taulahon najolo i, dang soal naung Saksi hita manang na dang tikki i.​—Jes. 1:18.

12. Tikki tahilala dang mararga hita jala merasa dang layak dihaholongi, songon dia do 1 Johannes 3:19, 20 mangurupi hita?

¹² Tikki tarimangi tobusan ni Jesus, olo do ra ro tu rohatta, ‘Ahh, dang layak au manjalo i.’ Boasa sappe songon i perasaanta? Ala licik do roha i, olo do hita tartipu. Gabe didok rohatta ma dang mararga be hita, jala dang layak dihaholongi. (Jaha 1 Johannes 3:19, 20.) Molo songon i, porlu do taingot on, “umbalga do Debata sian rohatta”. Molo tung pe ro tu rohatta dang dihaholongi Jahowa be hita, jala dang sesaonna dosatta, taingot ma holong hian do roha ni Jahowa tu hita, jala sesaonna do dosatta i. Tapapos ma rohatta na sai dihaholongi Jahowa do hita. Carana, ringgas ma hita marsiajar Bibel, torus ma hita martangiang, jala jotjot ma hita bergaul tu akka dongan sahaporseaon. Boasa penting i taulahon?

13. Aha do manfaatna molo taparsiajari Bibel? (Ida kotak “Hata ni Debata Mangurupi Nasida”.)

¹³ Taparsiajari ma Bibel ganup ari. Molo taparsiajari Bibel, gabe lam takkas ma tatanda akka parange ni Jahowa. Dung i, gabe boi ma taida na holong hian do roha ni Jahowa tu hita. Molo tarimangi Hata ni Debata ganup ari, gabe boi ma tapadenggan akka pikkiranta na sala. (2 Tim. 3:16) Sahalak sintua na margoar si Kevin, paboahon carana asa boi paposson rohana na di haholongi Jahowa do ibana. Didok, “Tikki hujaha jala hurimangi Psalmen 103, gabe boi ma huida na dihaholongi Jahowa do au, jala boi ma hupadenggan cara marpikkirhu. Gabe huboto ma songon dia do Jahowa mangida au.” Donganta si Eva naung dipaboa nakkin mandok, “Ganup borngin hubahen do tikki mangarimangi pikkiran ni Jahowa. Hasilna dame ma rohakku jala lam togu ma haporseaokku.”

14. Songon dia tangiang boi mangurupi hita?

¹⁴ Toktong ma martangiang. (1 Tes. 5:17) Biasana, asa lam togu hubunganta tu donganta, ikkon jotjot do hita makkatai tu ibana. Jala ikkon tapaboa do perasaanta tu ibana. Songon i do tong hubunganta tu Jahowa. Tikki tapaboa perasaan dohot pikkiranta di bagasan tangiang, i patuduhon pos do rohatta na dihaholongi Jahowa hita. (Ps. 94:17-19; 1 Joh. 5:14, 15) Donganta si Juli naung dipaboa nakkin mandok, “Tikki martangiang, hupaboa do sude na di bagasan rohakku tu Jahowa, dang holan na masa sadari i. Gabe boi ma huida Bapak na parholong do Jahowa i, dang songon bos.”​—Ida kotak “Nungnga Dijaha Hamu Bukku On?”

15. Ise do na dipakke Jahowa lao patuduhon holongna tu hita?

¹⁵ Bergaul ma hita dohot akka dongan sahaporseaon. Silehon-lehon sian Jahowa do akka dongan sahaporseaon. (Jak. 1:17) Alani holong ni Jahowa tu hita, dilean do akka dongan sahaporseaon di huria, na ‘sai patuduhon holong ni roha’ tu hita. (Poda 17:17) Di surat ni si Paulus tu halak Kristen di Kolosse, dipaboa ibana do piga-piga goar ni dongan sahaporseaon na ‘patoguhon rohana’. (Kol. 4:10, 11) Jesus sandiri pe hea do dipatogu suru-suruan dohot akka siseanna. Jadi, pasti do porlu hita dipatogu akka donganta.​—Luk. 22:28, 43.

16. Songon dia akka dongan sahaporseaon boi mangurupi hita asa jonok tu Jahowa?

¹⁶ Olo do hamu diurupi akka dongan sahaporseaon? Molo olo hita paboahon arsak ni rohatta tu akka dongan, boi ma nasida patoguhon hita. Jala taingot ma molo tapaboa pe akka arsakta i, dang na patuduhon na gale haporseaotta. Donganta si James naung dipaboa nakkin mandok, “Godang hian do manfaatna molo jonok hita tu akka dongan na togu haporseaonna. Tikki susa pikkiranku, sabar do akka dongan manangihon au. Jala dipapos ma rohakku na holong do roha nasida tu au. Sude na dibahen ni akka dongan i patuduhon na dihaholongi Jahowa do au.” Jadi penting hian do asa sai jonok tu akka dongan sahaporseaon.

17-18. Ise do na ikkon tatangihon, jala boasa?

¹⁷ Lomo do roha ni Sibolis asa menyerah hita mangulahon na sittong. Lomo do muse roha ni Sibolis asa porsea hita, dang holong be roha ni Jahowa tu hita. Jala asa merasa hita, dang layak diselamatton. Alai dang toho i.

¹⁸ Dihaholongi Jahowa do hita. Massai arga do hita di Ibana. Molo taoloi Ibana, toktong ma hita “di bagasan holongna” saleleng ni lelengna songon Jesus. (Joh. 15:10) Unang ma tatangihon hata ni Sibolis i, jala unang ma olo hita tartipu dibahen rohatta sandiri na sai mandok, ‘Dang dihaholongi Jahowa be au.’ Alai, Jahowa ma tatangihon, ala sai akka na denggan do na diida Ibana sian hita. Pos ma rohatta, “las do roha ni Jahowa mangida bangsona”, termasuk hamu!