Diurupi Jahowa do Hamu asa Marhasil

1-2. (a) Boasa dang tarsonggot hita molo masa sitaonon tu hita? (b) Aha do na lao tabahas di artikel on?

ALA naposo ni Jahowa do hita, dang songgot be rohatta molo masa tu hita sitaonon. Bibel mandok, “Ikkon talewati do godang hasusaan lao masuk tu Harajaon ni Debata”. (Ul. 14:22) Taboto do muse, adong do piga-piga masalah na so boi taselesaihon sahat tu na mangolu hita di tano na imbaru. Di tikki i “dang adong be hamatean nang arsak ni roha, nang angguk-angguk, nang na haccit”.​—Pgk. 21:4.

² Dang sai dilindungi Jahowa hita sian akka masalahta, alai diurupi Ibana do hita asa martahan mangadopi i. Parrohahon ma na didok Apostel Paulus tu halak Kristen na di Rom. Parjolo sahali dipaboa ibana do akka tantangan na diadopi nasida. Alai dang holan i, didok ibana do muse, “Marhite pangurupion ni Kristus na makkaholongi hita, boi do hita monang mangadopi sudena i.” (Rom 8:35-37) Maksud ni si Paulus, boi do hamu marhasil mangadopi tantangan aha pe na masa tu hamu molo diurupi Jahowa. Di artikel on, tabahas ma songon dia Jahowa mangurupi si Josep marhasil mangadopi tantanganna jala songon dia Jahowa mangurupi hamu.

 3. Aha do na toppu masa tu si Josep?

³ Ala umholong do roha ni si Jakkob tu anakna si Josep, gabe sogo ma roha ni akka abangna tu ibana. (1 Mus. 37:3, 4) Tikki adong kesempatan, dijual akka abangna i ma si Josep tu akka partiga-tiga na sian Midian. Diboan akka partiga-tiga i ma si Josep tu Mesir na daona marratus kilometer. Jala dijual ma muse ibana tu si Potipar, i ma kepala ni akka pengawal ni si Firaun. Hatop do muba situasi di ngolu ni si Josep. Sian anak hasian ni bapakna hian gabe hatoban di Mesir.​—1 Mus. 39:1.

 4. Sitaonon aha do na boi masa tu hita?

⁴ Didok di Bibel boi do masa tu hita ‘sude akka na so taharappon’. (Pjm. 9:11) Sipata, masa do tu hita ‘sitaonon na somal masa tu akka jolma’. (1 Kor. 10:13) Manang olo do masa sitaonon tu hita ala taihutton Jesus. Contohna, olo do diejek hita, ditentang bahkan dianiaya alani haporseaotta. (2 Tim. 3:12) Alai dang soal sitaonon aha pe na masa tu hamu, boi do Jahowa mambahen hamu marhasil. Taida ma songon dia Jahowa mangurupi si Josep asa marhasil.

 5. Aha do na disimpulhon si Potipar taringot si Josep? (1 Mus. 39:2-6)

⁵ Jaha 1 Musa 39:2-6. Diida si Potipar, halak na terampil jala pekerja keras do si Josep. Boi do diida ibana ‘sai marhasil sude ulaon ni Josep dibahen Jahowa’.b Alani i dipillit ma si Josep gabe pengawas di jabu ni si Potipar, jala dipasahat do sude arta ni si Potipar tu ibana. Gabe lam mamora ma si Potipar.

 6. Songon dia perasaan ni si Josep tikki gabe hatoban di jabu ni si Potipar?

⁶ Bayakkon ma songon dia perasaan ni si Josep tikki gabe hatoban di jabu ni si Potipar. Aha do na paling penting di ibana tikki i? Asa diparrohahon si Potipar do jala diangkat jabatanna? Daong. Lomo do roha ni si Josep asa dibebasson ibana jala boi muse pajuppang dohot bapakna. Nang pe timbo jabatan ni si Josep, alai hatoban dope ibana di jabu ni si Potipar na so manomba Jahowa. Dang dibahen Jahowa asa dibebasson si Potipar ibana. Gariada di pudian ni ari gabe lam parah do situasi na diadopi si Josep.

 7. Boasa lam parah situasi ni si Josep? (1 Musa 39:14, 15)

⁷ Songon na dipaboa di 1 Musa bindu 39, lomo do roha ni istri ni si Potipar tu si Josep jala mulak-ulak do ibana manggoda si Josep. Alai torus do ditolak si Josep godaanna i. Gabe sogo ma roha ni istri ni si Potipar tu si Josep jala ditudu ma si Josep naeng memerkosa ibana. (Jaha 1 Musa 39:14, 15.) Tikki dibege si Potipar on, dipenjarahon ma si Josep. Di penjara i ma ibana saleleng martaon-taon. (1 Mus. 39:19, 20) Tu inganan na songon dia do si Josep dipenjarahon? Hata Heber na dipakke si Josep lao manggombarhon “penjara” boi do lapatanna “lubang na massai golap”, jala dang adong na boi diulahon ibana disi. (1 Mus. 40:15) Dipaboa do muse di Bibel, tikki di penjara si Josep diratte do patna dohot rukkungna mamakke ratte na sian bosi. (Ps. 105:17, 18) Lam parah do situasi ni si Josep, sian hatoban na dihaporseai hian gabe sahalak tahanan.

 8. Nang pe lam parah hasusaan na taadopi, aha do na porlu taingot?

⁸ Hea do lam parah situasimuna hape nungnga jotjot ditangiakkon hamu i tu Jahowa? Olo do masa songon i. Dang sai dilindungi Jahowa hita sian sude hasusaan na masa di portibi na dirajai ni Sibolis on. (1 Joh. 5:19) Alai nang pe songon i, taingot ma on: Diparrohahon Jahowa do aha na masa tu hamu jala parduli do Ibana tu hamu. (Mat. 10:29-31; 1 Ptr. 5:6, 7) Asing ni i, marjanji do muse Jahowa, “Dang tadikkonokku ho jala dang pasombuokku ho.” (Heb. 13:5) Pos ma rohamuna urupan ni Jahowa do hamu asa martahan mangadopi situasi na parah, bahkan nang pe didok rohamuna hira na so adong be jalan keluarna. Saonari taida ma songon dia Jahowa mangurupi si Josep.

 9. Aha do na patuduhon na didongani Jahowa do si Josep tikki di penjara? (1 Musa 39:21-23)

⁹ Jaha 1 Musa 39:21-23. Nang pe susa ngolu ni si Josep tikki di penjara, alai dibahen Jahowa do ibana marhasil. Songon dia carana? Berupaya do si Josep asa boi dihaporseai kepala penjara songon na diulahon ibana tu si Potipar. Ujungna disuru kepala penjara i ma ibana gabe pengawas ni sude tahanan na di penjara i. Bibel mandok, “Pos do roha ni kepala penjara i di sude ulaon na dipasahat ibana tu si Josep.” Godang do ulaon na boi dikarejohon si Josep saleleng di penjara. Luar biasa do on! Coba ma jo tapikkirhon on, boasa boi sahalak tahanan na ditudu naeng memperkosa istri ni pejabat ujungna boi dihaporseai? Dipaboa do alusna di 1 Musa 39:23, “Didongani Jahowa do si Josep, jala dibahen Jahowa do marhasil sude ulaonna.”

10. Na merasa marhasil do si Josep di sasude? Patorang ma.

¹⁰ Coba ma muse tapikkirhon songon dia perasaan ni si Josep. Ditudu ibana mangulahon na jahat jala dipenjarahon. Menurut hamu na merasa marhasil do si Josep di sasude? Daong. Lomo do roha ni si Josep asa malua sian penjara i, dang gabe halak na boi dihaporseai kepala penjara. I do alana dipangido ibana do tu tahanan na naeng dipalua, asa paboahon taringot ibana tu si Firaun. (1 Mus. 40:14) Alai dung kaluar tahanan i sian penjara, lupa do ibana paboahon taringot si Josep tu si Firaun. Gabe di penjara i ma torus si Josep saleleng dua taon. (1 Mus. 40:23; 41:1, 14) Nang pe songon i, toktong do dibahen Jahowa si Josep marhasil. Songon dia carana?

11. Kesanggupan aha do dilean Jahowa tu si Josep, jala songon dia i mambahen saut lomo ni roha ni Jahowa?

¹¹ Tikki di penjara si Josep, dibahen Jahowa ma si Firaun mandapot dua nipi. Marsak do si Firaun mamikkiri arti ni nipina i. Jadi tikki diboto ibana si Josep boi mangartihon nipi, disuru ma si Josep ro. Alani bantuan ni Jahowa boi ma dipaboa si Josep arti ni nipi ni si Firaun. Terkesan do muse si Firaun alani saran na dipaboa si Josep. Diida si Firaun, na didongani Jahowa do si Josep. Alani i, dipillit si Firaun ma si Josep gabe pangurus sipanganon di sude luat na di Mesir. (1 Mus. 41:38, 41-44) Belakangan masa ma haraparon na parah dang holan di Mesir alai sahat tu Kanaan, tempat tinggal ni keluarga ni si Josep. Ala nungnga gabe pangurus sipanganon si Josep, gabe boi ma ibana menyelamatton keluargana jala boi melindungi garis keturunan ni Mesias.

12. Songon dia Jahowa mambahen si Josep marhasil?

¹² Coba ma pikkirhon na masa tu si Josep. Ise do na mambahen si Potipar mamparrohahon si Josep sahalak hatoban? Ise do na mambahen penjaga penjara porsea tu si Josep sahalak tahanan? Ise do na mambahen si Firaun marnipi, jala ise do na mangalehon kesanggupan tu si Josep paboahon lapatan ni nipi i? Ise do na mambahen si Firaun melantik si Josep gabe pangurus sipanganon di Mesir? (1 Mus. 45:5) Takkas ma, Jahowa do na mambahen si Josep gabe marhasil. Nang pe di mulana naeng dibunu akka abangna si Josep, alai boi do diuba Jahowa situasi i gabe dalan lao pasautton lomo ni rohana.

13. Sai campur tangan do Jahowa di sude na masa di ngolutta? Patorang ma.

¹³ Aha do na boi taparsiajari sian si Josep? Sai dilindungi Jahowa do hita sian sude hasusaan na taadopi? Sai campur tangan do Jahowa di sude na masa di ngolutta? Daong. Dang songon i dipaboa di Bibel. (Pjm. 8:9; 9:11) Alai taingot ma tikki taadopi hasusaan, diparrohahon Jahowa do hita jala ditangihon Ibana do tangiangta. (Ps. 34:15; 55:22; Jes. 59:1) Boi do diurupi Jahowa hita asa martahan mangadopi hasusaatta. Songon dia carana?

14. Songon dia do Jahowa mangurupi hita tikki susa?

¹⁴ Sada cara ni Jahowa mangurupi hita, i ma dipatogu jala diapuli do hita di tikki na pas. (2 Kor. 1:3, 4) On ma na dihilala donganta si Eziz na di Turkmenistan. Dijatuhi hukuman penjara do ibana dua taon alani haporseaonna. Didok ibana, “Manogotna i sebelum dimulai persidangan, adong ma dongan na patuduhon Jesaya 30:15 tu au na mandok, ‘Molo torus do hamu porsea jala dang busisaon, lam margogo ma hamu.’ Ayat on ma na mangurupi au asa toktong tenang jala mangandalhon Jahowa manang aha pe na masa. Saleleng di penjara, mangarimangi ayat on ma na mambahen au togu.” Boi do diingot hamu songon dia Jahowa mangapuli jala patoguhon hamu di tikki na pas?

15-16. Aha do na boi taparsiajari sian pengalaman ni si Tori?

¹⁵ Jotjot do dang tasadari na diurupi Jahowa hita manaon sitaonon na masa tu hita. On ma na ujungna disadari sahalak donganta borua na margoar si Tori. Berjuang melawan kanker do anakna si Mason saleleng onom taon sahat tu na mate. Pasti hancur hian do perasaan ni si Tori. Didok ibana, “Huhilala saleleng gabe natua-tua au, on ma na umhaccit na hea huhilala. Yakin do au natua-tua na asing pe setuju do mandok, umhaccittan do mangida gellengniba marsitaonon sian apala iba sandiri na mengalami.”

¹⁶ Nang pe lungun hian roha ni si Tori mangida anakna marsahit, alai belakangan dirimangi ibana ma songon dia Jahowa mangurupi ibana asa martahan. Didok ibana, “Molo huingot-ingot muse, sebenarna diurupi Jahowa do au tikki na marsahit i anakku. Misalna, nang pe dang boi dope si Mason dikunjungi, alai sai ro do akka dongan tu rumah sakit mangida ibana. Hape dua jom ma pardalanan ni nasida marmotor tusi. Sai adong do akka dongan di ruang tunggu na mangurupi hami jala paradehon kebutuhannami. Nang pe susa hian hami di tikki i, alai dang hea hami hahurangan.” Dilehon Jahowa do sude na dihaporluhon si Tori dohot si Mason asa boi martahan.—Ida kotak “Dilehon Jahowa do Sude na Dihaporluhon Hami.”

17-18. Aha do na porlu taulahon asa lam taargai pangurupion ni Jahowa tikki susa hita? (Psalmen 40:5)

¹⁷ Jaha Psalmen 40:5. Sasahalak na mendaki gunung berupaya do asa sahat tu puncak. Alai tikki di pardalanan, maradi do ibana sasatokkin lao menikmati pemandangan. Sarupa songon i ma, porlu do hita taratur maradi lao mamikkirhon songon dia Jahowa mambahen hita marhasil mangadopi hasusaatta. Setiap ari, sukkun ma tu dirimuna, ‘Pasu-pasu aha do na hujalo sian Jahowa sadarion? Nang pe dang sae dope masalahku, alai songon dia Jahowa mangurupi au asa boi martahan?’ Berupaya ma hamu ganup ari mamikkirhon pinomatna sada pasu-pasu ni Jahowa na mangurupi hamu asa marhasil.

¹⁸ Olo do ra ditangiakkon hamu asa dipaujung sitaononmuna i. Memang denggan do molo ditangiakkon hamu i. (Plp. 4:6) Alai unang ma lupa hita tu akka pasu-pasu na tadapot saonari. Marjanji do Jahowa patoguhon jala mangurupi hita asa toktong martahan. Jadi mandok mauliate ma tu Jahowa ala diurupi do hamu. Jala ida hamu ma songon dia Jahowa mangurupi hamu asa marhasil nang pe maol sitaononmuna, songon na dibahen Ibana tu si Josep.​—1 Mus. 41:51, 52.