Pauliuli Diri di Atas ni Haporseaon na Badia Situtu

1, 2. Aha do na diulahon ganup hita marsadasada jala boasa marsitutu hita mangulahon ulaon on?

GANUP hita marsadasada marsitutu mangulahon sada ulaon. Ulaon on nunga taulahon saleleng on jala tongtong do taulahon sahat tu ari na naeng ro. Nang pe godang na mangambati, alai boi do tahilala las ni roha. Jala marsitutu do hita mangulahon on, ala taboto mangkorhon do ulaon on tu parngoluonta saonari dohot tu ari na naeng ro. Boasa? Ala dirinta sandiri do na tapauliuli di ulaon on!

² Sisean ni Jesus na margoar si Judas paboahon molo hita ringkot pauliuli dirinta sandiri. Dijujui do halak Kristen asa tongtong ”di bagasan holong ni roha ni Debata”. Asa boi mangulahon on, didok ibana do, ”Pauliuli hamu ma dirimuna di atas haporseaonmuna na badia situtu.” (Judas 20, 21) Songon dia do hita boi pauliuli diri marhite patoguhon haporseaon? Taparrohahon ma adong tolu na porlu tapauliuli di partondionta.

3-5. (a) Pingkiran sisongon dia do na dihalomohon Sibolis taringot uhum ni Jahowa? (b) Songon dia do dengganna pingkiranta taringot aturan ni Debata jala songon dia do on mangkorhon tu hita? Bahen ma tudosan.

³ Parjolo sahali, porlu ma tapatogu haporseaonta tu uhum na dilehon Debata. Nunga taparsiajari marhite buku on godang aturan ni Jahowa taringot parange na tigor. Songon dia do pangkilalaanmu taringot aturan ni Jahowa? Lomo do roha ni Sibolis mangaliluhon jolma asa marpingkiran molo uhum, prinsip dohot aturan ni Jahowa mangambati hita laho mandapot na dumenggan di parngoluon. (1 Musa 3:1-6) Boi do pingkiran sisongon i mangaliluhon pingkiranmuna? Boi, molo ndang denggan pingkiranta taringot aturan ni Jahowa.

⁴ Umpamana, tingki laho hita tu taman na mansai uli, taida ma adong pagar na timbo na mangondingi sada inganan na uli di taman i. Mulana, olo do ra sogo rohanta mangida pagar i ala gabe ndang boi hita laho tu inganan i. Dung i, taida ma tu bagasan ni pagar i, adong babiat na male. Gabe taantusi ma, laho mangondingi hita do umbahen adong pagar na timbo di taman i. Adong do alo na parohon jea tu hita saonari? Hata ni Debata paingothon hita, ”Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna.”​—1 Petrus 5:8.

⁵ Sibolis dipatudos songon babiat na mangalului sibondutonna. Ala ndang lomo roha ni Jahowa hita dibondut Sibolis, dilehon Ibana ma angka uhum manang patik laho mangondingi hita sian sude ”utiutian ni sibolis”. (Epesus 6:11) Alani i, tingki tarimangi angka uhum ni Debata, tahilala ma on dalan ni Jahowa laho patuduhon holongNa tu hita. Molo taulahon on, boi ma uhum ni Debata mangondingi jala parohon las ni roha tu hita. Si Jakobus manurat, ”Alai na mamereng torus tu bagasan uhum haluaon na sun denggan i jala mian disi, i ma na martua marhite sian pangulaonna i.”​—Jakobus 1:25.

 6. Songon dia do asa togu haporseaonta tu uhum dohot tu prinsip ni Debata na tigor? Lehon ma sada tudosan.

⁶ Mangulahon angka parenta ni Debata, i ma sada cara na dumenggan laho patoguhon haporseaonta tu Silehon uhum dohot tu bisuk na tarida sian angka uhumNa. Umpamana, ”patik ni Kristus” dohot do parenta ni Jesus taringot mangajari ’nasa hata naung dipatikkon’ tu angka jolma. (Galatia 6:2; Mateus 28:19, 20) Ingkon ringkot do di halak Kristen parenta taringot ro tu parpunguan jala marsaor dohot angka dongan sahaporseaon. (Heber 10:24, 25) Diparentahon Jahowa do asa ringgas martangiang. (Mateus 6:5-8; 1 Tessalonik 5:17) Molo taulahon angka parenta on, boi ma tahilala on do dalan ni Jahowa laho patuduhon holongNa tu hita. Tahilala ma las ni roha na so boi tadapot sian portibi on. Tingki dirimangi hamu laba na hea dapotmuna ala mangihuthon uhum ni Debata, tontu lam togu ma haporseaonmuna tu uhum ni Debata na tigor.

7, 8. Songon dia do Hata ni Debata mambahen dame roha ni halak na mabiar ndang boi tongtong mangihuthon uhum ni Debata?

⁷ Adong do na mangkilala mansai maol asa boi tongtong mangihuthon uhum ni Debata. Mabiar do nasida di sada tingki ndang boi mangihuthon uhum ni Debata. Alai ingot hamu ma hata ni Debata na mandok, ”Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu. Aut na diradoti roham angka patikki, jala doshon batang aek hasonanganmu, jala hatigoranmu doshon galumbang ni laut.” (Jesaya 48:17, 18) Hea do dilehon hamu tingki laho mangarimangi ayat on?

⁸ Di ayat i, dipaboa Jahowa do molo taoloi Ibana, dapotta ma laba. Adong dua pasupasu na boi tahilala. Na parjolo, tahilala ma dame ni roha songon batang aek na tongtong mardalan. Na paduahon, hatigoranta doshon galumbang ni laut na so hea so sian tingki tu tingki. Hatigoranta, i ma sude na taulahon hombar tu lomo ni roha ni Debata, boi dos songon galumbang ni laut na so hea so. Molo marsitutu hita marsihohot tu Jahowa, sai na urupanNa do hita! (Jaha Psalmen 55:23.) Janji ni Jahowa na paposhon roha on, mambahen togu haporseaonta tu Debata dohot tu aturanNa na tigor.

9, 10. (a) Boasa denggan sahalak Kristen marsitutu asa toras di partondion? (b) Songon dia do pingkiran na mangihuthon Jahowa boi parohon las ni roha?

⁹ Na porlu muse tapauliuli di dirinta, taida ma sian hata na mandok, ”Mangalangka ma hita tu parsiajaran na umbagas [toras di partondion].” (Heber 6:1, Bibel siganup ari). Ndang tarbahen ni jolma asa unang mardosa, alai tarbahen ni nasida do toras di partondion. Alani i, denggan do sahalak Kristen marsitutu asa toras di partondion. Huhut mangulahon on, hilalaon ni nasida ma las ni roha mangulahon lomo ni roha ni Jahowa. Boasa boi dihilala sisongon i?

¹⁰ Halak Kristen na toras di partondion, i ma halak na marsitutu mangihuthon pingkiran ni Jahowa di sude parngoluonna. (Johannes 4:23) Si Paulus manurat, ”Pardagingon do diparrohahon angka na mangihuthon daging i; alai Tondi do diparrohahon angka na mangihuthon Tondi i.” (Rom 8:5) Halak na mangihuthon pardagingon ndang manghilala las ni roha ala holan mamingkiri dirina sandiri jala mangkaringkothon arta portibi. Alai, halak na mangihuthon pingkiran ni Jahowa, boi do marlas ni roha ala holan mamingkiri lomo ni roha ni Debata ”na Martua”. (1 Timoteus 1:11) Halak na mangihuthon pingkiran ni Jahowa, boi do tongtong marlas ni roha nang pe mangadopi sitaonon. Boasa? Marhite pangunjunan boi ma patuduhonon nasida molo Sibolis, pargabus jala tarlatik ma nasida asa marsihohot tu Jahowa.​—Poda 27:11; jaha Jakobus 1:2, 3.

11, 12. (a) Songon na didok si Paulus, aha do na porlu diulahon sasahalak asa ”malo mambolati na denggan sian na roa” jala aha do lapatan ni hata ”pasomalsomal”? (b) Aha do na ingkon bahenon ni sasahalak asa tarlatik pamatangna?

¹¹ Boi do lam toras partondionta molo tapasomalsomal rohanta mambolati na dengggan sian na roa. Taparrohahon ma ayat na mandok, ”Sipanganon hian do di angka na rimpas, naung pasomalsomal rohana, gabe malo mambolati na denggan sian na roa.” (Heber 5:14) Hata ”pasomalsomal” na dipangke ni si Paulus di ayat on, i ma hata Junani na jotjot dipangke tu sasahalak na marlatik olahraga di Junani abad na parjolo. Alani i, boi do hata on diterjemahon gabe ’parsenam atletik naung pasomalsomal dirina’. Taparrohahon ma angka aha do na porlu dipasomalsomal sasahalak.

¹² Ndang pintor boi hita mangulahon manang aha pe disi tubu tu portibi on. Umpamana songon posoposo, ingkon pasomalsomalonna do tanganna dohot patna dipahusorhusor. Dung i, martugarang ma ibana, mardalan laos marlojong.a Molo songon i, aha do na diulahon sahalak parsenam atletik? Molo taida sahalak parsenam atletik marsalto jala mangalumpat, ra ro do tu pingkiranta naung somal ibana mangulahon i. Jala boi do godang tingkina habis laho mangulahon i. Bibel mandok, ”otik do guna ni” na pasomalsomal daging. Alani i, ummarga do molo tapasomalsomal rohanta mambolati na dengggan sian na roa!​—1 Timoteus 4:8.

13. Songon dia do carana pasomalsomal roha asa malo mambolati na denggan sian na roa?

¹³ Di buku on nunga taparsiajari godang cara na boi mangurupi hita pasomalsomal roha asa malo mambolati na denggan sian na roa. Tingki mamillit aha na laho taulahon di ngolunta ganup ari, bagas ma pingkiri angka prinsip dohot uhum ni Debata jala martangiang ma. Ganup mambahen haputusan, sungkun ma dirimuna, ’Uhum dohot prinsip na dia do na porlu hupingkirhon? Songon dia do ahu boi mangulahon on? Aha do na ingkon hupillit asa las roha ni Jahowa?’ (Jaha Poda 3:5, 6; Jakobus 1:5.) Molo diulahon on, na pasomalsomal rohamuna do hamu asa malo mambolati na denggan sian na roa. Jala boi ma hamu tongtong gabe halak na mangihuthon pingkiran ni Jahowa.

14. Aha do na porlu sai taparrohahon asa lam togu partondionta? Jala aha do parange na porlu tapasiding?

¹⁴ Nang pe hita boi toras di partondion, ingkon tongtong do tapatogu partondionta. Mangkorhon do sipanganon laho mambahen hita toras. Si Paulus manurat, ”Sipanganon hian [parsiajaran na umbagas] do di angka na rimpas [toras].” Asa boi lam togu partondionta, ingkon tongtong do taparsiajari parsiajaran na umbagas sian Bibel. Marbisuk ma hita molo taulahon na taparsiajari. Didok do di Bibel, ”Mangalului habisuhon i do apala na rumingkot.” Alani i, ingkon taparrohahon do asa tongtong hita mauas male tu hasintongan. (Poda 4:5-7, Bibel siganup ari; 1 Petrus 2:2) Molo nunga taparsiajari godang parbinotoan taringot Jahowa, unang ma tahaginjangkon. Alai tongtong ma tapareso dirinta asa unang adong parange sisongon on di dirinta. Si Paulus manurat, ”Unjuni hamu ma dirimuna, manang na di bagasan haporseaon hamu; sulingkit hamu ma dirimuna!”​—2 Korint 13:5.

15. Boasa ringkot holong laho mambahen togu partondionta?

¹⁵ Nang pe nunga sae sada jabu dipauli, alai ringkot do asa tongtong diradoti jabu i. Dipaias jala dipadenggan manang ditambai molo porlu. Antong, aha do na ringkot taulahon asa tongtong togu jala toras partondionta? Tongtong patuduhon holong tu Jahowa dohot tu dongan sahaporseaon. Molo ndang adong holong, marisuang ma sude parbinotoan dohot ulaonta, na dipatudos songon soara ni ogung na so adong lapatanna. (1 Korint 13:1-3) Molo tapatudu holong, boi ma hita tongtong toras jala togu di partondion.

16. Pingkiran sisongon dia do na dihalomohon Sibolis jala aha do dilehon Jahowa laho mangondingi hita?

¹⁶ Adong dope na porlu tapauliuli asa boi gabe siihuthon Jesus, i ma manjaga pingkiranta. Alana mura do Sibolis mangelaela hita asa mangihuthon pingkiran na negatif, mura mandele, ndang manghaporseai dongan jala mura marmetmet roha. (Epesus 2:2) Pingkiran sisongon on boi parohon jea tu halak Kristen dos songon jabu na burburon. Mauliate ma tadok tu Jahowa ala dilehon do pangkirimon na mangondingi pingkiranta.

17. Songon dia do Bibel manggombarhon pangkirimon?

¹⁷ Dipaboa do di Bibel angka sinjata na sian Debata na ringkot tapangke mangalo Sibolis dohot portibi on. Umpamana, tahuluk na manggombarhon ”pangkirimon ni roha di haluaon”. (1 Tessalonik 5:8) Ndang boi sahalak tentara monang di parporangan molo ndang mamangke tahuluk. Tahuluk na dipangke sahalak tentara somalna dibahen sian bosi na dilampisi dohot kain kulit. Alani i, muntul do molo adong na mangantuk. Songon tahuluk, pangkirimon pe boi do mangondingi pingkiranta.

18, 19. Aha do sitiruon na dilehon Jesus taringot manjaga pangkirimon jala songon dia do hita boi maniru ibana?

¹⁸ Jesus ma sitiruon na denggan taringot manjaga pangkirimon. Taingot ma songon dia sitaonon na dihilala Jesus di borngin andorang so mate ibana. Sahalak siseanna pasahathon ibana tu musu holan alani hepeng. Na asing, mansoadahon jala manadingkon ibana. Ndang dijangkon bangso Israel ibana, gariada dipangido do asa dipasiaksiak jala dibunu tentara Rom ibana. Tangkas ma, umborat do sitaonon na diadopi Jesus sian na taadopi. Aha do na mangurupi ibana asa martahan? Heber 12:2 mandok, ”Manaonhon parsilangon i [digantung di sada hau], singkat ni las ni roha, tohapna i hian, so dietong i hailaon, gabe hundul di siamun ni habangsa ni Debata.” Tangkas ma tongtong do dipingkirhon Jesus ”las ni roha, tohapna i hian”.

¹⁹ Aha do tohap na dibahen di adopan ni Jesus na mambahen las rohana? Diboto ibana do molo tongtong martahan, parsidohot ma ibana pabadiahon goar ni Debata Jahowa. Dipatudu ibana ma Sibolis i pargabus. Diboto ibana do molo Jahowa mangalehon upa, i ma na laho rap nama ibana dohot Amana satongkinnari. On ma pangkirimon na boi mambahen Jesus marlas ni roha! Tongtong do dirimangi ibana pangkirimon on tingki mangadopi sitaonon na borat. Jala on ma na porlu taulahon. Adong do las ni roha naung diparade di adopanta. Dilehon Jahowa do hak na sumurung tu hita laho pabadiahon goarNa. Molo tapillit Jahowa gabe Parhuaso jala tapangasahon holong ni Jahowa tingki mangadopi sitaonon, tapatudu ma Sibolis i pargabus.

20. Aha do na mangurupi hita asa tongtong marpingkiran na denggan jala marpangkirimon?

²⁰ Sasintongna, lomo situtu do roha ni Jahowa laho mangalehon upa tu angka naposoNa na marsihohot. (Jesaya 30:18; jaha Maleaki 3:10.) Lomo do rohaNa mangalehon pangidoan ni angka naposoNa. (Psalmen 37:4) Alani i, tongtong ma tarimangi pangkirimon naung diparade di adopanta. Unang ma hea loas pingkiran na negatif, na rorang jala na angkal manegai pingkiranta. Molo tahilala adong parange ni portibi on naeng manegai pingkiranta, martangiang ma hita tu Jahowa. Tapangido ma ”dame ni Debata na sumurung sian saluhut roha”. Dame na sian Debata boi manjaga roha dohot pingkiranta.​—Pilippi 4:6, 7.

21, 22. (a) Aha do pangkirimon na laho hilalaon ni halak na parsidohot tu punguan na ”mansai torop”? (b) Pangkirimon na dia do na rumingkot di hamu jala aha do na ingkon taulahon?

²¹ Mansai denggan do pangkirimon na dilehon tu hita! Molo parsidohot do hamu di punguan na ”mansai torop”, na ”ro sian haporsuhon godang”, pingkirhon ma hangoluon na satongkinnari boi hilalaonmu. (Pangungkapon 7:9, 14) Molo ndang adong be Sibolis dohot angka begu, las situtu ma rohanta. Adong do sian hita na so hea mangadopi elaela ni Sibolis? Molo ndang adong be elaela sian Sibolis, las hian ma rohanta laho paulihon tano on gabe Paradeiso mangihuthon tudutudu sian Jesus dohot 144.000 halak na miniahan sian surgo! Las situtu do rohanta ala ndang adong be sahit, boi pajumpang dohot halak na dipahehe jala mangolu hombar tu lomo ni roha ni Debata! Huhut hita dipauliuli gabe halak na so mardosa, tahilala ma muse upa na umbalga songon na didok di Rom 8:21, ”Haluaon hasangapon na di angka anak ni Debata.”

²² Lomo hian do roha ni Jahowa asa tahilala haluaon lobi sian na tapingkirhon saleleng on. Alai, ingkon tongtong do taoloi Debata asa boi tahilala haluaon i. Alani i, tama do tahilala molo hita marsitutu saonari laho mangoloi Jahowa ganup ari? Sai tapauliuli ma dirinta di atas ni haporseaon na badia situtu asa boi tongtong di bagasan holong ni roha ni Debata salelengna!