Toktong ma Bahen Hamu Marsigorgor “Api na sian Jahowa”

 1. Songon dia do Bibel manggombarhon cinta sejati?

“DOS SONGON api na marsigorgor do [holong] i, api na sian Jahowa. Aek na margalumbang pe, dang boi pamatehon holong i. Sunge na doras pe, dang boi mangauppon i.”b (Ende 8:6, 7) Massai uli do digombarhon cinta sejati i! Ayat on boi paposson roha ni pasangan suami istri: Boi do toktong hamu marsihaholongan.

 2. Aha do na ikkon diulahon suami dohot istri asa unang ngali holong ni nasida?

² Porlu do upaya asa boi sapasang suami istri toktong marsihaholongan saleleng mangolu nasida. Bayakkon ma jo contoh on. Boi do toktong marsigorgor api unggun molo adong halak na manambai sobanna. Molo dang ditambai sobanna, pasti gabe mittop ma api i. Dos songon i ma, boi pe toktong togu holong ni suami dohot istri molo torus nasida patoguhon hubungan ni nasida. Olo do sipata sapasang suami istri merasa nungnga lam ngali holong ni nasida, tarlumobi tikki adong masalah parhepengon, masalah kesehatan, manang tekanan lao pagodang-godangkon dakdanak. Molo nungnga menikah hamu, songon dia do carana asa toktong marsigorgor “api na sian Jahowa” i di perkawinanmuna? Di artikel on, tabahas ma tolu cara songon dia asa bahagia jala toktong togu perkawinanmuna.c

 3. Boasa parale-aleon na togu tu Jahowa boi mangurupi suami dohot istri asa toktong marsihaholongan? (Parjamita 4:12) (Ida gambar.)

³ Asa toktong marsigorgor “api na sian Jahowa”, ikkon togu do parale-aleon ni suami dohot istri tu Jahowa. Alana molo diargai nasida do parale-aleonna dohot Jahowa, pasti dioloi nasida do paretta ni Jahowa. On ma na mangurupi nasida pasidikkon jala mangatasi masalah na boi mambahen ngali holong ni nasida. (Jaha Parjamita 4:12.) Asing ni i, halak na togu parale-aleonna tu Jahowa berupaya do maniru sifat ni Jahowa, songon haburjuon, sabar, jala rade manalpuhon hasalaan. (Eps. 4:32–5:1) Molo dipatudu suami dohot istri do akka sifat i, gabe lam togu ma hubungan ni nasida. Sahalak donganta borua na margoar si Lena naung menikah lobi sian 25 taon mandok, “Ummura do patuduhon holong dohot respek tu halak na togu parale-aleonna tu Jahowa.”

 4. Boasa dipillit Jahowa si Josep dohot si Maria gabe natua-tua ni Messias?

⁴ Parrohahon ma contoh ni si Josep dohot si Maria. Sian godang pinoppar ni si Daud, nasida do na dipillit Jahowa lao gabe natua-tua ni Messias. Alana togu do parale-aleon ni nasida tu Jahowa, jala diboto Jahowa pasti diutamahon nasida do Ibana di perkawinan ni nasida. Hamu akka naung menikah, aha do na boi diparsiajari hamu sian si Josep dohot si Maria?

 5. Aha do na boi ditiru akka suami sian si Josep?

⁵ Rade do si Josep mangihutton petunjuk sian Jahowa, jala on ma na mambahen ibana gabe suami na burju. Di tolu peristiwa, dijalo ibana do petunjuk sian Jahowa taringot keluargana. Pittor dioloi ibana do petunjuk i, nang pe maol di ibana. (Mat. 1:20, 24; 2:13-15, 19-21) Ala diihutton si Josep do petunjuk sian Jahowa, gabe terlindung ma si Maria jala terpenuhi ma kebutuhanna. Pasti gabe lam tamba ma holong dohot respek ni si Maria tu si Josep! Hamu akka suami, boi do ditiru hamu si Josep molo dilului hamu petunjuk sian Bibel lao mangurus keluargamuna.d Molo diulahon hamu akka petunjuk i nang pe dang sai mura i di hamu, on patuduhon na holong do rohamuna tu istrimuna jala gabe lam togu ma perkawinanmuna. Sahalak donganta borua di Vanuatu naung menikah lobi sian 20 taon mandok, “Tikki dilului suamikku petunjuk sian Jahowa jala diulahon ibana i, gabe lam respek ma au tu ibana. Gabe merasa aman ma au, jala gabe pos rohakku tu keputusanna.”

 6. Aha do na boi ditiru akka istri sian si Maria?

⁶ Togu do parale-aleon ni si Maria tu Jahowa, jala haporseaonna dang bergantung tu si Josep. Takkas do diboto ibana Surat na Badia.e Dilehon ibana do muse tikkina lao mangarimangi i. (Luk. 2:19, 51) Takkas ma, parale-aleon ni si Maria na togu tu Jahowa mambahen ibana gabe istri na burju. Saonari godang do akka istri na berupaya maniru teladan ni si Maria. Contohna sahalak donganta na margoar si Emiko mandok, “Tikki lajang au, adong do hubahen rutin rohanikku. Alai dung menikah, suamikku do na martangiang tu hami jala manguluhon ibadat keluarganami. Alai lam leleng gabe bergantung tu suamikku do haporseaokku. Husadari ma tanggung jawabhu do manjaga parale-aleokku tu Jahowa. Jadi hubahen ma tikki sahalakku lao martangiang tu Ibana, manjaha Bibel, jala mangarimangi isina.” (Gal. 6:5) Hamu akka istri, molo torus hamu berupaya patoguhon parale-aleonmuna tu Jahowa, gabe lam godang ma alasan ni suamimuna lao mamuji jala makkaholongi hamu.—Poda 31:30.

 7. Aha do na boi ditiru suami dohot istri sian si Josep dohot si Maria?

⁷ Kerja sama do si Josep dohot si Maria patoguhon hubungan ni nasida tu Jahowa. Diboto nasida massai penting do rap manomba Jahowa sakeluarga. (Luk. 2:22-24, 41; 4:16) Bisa jadi dang sai mura mangulahon i, tarlumobi ala nungnga adong gelleng ni nasida. Alai marhasil do nasida mangulahon i. Gabe sitiruon do nasida tu akka pasangan saonari! Molo nungnga adong gellengmuna, bisa jadi dang sai mura di hamu ro tu parpunguan manang mambahen jadwal ibadat keluarga. Olo do muse gabe lam maol hamu mangatur tikki lao marsiajar manang martangiang rap dohot pasanganmuna. Alai ingot ma molo rap hamu manomba Jahowa, gabe lam jonok ma hamu tu Ibana dohot tu pasanganmuna. Jadi bahen ma ibadat tu Jahowa gabe na paling penting di perkawinanmuna.

 8. Aha do na boi diulahon pasangan suami istri lao mandapot manfaat sian ibadat keluarga, nang pe adong masalah di perkawinan ni nasida?

⁸ Alai boha do molo adong masalah di perkawinanmuna? Olo do gabe dang semangat hamu mambahen ibadat keluarga. Molo songon i na masa, coba ma bahen ibadat keluarga na singkat lao mambahas topik na menarik di hamu na dua. Hasilna, gabe lam togu ma perkawinanmuna, jala lam balga ma tekadmuna lao manomba Jahowa rap dohot pasanganmuna.

 9. Boasa ikkon dibahen suami dohot istri tikki ni nasida asa rap?

⁹ Hamu akka naung menikah, atur ma tikki asa boi rap dohot pasanganmuna. Molo diulahon hamu i, gabe boi ma diattusi hamu pikkiran dohot perasaan ni pasanganmuna. (1 Mus. 2:24) Parrohahon ma na dihilala si Ruslan dohot si Lilia naung menikah lobi sian 15 taon. Dang leleng dung menikah, disadari nasida do dang godang tikki ni nasida rap. Didok si Lilia, “Sibuk do hami alani karejo, ulaon di jabu, dohot mangurus gellengnami. Diboto hami ma molo dang dibahen hami tikki asa rap, gabe dang jonok be hami.”

10. Songon dia do suami dohot istri boi menerappon prinsip di Epesus 5:15, 16?

¹⁰ Aha do na porlu diulahon suami dohot istri asa adong tikki ni nasida rap? Ikkon dibahen nasida do jadwal asa rap. (Jaha Epesus 5:15, 16.) Sahalak donganta di Nigeria na margoar si Uzondu mandok, “Tikki hususun jadwal kegiatanku, hubahen do jadwal asa rap dohot istrikku jala hupastihon ma dang adong na manggattihon i.” (Plp. 1:10) Parrohahon ma songon dia si Anastasia, istri ni pengawas wilayah di Moldova denggan mamakke tikkina. Didok ibana, “Tikki sibuk suamikku mandalatton tanggung jawabna, berupaya do au mangulahon kegiatan pribadikku. Hasilna dung sae hami mangulahon kegiatannami, gabe adong ma tikkinami rap.” Alai boha do molo maol hamu mambahen tikki asa rap dohot pasanganmuna alani godang ni ulaonmuna?

11. Akka kegiatan aha do na sai rap diulahon si Akuila dohot si Priskilla?

¹¹ Boi do pasangan naung menikah maniru teladan ni si Akuila dohot si Priskilla, sapasang suami istri na direspek halak Kristen di abad na parjolo. (Rom 16:3, 4) Memang dang godang dipaboa di Bibel taringot perkawinan ni nasida. Alai dipaboa do molo nasida rap karejo, marbarita na uli, dohot mangurupi na asing. (Ul. 18:2, 3, 24-26) Gariada, sai rap do goar ni nasida dipaboa di akka ayat ni Bibel.

12. Aha do na boi diulahon suami dohot istri asa adong tikki ni nasida rap? (Ida gambar.)

¹² Songon dia do suami dohot istri boi maniru si Akuila dohot si Priskilla? Pikkirhon ma akka kegiatan na porlu diulahon hamu dohot pasanganmuna. Boi do hamu rap mangulahon i daripada mangulahon i sahalakmuna? Misalna, rap marbarita do si Akuila dohot si Priskilla. Boi do dibahen hamu jadwal asa rap marbarita na uli? Asing ni i, rap karejo do si Akuila dohot si Priskilla. Bisa jadi dang sarupa karejomuna dohot pasanganmuna. Alai boi do rap hamu makkarejohon tugas di jabu? (Pjm. 4:9) Molo marsiurupan hamu makkarejohon tugas di jabu, gabe songon sada tim ma hamu jala gabe adong ma kesempatanmuna makkata-hatai. Nungnga menikah si Robert dohot si Linda lobi sian 50 taon. Didok si Robert, “Sasittongna, dang godang tikkinami rap rekreasi. Alai tikki manucci piring au, dohot do istrikku mangurupi. Manang tikki karejo au di taman, dohot do istrikku mangurupi. Gabe las hian ma rohakku. Gabe lam jonok ma hami jala lam bagas ma holongnami.”

13. Asa boi botul-botul jonok suami dohot istri, aha do na porlu diulahon nasida?

¹³ Alai ingot ma, nang pe rap hamu, dang otomatis i mambahen jonok hamu tu pasanganmuna. Sahalak istri na tinggal di Brasil mandok, “Alani godang ni ulaon, olo do gabe ro tu pikkiranku memang nungnga rap hami ala tinggal sajabu. Alai husadari ma dang cukkup holan i. Ikkon huparrohahon do kebutuhan ni suamiku.” Parrohahon ma songon dia si Bruno dohot istrina si Tays berupaya mamparrohahon kebutuhan ni pasanganna. Didok si Bruno, “Dibahen hami do dao HP-nami asa boi dinikmati hami tikki padua-dua.”

14. Molo dang dinikmati hamu dohot pasanganmuna tikki rap hamu na dua, aha do na boi diulahon hamu?

¹⁴ Alai boha do molo dang dinikmati hamu dohot pasanganmuna tikki rap hamu na dua? Bisa jadi dang sarupa seleramuna, manang jut do rohamuna dibahen pasanganmuna, songon i do sebalikna. Aha do na boi diulahon hamu? Ingot ma ilustrasi taringot api unggun nakkin. Tottu dang pittor balga apina tikki dipagalak. Ikkon palan-palan do ditambai sobanna asa boi balga apina. Dos songon i ma, coba ma lehon tikki ganup ari asa boi rap dohot pasanganmuna nang pe holan satokkin. Ulahon ma akka kegiatan na boi dinikmati hamu na dua, unang ma kegiatan na boi mambahen jut rohamuna. (Jak. 3:18) Molo dimulai hamu i sian akka na sederhana, gabe lam tamba ma holongmuna tu pasanganmuna.

15. Boasa massai penting patuduhon sangap tu pasanganmuna?

¹⁵ Massai penting do patuduhon sangap tu pasanganmuna. Sarupa do i songon oksigen na mambahen galak api unggun. Molo dang adong oksigen, pittor mittop ma apina i. Songon i ma, molo dang dipatudu suami dohot istri sangap tu pasanganna, boi do hatop ngali holong ni nasida. Alai molo dipatudu nasida i, lam marsihaholongan ma nasida. Alai porlu diingot hamu dang soal aha na dibahen hamu lao patuduhon sangap tu pasanganmuna, na paling penting ikkon boi do pasanganmuna merasa na diargai do nasida. Nungnga menikah si Penny dohot si Aret lobi sian 25 taon. Si Penny mandok, “Ala masipasangapan do hami, gabe dame ma suasana di jabunami. Huargai hami do pandapot ni pasangannami. Hasilna gabe leluasa ma au paboahon pandapot dohot perasaanku, songon i nang sebalikna.” Jadi aha do na boi diulahon hamu asa merasa diargai pasanganmuna? Tabahas ma jo teladan ni si Abraham dohot si Sara.

16. Aha do na boi ditiru akka suami sian si Abraham? (1 Petrus 3:7) (Ida gambar.)

¹⁶ Sangap do dibahen si Abraham si Sara. Olo do ibana mempertimbangkon pandapot ni si Sara jala diargai ibana do perasaanna. Sada tikki, hea do marsak si Sara. Dipaboa si Sara do tu si Abraham na massai jut rohana, bahkan disalahon si Sara do si Abraham alani masalah i. Gabe muruk do si Abraham jala makkatahon na so denggan tu istrina i? Daong, diboto ibana istri na burju do si Sara, jala rade do si Sara mendukung keputusanna. Ditangihon ibana do si Sara jala berupaya do ibana pasaehon masalah i. (1 Mus. 16:5, 6) Aha do boi taparsiajari sian on? Hamu akka suami, tanggung jawabmuna do mambahen keputusan tu keluargamuna. (1 Kor. 11:3) Alai molo holong rohamuna tu istrimuna, pasti olo do hamu mempertimbangkon pandapot ni istrimuna sebelum mambahen keputusan, tarlumobi molo berpengaruh keputusan i tu ibana. (1 Kor. 13:4, 5) Di situasi na asing, olo do marsak istrimuna jala dipaboa ibana ma perasaanna. Olo do hamu manangihon ibana jala mangargai perasaanna? (Jaha 1 Petrus 3:7.) Nungnga menikah si Angela dohot si Dmitry saleleng hampir 30 taon. Dipaboa si Angela do songon dia suamina mambahen ibana merasa diargai. Didok ibana, “Sai rade do si Dmitry manangihon au tikki jut rohakku, manang tikki holan naeng makkatai au. Sabar do ibana tu au, bahkan nang pe dang denggan carakku paboahon perasaanku.”

17. Aha do na boi ditiru akka istri sian si Sara? (1 Petrus 3:5, 6)

¹⁷ Sangap do dibahen si Sara si Abraham. Rade do ibana mendukung keputusan ni suamina. (1 Mus. 12:5) Di sada tikki, hea do si Abraham mamutusson lao menjamu tamu na ro di na so panagaman ni nasida. Dipangido si Abraham do si Sara asa so sian ulaonna jala paradehon godang sipanganon tu tamuna i. (1 Mus. 18:6) Pittor diulahon si Sara ma i jala rade do ibana mendukung keputusan ni si Abraham. Hamu akka istri, tiru hamu ma si Sara. Dukung ma keputusan na dibahen suamimuna. Molo diulahon hamu i, gabe lam togu ma perkawinanmuna. (Jaha 1 Petrus 3:5, 6.) Si Dmitry na dipaboa di paragraf sebelumna paboahon songon dia istrina mambahen ibana merasa diargai. Didok ibana, “Huargai do upaya ni si Angela lao mendukung keputusanku, bahkan nang pe dang setuju ibana. Molo tung pe dang denggan hasil ni keputusanki, dang gabe dikritik ibana au.” Pasti lam mura do makkaholongi sasahalak na mangargai hamu!

18. Aha do hasilna molo berupaya suami dohot istri asa toktong marsihaholongan?

¹⁸ Saonari, berupaya do Sibolis mambahen asa unang marsihaholongan be pasangan Kristen. Diboto ibana do molo dang marsihaholongan be nasida, gabe mandao ma nasida sian Jahowa. Alai dang boi mittop cinta sejati i! Anggiat ma holong di perkawinanmuna dos songon holong na dipaboa di Ende ni si Salomo. Bertekad ma hamu mangutamahon Jahowa di perkawinanmuna, bahen ma tikki rap dohot pasanganmuna, jala argai ma perasaan dohot kebutuhanna. Molo diulahon hamu i, perkawinanmuna i boi do parohon sangap tu Jahowa, Sumber ni cinta sejati. Jala songon api na marsigorgor, lam togu ma holongmuna saleleng mangolu hamu.