Aha do Tanda ni “Ari Parpudi” manang “Ujung ni Ari” i?

Dipaboa do di Bibel songon dia peristiwa, situasi, dohot pangalaho ni akka jolma na lao gabe tanda ni “panutup ni jaman on” manang “ajal ni hasiangan on”. (Mateus 24:3; Lembaga Alkitab Indonesia) Digoari do muse di Bibel na masa on “ari parpudi” manang “ujung ni ari” i.—2 Timoteus 3:1; Daniel 8:19.

Nungnga disurat hian di Bibel akka peristiwa na lao terjadi saleleng ari parpudi. Akka peristiwa i terjadi di tikki na bersamaan, jala on ma na gabe “tanda” ni ari parpudi i. (Lukas 21:7) Parrohahon ma piga-piga contoh:

Masa ma porang di godang inganan. Nungnga didok Jesus hian, “Marporang ma bangso tu bangso jala harajaon tu harajaon.” (Mateus 24:7) Asing ni i, di Pangungkapon 6:4 adong do dipaboa sahalak bawa na hundul di atas ni hoda na manggombarhon parporangan na “mambuat hadameon sian tano on”.

Maol mangalului sipanganon. Nungnga didok Jesus hian, ‘Na lao masa ma haraparon.’ (Mateus 24:7) Asing ni i, di bukku Pangungkapon adong do sahalak bawa na hundul di atas ni hoda na manggombarhon na lao masa haraparon di godang inganan.—Pangungkapon 6:5, 6.

Gempa na massai gogo. Nungnga didok Jesus hian na lao masa ma “gempa na massai gogo di godang inganan”. (Lukas 21:11; Mateus 24:7) Alani gempa na massai gogo on, gabe tamba susa do akka jolma di liat portibi on. Jala molo dibandingkon tu gempa na hea masa, unggodang ma halak na mate alani gempa on.

Sahit na menular. Sesuai tu hata ni Jesus, na lao masa do “sahit di godang inganan”.—Lukas 21:11.

Hajahaton. Nang pe hajahaton nungnga adong sian najolo, alai didok Jesus saleleng di ari parpudi on ‘lam tamba do godang ni hajahaton’.—Mateus 24:12.

Manegai tano on. Di Pangungkapon 11:18, nungnga dipaboa hian na lao adong do akka halak “na manegai tano on”. Godang do cara na diulahon nasida lao manegai tano on, dang holan mangulahon na jahat dohot korupsi alai disegai nasida do muse lingkungan.

Lam roa ma pangalaho ni akka jolma. Nungnga dipaboa Bibel hian di 2 Timoteus 3:1-4 molo pangalaho ni godang halak “dang diboto mandok mauliate, dang setia, . . . dang olo mardos ni roha, paroa-roahon donganna, dang diboto mangorom diri, parmuruk-muruk, makkasogohon na denggan, mangulahon na jahat tu donganna, sijogal rukkung, sombong”. Ala lam parah do pangalaho ni akka jolma, jadi cocok ma molo saonari on didokkon ‘tikki na massai susa’.

Sursar ma akka keluarga. Nungnga dipaboa hian di 2 Timoteus 3:2, 3 molo godangan halak saonari on “dang marroha holong” be tu akka keluargana jala akka ianakkon pe “dang mangoloi natorasna”.

Dang makkaholongi Debata. Nungnga dipaboa Jesus hian, “Lam ngali ma holong ni godang jolma.” (Mateus 24:12) Jesus patuduhon molo godangan halak dang marholong ni roha be tu Debata. Dos songon i ma na dipaboa di 2 Timoteus 3:4, saleleng ari parpudi on unlomo nama roha ni godang halak “mangoloi giot-giot ni rohana sian apala mangoloi Debata”.

Akka halak na munafik. Nungnga dipaboa hian di 2 Timoteus 3:5, molo godangan halak mangakku manomba Debata, alai di parngoluonna dang dipatudu na disomba nasida Debata.

Lam denggan ma pemahaman ni akka halak taringot surirang na di Bibel. Nungnga dipaboa hian di bukku Daniel na lao godang akka halak mangalului hasittongan na sian Bibel di panutup ni jaman on, termasuk ma pemahaman taringot akka surirang na di Bibel.—Daniel 12:4.

Dibaritahon ma barita na uli di liat portibi on. Nungnga dipaboa Jesus hian, “Dibaritahon ma barita na uli taringot tu Harajaon i di liat portibi on.”—Mateus 24:14.

Akka jolma dang parduli jala pangarehei. Nungnga dipaboa Jesus hian molo godang halak dang parduli tu akka bukti na patuduhon naung jonok ari i. (Mateus 24:37-39) Jala nungnga dipaboa hian di 2 Petrus 3:3, 4 na massai godang akka pangarehei saonari on jala dang parduli nasida tu akka tanda di ari parpudi i.

Terjadi ma sude surirang i. Nungnga dipaboa Jesus hian molo terjadi sude na disurirakkon i secara bersamaan, on patuduhon nungnga mangolu be hita di ari parpudi.—Mateus 24:33.

Tutu. Sian kondisi ni portibi on dohot sian perhitungan na di Bibel patuduhon, molo ari parpudi dimulai taon 1914 tikki masa Porang Dunia I. Molo naeng diida hamu songon dia kondisi ni portibi on na patuduhon hita mangolu di ari parpudi, tonton ma video na mangihut:

Taon 1914, mulai ma mamaretta Harajaon ni Debata di surgo, on ma sada cara na dibahen lao mangusir Sibolis dohot akka suru-suruanna na jahat sian surgo jala dibatasi ma ulaon ni nasida holan di tano on. (Pangungkapon 12:7-12) Boi do taida pengaruh ni Sibolis tu akka jolma sian pangalaho ni nasida saleleng ari parpudi on na tung massai jahat. Jala on ma na mambahen lam tu susana ari parpudi on.—2 Timoteus 3:1.

Godang do halak khawatir alani situasi na lam parah saonari. Ai dang parduli be akka halak tu na di sakalilingna, jala mabiar do nasida marsipamatean akka jolma di ari na naeng ro.

Alai adong do akka halak na porsea na lao denggan masa depan ni portibi on. Pos do roha ni nasida satokkin nai lao bertindak nama Harajaon ni Debata lao pasaehon masalah na di portibi on. (Daniel 2:44; Pangungkapon 21:3, 4) Sabar do nasida paimahon Debata pasautton sude janjina jala terhibur do nasida tu hata ni Jesus na mandok, “Paluaonna do manang ise na setia jala na martahan sahat tu ujungna.”—Mateus 24:13; Mika 7:7.