Aha do Lapatan ni Tardidi?

Na didok Bibel

Tikki tardidi sasahalak, ikkon dibonompon do sude dagingna tu bagasan aek.a Godang do disurat di Bibel taringot akka halak na tardidi. (Ulaon ni Apostel 2:41) Misalna Jesus, tikki tardidi ibana di Sunge Jordan, dibonompon do sude dagingna tu bagasan aek. (Mateus 3:13, 16) Martaon-taon dukkon i, adong ma muse sahalak pejabat Etiopia na tardidi tikki di pardalanan naeng mulak tu hutana. Tardidi do ibana di ‘inganan na godang aekna’.—Ulaon ni Apostel 8:36-40.

Didok Jesus asa boi sasahalak gabe siseanna, ikkon tardidi do ibana. (Mateus 28:19, 20) Jala dipaboa Apostel Petrus do muse na massai porlu i diulahon halak Kristen.—1 Petrus 3:21.

Na lao dibahas di artikel on

• Lapatan ni tardidi

• Adong do diajarhon di Bibel ikkon tardidi poso-poso?

• Aha do lapatan ni tardidi di bagasan goar ni Ama, Anak, dohot tondi parbadia?

• Sala do molo tardidi muse?

• Pandidion na asing na dipaboa di Bibel

• Pandangan na sala taringot tardidi

Lapatan ni tardidi

Tikki tardidi sasahalak, dipatudu ibana ma tu halak na asing naung bertobat ibana sian akka dosana jala naung marjanji ibana tu Debata lao mangulahon lomo ni roha ni Debata. Jadi ikkon sai rade do ibana mangihutton hata ni Debata dohot hata ni Jesus saleleng ngoluna. Molo torus diulahon ibana i, dapotna ma hangoluan na salelengna.

Di Bibel disarupahon do halak na tardidi songon na dikuburhon. (Rom 6:4; Kolosse 2:12) Tikki dibonompon sasahalak tu bagasan aek, hira na dikubur ma sude parngoluonna najolo i. Dung kaluar ibana sian aek, hira na dipahehe ma ibana gabe jolma na baru. Lapatanna, mulai sian i sude parngoluonna ikkon sesuai nama tu lomo ni roha ni Debata, songon na seharusna diulahon halak Kristen. Jadi cara tardidi na dibonompon tu aek i, cocok do manggombarhon perubahan na dibahen sasahalak di ngoluna.

Adong do diajarhon di Bibel ikkon tardidi poso-poso?

Dang adong disurat di Bibel taringot poso-poso na tardidi.b Jala dang adong tong disuru i ikkon diulahon.

Dipaboa do di Bibel, adong do akka persyaratan na ikkon diulahon sasahalak asa boi tardidi. Contohna ikkon diattusi sasahalak do pinomatna ajaran dasar na dipaboa di Bibel jala ikkon diulahon ibana do i di parngoluonna. Dung i ikkon bertobat do ibana sian akka dosana. Jala ikkon marjanji do ibana di bagasan tangiang, na rade ibana mangalehon ngoluna tu Debata. (Ulaon ni Apostel 2:38, 41; 8:12) Dang mungkin boi poso-poso mangulahon i sude. Jadi, takkas ma dang hea diajarhon di Bibel ikkon tardidi poso-poso.

Aha do lapatan ni tardidi di bagasan goar ni Ama, Anak, dohot tondi parbadia?

Didok Jesus do tu akka siihutton ibana, “Bahen hamu ma saluhut halak  . .  gabe siseanku. Didi hamu ma nasida di bagasan goar ni Ama, Anak, dohot tondi parbadia. Ajari hamu ma nasida mangulahon sude naung huparettahon tu hamu.” (Mateus 28:19, 20) Sasahalak na tardidi “di bagasan goar ni Ama, Anak, dohot tondi parbadia” lapatanna ikkon diboto ibana do ise Ama dohot Anak, jala ikkon diakkui ibana do wewenang ni nasida. Asing ni i, ikkon takkas do diboto ibana aha do tondi parbadia i. Contohna tikki dipamalum Apostel Petrus sahalak bawa na lumpu sian mulai tubu, didok ibana do, “Di bagasan goar ni Jesus Kristus halak Nasaret i, mardalan ma ho!” (Ulaon ni Apostel 3:6) Hata ni si Petrus i patuduhon na diakkui ibana do wewenang ni Jesus jala Jesus do na ikkon dipuji alani mukjizat i.

• “Ama” i ma Debata Jahowa.c Wewenangna do na umbalga di alam semesta on ala Ibana do Panoppa, na mangalehon hangoluan, dohot Debata Pargogo na So Hatudosan.—1 Musa 17:1; Pangungkapon 4:11.

• “Anak” i ma Jesus Kristus. Ibana do na manobus dosatta. (Rom 6:23) Asa boi hita malua sian dosa jala mandapot hangoluan na salelengna, ikkon taakkui jala taargai do peran ni Jesus lao pasautton tujuan ni Debata tu akka jolma.—Johannes 14:6; 20:31; Ulaon ni Apostel 4:8-12.

• “Tondi parbadia” i ma huaso manang gogo ni Debata.d Dipakke Ibana do tondi parbadia lao manoppa saluhutna. (1 Musa 1:2; Job 33:4) Asing ni i, dipakke Debata do tondi parbadiana lao pasahatton hatana tu akka panurirangna dohot akka naposona. Dilehon do tong tondi parbadiana tu nasida asa margogo nasida mangulahon lomo ni roha ni Debata. (Rom 15:18, 19) Jala marhite tondi parbadia, diurupi Debata do akka panurat ni Bibel asa manuratton hata ni Debata.—2 Petrus 1:21.

Sala do molo tardidi muse?

Godang do halak na mamutusson pinda agama jala tardidi muse nasida. Alai boha ma molo nga hea sasahalak tardidi di garejana na leleng, mardosa do ibana disi? Piga-piga halak mandok ido. Menurut nasida maralo do i tu Epesus 4:5 na mandok, “Sada do Tuan, sada do haporseaon, sada do pandidion.” Alai sabotulna lapatan ni ayat i dang na mandok sala tardidi muse. Sian dia taboto?

Latar belakang ni ayat i. Na dipaboa Apostel Paulus di Epesus 4:5 on sasittongna taringot penting ni halak Kristen marsada di huria. (Epesus 4:1-3, 16) Asa boi marsada huria, ikkon mangihutton sada Tuan do nasida, i ma Jesus Kristus; ikkon sarupa do na dihaporseai nasida, i ma ajaran ni Bibel; jala ikkon sarupa do persyaratan na diihutton nasida taringot pandidion, i ma persyaratan na adong di Bibel.

Hea do dipangido Apostel Paulus tu akka halak naung hea tardidi asa tardidi muse nasida. Boasa? Alana tikki tardidi nasida parjolo sahali, dang takkas dope diattusi nasida ajaran ni halak Kristen na adong di Bibel.—Ulaon ni Apostel 19:1-5.

Ikkon dapot ni sasahalak do parbinotoan na sittong andorang so tardidi. Molo tardidi sasahalak, alai na dihaporseai ibana ajaran na so sesuai tu “parbinotoan na sittong” na adong di Bibel, dang dijalo Debata pandidionna i nang pe halak na tulus ibana. (Johannes 4:23, 24; Rom 10:2) Molo songon i, aha ma na ikkon diulahon ibana? Ikkon diparsiajari ibana ma hasittongan na adong di Bibel, diulahon, dibaktihon ibana ngoluna tu Debata, jala tardidi muse. Alana asa dijalo Debata pandidion ni sasahalak, ikkon jolo takkas do diattusi ibana hasittongan na adong di Bibel. (1 Timoteus 2:3, 4) Molo songon i do situasina, dang mardosa ibana nang pe dua hali ibana tardidi. Justru denggan do na diulahon ibana i.

Pandidion na asing na dipaboa di Bibel

Adong do muse dipaboa di Bibel taringot akka pandidion na asing. Taida ma piga-piga contohna.

Pandidion na diulahon si Johannes Pandidi.e Akka halak na dididi si Johannes, i ma halak Jahudi dohot proselit (halak sian bangso na asing naung maragama Jahudi). Pandidion ni nasida i patuduhon naung bertobat nasida sian akka dosa ni nasida mangalanggar Patik ni si Musa. Asing ni i pandidion na dibahen si Johannes pe, paradehon akka halak asa mananda jala porsea tu Messias, i ma Jesus na sian Nasaret.—Lukas 1:13-17; 3:2, 3; Ulaon ni Apostel 19:4.

Pandidion ni Jesus. Si Johannes Pandidi do na mandidi Jesus. Alai berbeda do lapatan ni pandidion ni Jesus sian pandidion ni halak na asing. Tikki tardidi Jesus, ibana dang na lao patuduhon naung bertobat ibana sian akka dosana, manang “lao mangido panggora ni roha na denggan” sian Debata. (1 Petrus 3:21) Alana jolma na sempurna do Jesus jala dang hea ibana mangulahon dosa. (1 Petrus 2:21, 22) Alai tikki tardidi Jesus, dipatudu ibana ma na rade ibana mangulahon tugas sian Debata lao gabe Messias manang Kristus. Jala rade ibana mate humokkop hita.—Heber 10:7-10.

Tardidi mamakke tondi parbadia. Hea do dibahas si Johannes Pandidi taringot tardidi mamakke tondi parbadia. Jala Jesus Kristus pe hea do manaringoti i. (Mateus 3:11; Lukas 3:16; Ulaon ni Apostel 1:1-5) Dang sarupa pandidion on dohot tardidi di bagasan goar ni tondi parbadia. (Mateus 28:19) Attong aha do lapatan ni tardidi mamakke tondi parbadia?

Halak na tardidi mamakke tondi parbadia, i ma halak na dipillit marhite tondi parbadia lao mamaretta rap dohot Kristus di surgo.f Holan saotik do godang ni nasida. Nasida ma annon na gabe raja dohot malim lao mamaretta tu tano on. (1 Petrus 1:3, 4; Pangungkapon 5:9, 10) Na lao gabe rakyat ni nasida, i ma marjuta halak na mangolu salelengna di tano on haduan.—Mateus 5:5; Lukas 23:43.

Tardidi di bagasan Kristus Jesus dohot di bagasan hamateanna. Halak na “tardidi di bagasan Kristus Jesus” sarupa do tu halak na tardidi mamakke tondi parbadia. (Rom 6:3) Alani i pandidion on holan marlakku tu halak na lao mamaretta rap dohot Jesus di surgo. Tikki tardidi nasida di bagasan Kristus Jesus, nasida gabe bagian sian huria na sude anggotana dipillit marhite tondi parbadia. Jesus ma na gabe Ulu ni Huria jala nasida ma na gabe dagingna.—1 Korint 12:12, 13, 27; Kolosse 1:18.

Ikkon tardidi do tong nasida ‘di bagasan hamatean ni Jesus’. (Rom 6:3, 4) Lapatan ni pandidion on, i ma ikkon mangoloi Jahowa do na uppetting di ngolu ni nasida, dang pasonakkon dirina sandiri songon na diulahon Jesus. Jala nang pe sabotulna boi nasida mangolu salelengna di tano on, alai rela do nasida maninggalhon i asa boi nasida rap mamaretta dohot Jesus di surgo. Pandidion on sae dung mate nasida jala dipahehe tu surgo.—Rom 6:5; 1 Korint 15:42-44.

Tardidi mamakke api. Dipaboa si Johannes Pandidi do aha na lao bahenon ni Jesus. Didok ibana, “Didionna do tu hamu tondi parbadia dohot api. Nungnga ditiop ibana garpu pamurpur jala paiasonna ma pardegean i. Papunguonna ma gandum tu poti jala tutungonna ma lapung ni eme tu api na so ra mittop.” (Mateus 3:11, 12) Adong do perbedaan ni tardidi mamakke api dohot tardidi mamakke tondi parbadia. Aha ma bedana?

Halak na tardidi mamakke tondi parbadia, i ma akka halak na olo manangihon Jesus jala mangoloi hatana. Digombarhon ma nasida songon gandum. Alai molo halak na tardidi mamakke api, nasida i ma akka halak na so olo manangihon Jesus. Digombarhon ma nasida songon lapung ni eme. Nasida didok tardidi mamakke api lapatanna lao dipamate ma nasida saleleng ni lelengna.—Mateus 3:7-12; Lukas 3:16, 17.