Holong dohot Pangargaion tu Jahowa Mangonjar Rohatta asa Tardidi

1-2. Songon na dipaboa di Ulaon ni Apostel 8:27-31, 35-38, boasa taronjar roha ni sahalak Etiopia asa tardidi?

OLO do hamu tardidi jala gabe sisean ni Jesus? Godang halak na tardidi ala dihaholongi jala diargai nasida do Jahowa. Parrohahon ma aha na masa tu sahalak parpangkat na timbo sian Etiopia.

² Dung diparsiajari halak Etiopia i sian Bibel na ikkon tardidi do ibana, pittor olo do ibana mangulahon i. (Jaha Ulaon ni Apostel 8:27-31, 35-38.) Boasa taronjar rohana? Ala diargai ibana do Hata ni Debata. Dijaha ibana do akka ayat sian bukku Jesaya tikki di pardalanan. Jala dung makkatai si Pilippus tu ibana, gabe diargai ibana do akka naung dibahen Jesus. Alai boasa halak Etiopia i ro tu Jerusalem? Ala nungnga holong rohana tu Jahowa. Sian dia taboto? Ro do ibana tu Jerusalem lao manomba Jahowa. Nungnga ditadikkon ibana agamana najolo, jala olo do ibana dohot tu sada bangso naung pinillit ni Debata. Holongna tu Jahowa i do na mangonjar rohana lao tardidi jala gabe sisean ni Kristus.​—Mat. 28:19.

 3. Aha do na boi mangambati sasahalak lao tardidi? (Ida ma kotak “Tudos tu Tano na Songon Dia do Rohamuna?”)

³ Holong tu Jahowa do na boi mangonjar rohamuna lao tardidi. Alai, holong do tong na boi mangambati hamu mangulahon i. Boasa? Parrohahon ma contoh on. Holong do ra rohamuna tu keluarga dohot tu dongan na so Sitindangi. Gabe mabiar ma hamu, molo tardidi annon, sogo ma roha ni nasida tu hamu. (Mat. 10:37) Manang, holong dope rohatta tu akka ulaon na dihasogohon Jahowa. Jala maol dope dihilala hamu lao pasohon akka ulaon i. (Ps. 97:10) Manang sian na gelleng nungnga somal hamu dohot tu akka perayaan ni agama palsu. Sai diingot hamu dope las ni roha tikki mangulahon akka perayaan i. Gabe maol ma dihilala hamu asa unang be dohot tu akka perayaan na dihasogohon Jahowa. (1 Kor. 10:20, 21) Jadi sukkun-sukkunna saonari, “Tu ise do umholong rohamuna?”

 4. Aha do na terutama mangonjar rohamuna lao tardidi?

⁴ Nungnga godang akka na denggan na diargai jala dihaholongi hamu. Misalna, andorang so marsiajar dohot Sitindangi pe, nungnga diargai hamu isi ni Bibel. Jala nungnga dihaholongi hamu Jesus. Dung ditanda hamu Sitindangi Ni Jahowa, gabe lomo ma rohamuna marsaor tu nasida. Alai, dang cukkup holan makkaholongi i sude asa taronjar rohamu lao mangalehon diri tu Jahowa jala tardidi. Na urrikkot, ikkon holong do rohamuna tu Jahowa. Molo umholong do rohamu tu Jahowa, dang adong manang aha pe na boi mangambati hamu lao manomba Ibana. Holong tu Jahowa do na mangonjar rohamuna lao tardidi. Jala holong i do na mangurupi hamu asa toktong setia manomba Ibana.

 5. Sukkun-sukkun aha do na lao taulas?

⁵ Didok Jesus, ikkon tahaholongi do Jahowa sian nasa roha, ngolu, pikkiran, dohot gogotta. (Mrk. 12:30) Boha carana asa songon i bagas ni holongmuna tu Jahowa? Molo dirimangi hamu holong na dipatudu Jahowa tu hamu, gabe taronjar ma rohamuna lao makkaholongi Ibana. (1 Joh. 4:19) Dung makkaholongi Jahowa, gabe boha ma pakkilalaanmu jala aha do naeng ulahononmuna?b

 6. Songon na didok di Rom 1:20, aha do na boi taulahon lao mamparsiajari taringot Jahowa?

⁶ Parsiajari ma taringot Jahowa marhite akka toppaanna. (Jaha Rom 1:20; Pgk. 4:11) Rimangi ma bisuk ni Debata na tarida sian akka suan-suanan dohot akka binatang. Parsiajari ma songon dia Debata manoppa pamatangta. (Ps. 139:14) Rimangi ma, massai balga do energi na dibahen Jahowa tu mataniari. Hape sasittongna adong do marmiliar mataniari dohot akka bintang.c (Jes. 40:26) Molo diulahon hamu i, lam bagas ma pangargaionmuna tu Jahowa. Alai, dang cukkup holan mamboto bisuk dohot huaso ni Jahowa asa boi marale-ale tu Ibana. Unggodang do muse na ikkon taboto taringot Jahowa asa lam bagas holongta tu Ibana.

 7. Asa lam bagas holongmuna tu Jahowa, aha do na ikkon diingot hamu?

⁷ Ingot hamu ma, na disarihon Jahowa do hamu. Alai ra, sai sukkun-sukkun dope rohamuna, ‘Tutu do disarihon Sitoppa langit dohot tano on au?’ Molo songon i ingot ma, “ndang dao Ibana sian ganup hita on.” (Ul. 17:26-28) “Disulingkit Jahowa do nasa roha di bagasan”. Jala marjanji do Jahowa songon na dipaboa si Daud tu si Salomo, “Molo dilului ho Ibana, sai jumpang ho do Ibana.” (1 Kron. 28:9) Sasittongna boi do hamu marsiajar Bibel saonari, ala nungnga marjanji Jahowa, ‘Hutogu-togu do ho.’ (Jer. 31:3) Lam diargai hamu akka naung binahen ni Jahowa i, lam bagas ma holongmuna tu Ibana.

 8. Songon dia hita mangargai holong ni Jahowa?

⁸ Sada cara lao mangargai holong ni Jahowa, i ma marhite martangiang tu Ibana. Lam bagas ma holongmu tu Debata molo dipaboa hamu holso ni rohamuna, jala mandok mauliate tu sude naung binahenna tu hamu. Lam togu ma parale-aleonmuna tu Jahowa, tikki diida hamu dialusi Ibana do tangiangmuna i. (Ps. 116:1) Gabe pos ma rohamuna sai diattusi Ibana do hamu. Alai asa lam solhot tu Jahowa, porlu do diboto hamu aha na ikkon ulahononmuna asa las rohana. Boha carana? Parsiajari ma Bibel, Hata ni Debata.

 9. Songon dia hita patuduhon na taargai do Bibel?

⁹ Marsiajar ma hamu lao mangargai Bibel, Hata ni Debata. Holan di Bibel do dipaboa hasittongan taringot Jahowa, jala aha do na lao bahenonna tu hamu. Patudu ma na diargai hamu do Bibel. Carana, jaha hamu ma Bibel ganup ari. Denggan ma hamu persiapan tikki naeng marsiajar Bibel. Jala ulahon ma akka naung diparsiajari hamu. (Ps. 119:97, 99; Joh. 17:17) Adong do dibahen hamu jadwal lao manjaha Bibel? Diihutton hamu do jadwal i, jala dijaha hamu do Bibel ganup ari?

10. Aha do na menarik sian Bibel?

¹⁰ Na menarik sian Bibel on, dipaboa do pengalaman ni akka halak na langsung mangida Jesus tikki di tano on. Holan bukku on do na takkas paboahon aha naung diulahon Jesus tu hamu. Molo diparsiajari hamu akka naung dihatahon jala diulahon Jesus, gabe lomo ma rohamuna marale-ale tu ibana.

11. Aha do na boi mangurupi hamu lao makkaholongi Jahowa?

¹¹ Marsiajar ma lao makkaholongi Jesus, asa lam tamba holongmuna tu Jahowa. Boasa? Ala Jesus do na boi takkas maniru parange ni Amana. (Joh. 14:9) Molo jotjot hita marsiajar taringot Jesus, gabe lam taargai jala taattusi ma Jahowa. Rimangi ma, asi do roha ni Jesus tu akka halak na so diargai, songon halak na pogos, na marsahit, dohot na gale. Jala ingot ma, lam denggan do ngolumuna molo diihutton hamu poda sian Jahowa.​—Mat. 5:1-11; 7:24-27.

12. Tikki diparsiajari hamu taringot Jesus, aha ma na lao ulahononmuna?

¹² Lam balga ma holongmuna tu Jesus molo dirimangi hamu tobusan na dilehon ibana lao manesa dosatta. (Mat. 20:28) Ala diboto hamu rade do Jesus mate humokkop hamu, gabe taronjar ma rohamuna asa muba. Jala dipangido hamu ma tu Jahowa asa disesa dosamuna. (Ul. 3:19, 20; 1 Joh. 1:9) Ala lam tamba holongmuna tu Jesus dohot tu Jahowa, gabe lomo ma rohamuna marsaor dohot akka halak na tong makkaholongi nasida.

13. Aha do na diparade Jahowa tu hamu?

¹³ Marsiajar ma makkaholongi keluarga ni Jahowa. Ra, dang diattusi keluarga dohot donganmuna na so Sitindangi, boasa ma olo hamu gabe sisomba Jahowa. Olo do ra gabe diorai nasida hamu. Alai urupan ni Jahowa do hamu, marhite akka dongan di huria. Nungnga songon keluargamuna be nasida. Molo solhot hamu tu nasida, hilalaonmuna ma holong dohot pangurupion ni nasida. (Mrk. 10:29, 30; Heb. 10:24, 25) Haduan, olo do ra gabe dohot keluargamuna i manomba Jahowa jala mangoloi Ibana.​—1 Ptr. 2:12.

14. Songon na disurat di 1 Johannes 5:3, aha do na dihilala hamu ala mangihutton prinsip ni Jahowa?

¹⁴ Marsiajar ma lao mangargai jala mangulahon prinsip ni Jahowa. Tikki dang ditanda hamu dope Jahowa, hamu sandiri do na manottuhon dia na sittong dia na sala. Alai saonari nungnga diboto hamu, umdenggan do prinsip ni Jahowa. (Ps. 1:1-3; jaha 1 Johannes 5:3.) Rimangi ma akka poda sian Bibel tu akka suami, istri, natua-tua, dohot ianakhon. (Eps. 5:22–6:4) Dung diihutton hamu poda i, gabe las do roha ni keluargamuna? Gabe lam denggan do parangemuna ala mangihutton poda ni Jahowa asa marbisuk mamillit dongan? Gabe lam tamba do las ni rohamuna? (Poda 13:20; 1 Kor. 15:33) Ra songon i do na dihilala hamu.

15. Aha do na boi mangurupi hamu mangulahon prinsip ni Bibel?

¹⁵ Olo do sipata dang diboto hamu boha carana mangulahon prinsip naung diparsiajari hamu. Alani i, marhite organisasi dilehon Jahowa do akka sijahaon na boi mangurupi hamu asa mamboto dia na sittong dohot na sala. (Heb. 5:13, 14) Molo dijaha jala diparsiajari hamu i, gabe diboto hamu ma tu situasi songon dia do boi dipakke prinsip i. Jala gabe olo ma hamu dohot tu organisasi ni Jahowa.

16. Songon dia Jahowa mangorganisasi akka naposona?

¹⁶ Marsiajar ma lao makkaholongi jala unduk tu organisasi ni Jahowa. Dibahen Jahowa do akka huria lao papunguhon akka naposona. Jala Jesus ma na gabe ulu ni huria i. (Eps. 1:22; 5:23) Dipillit Jesus do sada punguan na marisi piga-piga halak na miniahan, lao mangaradoti akka ulaon na rikkot di tikki saonari on. Digoari Jesus ma nasida, “naposo haposan jala na marbisuk”. Nasida ma na martanggungjawab lao mangurupi hamu asa jonok tu Debata jala toktong marale-ale tu Ibana. (Mat. 24:45-47) Sada cara ni naposo haposan on mangurupi hamu, i ma mamillit akka sintua. Akka sintua on ma na manogu-nogu jala mangalinggomi hamu. (Jes. 32:1, 2; Heb. 13:17; 1 Ptr. 5:2, 3) Rade do nasida mangalehon tikki dohot gogona lao mangapuli hamu, jala mangurupi hamu asa lam jonok tu Jahowa. Alai na urrikkot, nasida ma na boi mangurupi hamu paboahon taringot Jahowa tu akka halak na asing.​—Eps. 4:11-13.

17. Songon na disurat di Rom 10:10, 13, 14, boasa olo hita paboahon taringot Jahowa tu akka halak?

¹⁷ Urupi ma akka halak asa mananda jala makkaholongi Jahowa. Disuru Jesus do akka siseanna asa mangajarhon taringot Jahowa tu akka halak. (Mat. 28:19, 20) Olo do hita mangulahon i, ala memang i do tugasta. Alai, molo lam bagas holongta tu Jahowa, gabe sarupa ma pakkilalaanta songon si Petrus dohot si Johannes na mandok, “Ndang tarbahen hami so mangkatahon taringot tu na niida dohot na binegenami.” (Ul. 4:20) Massai las do rohatta molo boi taurupi sasahalak asa makkaholongi Jahowa. Bayakkon ma, pasti las situtu do roha ni si Pilippus, ala boi mangurupi sahalak Etiopia marsiajar Hata ni Debata jala tardidi. Jadi tiru hamu ma si Pilippus jala ulahon ma paretta ni Jesus. I do buktina, na olo do hamu gabe Sitindangi Ni Jahowa. (Jaha Rom 10:10, 13, 14.) Ra, nga sarupa be pakkilalaanmuna songon halak Etiopia i, na mandok, “Aha dope na mangambati ahu asa tardidi?”​—Ul. 8:36.

18. Aha do na lao taulas di parsiajaran na mangihut?

¹⁸ Sada keputusan na massai rikkot do lao mamillit asa tardidi. Ala keputusan na serius do i, ikkon takkas do diboto hamu aha do lapatan ni tardidi. Aha do na porlu diboto hamu taringot pandidion? Jala aha do na porlu diulahon hamu andorang so tardidi dohot tikki dung tardidi? Taalusi ma sukkun-sukkun i di parsiajaran na mangihut.