PELAJARAN 17

Songon dia do Sifat ni Jesus?

Edisi Tercetak

Molo tajaha taringot na diulahon dohot na didok Jesus tikki di tano on, gabe lam takkas ma taboto sifatna. Gabe lomo ma rohatta asa jonok hubungatta tu ibana dohot tu Bapakna, i ma Jahowa. Boha do haroa sifat ni Jesus? Jala songon dia do caratta maniru sifatna i?

1. Boasa boi didok sarupa Jesus songon Bapakna?

Saleleng marmiliar taon, diida ibana do songon dia Bapakna patuduhon holong ni rohana tikki di surgo. Hasilna, gabe sarupa ma cara marpikkirna songon Bapakna. Jala sarupa ma tong perasaanna dohot carana mangulahon manang aha pe. (Jaha Johannes 5:19.) Jala sempurna do Jesus maniru sifat ni Bapakna. Alani i ma didok Jesus, “Manang ise na mangida au, nungnga diida ibana Damang i.” (Johannes 14:9) Molo taparsiajari akka sifat ni Jesus, boi ma gabe lam tatanda Jahowa. Contohna, asi do roha ni Jesus tu akka halak. On patuduhon parduli do tong Jahowa tu hita.

2. Aha do buktina na holong roha ni Jesus tu Jahowa?

Jesus mandok, “Huulahon do songon na diparettahon Damang i, asa diboto portibi on na holong do rohakku tu Damang i.” (Johannes 14:31) Tikki di tano on Jesus, torus do diulahon ibana lomo ni roha ni Bapakna nang pe sipata dang mura lao mangulahon i. Lomo do muse roha ni Jesus paboahon taringot Jahowa tu akka halak asa boi nasida jonok tu Ibana. On patuduhon na holong situtu do rohana tu Bapakna i.—Johannes 14:23.

3. Aha do buktina na holong roha ni Jesus tu jolma?

Bibel mandok, “tu jolma do na unlomo” roha ni Jesus. (Poda 8:31) Dipatogu ibana do roha ni akka halak jala diurupi ibana do nasida. Dibahen ibana do akka mukjizat alani asi ni rohana tu akka jolma. (Markus 1:40-42) Burju do ibana tu akka halak jala dang dibeda-bedahon ibana jolma. Sude na didok ibana tu jolma, mangapuli roha ni nasida do jala mambahen pos roha ni nasida tu janji ni Debata. Jala olo do Jesus mate humokkop sude jolma. On ma bukti na patuduhon holong rohana tu jolma. Alai tarlumobi holong do rohana tu akka halak na mangoloi hatana.—Jaha Johannes 15:13, 14.

ASA LAM TAATTUSI

Lam bagas ma muse taparsiajari taringot sifat ni Jesus. Jala songon dia ibana patuduhon holong ni rohana dohot kemurahan hatina.

4. Holong do roha ni Jesus tu Bapakna

Sian sitiruon na dibahen Jesus, gabe boi ma taboto songon dia carana makkaholongi Debata. Jaha Lukas 6:12 dohot Johannes 15:10; 17:26. Dung dijaha hamu sude ayat on, bahas ma sukkun-sukkun on:

Songon dia do caratta maniru Jesus lao makkaholongi Jahowa?

Jesus martangiang. — Holong do roha ni Jesus tu Bapakna jala jotjot do ibana makkatai tu Bapakna i marhite tangiang

5. Parduli do Jesus tu akka halak

Uppetting do di Jesus mangurupi akka halak. Nang pe nungnga loja ibana, olo dope ibana mangurupi akka halak. Jaha Markus 6:30-44, dung i bahas ma sukkun-sukkun on:

Sian akka ayat on, aha do bukti na patuduhon parduli do Jesus tu akka halak?—Ida ayat 31, 34, 41, dohot 42.
Boasa olo Jesus mangulahon i?—Ida ayat 34.
Ala ditiru Jesus do sifat ni Jahowa, attong songon dia do sifat ni Jahowa molo taida sude na diulahon Jesus?
Boha do caratta maniru sifat ni Jesus na parduli tu akka halak?

Dibahen Jesus ma godang sipanganon holan sian lima roti dohot dua dekke na gelleng. Dilehon ma i tu akka siseanna jala dilean nasida ma mangan marribu bawa, borua, dohot dakdanak.

6. Murah hati do Jesus

Lomo do roha ni Jesus mangalehon na adong di ibana nang pe dang mamora ibana. Jala disuru ibana do asa murah hati hita tu na asing. Jaha Ulaon ni Apostel 20:35, dung i bahas ma sukkun-sukkun on:

Boha do didok Jesus carana asa boi hita marlas ni roha?

Putar ma VIDEO, dung i bahas ma sukkun-sukkun on:

VIDEO: “Umlas do Roha ni Halak na Mangalehon”—Cuplikan (4:00)

Boha do caratta patuduhon kemurahan hati nang pe pogos hita?

Diboto hamu do?

Didok Bibel do asa martangiang hita tu Jahowa di bagasan goar ni Jesus. (Jaha Johannes 16:23, 24.) Molo songon i caratta martangiang, on patuduhon na mandok mauliate do hita tu sude naung dibahen Jesus asa boi jonok hubungatta tu Jahowa.

ADONG DO NA MANDOK: “Dang parduli Debata tu hita. Ai dipasombu Ibana do hita susa.”