Bibel Mambahen Denggan Ngolukku

• TUBU TAON: 1957

• NEGERI ASAL: AUSTRALIA

• RIWAYAT HIDUP: SURSAR NGOLUNA TIKKI GELLENG

NGOLUKKU NA UJU I:

Magodang di Newcastle, New South Wales do au. Adong pitu tubu ni omak, jala au ma na siakkangan. Parmabuk do bapak, jala kasar do halakna. Omak pe sering do mamukkuli jala mangaleai au. Sai didok ibana do au halak na jahat jala lao disiksa do au di api narokko. Gabe mabiar do au mambege hatana i.

Alani pambahenan ni omak, gabe sering do au dang masuk sikkola. Tikki marumur 11 taon, dipamasuk ma au tu sada lembaga pamaretta. Dung i, dipamasuk ma au tu sada biara. Tikki marumur 14 taon, lari ma au sian biara i. Dang olo au mulak tu jabu, jadi gabe anak jalanan ma au. Tinggal di akka dalan di Kings Cross do au, di pinggir ni kota Sydney.

Gabe marnarkoba ma au, minum minuman beralkohol, mangida pornografi, jala gabe pelacur. Adong sada pengalaman na mambahen au mabiar. Tikki i, tinggal di apartemen ni sahalak nappunasa kelab malam do au. Di sada borngin, ro ma dua bawa manjuppangi ibana. Disuru ibana ma au masuk tu kamar. Alai boi dope hubege na dihatai nasida. Naeng digadis nappunasa kelab malam i do hape au tu akka bawa i. Naeng dipamasuk nasida ma au tu bagasan ni kapal barang, jala diboan tu Jepang asa karejo di bar. Mabiar do au mambege i, gabe lari ma au sian balkon.

Pajuppang ma au dohot sahalak bawa na lagi berkunjung tu Sydney. Jadi hupatorang ma songon dia keadaanku. Ninna rohakku, asa dilean ibana hepeng tu au. Alai gabe diajak ibana ma au tu jabuna. Disi ma au maridi dohot mangan. Jala ujungna disi ma torus au tinggal. Sataon dukkon i, menikah ma hami.

SONGON DIA BIBEL PAUBAHON NGOLUKKU:

Tikki mulai marsiajar Bibel au dohot Saksi Jahowa, dang tardok songon dia perasaanku. Dung huboto Sibolis do hape na mambahen hajahaton di portibi on, gabe muruk do au. Alana saleleng on na diajarhon tu au, Debata do na mambahen hita susa. Alai las do rohakku dung mamboto, dang dihukum Debata hape halak di api narokko. On do ajaran na mambahen au mabiar sian najolo.

Salut do au mangida Saksi Jahowa, alana diihutton nasida do prinsip ni Bibel tikki mambahen keputusan. Jala diulahon do na diparsiajari nasida i. Sebenarna maol do mardongan dohot au. Alai manang aha pe na hudokkon dohot na huulahon, sai dipatudu Saksi Jahowa do holong ni rohana tu au jala diargai nasida do au.

Sada na paling maol hubolokkon, i ma sering do au merasa dang mararga dirikku. Sogo do rohakku mangida dirikku sandiri. Jala sering do ro perasaan sisongon i tu rohakku, nang pe nga leleng au gabe Saksi Jahowa. Memang holong do rohakku tu Jahowa. Alai menuruthu, dang mungkin dihaholongi Ibana halak na songon au.

Alai gabe muba do cara berpikkirhu hira-hira 15 taon dung tardidi au. Di tikki i, adong sada jamita na dipasahat di parpunguan na patorakkon Jakobus 1:23, 24. Di ayat i dipatudos do Hata ni Debata i songon kaca. Boi do i mangurupi hita asa sarupa caratta mangida diritta tu cara ni Jahowa. Gabe huboto ma, dang sarupa hape saleleng on carakku mangida dirikku tu cara ni Jahowa. Mulana maol do tarjalo au i. Sai didok rohakku do, dang mungkin dihaholongi Jahowa au.

Piga-piga ari dukkon i, hujaha ma ayat na mambahen muba cara berpikkirhu, i ma hata na Jahowa na disurat di Jesaya 1:18. Didok, ‘Beta, ro ma hamu, asa tapasae akka parsoalatta. Nang pe songon merah ni mudar dosamuna, Bottar do i bahenokku songon salju.’ Di ayat i, hira na didok Jahowa do tu au, “Beta Vicky, tapasae ma akka parsoalatta. Hutanda do ho, hoboto do akka dosam jala huboto do na di bagasan roham, alai tetap do holong rohakku tu ho.”

Dang boi au modom di borngin i. Dang porsea dope au na dihaholongi Jahowa au. Alai mulai ma hupikkiri taringot tobusan ni Jesus. Toppu ma au sadar, sabar hian do hape Jahowa saleleng on tu au. Sai dibahen Ibana do godang cara lao patuduhon holong ni rohana tu au. Alai sai hira na hudok do torus tu Ibana, “Dang sanggup holong ni rohami manarik au. Dang cukkup tobusan ni Anakmi manobus au.” Manang boi didok, hira na hupaulak do muse tobusan i tu Jahowa. Alai ujungna, dung hurimangi taringot tobusan ni Jesus, saonari boi ma huhilala na dihaholongi Jahowa do au.

LABA NA HUDAPOT:

Dang sai merasa bersalah be au, jala boi ma au marlas ni roha saonari. Gabe lam kompak ma au tu suamikku, jala lomo do rohakku paboahon pengalamankon lao mangurupi na asing. Saonari hurasa gabe lam jonok do hubungakku tu Jahowa.