Akka Bawa na Poso, Patogu ma Haporseaonmuna tu Jahowa

 1. Asa boi togu haporseaon ni akka bawa na poso, aha do na ikkon diulahon nasida?

DIDOK Raja Daud do tu si Salomo, “Ikkon togu do ho jala patudu ma na bawa do ho.” (1 Raj. 2:​1-3, surat na di toru.) Marlakku do poda on tu sude bawa na adong di huria saonari. Asa boi togu haporseaon ni akka bawa na poso, ikkon diparsiajari nasida do Hata ni Debata jala ikkon diulahon do i. (Luk. 2:52) Boasa on massai penting?

2-3. Boasa ikkon berupaya akka bawa na poso patoguhon haporseaonna tu Jahowa?

² Godang do tanggung jawab ni akka bawa di keluarga dohot di huria. Hamu akka na poso, pasti nungnga dipikkirhon hamu tanggung jawab na boi diulahon hamu di ari na naeng ro. Contohna boi do hamu gabe perintis, parhobas, jala ujungna gabe sintua di huria. Manang lomo do ra rohamuna naeng menikah jala marianakkon. (Eps. 6:4; 1 Tim. 3:1) Asa boi diraih hamu cita-citamuna i jala boi hamu mandalatton i, ikkon togu do haporseaonmuna tu Jahowa.b

³ Songon dia do carana asa boi togu haporseaonmuna tu Jahowa? Adong do piga-piga keterampilan na ikkon diparsiajari jala dilatik hamu. Di artikel on, tabahas ma aha do na porlu diulahon hamu sian saonari, asa boi diulahon hamu akka tanggung jawab i di pudian ni ari.

 4. Akka ise ma na boi gabe sitiruon di hamu? (Ida gambar.)

⁴ Tottuhon ma ise na lao ditiru hamu. Di Bibel, godang do dipaboa taringot akka bawa na makkaholongi Jahowa. Jala marragam do tugas ni nasida lao mangurupi naposo ni Debata. Gabe sitiruon do nasida tu akka bawa na poso. Asing ni i, adong do akka bawa di keluarga manang di huria na boi gabe sitiruon di hamu. (Heb. 13:7) Jala boi do ditiru hamu Jesus Kristus ala ibana do sitiruon na sempurna. (1 Ptr. 2:21) Tikki diparsiajari hamu akka pengalaman ni nasida, parrohahon ma akka parange ni nasida na naeng ditiru hamu. (Heb. 12:​1, 2) Jala pikkirhon ma songon dia caramuna maniru nasida.

 5. Songon dia do carana asa manat hamu marpikkir, jala boasa penting on? (Psalmen 119:9)

⁵ Marlatik ma asa ‘manat marpikkir’. (Poda 3:21) Molo manat sahalak bawa marpikkir, pasti jolo dipertimbakkon ibana do pilihanna sebelum mambahen keputusan. Jadi ikkon marsitutu do ibana marlatik asa boi gabe halak na songon i jala toktong patuduhon i. Boasa? Alana godangan na poso saonari, holan mangihutton lomo ni rohana manang perasaanna do tikki mambahen keputusan. (Poda 7:7; 29:11) Asing ni i, boi do gabe terpengaruh hamu sian acara TV, film, internet, dohot media sosial. Jadi songon dia ma carana asa manat hamu marpikkir? Na parjolo, parsiajari hamu ma akka prinsip ni Bibel jala pikkirhon ma aha labana di hamu. Dung i pakke ma akka prinsip i lao mangurupi hamu mambahen keputusan na boi palasson roha ni Jahowa. (Jaha Psalmen 119:9.) Sada keterampilan na massai penting do on. Molo marlatik hamu asa manat marpikkir, gabe togu ma haporseaonmuna tu Jahowa. (Poda 2:​11, 12; Heb. 5:14) Saonari tabahas ma manfaat ni keterampilan on: (1) gabe denggan ma pandangan dohot sikapmuna tu akka donganta borua, jala (2) gabe denggan ma dibahen hamu tikki mamillit pakkean dohot manottuhon penampilanmuna.

 6. Molo manat hamu marpikkir, songon dia do caramuna patuduhon na diargai hamu akka borua?

⁶ Molo manat hamu marpikkir, pasti denggan do pandanganmuna dohot sikapmuna tu akka borua. Dang sala molo lomo rohamuna tu sahalak anak boru. Alai ikkon manat do hamu. Unang ma hamu makkatahon, mangirim pesan, manang mangulahon aha pe na boi mambahen sahalak borua marpikkir hira na lomo rohamuna tu ibana. Hape dang adong tujuanmuna naeng menikah tu borua i. (1 Tim. 5:​1, 2) Molo marhallet pe hamu annon, ikkon dijaga hamu do nama baik ni borua i. Unang ma padua-dua hamu dohot halletmuna molo so adong na mandongani hamu.—1 Kor. 6:18.

 7. Molo manat hamu marpikkir, songon dia do hamu manottuhon pakkean dohot penampilanmuna?

⁷ Molo manat hamu marpikkir, boi ma gabe denggan hamu tikki mamillit pakkean dohot manottuhon penampilanmuna. Alana godangan halak na mambahen model ni pakkean saonari dang mangargai Jahowa. Jala roa do pangalaho ni nasida. Tarida do i sian model ni pakkean na dibahen nasida na paketathu, manang model ni pakkean na mambahen bawa gabe songon boru-boru. Jadi tikki mamillit pakkean, ihutton hamu ma prinsip ni Bibel jala tiru ma akka donganta bawa na gabe sitiruon di huria. Alani i pikkirhon ma on, ‘Sian pakkean dohot penampilanku, tarida do au halak na marbisuk? Huargai do pandangan ni halak na asing? Sian carakku marpakkean, mura do halak mananda na sisomba Jahowa au?’ (1 Kor. 10:​31-33; Tit. 2:6) Molo manat hamu marpikkir, gabe togu ma haporseaonmuna tu Jahowa. Jala gabe diargai akka donganmuna ma hamu, tarlumobi ma Jahowa.

 8. Boha do carana asa gabe halak na boi diandalhon hamu?

⁸ Boi ma hamu diandalhon. Asa gabe halak na boi diandalhon hamu, ikkon ringgas ma hamu mangulahon tugasmuna jala martanggung jawab. (Luk. 16:10) Jesus ma teladan na sempurna. Martanggung jawab do Jesus tu karejona, jala dang halak na gumarapus ibana. Alani i, boi ma ibana pasaehon sude tugas na dilehon Jahowa tu ibana, nang pe dang mura mangulahon i. Jala ala holong do rohana tu jolma tarlumobi tu akka siseanna, olo do ibana mangalehon ngoluna tu nasida. (Joh. 13:1) Alani i, tiru hamu ma Jesus. Marsitutu ma hamu pasaehon tugasmuna. Molo dang diboto hamu songon dia carana, serep ma rohamuna. Sukkun ma akka dongan bawa na togu haporseaonna tu Jahowa. Unang ma asal sae hamu mangulahon tugasmuna. (Rom 12:11) Ulahon ma i sian nasa roha “songon tu Jahowa, dang tu jolma”. (Kol. 3:23) Memang sude do hita dang sempurna, termasuk ma hamu. Olo do ra dibahen hamu kesalahan. Alani i serep ma rohamuna mangakkui kesalahanmuna i.—Poda 11:2.

 9. Boasa ikkon diparsiajari hamu piga-piga keterampilan?

⁹ Asa boi togu haporseaonmuna tu Jahowa, porlu do diparsiajari hamu akka keterampilan. Alana molo adong keterampilanmuna, boi ma didalatton hamu tanggung jawabmuna di huria, massari na porlu di hamu dohot di keluargamuna, jala gabe denggan ma hubunganmuna tu halak na asing. Saonari tabahas ma piga-piga keterampilan na boi diparsiajari hamu.

10-11. Aha ma manfaatna tu hamu dohot tu akka dongan molo denggan hamu manjaha dohot manurat? (Psalmen 1:​1-3) (Ida gambar.)

¹⁰ Marlatik ma asa lam denggan manjaha dohot manurat. Bibel mandok halak na marlas ni roha jala na marhasil, i ma halak na mangalean tikkina lao manjaha jala mangarimangi Hata ni Debata ganup ari. (Jaha Psalmen 1:​1-3.) Molo taratur hamu manjaha Bibel ganup ari, gabe diboto hamu ma cara marpikkir ni Jahowa. Jala on boi mangurupi hamu asa manat marpikkir jala mangulahon na diparsiajari hamu. (Poda 1:​3, 4) Porlu do akka bawa na denggan manjaha dohot manurat lao mangurupi huria. Boasa?

¹¹ Di huria porlu do akka bawa na malo mangajari jala mangalehon poda na sian Bibel. (Tit. 1:9) Molo denggan hamu manjaha dohot manurat, boi ma dipersiappon hamu jamita dohot komentar na patoguhon haporseaon ni akka dongan. Asing ni i, boi ma hamu denggan mambahen catatan tikki pelajaran pribadi, manang tikki mambege jamita di parpunguan dohot di kebaktian. Molo denggan dibahen hamu catatanmuna, boi do i patoguhon haporseaonmuna dohot patoguhon halak na asing.

12. Boha do carana asa denggan hamu makkata-hatai dohot halak na asing?

¹² Marlatik ma asa denggan makkata-hatai. Ikkon marlatik do sahalak bawa asa denggan makkata-hatai. Lapatanna, porlu do ibana denggan manangihon jala mangattusi pikkiran dohot perasaan ni halak na asing. (Poda 20:5) Porlu do denggan diparrohahon ibana nada suara, bohi, dohot gerak tubuh ni sasahalak tikki makkata-hatai dohot ibana. Alani i, parade hamu ma tikkimuna lao marsaor dohot halak na asing secara langsung. (2 Joh. 12) Alana molo holan mangirim pesan manang email hamu lao makkata-hatai dohot halak na asing, boi do gabe maol hamu annon makkata-hatai secara langsung.

13. Aha do muse na porlu dilatik hamu? (1 Timoteus 5:8) (Ida gambar.)

¹³ Marlatik ma gabe halak na mandiri. Sahalak bawa na togu haporseaonna tu Jahowa ikkon boi do massari. (Jaha 1 Timoteus 5:8.) Di piga-piga negara, sian bapakna manang tondongna do akka na poso marsiajar sada keterampilan. Adong muse na marsiajar keterampilan tikki di sikkola. Manang sian dia pe diparsiajari hamu sada keterampilan, godang do labana molo diparsiajari hamu i. Alana boi do i mangurupi hamu lao mangalului karejo. (Ul. 18:​2, 3; 20:34; Eps. 4:28) Molo ditanda halak hamu bawa na ringgas jala na martanggung jawab, gabe mura ma hamu mangalului karejo. Jala gabe lomo ma roha ni bosmuna mampartahatton hamu gabe parkarejona. Massai penting do akka parange dohot keterampilan naung tabahas nakkin asa boi sahalak bawa mandalatton tugas di pudian ni ari. Saonari tabahas ma piga-piga tugas na boi diulahon hamu.

14. Aha do na porlu diulahon hamu asa rade hamu dohot tu dinas sepenuh waktu?

¹⁴ Dohot tu dinas sepenuh waktu. Godang do donganta bawa na togu haporseaonna tu Jahowa nungnga dohot tu dinas sepenuh waktu tikki poso dope nasida. Ala sian tikki poso nasida merintis, nungnga tarlatik nasida denggan bekerja sama. Asing ni i, gabe malo ma nasida mangatur hepengna. (Plp. 4:​11-13) Cara na denggan lao memulai dinas sepenuh waktu, i ma merintis ekstra. Godang do donganta naung merintis ekstra saleleng piga-piga bulan. Ala dibahen nasida songon i, gabe rade ma nasida merintis biasa. Jala dung merintis biasa nasida, gabe adong ma kesempatan diundang lao mangurupi ulaon pembangunan manang karejo di Betel.

15-16. Boha do carana asa boi hamu gabe parhobas manang sintua?

¹⁵ Gabe parhobas manang sintua. Sahalak doli-doli boi do marcita-cita asa gabe sintua lao mangurupi akka dongan di huria. Alana didok Bibel molo marsitutu sahalak bawa naeng gabe sintua, “na lomo do rohana mandapot ulaon na denggan”. (1 Tim. 3:1) Alai andorang so gabe sintua, ikkon berupaya do ibana gabe sahalak parhobas. Godang do na boi diulahon sahalak parhobas lao mangurupi akka sintua. Ikkon serep do roha ni akka sintua dohot parhobas mangurupi akka dongan di huria, jala semangat di ulaon marbarita. Molo nungnga memenuhi syarat, boi do sahalak doli-doli gabe parhobas di huria nang pe dang gok dope umurna 20 taon. Jala molo nungnga memenuhi syarat, boi do ra sahalak parhobas gabe sintua nang pe baru marumur 20 taon manang lobi.

¹⁶ Boha do carana asa boi hamu gabe parhobas dukkon i gabe sintua? Jaha ma akka syaratna na dipaboa di Bibel. Molo holong rohamuna tu Jahowa, tu keluargamuna, dohot tu huria, pasti taronjar do rohamuna lao mangulahon akka syarat i. (1 Tim. 3:​1-13; Tit. 1:​6-9; 1 Ptr. 5:​2, 3) Berupaya ma hamu mangattusi ganup syarat na dipaboa di Bibel, jala martangiang ma hamu asa diurupi Jahowa hamu mangulahon i.c

17. Boha do carana asa rade sahalak doli-doli gabe suami dohot kepala keluarga? (Ida gambar.)

¹⁷ Gabe suami dohot kepala keluarga. Didok Jesus, adong do piga-piga bawa na so mangoli. (Mat. 19:12) Molo tung pe naeng mangoli hamu, dang pola sala i. Alai gabe tamba do tanggung jawabmuna, i ma gabe sahalak suami dohot kepala keluarga. (1 Kor. 11:3) Dipangido Jahowa do sahalak suami asa makkaholongi istrina, mangalehon kebutuhan ni istrina, jala mangurupi istrina asa jonok tu Jahowa. (Eps. 5:​28, 29) Asa boi hamu gabe suami na burju, ikkon marlatik do hamu asa manat marpikkir, mangargai akka borua, jala boi diandalhon, songon naung tabahas nakkin. Molo diulahon hamu i sude, rade ma hamu gabe suami dohot kepala keluarga.

18. Boha do carana asa rade sahalak doli-doli gabe sahalak ama?

¹⁸ Gabe ama. Dung menikah hamu, olo do ra gabe marianakkon hamu. Asa boi hamu gabe ama na burju, tiru ma Jahowa. (Eps. 6:4) Olo do Jahowa paboahon tu Jesus na massai holong do rohana tu Anakna i, jala massai arga do Anakna i di Ibana. (Mat. 3:17) Molo gabe ama hamu, jotjot ma paboa tu gellengmuna na holong do rohamuna tu nasida. Puji ma nasida alani akka na denggan na diulahon nasida. Molo ditiru hamu Jahowa, boi do i mangurupi gellengmuna asa marale-ale tu Jahowa. Jadi asa boi hamu gabe ama na burju, sian saonari patudu ma na holong rohamuna tu keluargamuna dohot tu akka dongan di huria. Jala unang ma maila hamu paboahon na holong rohamuna tu nasida. (Joh. 15:9) Molo marlatik hamu mangulahon i, boi ma hamu rade gabe suami dohot ama na burju. Gabe lam arga ma hamu di Jahowa, di keluargamuna, dohot di akka dongan di huria.

19-20. Aha do na porlu diulahon sahalak doli-doli asa gabe bawa na togu haporseaonna? (Ida gambar sampul.)

¹⁹ Hamu akka na poso, berupaya ma hamu asa togu haporseaonmuna tu Jahowa. Pillit hamu ma ise na naeng ditiru hamu, marlatik ma hamu asa manat marpikkir jala boi diandalhon. Parsiajari ma akka keterampilan, jala parade hamu ma dirimuna asa boi mandapot tanggung jawab di ari na naeng ro.

²⁰ Dung diparsiajari hamu artikel on, olo do ra dihilala hamu hira na maol hian do on diulahon. Alai ingot ma, pasti boi do hamu marhasil mangulahon i. Alana massai lomo do roha ni Jahowa mangurupi hamu. (Jes. 41:​10, 13) Asing ni i, lomo do roha ni akka dongan di huria mangurupi hamu. Molo marhasil hamu mangulahon i sude, pasti marlas ni roha do hamu annon. Hamu akka doli-doli, holong hian do rohanami tu hamu. Sai anggiat ma dipasu-pasu Jahowa upayamuna asa gabe bawa na togu haporseaonna tu Jahowa!—Poda 22:4.