Naeng Ihuthononnami do Ho

1, 2. (a) Aha do didok Jahowa na laho masa di tingkinta on? (b) Sungkunsungkun aha do na laho taulas di artikel on? (Ida gombar di mula ni parsiajaran.)

DIDOK Jahowa do taringot tu tingkinta on, adong ”sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna”. (Sak. 8:23) ”Halak Jahudi” manggombarhon halak na miniahan ni tondi parbadia. Didok ma nasida ”Israel ni Debata”. (Gal. 6:16) ”Sampulu halak baoa” manggombarhon angka halak na mangkirim mangolu di tano on. Diboto nasida Jahowa do na mamasumasu punguan ni halak na miniahan on jala hasangapon do manomba Debata rap dohot nasida.

² Songon naung disurirangkon si Sakaria, Jesus mandok, naposo ni Debata ingkon marsada. Dipatorang muse taringot tu halak na laho mangolu di surgo, digoari ma on ”punguan na metmet” jala adong muse na laho mangolu di tano on, digoari ma on ”birubiru na asing”. Alai ingkon ”sada punguan” nasida jala mangihuthon ”sada parmahan” i ma Jesus. (Luk. 12:32; Joh. 10:16) Dung adong punguan na dua on, ra tubu do sungkunsungkun: (1) Ingkon botoon ni birubiru na asing do sude goar ni angka na miniahan? (2) Songon dia do sasintongna halak Kristen na miniahan mangida dirina sandiri? (3) Molo adong sasahalak di huriangku na mangallang roti jala na manginum anggur di ari Parningotan, songon dia do ahu maradophon nasida? (4) Sungkunsungkun do rohangku ala lam tamba bilangan ni halak na mangallang roti dohot na manginum anggur di ari Parningotan? Artikel on mangulas sungkunsungkun on.

 3. Boasa ndang adong sahalak pe na boi mamboto ise na dohot tu punguan ni 144.000?

³ Ingkon botoon ni birubiru na asing do sude goar ni angka na miniahan? Ndang. Boasa? Ndang adong na mamboto ise na miniahan na laho mandapot upa.^[1] Nang pe naung dijou Debata nasida mangolu di surgo, ingkon marsihohot do nasida asa mandapot upa. Diboto Sibolis do on, alani i dipangke ibana ma ”panurirang pargapgap” laho ”mangaliluhon” nasida. (Mat. 24:24) Ndang diboto na miniahan i dope jaloon ni nasida upana manang na ndang alai, Jahowa do na manontuhon molo marsihohot nasida. Nunga disahap (dimeterai) Jahowa nasida andorang so mate dope manang tingki pamungka ni ”hasusaan bolon”.​—Pgk. 2:10; 7:3, 14.

 4. Nang pe ndang taboto goar ni sude halak na miniahan na tading di tano on saonari, songon dia hita boi ”rap sauduran” dohot nasida?

⁴ Nang pe ndang boi taboto goar ni angka na miniahan, songon dia do hita boi rap ”sauduran” dohot nasida? Bibel mandok, adong sampulu halak baoa ”marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna”. Nang pe ayat ni Bibel mandok sahalak Jahudi, alai hata ”Debata do donganmuna” on lapatanna ndang holan sada halak Jahudi, alai on patuduhon punguan ni halak na miniahan. Nang pe ndang diboto birubiru na asing goar ni sude halak na miniahan, alai diboto do na rap nasida dohot punguan ni na miniahan on manomba Jahowa. Jala ndang mangihuthon sada sian nasida. Asa boi hita rap sauduran dohot nasida, ingkon mangihuthon sada pamimpin, i ma Jesus, ala didok di Bibel holan ibana do na ingkon taihuthon.​—Mat. 23:10.

 5. Aha do sipasingot na ingkon manat dipingkiri halak na miniahan jala boasa?

⁵ Manat ma dipingkiri halak na miniahan sipasingot na adong di 1 Korint 11:27-29. (Jaha.) Songon dia do na miniahan mangallang roti jala minum anggur ”sian na so tau” di ari Parningotan? Molo ndang denggan dijaga paralealeonna tu Jahowa jala ndang marsihohot ibana hape diallang roti jala diinum anggur, on patuduhon ndang dipasangap ibana Debata. (Heb. 6:4-6; 10:26-29) Sada sipasingot do on tu na miniahan, ingkon tongtong do nasida marsihohot molo naeng mandapot ”upa hamonangan na sian panjouon ni Debata sian ginjang, di bagasan Kristus Jesus i.”​—Plp. 3:13-16.

 6. Songon dia do sasintongna halak na miniahan mangida dirina sandiri?

⁶ Didok si Paulus tu na miniahan, ”Asa ahu na tarihot [tarhurung] di bagasan Tuhan i, huapoi ma hamu: Parangehon hamu ma na tama, hombar tu panjouon naung songgop tu hamu!” Songon dia nasida mangulahon on? Didok si Paulus muse, ”Martoruk ni roha situtu, marlambok jala marlambas ni roha, masihaehean di bagasan roha na holong! Haringgashon hamu ma mangaradoti hasadaon ni Tondi, pinadomu ni dame!” (Eps. 4:1-3) Diurupi tondi parbadia ni Jahowa do halak na manomba Ibana asa tongtong marserep ni roha, ndang marginjang ni roha. (Kol. 3:12) Unang ma dirimpu na miniahan on dumenggan nasida sian na asing. Jala ndang gumodang dilehon Jahowa tondi parbadiaNa tu nasida sian sude halak na manomba Ibana. Ndang dohononna umbotoan nasida hasintongan ni Bibel sian na asing. Ndang paboan ni halak na miniahan tu halak na asing molo ibana na dimiahi jala mangallang roti dohot minum anggur di ari Parningotan. Ingkon serep do rohanasida ala diboto holan Jahowa do na boi manjou halak na laho mangolu di surgo.

7, 8. Aha do na so dihalomohon halak Kristen na miniahan, jala boasa?

⁷ Nang pe na miniahan on mandapot hasangapon dijou laho mangolu tu surgo, alai ndang ingkon sipasangapon jala sumurung nasida bahenon sian na asing. (Eps. 1:18, 19; jaha Pillipi 2:2, 3.) Ndang adong halak na asing mamboto nasida dimiahi Jahowa. Alani i, ndang pola sungkunsungkun rohanasida tingki adong na so porsea molo nasida naung dimiahi. Songon na dipaboa di Bibel, ndang sude halak porsea tingki adong mandok dilehon Jahowa tu ibana tanggung jawab na sumurung. (Pgk. 2:2) Ndang hirimon ni na miniahan asa gumodang disarihon nasida. Alani i, ndang paboaonna tu na asing na miniahan nasida. Jala ndang paboaboaonna manang aha pe na laho ulahononna di surgo.​—1 Kor. 1:28, 29; jaha 1 Korint 4:6-8.

⁸ Ndang marsaor nasida holan tu halak na miniahan manang mambahen punguan di nasida sandiri. Jala ndang jumpangan nasida dongan na miniahan laho manaringoti angka na hombar tu nasida, manang mambahen parpunguan laho marsiajar Bibel. (Gal. 1:15-17) Ndang marsada huria molo songon i do diulahon nasida. Tondi parbadia na mangalehon hadameon dohot hasadaan ni roha di huria, i do na dialo nasida molo diulahon songon i.​—Jaha Rom 16:17, 18.

 9. Songon dia do bahenonta tu halak na mangallang roti dohot minum anggur di ari Parningotan? (Ida kotak ”Maradat Situtu do Haholongon i.”)

⁹ Songon dia do hita maradophon halak na miniahan? Didok Jesus tu angka siseanna, ”Saluhutna hamu marhahamaranggi.” Didok muse, ”Ai sipaoruon do ganup na patimbo dirina; alai sipatimboon do na paoru dirina.” (Mat. 23:8-12) Ndang denggan molo pasangaphu tabahen tu sasahalak nang pe nasida na miniahan. Tingki dipaboa di Bibel taringot angka sintua, didok asa tatiru haporseaon ni nasida. Ndang hea dipaboa di Bibel asa tabahen jolma gabe pamimpin di hita. (Heb. 13:7) Tutu do didok Bibel, ”Silompit do jujuron hasangapon ni sintua.” Alai, tapasangap pe nasida alana ”burju mangula hasintuaon” jala ”mangulahon hata dohot poda”, ndang alana dimiahi. (1 Tim. 5:17) Molo sai tapuji jala pasangaphu tabahen angka na miniahan, on boi mambahen nasida maila. Manang boi do nasida gabe marginjang ni roha. (Rom 12:3) Ndang adong sian hita na olo mambahen angka dongan na miniahan on gabe mardosa!​—Luk.17:2.

10. Songon dia do hita patuduhon pangargaion tu halak na miniahan?

¹⁰ Songon dia do patuduhon pangargaion tu halak na miniahan? Ndang sungkunonta songon dia nasida gabe halak na miniahan. (1 Tes. 4:11; 2 Tes. 3:11) Unang ma sungkunsungkun rohanta molo tunggani doli, tunggani boru, natuatuana, dohot angka keluargana pe na miniahan. Alana ndang sian keluarga sasahalak mandapot upa. (1 Tes. 2:12) Unang ma tabahen sungkunsungkun na mambahen hansit roha ni halak na asing. Umpamana, unang ma tasungkun tunggani boru ni halak na miniahan songon dia pangkilalaanna haduan mangolu salelengna di tano on, alai ndang rap dohot tunggani dolina. Pos do rohanta, boi do Jahowa ”pasombu lomo ni roha ni nasa na mangolu” di tano na imbaru.​—Ps. 145:16.

11. Songon dia do hita manjaga diri asa unang pasangaphu tabahen tu sasahalak?

¹¹ Molo ndang pasangaphu tabahen tu halak na miniahan, dirinta do na tajaga disi. Songon dia? Dipaboa Bibel tu hita ”adong do deba dongan na so haru dongan” na mandok dirina na miniahan. (Gal. 2:4, 5; 1 Joh. 2:19) Adong do halak na miniahan na so marsihohot. (Mat. 25:10-12; 2 Ptr. 2:20, 21) Molo ndang pasangaphu sasahalak tabahen, on patuduhon hita ndang mangihuthon jolma, nang pe nasida na miniahan manang naung leleng manomba Jahowa. Molo adong na so marsihohot manang gabe maninggalhon huria, ndang gabe mago haporseaonta tu Jahowa.​—Jud. 16.

12, 13. Boasa ndang pola sungkunsungkun rohanta ala tamba bilangan ni halak na mangallang roti dohot na minum anggur di ari Parningotan?

¹² Di angka taon naung salpu, lam moru do bilangan ni halak na mangallang roti dohot na minum anggur. Alai saonari on, lam martamba ganup taon. Sungkunsungkun do rohanta taringot i? Ndang. Taida ma boasa songon i.

¹³ ”Ditanda Tuhan i do angka na di Ibana!” (2 Tim. 2:19) Sasintongna, ndang diboto na mangetong bilangan ni halak na mangallang roti dohot na minum anggur di ari Parningotan ise na dimiahi, holan Jahowa do na mamboto. Adong do na mandok nasida dimiahi alai sasintongna ndang. Umpamana, adong do naung leleng mangallang roti dohot minum anggur, alai di pudian ni ari ndang diulahon be i. Na asing muse adong do na paposhu rohana tu dirina sandiri jala nasida porsea naeng dohot mamarenta raphon Jesus di surgo. Alani i, ndang tangkas taboto godang ni halak na miniahan na tading di tano on saonari.

14. Songon dia do didok Bibel taringot tu bilangan ni halak na miniahan na tading sahat tu na ro hasusaan bolon?

¹⁴ Adong dope na miniahan tading di tano on tingki ro Jesus mangalap nasida laho tu surgo. Didok Bibel suruon ni Jesus ma ”angka surusuruan na marsarune mansai gogo, jadi sian desa na ualu i ma papunguonnasida angka na pinillitna, sian suhi ni langit na sada ro di na sada nari i”. (Mat. 24:31) Bibel patuduhon saleleng di ari parpudi on, adong dope otik nai bilangan ni halak na miniahan na tinggal di tano on. (Pgk. 12:17) Alai, ndang dipaboa sadia bilangan ni nasida na tading sahat tu na ro hasusaan bolon.

15, 16. Aha do na porlu taantusi taringot tu si 144.000 na pinillit ni Jahowa?

¹⁵ Nunga ditontuhon Jahowa andigan Ibana mamillit halak na dimiahi. (Rom 8:28-30) Dung dipahehe do Jesus asa dipillit Jahowa angka halak na miniahan. Halak Kristen di abad na parjolo, sude do nasida na miniahan. Alai dungkon i, godang na mandok nasida Kristen alai ndang tutu mangihuthon Kristus. Di tingki i, tongtong dope dimiahi Jahowa halak Kristen na sintong nang pe otik nama bilanganna. Didok Jesus, nasida songon eme na tubu di tongatonga ni simaremeeme. (Mat. 13:24-30) Alai, dipillit Jahowa ma muse di ari parpudi on halak na dohot tu bilangan ni si 144.000.^[2] Ala Debata do na mamillit nasida, tontu ndang ganggu be rohanta. (Jes. 45:9; Dan. 4:32; jaha Rom 9:11, 16.)^[3] Ingkon manat ma hita asa unang songon parkarejo na marungutungut ala dos dilehon gajina dohot halak na parpudi ro karejo.​—Jaha Mateus 20:8-15.

¹⁶ Ndang sude halak na mangkirim laho mangolu di surgo ”naposo haposan jala na marroha.” (Mat. 24:45-47) Di abad na parjolo, ndang sude halak Kristen dipangke Jahowa laho mangajar jala mangalehon mangan partondion ni godang halak. Jala ndang sude sian nasida na dipangke laho manurat angka buku Junani Kristen. Saonari pe, holan saotik do halak Kristen na dimiahi na martanggung jawab laho mangalehon angka naposoNa ”mangan di tingkina”.

17. Aha do na taparsiajari sian artikel on?

¹⁷ Aha do na taparsiajari sian artikel on? Jahowa do na mamillit halak na laho mangolu salelengna di tano on dohot na mangolu di surgo. Dipasupasu Jahowa do sude naposoNa, halak ”Jahudi” dohot na ”sampulu halak” i. Dos do patik ni Jahowa siulahonon ni nasida jala ingkon tongtong do nasida marsihohot. Ingkon marserep ni roha, jala marsada rap manomba Jahowa. Ingkon manjaga hadameon di huria. Dung i, ala naung jonok ari i, rap ma hita manomba Jahowa jala mangihuthon sada parmahan, i ma Kristus.