Olo do Jahowa Mangalusi Tangiakku?

1-2. Boasa sipata tahilala dang dialusi Jahowa tangiangta?

“LULUI ma las ni roham sian Jahowa. Dung i, lehononna ma na pinangido ni roham.” (Ps. 37:4) Luar biasa do janji on! Alai ikkon lehonon ni Jahowa do sude pangidoatta? Boasa tabahas sukkun-sukkun on? Parrohahon ma contoh on. Sahalak donganta borua na lajang martangiang asa boi dohot tu Sikkola tu Parbarita Harajaon. Alai dung piga-piga taon dang marnadiundang ibana. Adong muse sahalak donganta bawa na poso mangido asa dipamalum Jahowa sahitna, asa boi unggodang diurupi ibana huria. Alai dang marnamalum sahitna i. Asingni i, adong ma natua-tua na martangiang asa toktong gellengna manomba Jahowa. Hape di pudian ni ari, dang olo be gellengna i manomba Jahowa.

² Hea do ra adong na dipangido hamu tu Jahowa, alai dang marnadialusi dope tangiangmuna i. Akibatna gabe didok rohamuna ma dang adil Jahowa. Alana dialusi Ibana do tangiang ni halak, hape tangiangmuna dang dialusi Ibana. Manang gabe didok rohamuna na hea do dibahen hamu na sala umbahen dang dialusi tangiangmuna. Songon i ma na dihilala sahalak donganta borua na margoar si Janice.b Nungnga martangiang ibana dohot suamina paboahon na lomo roha ni nasida melayani di Betel. Didok ibana, “Dirippu hami pasti hatop do hami dijou tu Betel.” Alai dung martaon-taon dang marnadiundang nasida. Didok si Janice, “Lungun do rohanami jala bingung. Gabe sukkun-sukkun ma rohakku, na hea do hubahen kecewa Jahowa? Nungnga jotjot hutangiakkon on. Alai boasa ma dang marnadialusi tangiangku?”

 3. Aha do na lao tabahas di artikel on?

³ Sipata sukkun-sukkun do rohatta, ditangihon Jahowa do tangiangta manang na dang. Songon i ma na dihilala akka halak na setia na disurat di Bibel. (Job 30:20; Ps. 22:2; Hab. 1:2) Jadi aha do na mambahen pos rohatta pasti ditangihon Jahowa do tangiangta? (Ps. 65:2) Lao mangalusi sukkun-sukkun i, tabahas ma: (1) Aha do na boi taharappon sian Jahowa? (2) Aha do na diharappon Jahowa sian hita? (3) Boasa porlu tabahen piga-piga pangidoatta?

 4. Aha do janji ni Jahowa songon na dipaboa di Jeremia 29:12?

⁴ Marjanji do Jahowa tangihononna tangiangta. (Jaha Jeremia 29:12.) Ala holong do roha ni Jahowa tu akka naposona na setia, pasti ditangihon Ibana do tangiang ni nasida. (Ps. 10:17; 37:28) Alai on dang patuduhon pasti dilehon Ibana sude pangidoatta. Adong do ra pangidoatta na ikkon tapaima sahat tu na gabe paradeiso tano on.

 5. Aha do na dipikkirhon Jahowa tikki mambege tangiangta? Patorang ma.

⁵ Dippikirhon Jahowa do kaitan ni tangiangta tu lomo ni rohana. (Jes. 55:​8, 9) Sada tujuan ni Jahowa manoppa tano on, asa holan halak na mangoloi Ibana ma na mangingani tano on. Alai didok Sibolis, boi do undenggan ngolu ni jolma molo mamaretta dirina sandiri. (1 Mus. 3:​1-5) Lao mambuktihon dang toho hata ni Sibolis i, dipaloas Jahowa ma jolma mamaretta dirina sandiri. Akibatna godang ma sitaononta saonari. (Pjm. 8:9) Nungnga takkas be taboto dang na lao salpuhonon ni Jahowa sude sitaononta saonari. Alana molo diulahon Jahowa i, gabe adong ma na mandok boi do jolma mangatasi masalahna sandiri.

 6. Boasa ikkon pos rohatta na adil jala patuduhon holong do cara ni Jahowa mangalusi tangiangta?

⁶ Dang sai sarupa cara ni Jahowa mangalusi tangiangta. Contohna, tikki marsahit na posi Raja Hiskia martangiang do ibana tu Jahowa asa dipamalum sahitna i. Dialusi Jahowa do tangiangna, malum do ibana. (2 Raj. 20:​1-6) Alai tikki martangiang Apostel Paulus tu Jahowa asa dibolokkon ‘suga na sian dirina’ manang sahitna, dang dipamalum Jahowa sahitna i. (2 Kor. 12:​7-9) Saonari taida ma jolo contoh na asing, i ma Apostel Jakobus dohot Apostel Petrus. Naeng dipamate Raja Herodes do nasida na dua. Jadi ditangiakkon huria ma nasida. Alai dipamate do si Jakobus. Molo si Petrus, dibahen Jahowa do mukjizat asa boi malua ibana. (Ul. 12:​1-11) Mungkin gabe sukkun-sukkun do rohatta, ‘Boasa ma dipalua Jahowa si Petrus, hape si Jakobus daong?’ Dang adong dipaboa alusna di Bibel.c Alai pos ma rohatta dang hea diulahon Jahowa na so “sittong”. (5 Mus. 32:4) Jala taboto do holong do roha ni Jahowa tu si Petrus, songon i nang tu si Jakobus. (Pgk. 21:14) Hita pe olo do tahilala dang dialusi Jahowa tangiangta songon na taharappon. Alai pos ma rohatta, pasti adil jala patuduhon holong do cara ni Jahowa mangalusi tangiangta. Alani i, unang ma muruk hita ala dang songon na taharappon cara ni Jahowa mangalusi tangiangta.—Job 33:13.

 7. Sikap na songon dia do na ikkon tapasiding? Jala boasa ikkon tapasiding i?

⁷ Unang ma tabandingkon situasitta tu situasi ni halak. Uppamana, olo do ra nungnga takkas tapaboa pangidoatta tikki martangiang tu Jahowa. Alai dang dialusi Jahowa tangiangta i. Di pudian ni ari taboto ma, adong donganta na sarupa pangidoanna tu hita. Jala dialusi Jahowa do pangidoanna i. Songon i ma na dihilala sahalak donganta na margoar si Anna. Martangiang do ibana tu Jahowa asa dipamalum suamina na margoar si Matthew sian sahit kanker. Alai di huriana pe adong dua donganta borua naung matua na marsahit kanker. Jadi lam jotjot ma ditangiakkon si Anna suamina dohot dua donganta i. Di pudian ni ari, malum do dua donganta i. Alai mate do suamina. Di mulana, dirippu si Anna do Jahowa na pamaluppon dua donganta i. Gabe sukkun-sukkun ma rohana, “Molo songon i do, boasa ma dang dipamalum Jahowa suamikku?” Sebenarna, dang taboto boasa gabe boi malum dua donganta i. Alai takkas do taboto pasti salpuhonon ni Jahowa do sude sitaononta di ari na naeng ro. Jala pasti paheheonna do akka naposona naung mate.—Job 14:15.

 8. (a) Songon na disurat di Jesaya 43:​2, songon dia do cara ni Jahowa mangurupi hita? (b) Aha do manfaatna molo martangiang hita tikki adong sitaononta? (Ida video Margogo do Hami Alani Tangiang.)

⁸ Sai urupan ni Jahowa do hita. Ala holong roha ni Jahowa tu hita, dang lomo rohana mangida hita susa. (Jes. 63:9) Alai on dang patuduhon diabbati Jahowa sitaonon ro tu hita, na sipata dos songon sunge manang api. (Jaha Jesaya 43:2.) Nang pe songon i, marjanji do Jahowa tu hita lao urupanna do hita “manaripari” sitaononta i. Jala dang pasombuonna gabe sega hubungatta tu Ibana alani sitaononta i. Asing ni i, dilehon Jahowa do tondi parbadiana tu hita asa tolap hita mangadopi i sude. (Luk. 11:13; Plp. 4:13) Dung i gabe pos ma rohatta, lehonon ni Jahowa do tu hita akka na porlu na boi mambahen hita toktong martahan jala setia manomba Ibana.d

 9. Songon na dipaboa di Jakobus 1:​6, 7, boasa ikkon pos rohatta pasti diurupi Jahowa do hita?

⁹ Asa marpos ni roha hita tu Jahowa. (Heb. 11:6) Sipata olo do borat hian sitaonon na masa tu hita. Molo songon i situasitta olo do gabe ragu hita, diurupi Jahowa do hita manang dang. Alai pos ma rohatta tu Jahowa. Alana didok Bibel, boi do ‘tibbungotta tembok’ manang sitaonon na borat molo dilehon Jahowa huasona tu hita. (Ps. 18:29) Jadi unang ma ganggu rohatta. Alai tapasahat ma i di tangiangta jala pos ma rohatta pasti dialusi Jahowa do tangiangta i.—Jaha Jakobus 1:​6, 7.

10. Paboa ma contoh na patuduhon ikkon sadalan do na taulahon dohot na tatangiakkon.

¹⁰ Asa sadalan na taulahon dohot na tatangiakkon. Contohna adong ma sahalak donganta na martangiang tu Jahowa asa diurupi ibana mangido ijin dang masuk karejo tu bosna, asa boi ibana dohot tu parpunguan regional. Songon dia do Jahowa mangalusi tangiangna? Olo do ra dibahen Jahowa ibana asa barani manjuppangi bosna lao mangido ijin. Alai ikkon adong do na diulahon ibana. Ikkon dijuppangi ibana do bosna i lao mangido ijin. Olo do ra ikkon piga-piga hali ibana mangido ijin tu bosna. Manang ikkon minta tolong ibana tu dongan sakarejona asa margatti ari ni nasida karejo. Manang molo porlu, ikkon olo ma ibana diorui gajina di bulan i.

11. Boasa ikkon torus hita manangiakkon pangidoatta?

¹¹ Asa torus tatangiakkon i. (1 Tes. 5:17) Sian hata ni Jesus na disurat di Bibel boi ma taboto, adong do piga-piga tangiangta na so pittor dialusi Debata. (Luk. 11:9) Jadi unang ma hita marnaloja! Torus ma tatangiakkon i. (Luk. 18:​1-7) Alana molo torus tatangiakkon i, on patuduhon na massai penting do pangidoatta i jala porsea hita na sanggup do Jahowa mangurupi hita.

12. (a) Sukkun-sukkun aha do na porlu tapikkirhon taringot tangiangta, jala boasa porlu tapikkirhon i? (b) Sian dia do taboto na taargai do Jahowa di tangiangta? (Ida kotak “Huargai do Jahowa Tikki Martangiang?”)

¹² Molo dang dialusi dope tangiangta, porlu do tapikkirhon tolu sukkun-sukkun on. Na parjolo, ‘Sittong do pangidoakkon?’ Sering do didok rohatta, taboto dia na dumenggan di hita. Hape sebenarna, dang botul-botul bermanfaat pangidoatta i tu ari na naeng ro. Molo taringot sada masalah do na tatangiakkon, olo do ra adong cara na asing na dumenggan sian cara na tapangido. Jala olo do ra piga-piga pangidoatta dang sadalan tu lomo ni roha ni Debata. (1 Joh. 5:14) Saonari tabahas ma muse contoh natua-tua na dipaboa di mula ni parsiajaran on. Ditangiakkon nasida do tu Jahowa asa boi toktong gellengna manomba Jahowa. Songon na denggan do begeon tangiang ni nasida i. Alai taingot ma, dang hea dipaksa Jahowa hita lao manomba Ibana. Lomo do rohana asa sian ias ni roha hita dohot gellengta manomba Ibana. (5 Mus. 10:​12, 13; 30:​19, 20) Jadi tumagon do ditangiakkon nasida asa boi diurupi gellengna manomba Jahowa sian ias ni rohana jala marale-ale tu Ibana.—Poda 22:6; Eps. 6:4.

13. Menurut Heber 4:​16, sadihari do Jahowa mangurupi hita? Patorang ma.

¹³ Sukkun-sukkun na paduahon, ‘Memang on do tikki na pas Jahowa mangalusi tangiakku?’ Tikki martangiang hita, olo do ra tahilala pittor hatop ma nian dialusi tangiangta. Hape sebenarna holan Jahowa do na mamboto andigan tikki na pas lao mangalusi tangiangta. (Jaha Heber 4:16.) Jala molo dang pittor dialusi tangiangta, olo do didok rohatta ‘na so’ dialusi tangiangta i. Hape sebenarna, olo do ra ‘dang tikkina dope’ Jahowa mangalusi tangiangta i. Uppamana mulak ma jo muse hita tu pengalaman ni bawa na marsahit na mangido asa dipamalum. Molo dibahen Jahowa mukjizat pamaluppon ibana, olo do gabe didok Sibolis holan ala na sehat do bawa i umbahen na olo ibana manomba Jahowa. (Job 1:​9-11; 2:4) Asing ni i, nungnga ditottuhon Jahowa andigan tikkina lao pamaluppon sude sahit. (Jes. 33:24; Pgk. 21:​3, 4) Jadi saleleng so dapot dope tikkina, unang ma taharappon terjadi mukjizat na mambahen hita malum. Tumagon hian do dipangido bawa i tu Jahowa asa dilehon Jahowa gogo dohot dame ni roha tu ibana, asa boi ibana martahan saleleng marsahit jala setia manomba Jahowa.—Ps. 29:11.

14. Aha do na boi taparsiajari sian pengalaman ni si Janice?

¹⁴ Saonari tabahas ma pengalaman ni si Janice. Martangiang do ibana asa boi karejo di Betel. Dung lima taon diboto ibana ma, dialusi Jahowa do hape tangiangna. Alai dang songon cara na diharappon ibana. Didok ibana, “Saleleng lima taon i, gabe godang do na huparsiajari jala gabe lam togu do au. Alana ikkon hupatogu do haporseaonku jala ikkon hupadenggan do carakku marsiajar pribadi. Asing ni i gabe huboto ma, manang didia pe hita melayani Jahowa boi do hita marlas ni roha.” Di pudian i ari gabe pengawas wilayah do suami ni si Janice. Didok si Janice ma muse, “Dialusi Jahowa do tangiakku nang pe dang songon cara na huharappon. Ikkon sabar do au asa boi huida luar biasa do cara ni Jahowa mangalusi tangiakku. Jala mandok mauliate do au ala dilehon kesempatan di au boi makkilala holong ni roha dohot haburjuon ni Jahowa.”

15. Boasa sipata porlu tabahen piga-piga pangidoatta tikki martangiang? (Ida gambar.)

¹⁵ Sukkun-sukkun na patoluhon, ‘Porlu do hubahen piga-piga pangidoakku tikki martangiang?’ Tikki martangiang hita, denggan do memang molo takkas tapaboa sada pangidoatta. Alai asa boi taboto lomo ni roha ni Jahowa tu hita, dumenggan do molo tabahen piga-piga pangidoatta tikki martangiang. Taparrohahon ma muse pengalaman ni sahalak donganta borua lajang na manangiakkon asa dohot ibana tu Sikkola tu Parbarita Harajaon. Lomo do rohana dohot tu sikkola i asa boi ibana mangurupi inganan na makkaporluhon parbarita. Jadi sambil paimahon dijou ibana tu sikkola i, ditangiakkon ibana ma muse tu Jahowa asa boi ibana mangida kesempatan na asing lao mangalehon unggodang tikkina tu Jahowa. (Ul. 16:​9, 10) Dung i diulahon ibana ma songon na ditangiakkonna i. Disukkun ibana ma tu pengawas wilayah, huria dia do na makkaporluhon godang perintis. Jala dibahen ibana ma surat tu kantor cabang, lao manukkun daerah na dia do na makkaporluhon godang parbarita.e

16. Taringot tangiangta, aha do pos ni rohatta?

¹⁶ Nungnga takkas be taboto, pasti adil jala patuduhon holong do cara ni Jahowa mangalusi tangiangta. (Ps. 4:3; Jes. 30:18) Sipata olo do dang songon na taharappon cara ni Jahowa mangalusi tangiangta. Nang pe songon i, pasti ditangihon Jahowa do tangiangta. Alana holong hian do rohana tu hita jala dang na lao tadikkononna hita. (Ps. 9:10) Jadi, ‘sai toktong ma hita marpos ni roha tu Jahowa’ jala tapaboa ma sude na di bagasan rohatta tu Ibana.—Ps. 62:8.