Laos Tondi i do Mangkatindangkon di Tondinta

1-3. Aha do na mambahen ari Pentakoste i sumurung jala songon dia do on manggohi surirang ni Bibel? (Ida gombar di mula ni parsiajaran.)

ARI Minggu ma tingki i di Jerusalem taon 33 DM, ari na sumurung jala na palashon roha. Angka halak mangarayahon ari Pentakoste, perayaan na badia di perayaan patumonaan panen gandum. Manogotna i di bagas joro, dipelehon sintua ni malim ma pelean siganup ari. Dung i, pukul sia dipelehon sintua ni malim ma dua roti sian patumonaan ni panen gandum tu Jahowa.​—3 Mus. 23:15-20.

² Ganup taon do on diulahon sintua ni malim. Pelean na dipelehon on, manggombarhon na masa di ari Pentakoste taon 33 D.M. On dihilala 120 halak sisean ni Jesus tingki rap nasida martangiang di sada inganan di Jerusalem. (Ul. 1:13-15) Ualu ratus taon andorang so masa i, nunga disurat panurirang Joel aha na laho masa. (Joel 3:1-5; Ul. 2:16-21) Boasa on mansai ringkot?

³ Jaha Ulaon ni Apostel 2:2-4. Di ari Pentakoste taon 33 DM, dilehon Jahowa tondi parbadiaNa tu halak Kristen jala dimiahi nasida. (Ul. 1:8) Torop do halak pungu disi, dung i mangkatai ma angka sisean i hombar tu halongangan na niida jala na binege nasida. Dipaboa apostel Petrus ma aha na masa. Didok ibana tu na torop i, ”Pauba hamu ma rohamuna, dung i padidihon hamu ma ganup hamu tu bagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i.” Di tingki i, adong 3.000 halak na tardidi jala dijalo nasida tondi parbadia.​—Ul. 2:37, 38, 41.

 4. (a) Boasa ringkot taboto aha na masa di ari Pentakoste taon 33? (b) Ulaon na sarupa aha do na diulahon dohot perayaan ari Pentakoste? (Ida ma catatan.)

⁴ Aha do na diulahon sintua ni malim jala aha do na digombarhon ni pelean na dilehon di ari Pentakoste i? Sintua ni malim manggombarhon Jesus. Gandum manggombarhon sisean ni Jesus na miniahan. Angka sisean on nunga dipillit sian angka jolma na mardosa jala digoari ma nasida ”patumonaan”. (Jak. 1:18) Dijalo Debata do nasida on gabe anakNa jala dipillit nasida gabe raja rap dohot Jesus di surgo laho mamarenta di HarajaonNa. (1 Ptr. 2:9) Marhite Harajaon on, dilehon Jahowa ma pasupasu tu sude jolma na mangoloi Ibana. Alani i, didia pe pangkirimonta, di surgo manang di tano on, ari Pentakoste taon 33 i mansai ringkot di hita.^[1]

 5. Sian dia do taboto ndang sai dos na masa tu sasahalak tingki nasida dimiahi?

⁵ Ndang tarhalupahon ni angka sisean i na masa di tingki i. Ganup nasida disonggopi na songon dila ni api. Dibahen Jahowa nasida mangkatai di hata na asing. Pos do roha ni angka sisean i, molo nasida dimiahi tondi parbadia. (Ul. 2:6-12) Alai, tanda halongangan sisongon on ndang masa tu sude halak Kristen tingki nasida dimiahi. Di pudian ni ari, tingki marribu halak di Jerusalem dimiahi, ndang adong songgop na songon dila ni api tu nasida. Tingki tardidi do nasida dimiahi. (Ul. 2:38) Alai, ndang sude halak Kristen dimiahi tingki tardidi. Songon halak Samaria, dungkon tardidi do nasida asa dimiahi. (Ul. 8:14-17) Alai na asing muse, andorang so tardidi nasida dimiahi, songon si Kornelius dohot sude na di bagasan jabuna.​—Ul. 10:44-48.

 6. Aha do na dijalo ni sude halak na dimiahi jala aha pangkorhonna tu nasida?

⁶ Tingki sahalak Kristen dimiahi, adong do na pintor mamboto naung dimiahi Jahowa ibana. Alai, na asing dung pe leleng asa diboto naung dimiahi. Dipaboa apostel Paulus aha naung dijalo ni halak na dimiahi. Didok ibana, ”Jala di bagasan Ibana gabe porsea hamu, laos disahaphon do tu hamu Tondi Parbadia na pinarbagabaga i. Ibana do patujolo ni arta siteanonta.” (Eps. 1:13, 14) Marhite tondi parbadia, dipatuduhon Jahowa tu halak Kristen na miniahan molo nasida nunga dipillit laho mangolu tu surgo ndang di tano on. Dilehon do tu bagasan rohanasida ”patujolo i”, i ma tondi parbadia.​—Jaha 2 Korint 1:21, 22; 5:5.

 7. Aha do na ingkon diulahon halak Kristen na dimiahi asa boi nasida mandapot upa tu surgo?

⁷ Tingki sasahalak dimiahi, naung situtu do ibana mandapot upa tu surgo? Ndang. Diboto do naung dijou ibana tu surgo. Alai, asa dapotna upa i, ingkon marsihohot do tu Jahowa. Didok apostel Petrus, ”Dibahen i, ale angka dongan, lam ringgas ma hamu pahothon panjouonna dohot pamillitonna di hamu; ai molo diulahon hamu i, ndang olo be hamu tinggang. Songon i ma buas lehononna tu hamu hamasuhon tu bagasan, harajaon salelenglelengna, na di Tuhanta Jesus Kristus, Sipalua i.” (2 Ptr. 1:10, 11) Alani i, halak naung dimiahi ingkon marsitutu do mangoloi Jahowa. Nang pe naung dijou ibana asa parsidohot tu surgo, molo ndang marsihohot ndang dapotna upa i.​—Heb. 3:1; Pgk. 2:10.

8, 9. (a) Boasa maol diantusi torop halak aha na masa tingki sasahalak dimiahi? (b) Songon dia do sasahalak mamboto molo ibana dijou tu surgo?

⁸ Torop do na manomba Debata saonari on, ndang mangantusi aha na masa tu sasahalak tingki dimiahi. Alana nasida sandiri ndang dimiahi. Ditompa Debata jolma laho mangolu di tano on do, ndang di surgo. (1 Mus. 1:28; Ps. 37:29) Alai, Jahowa do na mamillit sasahalak gabe raja jala malim di surgo. Alani i, tingki dimiahi Jahowa nasida, muba ma pingkiran dohot pangkirimon ni nasida.​—Jaha Epesus 1:18.

⁹ Alai, songon dia do sasahalak mamboto molo ibana dijou tu surgo? Dipaboa si Paulus do tu ”angka na badia” i ma halak Kristen na di Rom. Didok ibana, ”Ai ndang na dijalo hamu tondi hatoban, asa mangulahi mabiar, Tondi haanakon do dijalo hamu; mangasahon I do panjouonta: Abba, mandok: Ale Amang! Laos Tondi i do mangkatindangkon di tondinta, paboa na tutu hita anak ni Debata.” (Rom 1:7; 8:15, 16) Lapatanna, marhite tondi parbadia, tangkas ma dipatuduhon Jahowa tu sasahalak naung dijou Debata ibana asa mamarenta gabe raja di surgo rap dohot Jesus.​—1 Tes. 2:12.

10. Songon na disurat di 1 Joh. 2:27 aha do lapatanna ndang porlu ajaran ni na asing halak Kristen na dimiahi?

¹⁰ Ndang halak na asing na paboahon molo sasahalak dimiahi. Jahowa do na paposhon rohana. Didok apostel Johannes do tu halak naung dimiahi, ”Naung miniahan ni Na-badia i do hamu, jala saluhut hamu umbotosa.” Didok muse, ”Na mian do di bagasan hamu pamiahion, naung jinalomuna sian Ibana; ndang pola hamu ajaran ni halak. Sintong do na niajarhon ni pamiahion i saluhutna tu hamu, ndang adong gabus disi. Mian ma hamu di bagasan Ibana, songon naung niajarhon tu hamu!” (1 Joh. 2:20, 27) Halak Kristen na dimiahi on pe, tongtong do mangkaporluhon pangajarion sian Jahowa. Alai, marhite tondi parbadia ni Jahowa do diboto molo nasida naung dimiahi!

11, 12. Sungkunsungkun aha do na ro tu pingkiran ni halak Kristen na dimiahi, alai aha do na mambahen pos rohanasida?

¹¹ Tingki dimiahi tondi parbadia sasahalak, muba ma na masa tu ibana. Songon na nidok ni Jesus, ditubuhon muse manang ingkon ”tubu sian ginjang”. (Joh. 3:3, 5) Dipatorang ibana muse, ”Unang ma longang roham, ala hudok tu ho: Ingkon tubu hamu sian ginjang! Na mangullus do alogo dompak lomo ni rohana; dibege ho do parngongosna, alai ndang diboto ho haborhatanna manang hasahatanna. Laos songon i do ganup naung tubu sian Tondi.” (Joh. 3:7, 8) Tutu do, ndang tarpatorang halak na dimiahi pangkilalaan ni nasida tu halak na asing na so dimiahi.^[2]

¹² Olo do sungkunsungkun roha ni sasahalak na miniahan, ’Boasa ahu dipillit Jahowa ndang halak na asing? Tolap do ahu mangulahon tanggung jawab on?’ Ingkon marpos ni roha do sasahalak naung dipillit Jahowa ibana. Ingkon las ma rohana jala mandok mauliate tu Jahowa alani silehonlehon on. Dihilala halak na miniahan ma songon na nidok ni si Petrus, ”Pinuji ma Debata, Ama ni Tuhanta Jesus Kristus, naung manubuhon hita paduahalihon, sian godang ni asi ni rohana, marhitehite haheheon ni Jesus Kristus sian angka na mate, asa marpangkirimon na mangolu hita. Di siteanon na manongtong, na so marlindang, na so ra malos, na sinimpan di banua ginjang di hamu.” (1 Ptr. 1:3, 4) Tingki sasahalak na dimiahi manjaha on, pos do rohanasida jala diboto molo Debata, Amanasida naung paboahon i tu nasida.

13. Boasa gabe muba pangkirimon ni sasahalak tingki dimiahi tondi?

¹³ Andorang so dijou Jahowa dope halak Kristen na miniahan on, mangkirim do nasida mangolu di tano on salelengna. Jala maimaima do nasida laho bahenon ni Jahowa tano on gabe paradeiso na so adong be hajahaton. Las do rohanasida laho manjangkon angka sisolhot dohot aleale na laho dipahehe. Jala, hirim do rohanasida laho pajongjongkon jabu jala tading disi manang manuan angka hau jala mangallang parbuena. (Jes. 65:21-23) Boasa muba pangkirimon ni nasida? Ala na godang do hasusaan dohot sitaonon na dihilala umbahen na muba pangkirimon ni nasida? Na dirimpu nasida do gabe ngolngolan ala mangolu salelengna di tano on? Manang na sungkunsungkun do rohana songon dia do mangolu di surgo? Ndang. Alai, Debata do na mangalehon pangkirimon on tu nasida. Tingki dijou Debata nasida, dipangke Ibana do tondi parbadiaNa asa muba pingkiran dohot pangkirimon ni nasida.

14. Songon dia do pangkilalaan ni halak na dimiahi taringot tu hangoluan ni nasida di tano on?

¹⁴ Lomo do roha ni sasahalak na miniahan i tibu mate? Dipatorang apostel Paulus do songon dia pangkilalaan ni halak na miniahan. Dipatudos si Paulus do pardagingon ni nasida on tu ”tenda” didok ibana, ”Ai tagan di parlapelapean on hami, marhoi do hami jala sorat, ala dipangido rohanami: Naeng unang ma ditanggali sian hami, dilampishon ma nian, asa dibondut hangoluan i hamatean.” (2 Kor. 5:4) Ndang lomo roha ni halak Kristen na dimiahi i asa mate. Naeng do tongtong nasida mangolu jala lomo rohanasida mamangke tingkina laho manomba Jahowa rap dohot keluarga nang alealena. Ndang soal aha na diulahon nasida, diingot nasida do aha naung dijanjihon Debata tu nasida di ari na naeng ro.​—1 Kor. 15:53; 2 Ptr. 1:4; 1 Joh. 3:2, 3; Pgk. 20:6.

15. Aha do na patuduhon molo sasahalak i ndang dimiahi tondi?

¹⁵ Olo do ninna rohanta, dipillit Jahowa do ra ahu laho mangolu di surgo. Molo songon i do na tahilala, pingkirhon ma sungkunsungkun na ringkot on: Hiras situtu do rohangku tingki marbarita na uli? Las situtu do rohangku marsiajar Bibel manang mamboto ”angka na buni di bagasan diri ni Debata”? (1 Kor. 2:10, Bibel siganup ari) Huhilala do pasupasu ni Jahowa tingki marbarita na uli? Umlomo do rohangku mangulahon lomo ni roha ni Jahowa sian ulaon na asing? Togu do holong ni rohangku tu dongan na asing jala marsitutu do ahu mangurupi nasida manomba Jahowa? Boi do huhilala na diurupi Jahowa ahu di parngoluonku? Molo tadok i do, tu sude sungkunsungkun on, patuduhon naung dipillit Jahowa do hita mangolu tu surgo? Ndang. Boasa? Ala sude do naposo ni Jahowa boi mangkilala songon on, nang pe nasida dimiahi manang na ndang. Marhite tondi parbadiaNa, dilehon Jahowa do huasoNa tu sude na manomba Ibana manang tudia pe pangkirimon ni nasida. Molo sai sungkunsungkun do rohanta na laho tu surgo do hita manang na ndang, on patuduhon ndang dijou hita laho tu surgo. Sude halak na miniahan ndang sungkunsungkun be rohanasida manang dipillit Jahowa do nasida! Alai diboto nasida do molo nasida naung dipillit!

16. Sian dia do taboto ndang sude halak na manjalo tondi parbadia dijou Debata asa mangolu di surgo?

¹⁶ Di Bibel, godang do tudosan ni halak na manjalo tondi parbadia sian Jahowa alai nasida ndang mangkirim mangolu tu surgo. Umpamana, si Johannes pandidi. Didok Jesus, ndang adong na umbalga sian si Johannes pandidi alai ninna ibana, si Johannes pandidi ndang dohot mamarenta gabe raja di surgo. (Mat. 11:10, 11) Si Daud pe didongani tondi parbadia do. (1 Sam. 16:13) Diurupi tondi parbadia do ibana asa tangkas mananda Jahowa jala disuru manurat deba isi ni Bibel. (Mrk. 12:36) Alai, didok apostel Petrus do ndada ”nangkok tu banua ginjang” si Daud i. (Ul. 2:34) Marhite tondi parbadiaNa, dilehon Jahowa do gogo tu sasahalak laho mambahen godang tanda halongangan, alai ndang i patuduhon na dijou Jahowa nasida asa mangolu di surgo. Patuduhon na hurang do haporseaon ni nasida manang na so tama do nasida laho mamarenta di surgo? Ndang. Alai, ala na laho paheheon ni Jahowa do nasida asa mangolu di paradeiso di tano on.​—Joh. 5:28, 29; Ul. 24:15.

17, 18. (a) Aha do pangkirimon ni gumodangan halak na manomba Debata saonari on? (b) Aha do sungkunsungkun na laho diulas di artikel na mangihut?

¹⁷ Gumodangan halak na manomba Debata saonari on ndang laho mangolu di surgo. Songon si Abraham, si Daud, si Johannes pandidi, dohot angka na asing na disurat di Bibel, mangkirim do nasida mangolu di Harajaon ni Debata di tano on. (Heb. 11:10) Alai, adong 144.000 halak na laho mamarenta dohot Jesus di surgo. Jala Bibel mandok adong dope ”angka pomparanna na tading” di tano on sian na miniahan sahat tu saonari. (Pgk. 12:17) Alai, godangan sian si 144.000 nunga mate jala nunga dipahehe tu surgo.

¹⁸ Molo adong sasahalak mandok na dimiahi ibana, songon dia do hita maradophon nasida? Molo adong di huriamu na mangallang roti manang na manginum anggur di tingki ari Parningotan, songon dia do bahenonmu tu nasida? Songon dia do bahenonmu molo lam godang mandok dirina na miniahan? Sungkunsungkun do rohanta tu nasida? Boi ma tadapot alusna di artikel na mangihut.