Naung Dipaboa Hian do di Bibel Pangalaho ni Halak di Tikkitta Saonari?

Nungnga dipaboa hian di Bibel na lam roa nama pangalaho ni jolma di tikkitta saonari. I do alana lam godang halak mangulahon na jahat jala mangulahon na so denggan tu donganna.a (2 Timoteus 3:1-5) Alai didok do di Bibel, dang sude jolma songon i pangalahona. Ala diurupi Debata, adong do na berupaya asa unang mangulahon akka na so denggan jala muba lao mambahen las roha ni Debata.—Jesaya 2:2, 3.

Di topik on lao dibahas ma

• Aha do na dipaboa Bibel taringot pangalaho ni halak di tikkitta saonari?

• Aha do akibatna molo akka halak holan mamikkirhon dirina sandiri?

• Boasa lam roa pangalaho ni akka jolma?

• Ikkon songon dia do sikapta?

• Na sude do halak lam roa pangalahona?

• Gabe torus nama lomo-lomo ni jolma jala dang boi be nasida diatur?

Saonari, nungnga biasa be lam roa pangalaho ni jolma. Jala nungnga sude jolma holan mamikkirhon dirina sandiri. Dang boi be nasida “mangorom diri”, holan “makkaholongi dirina sandiri,” jala “unlomo do rohana mangoloi giot-giot ni rohana sian apala mangoloi Debata”.—2 Timoteus 3:2-4.

Toho do na didok di ayat on. Saonari, godang halak holan na mamikkirhon dirina sandiri, mamikkirhon aha na boi mambahen nasida sonang, aha na mambahen nasida marlas ni roha jala adong dope na upparah sian i. Alani i ma, godang halak “makkasogohon na denggan” jala dang diboto mandok mauliate. ‘Dang diboto nasida mandok mauliate’ tu akka aha na adong di nasida jala dang diboto mandok mauliate tu halak na asing.—2 Timoteus 3:2, 3.

Ala holan na mamikkirhon dirina sandiri, lam roa do pangalaho ni akka jolma. Jala didok di Bibel, nungnga biasa be akka pangalaho sisongon i saonari. Contohna:

• Serakah. Godang halak “holongan di hepeng”. Didok nasida, molo godang hepengna manang artana, i ma na sukses.—2 Timoteus 3:2.

• Sombong. Godang do halak saonari “marhata manggang, ginjang rohana”, jala “sombong”. (2 Timoteus 3:2, 4) Lomo do roha ni nasida paboa-boahon jala manamba-nambai taringot kemampuan ni nasida, burju ni nasida, manang hamoraon ni nasida.

• Paroa-roahon donganna. Saonari, godang do halak juppangta lomo rohana “mangaleai” jala “paroa-roahon donganna”. (2 Timoteus 3:2, 3) Dang holan tu jolma dibahen nasida songon i, alai dohot do tu Debata.

• Keras kepala. Godang do halak “dang setia”, “dang olo mardos ni roha”, “mangulahon na jahat tu donganna”, dohot “sijogal rukkung”. (2 Timoteus 3:2-4) Dang olo nasida mardos ni roha manang rap mangalului solusina. Jala dilanggar nasida do perjanjian naung dibahen nasida.

• Kasar. Godang do halak saonari na “parmuruk-muruk”. Alani i, gabe jotjot do nasida mangulahon na jahat manang na kejam.—2 Timoteus 3:3.

• Dang mangoloi hukum. Nungnga didok Jesus hian “lam godang hajahaton” di tikkitta saonari. (Mateus 24:12) Jala didok Jesus do muse, lao godang “na gaor” manang “na maralo” di godang inganan.—Lukas 21:9, surat na di toru.

• Dang adong be holong ni roha di keluarga. Godang dakdanak “dang mangoloi natorasna” jala “dang marroha holong di [keluarga]”. Akibatna, godang anggota keluarga na so dipardulihon, manang adong kekerasan di rumah tangga.—2 Timoteus 3:2, 3.

• Munafik. Godang halak idaon, songon na “disomba nasida do Debata”. (2 Timoteus 3:5) Dang diulahon nasida lomo ni roha ni Debata. Alai, diihutton nasida do hata ni akka pamimpin agama na holan paboahon hata na tabo begeon ni nasida.—2 Timoteus 4:3, 4.

Akka halak na holan mamikkirhon dirina sandiri, boi do mambahen godang halak gabe tertekan batin jala stres. (Parjamita 7:7) Contohna, ala holongan di hepeng, gabe dang mabiar be nasida mangoto-otoi halak. Ala dang marroha holong be, adong do na mangulahon kekerasan di rumah tangga. Ujungna, gabe stres do halak na gabe korbanna jala adong do na gabe naeng bunuh diri. Halak na dihianati halak na asing, boi do i mambahen haccit roha ni halak na dihianati i. Jala haccit ni rohana i, olo do leleng i dihilala ibana.

Dipaboa do di Bibel aha na mambahen lam roa pangalaho ni akka jolma:

• Dang holong be roha ni akka halak tu Debata dohot tu donganna jolma. (Mateus 24:12) I do alana godang jolma holan na mamikkirhon dirina sandiri.

• Ala nungnga diusir Sibolis sian surgo, gabe holan di tano on nama ibana dang boi be lao tu surgo. (Pangungkapon 12:9, 12) Dukkon i, dipengaruhi ibana ma akka jolma. I do alana holan na mamikkirhon dirina sandiri akka jolma.—1 Johannes 5:19.

Didok di Bibel, “Padao ma dirim sian halak sisongon i.” (2 Timoteus 3:5) Lapatanna, dang na gabe dang tadongani sude halak. Alai, unang ma mardongan hita tu halak na holan mamikkirhon dirina sandiri jala na so parduli tu Debata.—Jakobus 4:4.

Daong. Alana didok Debata do, adong do akka halak na sai holsoan, jala “marsak situtu do nasida alani ulaon na huhagigihon na diulahon” akka jolma. (Hesekiel 9:4) Jadi, nasida dang mamikkirhon dirina sandiri. Alai diihutton nasida do aturan ni Debata. Jala pakkataion dohot tindakan ni nasida pe asing do sian godangan halak. (Maleaki 3:16, 18) Contohna, berupaya do nasida asa mardame dohot sude halak. Jala dang olo nasida dohot marporang manang mangulahon kekerasan.—Mika 4:3.

Daong. Dang salelengna adong na jahat di portibi on. Alana satokkin nai, musnahonon ni Debata nama akka halak na so mangoloi Ibana. (Psalmen 37:38) Lao bahenon ni Debata ma “tano na imbaru”. Lapatanna, akka halak na lambok roha nama na lao tinggal salelengna di tano on. (2 Petrus 3:13; Psalmen 37:11, 29) Janji on, dang holan hata-hata. Alana saonari pe, nga godang halak ala marsiajar Bibel gabe lam denggan ngoluna.—Epesus 4:23, 24.