“Panondang ni Portibi On” do Anak ni Debata

Di ari parpudi Perayaan Tabernakel, i ma ari papituhon, mangajari ma Jesus di jonok ni “poti inganan ni pelean” di bagas joro. (Johannes 8:20; Lukas 21:1) Inganan on digoari Alaman ni Angka Borua. Tu inganan i ma halak mangalehon sumbangan ni nasida.

Tingki borngin saleleng perayaan i, mansai tiur do di humaliang ni bagas joro. Adong disi opat inganan ni lampu na balga. Di ganup inganan ni lampu i adong bokor-bokor na marisi miak. On ma na mambahen mansai tiur inganan i. Gabe diingot angka halak ma on tingki didok Jesus, “Ahu do panondang ni portibi on. Manang ise na mangihuthon ahu, dapotna ma sinondang ni hangoluan.”​—Johannes 8:12.

Dialo halak Parise ma na nidok ni Jesus, didok ma, “Ho sandiri do na paboahon taringot tu dirim, jadi ndang na tutu na nidokmi.” Dialusi Jesus ma nasida, “Nang pe ahu na paboahon taringot tu diringku, tutu do na hudok i. Ai huboto do sian dia ahu ro jala tudia ahu laho. Alai, ndang diboto hamu sian dia ahu ro jala tudia ahu laho.” Didok Jesus ma muse, “Tarsurat do di patikmuna, ‘Molo adong dua saksi, sintong do na pinaboana i.’ Ahu sandiri do na paboahon taringot tu diringku, jala dohot do Damang na marsuru ahu i paboahon taringot tu ahu.”​—Johannes 8:13-18.

Alai gabe disungkun halak Parise do, “Didia do Amangmi?” Dialusi Jesus ma, “Ndang ditanda hamu ahu dohot Damang i. Molo ditanda hamu ahu, tandaonmuna do Damang i.” (Johannes 8:19) Nang pe naeng ditangkup halak Parise Jesus, alai ndang adong sian nasida na barani manangkup ibana.

Didok ibana ma muse tu nasida, “Na laho ma ahu jala luluanmuna ma ahu. Alai mate ma hamu di bagasan dosamuna. Ndang boi hamu ro tu inganan sitopotonki.” Ala ndang diantusi halak Jahudi na nidok ni Jesus i, gabe didok nasida ma, “Didok ibana ndang boi hita ro tu inganan sitopotonna i, na laho maningkot do ibana?” Ndang diboto nasida sian dia haroro ni Jesus, alani i ndang diantusi nasida na nidokna. Gabe didok Jesus ma, “Sian toru do hamu, alai sian ginjang do anggo ahu. Sian portibi on do hamu, alai ndang sian portibi on anggo ahu.”​—Johannes 8:21-23.

Na nidok ni Jesus disi, i ma taringot hangoluanna di banua ginjang andorang so ro tu tano on dohot taringot Messias manang Kristus na dijanjihon i. On do na pinaima-ima ni angka pamimpin agama. Alai didok nasida do, “Ai ise huroha ho?”​—Johannes 8:25.

Alai dialusi Jesus ma nasida, “Tu aha be sai mangkatai ahu dohot hamu?” Dung i dipatorang Jesus ma tu nasida taringot tu Debata jala boasa ingkon ditangihon halak Jahudi Anak i. Didok ma, “Na hubege sian Ibana na marsuru ahu tu portibi on, i do na huhatahon. Ai tongtong do ibana sintong.”​—Johannes 8:25, 26.

Ala pos situtu roha ni Jesus tu Amana, didok ma, “Molo dung digantung hamu Anak ni jolma i, botoonmuna ma ahu do na naeng ro i, jala botoonmuna ma ndang adong na huulahon mangihuthon sangkaphu sandiri. Alai na niajarhon ni Damang i do na huhatahon. Ibana na marsuru ahu i do donganku, ndang dipasombu Ibana sahalakku, ai tongtong do huulahon lomo ni rohana.” Alai ndang songon i anggo halak Jahudi.​—Johannes 8:28, 29.

Nang pe songon i porsea do deba halak Jahudi tu Jesus, didok ibana ma tu nasida, “Molo diihuthon hamu hatangku, tutu ma hamu angka siseanku. Botoonmuna ma hasintongan jala paluaon ni hasintongan i ma hamu.”​—Johannes 8:31, 32.

Maralo do na nidok ni Jesus on tu roha ni na deba. Didok nasida ma, “Pinompar ni si Abraham do hami. Ndang hea hami diparhatoban manang ise pe. Boasa ma dohononmu ingkon dipalua hami?” Tangkas do diboto halak Jahudi na hea nasida diparhatoban, alai ndang olo nasida didok hatoban. Dipatorang Jesus ma na diparhatoban dope nasida, didok ma, “Tutu do na hudok on tu hamu, manang ise na mangulahon dosa, hatoban ni dosa i do ibana.”​—Johannes 8:33, 34.

Molo ndang olo halak Jahudi mangakkui naung diparhatoban dosa nasida, tongtong ma nasida gabe hatoban ni dosa i. Didok Jesus ma, “Hatoban ndang tongtong di jabu ni tuanna, alai anak i do na tongtong di jabu i.” (Johannes 8:35) Ndang adong parbagianan ni hatoban jala boi do ibana dipalao manang sadihari pe. Holan anak kandung manang na diadopsi do na boi “tongtong” tinggal di jabu saleleng mangolu ibana.

Alani i, molo ditanda angka halak do Anak i boi ma nasida malua sian upa ni dosa i ma hamatean. Jesus mandok, “Molo dipalua Anak i hamu, tutu ma hamu malua.”​—Johannes 8:36.