Sai Ringkot do Molo Hita Manamue!

 1. Sitaonon aha do na diadopi angka halak Kristen di abad na parjolo?

HIRAHIRA taon 62 sahat tu 64, ditongoshon si Petrus do surat tu angka dongan na di pangarantoan, i ma na di kota “Pontus, Galatia, Kappadosia, Asia dohot Bitinia”. (1 Ptr. 1:1) Marragam do haroroan dohot hasomalan ni nasida. Alai mansai susa do ngolu ni nasida tingki i. Ingkon diadopi nasida do pangunjunan na borat dohot paraloan. Jadi porlu do nasida dipatogu jala diurupi. Didok si Petrus ma, “Nunga jonok ujung ni saluhutna!” Alana, ndang sadia leleng nai, laho dilengsehon nama Jerusalem. Jadi, aha ma na boi mangurupi nasida mangadopi sitaonon i?​—1 Ptr. 4:4, 7, 12.

2, 3. Boasa dijujui si Petrus angka dongan asa lomo roha ni nasida manamue? (Ida gombar di mula ni parsiajaran.)

² Dijujui si Petrus do angka dongan asa manamue dongan na asing. (1 Ptr. 4:9) Molo tatamue sasahalak, lapatanna lomo do rohanta tu nasida jala las rohanta patuduhon haburjuon tu nasida. Alai, tingki didok si Petrus ingkon manamue tu dongan na asing, lapatanna i ndang diulahon holan tu angka halak na baru tinanda. Dohot do tu angka dongan naung leleng ditanda jala rap saulaon dohot nasida. Aha do laba na didapot ala lomo roha ni nasida manamue?

³ On mambahen nasida gabe lam solhot. Songon dia molo hamu? Hea do hamu mangkilala las ni roha ala digokhon sasahalak tu jabu ni nasida? Molo taulahon na sarupa, on mambahen hita gabe lam solhot tu nasida. Gabe lam tatanda ma angka donganta molo lomo rohanta manamue nasida. Halak Kristen di tingki ni si Petrus, ingkon solhot do nasida tu donganna be. Alana, lam susa do parngoluon ni nasida. Hita pe saonari, porlu do mangulahon i ala mangolu di “tingki parpudi”.​—2 Tim. 3:1.

 4. Sungkunsungkun aha do na laho taulas di parsiajaran on?

⁴ Songon dia carana asa boi hita manamue tu angka donganta? Aha do na boi mangambati hita laho manamue, jala songon dia hita asa lam ringgas manamue? Songon dia hita asa denggan martamu?

 5. Songon dia caranta manamue tingki di parpunguan?

⁵ Di parpunguan: Digokhon Jahowa do sude hita asa ro tu parpunguan. Lomo do rohanta molo angka na ro tu parpunguan boi marlas ni roha ala tajangkon, tarlumobi angka halak na parjolo sahali ro. (Rom 15:7) Sasintongna Jahowa do na manamue nasida, jadi denggan ma tajangkon nasida, ndang soal manang songon dia cara ni nasida marpangkean. (Jak. 2:1-4) Molo diida hamu sahalak na baru ro hundul sahalakna, olo do hamu rap hundul di lambungna? Tontu, gabe las do rohana molo taurupi nasida mangihuthon acara di parpunguan i, dohot mangurupi mangalului ayat na dijahahon. On ma cara na dumenggan laho manamue.​—Rom. 12:13.

 6. Ise do na tarlumobi tatamue?

⁶ Paradehon sipanganon: Lomo do roha ni angka halak na disurathon di Bibel manogihon angka halak asa mangan di jabuna. On patuduhon na lomo do roha ni nasida asa lam solhot dohot dongan na asing. (1 Mus. 18:1-8; Pangh. 13:15; Luk. 24:28-30) Ise do na tarlumobi tatamue? I ma angka dongan sahaporseaon. Di tingkinta saonari, ingkon masiurupan do hita dohot angka donganta. Umpamana, Di Betel Amerika Serikat taon 2011, mulana dipungka jam 6.45 botari do mangulas Joujou Paboahon. Alai diganti gabe jam 6.15 botari. On dibahen asa sude anggota Betel boi manamue angka dongan na asing dung sae parpunguan i. On ma carana asa anggota Betel boi lam mananda angka donganna.

7, 8. Songon dia caranta manamue angka parjamita na ro tu hurianta?

⁷ Ra, adong do donganta sian huria na asing, manang pengawas wilayah, manang wakil ni kantor cabang na marjamita tu hurianta. Songon dia do caranta manamue angka donganta on? (Jaha 3 Johannes 5-8.) Carana, tatogihon ma nasida asa rap mangan di jabunta.

⁸ Sada donganta borua di Amerika Serikat mandok, “Saleleng martaontaon, las do rohangku dohot tungganedolingku manamue angka parjamita dohot tungganeboruna tu jabunami.” Dihilala ibana, gabe lam togu do haporseaonna jala las do rohana tingki manamue i. Didok do muse, “Ndang hea husolsoli manamue angka dongan.”

9, 10. (a) Ise do somalna mangkaporluhon inganan asa leleng manginap? (b) Boi do hita manamue nasida nang pe ndang balga jabunta? Paboa ma sada pengalaman.

⁹ Angka tamu na manginap: Di tingki najolo, somal do angka halak paradehon inganan manginap tu halak na ro sian luat na dao. (Job 31:32; Plm. 22) Hita pe saonari porlu do mangulahon i. Tingki ro pengawas wilayah tu hurianta, dihaporluhon nasida do inganan asa manginap. Manang porlu do penginapan tu angka na mangihuthon singkola ni organisasi manang angka relawan pajongjongkon Bale Harajaon. Alai songon dia taringot angka dongan na so adong be jabuna alani hona mara? Tontu, porlu do inganan di nasida andorang so dipajongjong jabuna. Unang ma tapingkir holan angka na mora na boi mangurupi. Ra, nasida pe nunga jotjot mangurupi. Jadi, olo do hamu manjalo sasahalak laho manginap, nang pe ndang balga jabumuna?

¹⁰ Songon pengalaman ni donganta di Korea Selatan. Dijangkon nasida do angka dongan na mangihuthon singkola ni organisasi asa manginap di jabunasida. Didok ibana, “Sasintongna, maila do ahu. Ala baru dope hami marhasohotan, jadi gelleng dope jabunami. Alai, las do roha tingki manginap nasida di jabunami. Diida hami ma las ni roha ni angka dongan naung marhasohotan na rap merintis.”

11. Boasa angka dongan na baru pinda tu hurianta porlu tatamue?

¹¹ Angka dongan na baru pinda tu hurianta: Adong do angka dongan manang sada keluarga na ro sian luat na asing tu hurianta. Ra, nasida pinda laho mangurupi huriamuna. Manang, na ditugashon do nasida gabe perintis di huriamuna. Tontu, godang do penyesuaian na ingkon dibahen nasida. Umpamana, taringot inganan na baru, huria na baru, manang bahasa dohot hasomalan na baru. Boi do hamu manogihon halak na baru asa rap mangan manang rap mardalani dohot hamu. On boi mangurupi nasida asa lam solhot tu huriamuna jala mura mambahen penyesuaian.

12. Pengalaman aha do na patuduhon ndang ingkon godang na taparade laho manamue?

¹² Ndang pola ingkon godang na taparade laho manamue. (Jaha Lukas 10:41, 42.) Songon pengalaman ni donganta tingki parjolo sahali ibana dohot tungganeboruna gabe misionaris. Didok ibana, “Poso dope hami tingki i, ndang adong dope pengalaman, jala jotjot do hami masihol tu hutanami. Sada tingki, masihol hian ma tungganeborungku tu hutana. Nunga marsitutu ahu mangapuli ibana, tong dope lungun rohana. Alai hirahira jam tonga ualu borngin, adong ma na manuktuk pintu ni jabunami, i ma sahalak parsiajar Bibel. Ibana ro laho mangida hami jala diboan do tolu jeruk. Ditogihon hami ma ibana masuk jala dilehon hami ma minum. Dung i, dibahen hami ma muse tes manis dohot susu coklat. Ndang diantusi hami dope bahasa Swahili, ibana pe ndang diboto marbahasa Inggris.” Didok donganta i do molo pengalamanna i mangurupi nasida asa lam solhot tu angka dongan disi jala lam marlas ni roha.

13. Aha do labana molo lomo rohanta manamue?

¹³ Hea do hira na maol dihilala hamu laho manamue? Molo songon i do pangkilalaanmuna, boi do gabe maol hamu mandapot las ni roha jala mandapot paralealeon na manongtong. Manamue do sada cara na dumenggan asa unang gabe lungunlungunan hita. Jadi, aha do na mambahen sasahalak gabe maol manamue? Adong do pigapiga alana.

14. Aha do na porlu taulahon molo tahilala ndang adong tingki dohot gogonta laho manamue?

¹⁴ Mangalehon tingki: Godang do ulaon dohot tanggung jawab ni naposo ni Debata. Ra, pigapiga mangkilala ndang tolap nasida ala ndang adong tingki laho manamue. Molo songon i do na dihilala hamu, atur ma tingkimuna asa boi manamue angka dongan. Ringkot do on, alana dijujui Bibel do hita asa lomo rohanta manamue. (Heb. 13:2) Jadi, dipujihon do molo olo hita manamue. Alai asa boi mangulahon i, orui hamu ma angka ulaon na so pola ringkot.

15. Boasa adong pigapiga halak mangkilala maol manamue?

¹⁵ Ndang pos rohanta tu dirinta sandiri: Hea do di hilala hamu, naeng manamue alai hira na so tolap hamu mangulahon i? Ra, ala parila do hamu. Manang atik na gabe bosan do annon dongan na ditamue hamu. Manang, ala dihilala hamu ndang cukup hepengmuna, jala ndang boi lehononmuna songon na dilehon dongan na asing. Alai ingot ma, ndang ingkon bagak hian jabunta. Na rumingkot, i ma molo ias jabunta, jala ingkon burju hita manjangkon. Tontu on mambahen gabe las do roha ni nasida.

16, 17. Aha do na boi taulahon molo busisaon hita laho manamue?

¹⁶ Hea do hamu busisaon tingki naeng ro tamumuna? Ndang holan hamu na mangkilala songon i. Songon pengalaman ni sahalak sintua di Inggris, didok ibana, “Tingki naeng ro tamunami, busisaon do ahu paradehon angka na porlu. Alai, manamue dos do songon angka ulaon na asing laho manomba Jahowa, godang do laba dohot las ni roha na hudapot, jala umgodang sian holso ni rohangku. Las do rohangku nang pe holan hundulhundul laho mangkatahatai jala minum kopi dohot angka dongan.” Denggan do molo tapatudu las ni rohanta ala manjangkon nasida. (Plp. 2:4) Godang halak na las rohana molo mangkatahatai taringot pengalaman ni nasida. Alani i tingki rap dohot nasida, disi ma tingki na pas manangihon pengalaman ni nasida. Sintua na asing mandok, “Ala hutogihon angka dongan tu jabungku, gabe lam hutanda ma nasida, jala huboto ma songon dia nasida boi mananda hasintongan.” Molo las rohamuna tu angka dongan na ro, tontu nasida pe las do rohana.

¹⁷ Adong sahalak perintis na jotjot manamue angka na mangihuthon singkola organisasi. Didok ibana, “Sasintongna holsoan do ahu ala ndang pola lengkap angka barang di jabungku jala angka barang bekas do i. Alai adong ma tungganeboru ni sahalak instruktur na paposhon rohangku. Didok ibana, ndang i na rumingkot di nasida, alai tading di jabu ni halak na mangkaringkothon Debata i do na mambahen las roha nasida. Gabe huingot ma hata ni omakku tingki dakdanak hami: ‘Tagonan [sapiring sayur] mardongan holong ni roha.’” (Poda 15:17) Alani i, ndang porlu hita holsoan. Na rumingkot, i ma molo tapatudu holong tu dongan na tatamue.

18, 19. Songon dia hita pasidingkon pingkiran na so denggan molo lomo rohanta manamue?

¹⁸ Ala ndang lomo rohanta tu pigapiga dongan: Adong do sahalak dongan di huria na mambahen jut rohamuna? Ra, gabe ndang olo hamu manogihon ibana tu jabumuna ala ndang lomo rohamu mangida parangena. Manang, adong do na hea mambahen hansit rohamuna, jala maol do hamu manalpuhon i. Molo ndang dipasiding hamu pangkilalaan i, songon i ma torus na dihilala hamu.

¹⁹ Bibel mandok, molo lomo rohanta manamue, boi do i mambahen hita lam solhot tu na asing, tarmasuk ma i tu musunta. (Jaha Poda 25:21, 22.) Molo ditogihon hamu sasahalak tu jabumuna, gabe boi ma hamu pasidingkon angka pingkiran na so denggan taringot ibana. Jala boi ma hamu gabe lam maraleale tu ibana. Ra, boi ma diida hamu parangena na denggan, songon Jahowa mangida parange na denggan sian ibana. (Joh. 6:44) Molo holong do na mangonjar rohanta laho manamue sasahalak, boi do i gabe dalan asa maraleale hita. Songon dia carana mamboto alani holong do hita gabe taronjar mangulahon i? Carana, i ma mangulahon songon na disurat di Pilippi 2:3 na mandok, “sian toruk ni rohamuna be ma rajumi hamu donganmuna sumurung sian dirimuna!” Alani i, unang ma tapingkir hita na sumurung sian angka dongan. Boi ma tadapot parsiajaran sian haporseaon, habengeton, dohot parange ni nasida na denggan. On boi mambahen lam holong rohanta tu nasida, jala lam marlas ni roha manamue.

20. Molo nunga tajangkon gokhon ni donganta, boasa ingkon taargai i jala songon dia caranta mangargai?

²⁰ Raja Daud mandok, “Ale Jahowa, ise do na jadi sorang di bagasan undungundungmu?” (Ps. 15:1) Dung i, diulas ibana ma angka parange na dihalomohon Jahowa tu sasahalak na gabe tamuNa. Sada parange na ringkot, i ma “na satia tu janjina atik pe mansai arga gararonna”. (Ps. 15:4, Bibel siganup ari) Molo adong dongan na manamue hita jala nunga tajangkon hian, unang ma gabe tasundati. Ra nunga diparade ibana sude andorang so ro hita. Jadi molo tasundati, boi do gabe marisuang sude naung diparade ibana i. (Mat. 5:37) Adong do na so jadi ro tingki digokhon ala dihilala ibana adong ulaon na dumenggan sian i. Na parholong do molo songon i hita? Ingkon taargai do molo adong halak na manamue hita. (Luk. 10:7) Jadi nang pe tasundati ala na tutu do adong na rumingkot, ingkon tibu ma tapaboa tu donganta i.

21. Songon dia hita boi denggan martamu molo taihuthon hasomalan di pigapiga luat?

²¹ Ingkon taargai do hasomalan di pigapiga inganan. Di sada inganan, boi do ro martamu nang pe ndang ingkon digokhon. Na asing, ingkon mambahen janji do andorang so ro martamu. Di inganan na asing ingkon tamuna do na parjolo mangan. Alai di luat na asing, ingkon rap do tamuna mangan dohot sakeluarga nampunasa jabu. Na asing muse, somal do mamboan sipanganon molo naeng martamu. Alai adong do na so mamboan manang aha. Di pigapiga hasomalan ndang pola boha molo tasundati gokhon na parjolo sahali. Alai molo di hasomalan na asing ndang suman molo songon i. Jadi ingkon tabahen do na denggan asa las roha ni dongan na manamue hita.

22. Boasa ringkot asa manamue?

²² Si Petrus mandok, “nunga jonok ujung ni saluhutna!” (1 Ptr. 4:7) Jadi, ndang sadia leleng nai, ingkon taadopi ma haporsuhon bolon. Alana nunga lam sega portibi on, porlu do lam tahaholongi angka donganta. Dilehon si Petrus do poda na mansai ringkot taulahon, i ma: “ringkot ma rohamuna masitamuean”. (1 Ptr. 4:9) Tutu, parohon las ni roha do molo hita manamue. Jala ringkot do i di ngolunta saonari dohot di ari naeng ro, sahat tu salelengna.