PELAJARAN 07

Boha do Sebenarna Jahowa i?

Edisi Tercetak

Molo dipikkiri hamu taringot Debata Jahowa, aha do na ro tu pikkiranmuna? Dos do Ibana songon bintang di hamu? Nang pe lomo rohamuna mangida i, alai dao hian do i sian hamu. Manang, dos do Ibana songon alogo na gogo di hamu? Nang pe massai gogo i, alai dang boi diida. Jadi boha do sebenarna Jahowa i? Dipaboa Jahowa do di Bibel taringot akka sifatna, termasuk ma holong ni rohana tu hamu.

1. Boasa dang boi taida Debata?

Dang songon jolma Jahowa i, na boi taida jala tajama. Bibel mandok, “Dang boi taida Debata.” (Johannes 4:24) Jala, di surgo do Ibana tinggal, inganan na so boi taida.

2. Songon dia do sifat ni Jahowa na dipaboa di Bibel?

Nang pe dang boi taida Jahowa, alai boi do holong rohatta tu Ibana molo taboto akka sifatna. Bibel mandok, “Dihaholongi Jahowa do akka ulaon na tigor. Jala dang tinggalhononna akka naposona na setia.” (Psalmen 37:28) Asing ni i, “parholong do Jahowa jala parasi roha”, tarlumobi tu akka halak na susa. (Jakobus 5:11) Jala, “jonok do Jahowa tu halak na mandele. Dipalua Ibana do akka halak na marmetmet ni roha”. (Psalmen 34:18) Manang aha pe na taulahon, adong do pengaruh ni i tu perasaan ni Jahowa. Molo taulahon na jahat, lungun do rohana jala kecewa. (Psalmen 78:40, 41) Alai molo taulahon na sittong, las do rohana.—Jaha Poda 27:11.

3. Aha do buktina na holong roha ni Jahowa tu hita?

Sifat ni Jahowa na paling istimewa, i ma holong. Bibel mandok, “Holong do Debata.” (1 Johannes 4:8) Boi do tahilala holong ni Jahowa sian Bibel dohot sian akka toppaanna. Misalna, rimangi ma songon dia Jahowa manoppa hita. (Jaha Ulaon ni Apostel 14:17.) Dibahen Ibana do boi taida warna na bagak, mambege musik na tabo, jala mangallang sipanganon na tabo. Lomo do rohana asa marlas ni roha hita.

ASA LAM TAATTUSI

Taparsiajari ma aha do na dipakke Jahowa lao mangulahon lomo ni rohana, jala songon dia Jahowa patuduhon akka sifatna.

4. Gogo ni Debata do tondi parbadia i

Gambar: Dipakke Debata do tondi parbadiana lao mangulahon lomo ni rohana. 1. Manoppa akka planet dohot alam semesta. 2. Mangurupi sahalak panurat ni Bibel manuratton Hata ni Debata di sada gulungan.

Dos songon jolma na mamakke tanganna lao karejo, songon i ma Jahowa. Dipakke Ibana do tondi parbadiana lao mangulahon lomo ni rohana. Bibel mandok, dang Debata tondi parbadia i, alai gogo ni Debata do i. Jaha Lukas 11:13 dohot Ulaon ni Apostel 2:17, dung i bahas ma sukkun-sukkun on:

Molo tapangido tondi parbadia, ‘usehonon’ ni Debata do i tu hita. Jadi menurutmuna, Debata do tondi parbadia i, manang gogo ni Debata? Aha ma alasanna?

Dipakke Jahowa do tondi parbadiana lao mangulahon lomo ni rohana. Jaha Psalmen 33:6 dohot 2 Petrus 1:20, 21, dung i bahas ma sukkun-sukkun on:

Lao mambahen akka aha do dipakke Jahowa tondi parbadiana?

5. Godang do sifat ni Jahowa na denggan

Setia do si Musa manomba Debata. Alai lomo dope rohana mamboto unggodang taringot Debata na manoppa ibana. Didok si Musa ma tu Debata, “Paboa ma tu au akka dalanmu. Ai lomo do rohakku mamboto taringot tu Ho.” (2 Musa 33:13) Jadi dipaboa Jahowa ma akka sifatna tu si Musa. Jaha 2 Musa 34:4-6, dung i bahas ma sukkun-sukkun on:

Boha do sifat ni Jahowa dipaboa di ayat i?
Na dia do sifat ni Jahowa na menarik di hamu?

6. Parduli do Debata tu jolma

Hea do halak Heber gabe hatoban di Mesir. Boha do perasaan ni Jahowa tikki susa akka naposona i? Putar ma AUDIO manang jaha 2 Musa 3:1-10. Dung i bahas ma sukkun-sukkun on:

AUDIO: Diida Jahowa do Sitaonon ni Nasida (2:45)

Sian cerita taringot halak Israel on, boha do perasaan ni Jahowa tikki susa jolma?—Ida ayat 7 dohot 8.
Menurut hamu, olo do Jahowa mangurupi jolma? Tolap do Ibana mangulahon i?