Argai ma Jahowa Sitopa Hita

 1. Boasa Jahowa boi didok Sipanopa na umbalga?

BULAN November 2010 di Inggris, adong halak na olo manuhor gunsi sian Cina na argana hirahira 900 miliar rupiah. Longang do roha mangida na manopa i. Boi ditopa ibana tano liat gabe gunsi na bagak jala arga. Umbalga do huaso ni Jahowa, Sitopa hita sian sude sitopa gunsi. Dipaboa di Bibel, Jahowa manompa jolma sian ”orbuk ni tano” manang tano liat. (1 Mus. 2:7) Jolma na tinompaNa, i ma si Adam na digoari ”anak ni Debata” jala ditompa si Adam boi maniru pangalaho ni Debata.​—Luk. 3:38, Bibel siganup ari.

2, 3. Songon dia do hita boi maniru halak Israel naung marhamubaon?

² Ala mangalo si Adam tu Jahowa, ndang didok be ibana anak ni Debata. Alai, godang do pinompar ni si Adam na mangoloi Jahowa. (Heb. 12:1) Pangoloion ni nasida tu Debata patuduhon Jahowa do na dipillit nasida gabe Ama manang Sipanopa, ndang Sibolis. (Joh. 8:44) Songon halak Israel na marhamubaon mandok, ”Ale Jahowa. Ho do amanami! Tano do ianggo hami, jala ho do sitompa hami, jala jadijadian ni tanganmu do hami sudena.”​—Jes. 64:7

³ Songon halak Israel, serep do roha ni sude na manomba Jahowa saonari jala marsitutu mangoloi Ibana. Hasangapon do di nasida mandok Jahowa Ama ni nasida, jala las rohanasida mangoloi Jahowa Sitopanasida. Olo do hita songon tano liat na mura ditopa gabe gunsi na arga? Boi do taida angka donganta na marsitutu asa mura ditopa Jahowa? Asa boi taantusi, taulas ma songon dia Jahowa mamillit halak na laho topaonNa, boasa ditopa, jala songon dia Jahowa manopa nasida.

 4. Songon dia do Jahowa mamillit sasahalak asa jonok tu Ibana? Bahen ma tudosan.

⁴ Ndang songon jolma cara ni Jahowa mangida sasahalak. Roha do na niida ni Jahowa. (Jaha 1 Samuel 16:7b.) Hea do on dipatudu Jahowa tingki baru dipajongjong huria Kristen. Ditogu Jahowa do sasahalak na marmetmet ni roha asa jonok tu Ibana dohot tu anakNa. (Joh. 6:44) Umpamana, halak Parise na margoar si Saul sahalak panginsahi, pangaleai, jala pangalele. (1 Tim. 1:13) Alai, roha ni si Saul do na niida ni Jahowa, ala ibana songon tano liat na mura ditopa. (Poda 17:3) Dipillit Jahowa do si Saul gabe parhobasNa asa marbarita ibana ”tujolo ni angka bangso, nang tujolo ni angka raja dohot tujolo ni angka anak Israel”. (Ul. 9:15) Dipillit Jahowa do muse halak na boi topaonNa laho dipangke tu ulaon na sangap, nang pe sasahalak i hea gabe parmabuk, panangko, manang mangulahon parmainanon. (Rom 9:21; 1 Kor. 6:9-11) Dung marsiajar Bibel, marhaporseaon ma nasida tu Jahowa jala rade ditopa hombar tu lomo ni rohaNa.

5, 6. Songon dia do pos ni rohanta tu Jahowa mangkorhon tu pamingkirionta maradophon (a) halak na di humaliangta? (b) dongan sahaporseaonta?

⁵ Pos do rohanta, dipillit Jahowa do na burju. Alani i, unang ma tauhumi halak na asing dohot na di huria. Umpamana, taida ma songon dia si Michael maradophon Sitindangi Ni Jahowa na marbarita tu jabuna. Didok ibana, ”Pintor hutadingkon jala huanggap do nasida ndang adong. Ndang hea burju ahu tu nasida! Sada tingki, las rohangku pajumpang dohot keluarga na marparange na denggan. Alai, songgot ma rohangku dung huboto nasida Sitindangi Ni Jahowa! Parange ni nasida na burju mambahen muba pamingkirionku tu nasida. Huboto ma, ndang sintong pangantusionku taringot nasida saleleng on.” Lomo roha ni si Michael mamboto taringot Sitindangi Ni Jahowa jala marsiajar Bibel. Tardidi ma ibana jala gabe perintis.

⁶ Molo olo hita ditopa Jahowa, ingkon olo do hita manguba pingkiranta maradophon angka donganta. Taboto ma na marsitutu nasida mambahen hamajuon. Suang songon i ma Jahowa mangida nasida. Jahowa mangida roha jala diboto do na boi dope nasida muba. Tangkas do diboto Jahowa taringot hita. (Ps. 130:3) Jahowa do na tatiru molo denggan pamingkirionta maradophon angka donganta. Songon na saulaon dohot Jahowa ma hita molo taurupi donganta mambahen hamajuon. (1 Tes. 5:14, 15) Gabe sitiruon ma angka sintua mangulahon on di huria.​—Eps. 4:8, 11-13.

 7. Boasa taargai pinsangpinsang ni Jahowa?

⁷ Adong na mandok, ’Andorang so marianakhon ahu, ndang lomo rohangku tingki natuatuangku maminsang ahu.’ Dung lam magodang hita, taboto ma alani holong do umbahen na dipinsang hita. (Jaha Heber 12:5, 6, 11.) Dihaholongi Jahowa do hita songon anakNa sandiri. Alani i, sabar do Ibana maminsang manang manopa hita. Lomo rohaNa hita marlas ni roha, marbisuk jala mangkaholongi Ibana. (Poda 23:15) Ndang lomo roha ni Jahowa hita marsitaonon jala ndang lomo rohaNa mate hita songon halak pardosa na so marhamubaon.​—Eps. 2:2, 3.

8, 9. Songon dia do Jahowa mangajari hita saonari, jala songon dia do pangajarionNa tongtong adong haduan?

⁸ Andorang so tatanda Jahowa, godang do ra parangenta na so denggan. Alai, rade do Jahowa manopa jala mangurupi hita marhamubaon asa marparange na denggan. (Jes. 11:6-8; Kol. 3:9, 10) Saonari, nunga tahilala mangolu di paradeiso partondion. On ma inganan na diparade Jahowa laho manopa hita. Boi ma dame tahilala nang pe hita mangolu di portibi na gok hajahaton. Adong do pigapiga halak na so mangkilala holong sian keluargana, alai saonari nunga dihilala nasida holong sian angka dongan sahaporseaon di paradeiso partondion. (Joh. 13:35) Diajari do hita asa patuduhon holong tu angka donganta. Na rumingkot, nunga tatanda Jahowa jala tahilala holongNa songon holong ni sahalak ama.​—Jak. 4:8.

⁹ Di tano na imbaru, tahilala ma godang laba alani paradeiso partondion. Hilalaonta ma muse hangoluan na tipak (sempurna) di Harajaon ni Debata. Di tingki i, tongtong do Jahowa manopa jala mangajari hita hombar tu lomo ni rohaNa, nang pe ndang taboto songon dia i bahenonNa. (Jes. 11:9) Bahenon ni Jahowa do muse tipak pamatang dohot pingkiranta. Alani i, mura ma hita mangihuthon jala mangulahon tudutuduNa. Tapaloas ma Jahowa manopa hita jala tapatudu ma pangargaion tu Ibana.​—Poda 3:11, 12.

10. Songon Jahowa, songon dia do Jesus patuduhon hasabaron dohot pangantusionna?

¹⁰ Songon sitopa hudon na malo jala mamboto ragam ni tano liat, diboto Jahowa do sude taringot hita. Diboto do hagaleonta, gogonta, hamubaon na tabahen, jala ditopa do hita mangihuthon na tolap tabahen. (Jaha Psalmen 103:10-14.) Taboto do pangkilalaan ni Jahowa tu hita marhite pambahenan ni Jesus maradophon hagaleon ni angka siseanna. Hea ma marsoal angka siseanna taringot ise sian nasida na umsangap. Molo disi hita, songon dia do pangkilalaanta mangida parange ni angka apostel i? Ra, tadok do nasida ndang songon tano liat na mura ditopa. Alai diboto Jesus do, molo ditangihon siseanna i podana jala ditiru serep ni rohana, boi dope nasida ditopa. (Mrk. 9:33-37; 10:37, 41-45; Luk. 22:24-27) Dung hehe Jesus, dijalo angka siseanna ma tondi parbadia jala ndang dipingkirhon nasida be ise na umsangap. Alai, marsitutu do nasida mangulahon ulaon na diparentahon ni Jesus.​—Ul. 5:42.

11. Songon dia do si Daud patuduhon ibana songon tano liat na mura ditopa, jala songon dia do hita maniru ibana?

¹¹ Laho manopa hita, dipangke Jahowa do Bibel, tondi parbadia, dohot huria. Songon dia do Bibel boi manopa hita? Tajaha, tarimangi, jala tapangido ma Jahowa mangurupi hita mangulahon i. Songon na disurat raja Daud, ”Molo sapala diingot rohangku Ho di atas podomanku, laos torus sabornginna i marhusari ahu taringot tu Ho.” (Ps. 63:7) Didok ibana muse, ”Hupuji ma Jahowa na manogunogu ahu, jala di tingki borngin panggora ni rohangku mangajari ahu.” (Ps. 16:7, Bibel siganup ari) Dirimangi si Daud do patik ni Jahowa jala dipangke laho manopa roha dohot pingkiranna, nang pe sipata maol dihilala ibana mangulahon i. (2 Sam. 12:1-13) Dilehon si Daud do sitiruon na denggan tu hita, i ma serep ni roha dohot pangoloion. Tasungkun ma dirinta, ’Hea do hujaha Bibel, dung i hurimangi? Boi dope ahu marsitutu laho mangulahon i?’​—Ps. 1:2, 3.

12, 13. Songon dia do Jahowa manopa hita marhite tondi parbadia dohot huria?

¹² Marragam do cara ni tondi parbadia manopa hita. Umpamana, diurupi do hita maniru Jesus jala patuduhon parbue ni tondi. (Gal. 5:22, 23) Sada sian parbue ni tondi, i ma holong. Tahaholongi Debata, taoloi Ibana, jala rade hita ditopa ala taboto sude parentaNa marlaba tu hita. Diurupi tondi parbadia do hita asa unang portibi na jahat on na manopa hita. (Eps. 2:2) Tingki poso dope apostel Paulus, ditiru ibana do parange ni pemimpin agama Jahudi. Alai, marhamubaon do ibana ala diurupi tondi parbadia. Dipaboa marhite suratna, ”Saluhutna do tarpatupa ahu marhitehite Ibana, na margogoihon ahu!” (Plp. 4:13) Hita pe, porlu mangido tondi parbadia ala taboto tangihonon ni Jahowa do tangiangta.​—Ps. 10:17.

¹³ Dipangke Jahowa do huria dohot angka sintua laho manopa hita. Umpamana, molo diida sintua gale partondionta, urupanna do hita. Alai, poda na dilehon laho mangurupi hita ndang sian pamingkirion ni nasida sandiri. (Gal. 6:1) Marhite tangiang, dipangido nasida pangantusion dohot bisuk sian Jahowa. Dilului nasida do hatorangan sian Bibel dohot angka publikasi na mangurupi hita. Molo sintua mamodai hamu taringot pangkeanmuna, ingot ma na patuduhon holong ni Debata do nasida tu hamu. Molo taoloi poda ni nasida, songon tano liat na mura ditopa ma hita jala parohon laba.

14. Nang pe marhuaso Jahowa manopa hita, songon dia do Ibana paloashon hita manontuhon sipillitonta?

¹⁴ Ala taboto cara ni Jahowa manopa hita, on mangurupi hita asa denggan paralealeonta tu angka dongan di huria. Dung i, denggan ma hita maradophon halak di humaliangta dohot parsiajar Bibelta. Dipaboa di Bibel, andorang so ditopa tano liat, porlu do dipaias sian batu, pasir dohot na asing. Diurupi Jahowa do halak na laho topaonNa. Ndang dipaksa nasida muba, alai marhite patikNa diurupi do nasida. Ingkon nasida do na mamillit laho muba manang na ndang.

15, 16. Songon dia do parsiajar Bibel patuduhon na olo ibana ditopa Jahowa? Bahen ma tudosan.

¹⁵ Pingkirhon ma na masa tu si Tessie, donganta sian Australia. Mura do ibana mangantusi na nidok ni Bibel. Alai, maol do ibana marhamubaon jala ndang hea ro tu parpunguan. Nunga martangiang na mangurupi ibana marsiajar Bibel laho pasohon parsiajaran ni nasida. Tingki marsiajar, disungkun donganta on ma si Tessie boasa ndang marhamubaon dope ibana. Songgot ma rohana mambege alus ni si Tessie tingki didok songon halak na munafik do ibana ala lomo rohana marjuji. Alai, saonari ndang diulahon ibana be songon i.

¹⁶ Ndang sadia leleng, dohot ma si Tessie marpungu, marsitutu patuduhon parange Kristen nang pe sai dielaela donganna. Dung i, tardidi ma ibana. Nang pe adong posoposona, merintis ekstra do si Tessie. Tarida ma sian on, tingki parsiajar Bibel mambahen hamubaon laho mangoloi Debata, urupanNa do nasida jala dipangke tu ulaon na sangap.

17. (a) Boasa las rohanta mamboto Jahowa Sitopa hita? (b) Aha do na laho taparsiajari di parsiajaran na mangihut?

¹⁷ Saonari, tongtong dope adong tano liat na ditopa pangke tangan gabe gunsi na arga. Dos songon i, sabar do Jahowa manopa hita marhite patikNa jala dipaima do hita marhamubaon. (Jaha Psalmen 32:8.) Dihilala hamu do na diparrohahon Jahowa hamu? Dihilala hamu do hasabaron ni Jahowa manopa hamu? Molo songon i, parange aha do na ingkon patuduhononmu? Parange aha do na ingkon tapasiding asa mura ditopa? Songon dia do Jahowa mangurupi natuatua manopa ianakhonna? Tadapot ma alus ni sungkunsungkun on di artikel na mangihut.