Akka Borua na Poso, Patogu ma Haporseaonmuna tu Jahowa

 1. Asa togu haporseaotta tu Jahowa, aha do na ikkon taulahon?

LONGANG do rohatta mangida pertumbuhan ni dakdanak, alana pasti magodang do nasida. Alai dang songon i molo naeng gabe halak Kristen na togu haporseaonna tu Jahowa. Ikkon adong do upaya na tabahen.b (1 Kor. 13:11; Heb. 6:1) Asa boi togu haporseaotta, ikkon jonok do hubungatta tu Jahowa. Jala porlu do hita diurupi tondi parbadia ni Jahowa asa boi patuduhon parange na denggan, mamparsiajari akka keterampilan na marguna, dohot paradehon diri lao mandalatton tanggung jawab di ari na naeng ro.—Poda 1:5.

 2. Aha do na taparsiajari sian 1 Musa 1:​27, jala aha do na lao tabahas di artikel on?

² Ditoppa Jahowa do bawa dohot borua. (Jaha 1 Musa 1:27.) Mura do taida beda ni bawa dohot borua secara fisik. Alai dang holan i bedana. Asing do tugas na dilehon Jahowa tu bawa dohot tu borua. Alani i, porlu do diparsiajari nasida akka parange dohot keterampilan na boi mangurupi nasida mandalatton tugas ni nasida be. (1 Mus. 2:18) Di artikel on, lao tabahas ma aha do na boi diulahon akka borua na poso asa lam togu haporseaonna tu Jahowa. Jala di artikel na mangihut, tabahas ma songon dia akka bawa na poso boi mangulahon na sarupa.

3-4. Akka ise do na boi gabe sitiruon tu akka borua na poso? (Ida gambar.)

³ Di Bibel godang do dipaboa akka borua na makkaholongi Jahowa jala na manomba Ibana. (Ida artikel “Apa yang Bisa Kita Pelajari dari Para Wanita di Alkitab?” di jw.org.) Songon ayat tema ni artikel on, boi do nasida “mangarajai diri” jala “setia di saluhutna”. Asing ni i, godang do donganta borua di huria na boi gabe sitiruon di hita ala togu haporseaonna tu Jahowa.

⁴ Hamu akka borua na poso, adong do ditanda hamu donganmuna borua na boi gabe sitiruon di hamu? Parrohahon ma songon dia nasida patuduhon akka parange na denggan. Dung i pikkirhon ma songon dia hamu boi maniru nasida. Saonari, tabahas ma dua parange na penting na ikkon dipatudu sahalak borua na togu haporseaonna tu Jahowa.

 5. Boasa ikkon serep roha ni sahalak borua?

⁵ Ikkon serep do rohatta asa boi gabe halak Kristen na togu haporseaonna tu Jahowa. Molo serep roha ni sahalak borua, pasti denggan ma hubunganna tu Jahowa dohot tu halak na asing. (Jak. 4:6) Misalna, parrohahon ma prinsip di 1 Korint 11:3. Dipaboa do disi, tu akka bawa do dilean Jahowa tanggung jawab lao manguluhon huria dohot keluarga.c Molo serep do roha ni sahalak borua, pasti mura do di ibana mangihutton prinsip i.

 6. Aha do na boi ditiru akka borua na poso sian si Rebekka?

⁶ Parrohahon ma sitiruon sian si Rebekka. Sahalak borua na barani do ibana jala sai dibahen ibana do keputusan na marbisuk saleleng ngoluna. (1 Mus. 24:58; 27:​5-17) Alai nang pe songon i, rade do ibana mangihutton petunjuk. (1 Mus. 24:​17, 18, 65) Hamu akka borua na poso, tiru hamu ma si Rebekka. Serep ma rohamuna jala unduk ma hamu tu akka bawa na martanggung jawab di keluarga dohot di huria. Molo diulahon hamu songon i, gabe sitiruon ma hamu.

 7. Songon dia do akka borua na poso boi maniru si Ester?

⁷ Massai penting do serep ni roha di sude halak Kristen. Didok do di Bibel, “Marbisuk do halak na serep marroha.” (Poda 11:2) Contohna si Ester, sahalak borua na serep marroha do ibana. Nang pe gabe ratu ibana alai dang gabe ginjang rohana. Ditangihon ibana do nasehat sian si Mordahai jala diihutton ibana do i. (Est. 2:​10, 20, 22) Hamu pe boi do songon si Ester. Pangido hamu ma nasehat sian halak na asing jala ulahon hamu ma i.—Tit. 2:​3-5.

 8. Molo serep do roha ni sahalak borua, songon dia do ibana mangulahon prinsip di 1 Timoteus 2:​9, 10?

⁸ Dipatudu si Ester do serep ni roha marhite cara na asing. Nang pe bagak ibana jala uli rupana, alai dang lomo rohana asa holan ibana na diparrohahon akka halak. (Est. 2:​7, 15) Songon dia do hamu boi maniru si Ester? Sada carana dipaboa di 1 Timoteus 2:​9, 10. (Jaha.) Dijujui Apostel Paulus do akka borua asa marpakkean na tama mardongan toruk ni roha dohot bisuk. Hata Junani na dipakke si Paulus di ayat i patuduhon, ikkon tarida do na diargai sahalak borua pakkilalaan ni halak na asing sian carana marpakkean. Bangga do hami tu hamu akka borua na poso ala serep rohamuna mangihutton nasehat on.

 9. Aha do na boi tatiru sian si Abigail?

⁹ Ikkon marbisuk do sahalak borua asa boi gabe halak na togu haporseaonna tu Jahowa. Halak na marbisuk, i ma halak na mamboto dia na sittong dohot na sala, dung i dipillit ibana do mangulahon na sittong. Parrohahon ma contoh ni si Abigail. Hea do dibahen suamina keputusan na so denggan na boi parohon jea tu keluargana. Alai pittor hatop do si Abigail bertindak, alani i gabe selamat ma keluargana. (1 Sam. 25:​14-23, 32-35) Molo marbisuk hita songon si Abigail, boi ma taboto andigan tikkina makkatai jala andigan tikkina hohom. Asing ni i molo marbisuk hita, gabe boi ma hita toktong parduli tu akka dongan, alai dang sappe mangattoi urusan ni nasida.—1 Tes. 4:11.

10-11. Molo denggan hamu manjaha dohot manurat, aha do manfaatna tu hamu dohot tu halak na asing? (Ida gambar.)

¹⁰ Ikkon diparsiajari sahalak borua do akka keterampilan na marguna. Molo diparsiajari ibana i sian tikki poso, pasti marlaba do i saleleng ni ngoluna. Parrohahon ma piga-piga contohna.

¹¹ Marlatik ma asa denggan manjaha dohot manurat. Di piga-piga daerah, dang diajari akka borua asa denggan manjaha dohot manurat. Alai sasittongna penting do keterampilan on di sude halak Kristen.d (1 Tim. 4:13) Alani i torus ma hamu marlatik asa boi denggan manjaha dohot manurat. Aha ma manfaatna? Boi do i mangurupi hamu mangalului karejo. Gabe lam mura ma hamu marsiajar Bibel dohot mangajarhon i tu na asing. Alai na urrikkot, gabe lam jonok ma hubunganmuna tu Jahowa ala boi hamu denggan manjaha jala mangarimangi Hatana.—Jos. 1:8; 1 Tim. 4:15.

12. Aha do na boi diparsiajari hamu sian Poda 31:26?

¹² Marlatik ma asa denggan manangihon jala manat makkatai. Massai penting do on taparsiajari. Dipaboa Apostel Jakobus do nasehat na denggan taringot on. Didok, “Ganup halak ikkon hatop manangihon, manat makkatai.” (Jak. 1:19) Molo manat ditangihon hamu tikki makkatai halak na asing, on patuduhon na parduli manang na “sapakkilalaan” do hamu tu nasida. (1 Ptr. 3:8) Molo dang diattusi hamu dope aha na dihatahon sasahalak jala songon dia pakkilalaanna, denggan ma sukkun tu ibana. Jala tikki naeng makkatai hamu tu ibana, jolo pikkiri hamu ma aha na lao sidohononmuna. (Poda 15:28) Sukkun ma tu dirimuna: ‘Sittong do na huhatahon on, jala patoguhon roha do on? Huargai do halak na asing?’ Marsiajar ma hamu sian akka borua na manat tikki makkatai. (Jaha Poda 31:26.) Parrohahon ma aha na dihatahon nasida, jala songon dia cara ni nasida pasahatton i. Molo marlatik hamu mangulahon on, gabe mura ma hamu mardongan dohot halak na asing jala toktong mardame dohot nasida.

13. Songon dia do carana asa diboto hamu karejo di jabu? (Ida gambar.)

¹³ Marlatik ma hamu karejo di jabu. Di godang inganan, akka borua do biasana na karejo di jabu. Boi do diurupi omak manang kakakmuna hamu mamparsiajari keterampilan on. Donganta borua na margoar si Cindy mandok, “Sai didok omak do tu au, gabe marlas ni roha do hita molo ringgas karejo. Jadi huparsiajari ma songon dia carana mangaloppa, paiasson jabu, manjait, dohot belanja. Gabe boi ma au mangurus dirikku sandiri jala godang na boi huulahon tu Jahowa. Diajari omak do muse au asa rade menjamu. Ala sering au menjamu, gabe boi ma au pajuppang dohot akka dongan na gabe sitiruon di au.” (Poda 31:​15, 21, 22) Molo ringgas sahalak borua, rade menjamu, jala diboto karejo di jabu, parohon las ni roha ma ibana di keluarga dohot di huria.—Poda 31:​13, 17, 27; Ul. 16:15.

14. Aha do na boi tatiru sian si Crystal, jala aha do na ikkon taingot?

¹⁴ Marlatik ma gabe halak na mandiri. Massai penting do on di hita sude. (2 Tes. 3:​7, 8) Donganta borua na margoar si Crystal mandok, “Diurupi orang tuaku do au mamillit jurusan aha tikki naeng masuk SMA. Dijujui bapakku do au mamillit jurusan akuntansi jala marguna hian do i di au.” Asing ni i, dang sae holan mamparsiajari cara mangalului hepeng. Porlu do tong diparsiajari hamu boha carana asa denggan mangatur hepeng. (Poda 31:​16, 18) Alai ingot ma, molo puas hamu di akka na adong di hamu jala dang marutang, gabe lam godang ma na boi diulahon hamu tu Jahowa.—1 Tim. 6:8.

15-16. Boasa holong hian rohatta tu akka donganta borua na melajang? (Markus 10:​29, 30)

¹⁵ Molo lam denggan parangetta jala adong keterampilanta, gabe lam rade ma hita manjalo tanggung jawab di ari na naeng ro. Tabahas ma piga-piga contohna.

¹⁶ Melajang. Songon na didok Jesus, adong piga-piga borua na mamillit tetap melajang, nang pe sada tihas i di daerah ni nasida. (Mat. 19:​10-12) Adong do muse na melajang alani situasi. Alai pos ma rohamuna, dang hea leas roha ni Jahowa dohot Jesus tu hamu ala dang menikah hamu. Di liat portibi on, godang do donganta borua na melajang na gabe sitiruon di huria. Ala holong roha ni nasida tu akka dongan, gabe songon kakak manang omak ma nasida di akka dongan i.—Jaha Markus 10:​29, 30; 1 Tim. 5:2.

17. Songon dia do carana asa boi akka borua na poso dohot tu dinas sepenuh waktu?

¹⁷ Dohot tu dinas sepenuh waktu. Unggodang do akka donganta borua na gabe parbarita na uli. (Ps. 68:11) Hamu akka borua na poso, adong do rencanamuna naeng dohot tu dinas sepenuh waktu? Boi do hamu gabe perintis, relawan pembangunan, manang karejo di Betel. Tangiakkon hamu ma cita-citamuna i, jala ceritahon ma cita-citamuna i tu akka dongan naung dohot tu dinas sepenuh waktu. Sukkun ma tu nasida aha do na ikkon diulahon hamu. Dung i, bahen ma rencana na masuk akkal. Molo dohot hamu tu dinas sepenuh waktu, gabe lam godang ma na boi diulahon hamu lao melayani Jahowa.

18. Boasa ikkon manat sahalak borua mamillit ise na lao gabe suamina? (Ida gambar.)

¹⁸ Menikah. Akka parange dohot keterampilan na tabahas di artikel on, boi mangurupi hamu asa gabe istri na burju. Ingot ma molo naeng menikah hamu, ikkon manat do hamu mamillit ise na lao gabe suamimuna. Alana on ma sada keputusan na penting di ngolumuna. Molo nga menikah hamu, ikkon unduk do hamu tu suamimuna. (Rom 7:2; Eps. 5:​23, 33) Jadi tikki naeng mamillit ise na lao gabe suamimuna, rimangi ma sukkun-sukkun on: ‘Togu do haporseaonna tu Jahowa? Melayani Jahowa do na uppetting di ngoluna? Marbisuk do ibana mambahen keputusan? Olo do ibana mangakkui kesalahanna? Diargai ibana do akka borua? Boi do ibana mangurupi au asa jonok tu Debata? Boi do ibana paradehon kebutuhanku? Boi do ibana gabe ale-alekku? Denggan do ibana mangulahon tanggung jawabna? Aha do tanggung jawabna di huria, jala songon dia ibana mangulahon i?’ (Luk. 16:10; 1 Tim. 5:8) Molo naeng dapotmuna suami na burju, hamu pe ikkon paradehon diri do asa gabe istri na burju.

19. Na gabe hurang sangap do istri ala mangurupi suamina? Patorang ma.

¹⁹ Didok di Bibel, istri na burju boi do gabe “dongan” jala rade “mangurupi” suamina. (1 Mus. 2:18) Na gabe hurang sangap do istri ala mangurupi suamina? Daong. Sada hasangapon do di istri boi mangurupi suamina. Haru Jahowa pe, didok Bibel jotjot do Ibana “mangurupi” naposona. (Ps. 54:4; Heb. 13:6) Songon dia ma sahalak istri mangurupi suamina? Ikkon olo do ibana mendukung keputusan na dibahen suamina. Jala molo holong roha ni sahalak istri tu Jahowa, pasti marsitutu do ibana manjaga reputasi ni suamina. (Poda 31:​11, 12; 1 Tim. 3:11) Alani i, sian saonari parade hamu ma dirimuna asa boi gabe istri na burju. Carana, patogu ma hubunganmuna tu Jahowa jala rade ma hamu mangurupi anggota keluargamuna dohot akka dongan di huria.

20. Molo gabe ina na burju hamu, aha ma manfaatna tu suami dohot tu gellengmuna?

²⁰ Gabe ina. Dung menikah hamu, olo do ra gabe adong gellengmuna. (Ps. 127:3) Alani i, parade hamu ma dirimuna sian saonari asa boi gabe ina na burju. Akka parange dohot keterampilan naung tabahas di artikel on, boi do mangurupi hamu asa gabe istri dohot ina na burju. Molo dipatudu hamu holong, haburjuon, dohot hasabaron, gabe dame ma dihilala suami dohot gellengmuna. Jala boi ma dihilala nasida na holong do rohamuna tu nasida.—Poda 24:3.

21. Boasa massai holong rohatta tu akka dongan borua? (Ida gambar sampul.)

²¹ Hamu akka anak boru, massai holong do rohanami tu hamu. Alana nungnga godang na diulahon hamu tu Jahowa dohot tu akka dongan. (Heb. 6:10) Marsiajar do hamu patuduhon akka parange dohot keterampilan na marguna di ngolumuna, di keluargamuna, dohot di huria. Jala diparade hamu do dirimuna lao mandalatton akka tanggung jawab di ari na naeng ro. Massai arga do hamu di organisasi ni Jahowa!