“Ndang Hea Dope Adong Halak na Boi Mangkatai Songon I”

Di Jerusalem dope Jesus mangarayahon Perayaan Tabernakel (Parlape-lapean). Las do rohana ala “godang do sian natorop i na porsea tu ibana”. Alai sogo do roha ni angka pamimpin agama. Disuru nasida ma angka petugas manangkup Jesus. (Johannes 7:31, 32) Alai ndang martabuni Jesus.

Gariada tongtong do Jesus mangajari di jolo ni angka halak di Jerusalem, didok ibana ma, “Satongkin nai nama ahu rap dohot hamu, dung i laho ma ahu mandapothon Ibana na marsuru ahu. Luluanmuna ma ahu, alai ndang jumpangmuna ahu, jala ndang boi hamu ro tu inganan sitopotonki.” (Johannes 7:33, 34) Ndang diantusi halak Jahudi na nidokna i, alani i marhusip ma nasida mandok, “Naeng tudia do ibana laho umbahen na so boi jumpangta ibana? Na naeng laho do ibana mandapothon halak Jahudi na maringanan di tonga-tonga ni halak Junani? Jala na naeng ajaranna do halak Junani? Aha do lapatan ni hata na nidokna i, ‘Luluanmuna ma ahu, alai ndang jumpangmuna ahu, jala ndang boi hamu ro tu inganan sitopotonki’?” (Johannes 7:35, 36) Sasintongna, taringot tu hamateanna dohot haheheonna tu banua ginjang do na dihatai Jesus. Jala ndang boi angka musuna mangihuthon ibana tusi.

Ujungna dapot ma ari papituhon perayaan i. Ganup manogot di perayaan i, diusehon sahalak malim ma aek sian Kolam Siloam tu toru ni langgatan na di bagas joro. Ditaringoti Jesus ma hasomalan on tingki didok ibana, “Manang ise na mauas, ro ma ibana minum tu ahu. Manang ise na porsea tu ahu, masa ma songon na nidok ni na tarsurat i, ‘Kaluar ma aek hangoluan marbuhal-buhal sian rohana.’”​—Johannes 7:37, 38.

Na laho masa dung hamateanna do na nidok ni Jesus disi. Sataon dungkon i, dipillit ibana do angka siseanna marhite tondi parbadia laho mangolu di surgo. Dungkon i, diusehon angka sisean i ma aek hangoluan tu angka halak tingki ari Pentakosta, marhite paboahon hasintongan tu angka halak.

Adong ma na mambege i mandok, “Tutu ma ibana Panurirang na naeng ro i.” Tontu na nidok ni nasida disi, i ma panurirang na umbalga sian si Musa. Na deba nai mandok, “Ibana do Kristus i.” Alai na deba nai mandok, “Ai ndang sian Galilea haroroan ni Kristus. Nda didok na tarsurat i do molo Kristus i ro sian pinompar ni si Daud jala ro sian Betlehem huta ni si Daud?”​—Johannes 7:40-42.

Alani i, gabe marsalisi ma angka halak i. Nang pe naeng ditangkup angka petugas Jesus, alai ndang saut i. Dung mulak nasida mandapothon angka pamimpin agama dohot halak Parise, disungkun ma nasida, “Boasa ndang diboan hamu ibana tuson?” Dialusi angka petugas i ma, “Ndang hea dope adong halak na boi mangkatai songon i.” Muruk ma angka pamimpin agama mambege i jala didok ma, “Na dohot do hamu dililuhon? Ai adong diboto hamu sahalak pe sian angka pamimpin manang sian halak Parise na porsea tu ibana? Alai natorop on, na so mananda Patik i, diburai Debata do nasida.”​—Johannes 7:45-49.

Adong ma disi sahalak Parise jala anggota ni Sanhedrin na margoar si Nikodemus. Ndang lomo rohana molo ditangkup Jesus. Dua satonga taon andorang so i, ro do ibana borngin-borngin mandapothon Jesus jala porsea do ibana tu na nidok ni Jesus. Alani i, didok si Nikodemus ma, “Mangihuthon Patik, boi do uhumon sasahalak andorang so binege hatoranganna jala andorang so binoto manang na aha na binahenna?” Alai dialusi angka pamimpin agama i ma, “Ai dohot do ho halak Galilea? Pareso ma jolo di Surat na Badia i manang na adong do panurirang na ro sian Galilea.”​—Johannes 7:51, 52.

Tutu, ndang adong didok di Surat na Badia na laho ro panurirang sian Galilea. Alai adong do surirang na patuduhon na laho ro do Kristus sian i. Surirang i mandok na ro ma “panondang na bolon” sian “Galilea, inganan ni angka bangso na asing”. (Jesaya 9:1, 2, Bibel siganup ari; Mateus 4:13-17) Jala songon naung disurirangkon, tubu do Jesus di huta Betlehem jala anak ni si Daud do ibana. Olo do ra diboto halak Parise taringot i. Alai dipandok nasida do na so tutu tu angka halak taringot tu Jesus.