Jesus marhalode tikki masuk tu Jerusalem

Tutu do Jesus i Messias na Disurirangkon di Bibel?

Na didok Bibel

I do. Jesus do “na miniahan, pangarajai” na gabe “sipalua ni portibi on”. (Daniel 9:25; 1 Johannes 4:14) Akka na masa tu ibana tikki di tano on, sarupa do songon naung disurirangkon hian taringot Messias. Dung mate Jesus, adong do muse surirang taringot Messias, na tutu masa tu dirina.—Psalmen 110:1; Ulaon ni Apostel 2:34-36.

Aha do lapatan ni “Messias”?

Molo di bahasa Heber Mashiach (Messias) jala molo di bahasa Junani Khristos (Kristus). Sarupa do lapatanna, i ma “Na Dipillit”. Jadi Jesus Kristus lapatanna “Jesus na Dipillit” manang “Jesus Messias i”.

Najolo, molo adong sasahalak na dipillit gabe raja, diusehon do miak tu uluna. Dung i, gabe raja ma ibana. (3 Musa 8:12; 1 Samuel 16:13) Jesus do na dipillit Debata gabe Messias. Sada hasangapon na massai balga do i. (Ulaon ni Apostel 2:36) Alai, dang miak na diusehon tu ulu ni Jesus. Marhite tondi parbadia do dipillit Debata ibana.—Mateus 3:16.

Holan tu sada halak do masa surirang taringot Messias i?

I do. Dos do i songon sidik jari. Dang sarupa sidik jari ni ganup halak. Jadi, holan tu sada halak do masa surirang taringot Messias manang Kristus na didok di Bibel. Jala didok do di Bibel, “Marroan ma angka Kristus palsu dohot panurirang na mangkatahon na so tutu. Bahenon ni nasida ma angka tanda halongangan laho mangaliluhon, molo boi mangaliluhon angka na tarpillit i.”—Mateus 24:24.

Di ari na naeng ro do muncul Messias i?

Daong. Disurirangkon do di Bibel, sian pinompar ni Raja Daud do Messias i. (Psalmen 89:4, 5) Alai, saonari dang adong be catatan na paboahon akka ise pinompar ni Raja Daud. Mago do ra catatan i tikki ro tentara Rom manaluhon Jerusalem taon 70 Masehi.a Jadi mulai sian i sahat tu saonari, dang adong be na mamboto akka ise do na termasuk pinoppar ni Raja Daud. Alai molo di tikki ni Jesus, adong dope catatan taringot i. Jadi dang boi didok manang ise pe, termasuk ma musuna, na so tutu Jesus i pinompar ni Raja Daud.—Mateus 22:41-46.

Sadia godang do surirang taringot Messias na disurat di Bibel?

Dang taboto sadia godang surirang taringot Messias i. Dang sai sarupa cara mangetong surirang taringot Messias na adong di Bibel. Umpamana, Jesaya 53:2-7 paboahon piga-piga surirang taringot Messias. Adong na mandok sude ayat i marisi surirang taringot Messias. Alai, adong muse na mandok dang sude ayat i marisi surirang taringot Messias, holan piga-piga do.

Piga-piga surirang taringot Messias na tutu masa tu diri ni Jesus

Surirang	Disurat di	Tutu masa
Pinoppar ni si Abraham	1 Musa 22:17, 18	Mateus 1:1
Pinoppar ni si Isak, anak ni si Abraham	1 Musa 17:19	Mateus 1:2
Sian suku Juda	1 Musa 49:10	Mateus 1:1, 3
Pinoppar ni Raja Daud	Jesaya 9:6	Mateus 1:1
Ditubuhon sahalak anak boru	Jesaya 7:14	Mateus 1:18, 22, 23
Tubu di Betlehem	Mika 5:1	Mateus 2:1, 5, 6
Digoari si Immanuelb	Jesaya 7:14	Mateus 1:21-23
Sian keluarga na sederhana	Jesaya 53:2	Lukas 2:7
Godang dakdanak na dipamate dung tubu ibana	Jeremia 31:15	Mateus 2:16-18
Dijou sian Mesir	Hosea 11:1	Mateus 2:13-15
Didok do ibana halak Nasaretc	Jesaya 11:1	Mateus 2:23
Adong suruan ni Debata na ro andorang so ro ibana	Maleaki 3:1	Mateus 11:7-10
Dipillit gabe Messias taon 29 Md	Daniel 9:25	Mateus 3:13-17
Diakkui Debata do ibana anakna	Psalmen 2:7	Ulaon ni Apostel 13:33, 34
Holong rohana tu bagas joro ni Debata	Psalmen 69:10	Johannes 2:13-17
Parbarita na uli	Jesaya 61:1	Lukas 4:16-21
Marbarita na uli tu halak Galilea	Jesaya 8:23; 9:1	Mateus 4:13-16
Mambahen mukjizat songon si Musa	5 Musa 18:15	Ulaon ni Apostel 2:22
Pasahatton hata ni Debata do ibana songon si Musa	5 Musa 18:18, 19	Johannes 12:49
Pamaluppon akka na marsahit	Jesaya 53:4	Mateus 8:16, 17
Dang olo pasangappon dirina sandiri	Jesaya 42:2	Mateus 12:17, 19
Marasi ni roha tu halak na susa	Jesaya 42:3	Mateus 12:9-20; Markus 6:34
Ditiru ibana do Debata, tigor maradoppon akka halak	Jesaya 42:1, 4	Mateus 12:17-20
Massai denggan mamodai	Jesaya 9:5, 6	Johannes 6:68
Dipaboa do goar ni Debata	Psalmen 22:23	Johannes 17:6
Mamakke akka tudosan tikki mangajari	Psalmen 78:2	Mateus 13:34, 35
Sahalak pamimpin	Daniel 9:25	Mateus 23:10
Godang na so porsea tu ibana	Jesaya 53:1	Johannes 12:37, 38
Gabe batu partuktuhan	Jesaya 8:14, 15	Mateus 21:42-44
Dang dijalo akka halak ibana	Psalmen 118:22, 23	Ulaon ni Apostel 4:10, 11
Sogo roha ni akka halak tu ibana, alai dang diboto aha alana	Psalmen 69:5	Johannes 15:24, 25
Dijakkon akka halak ibana tikki ro tu Jerusalem mamakke halode	Sakaria 9:9	Mateus 21:4-9
Dipuji akka dakdanak do ibana	Psalmen 8:3	Mateus 21:15, 16
Ro di bagasan goar ni Jahowa	Psalmen 118:26	Johannes 12:12, 13
Dang setia akka ale-alena	Psalmen 41:10	Johannes 13:18
Digadis holan alani 30 logam perake	Sakaria 11:12, 13	Mateus 26:14-16; 27:3-10
Ditadikkon akka donganna	Sakaria 13:7	Mateus 26:31, 56
Adong akka halak na mandok na so tutu taringot ibana	Psalmen 35:11	Mateus 26:59-61
Sip do ibana nang pe adong na mandok na so tutu taringot ibana	Jesaya 53:7	Mateus 27:12-14
Ditijuri	Jesaya 50:6	Mateus 26:67; 27:27, 30
Diantuk uluna	Mika 4:14	Markus 15:19
Dicambuk	Jesaya 50:6	Johannes 19:1
Dang mambalos ibana tikki dipukkuli	Jesaya 50:6	Johannes 18:22, 23
Marsada do akka pamimpin lao mangalo ibana	Psalmen 2:2	Lukas 23:10-12
Dipakkuhon do patna dohot tanganna tu hau	Psalmen 22:17	Mateus 27:35; Johannes 20:25
Diundi do abitna	Psalmen 22:19	Johannes 19:23, 24
Diuhum rap dohot akka pardosa	Jesaya 53:12	Mateus 27:38
Diparekkeli, direhei	Psalmen 22:8, 9	Mateus 27:39-43
Marsitaonon alani akka pardosa	Jesaya 53:5, 6	1 Petrus 2:23-25
Hira na ditadikkon Debata	Psalmen 22:2	Markus 15:34
Dilehon do asom gabe siinumonna	Psalmen 69:22	Mateus 27:34
Mauas andorang so mate	Psalmen 22:16	Johannes 19:28, 29
Dilehon do ngoluna tu Debata	Jesaya 53:12	Markus 15:37
Gabe tobusan lao manesa dosa ni jolma	Jesaya 53:12	Mateus 20:28
Dang diponggolhon holi-holina	Psalmen 34:21	Johannes 19:31-33, 36
Ditullang	Sakaria 12:10	Johannes 19:33-35, 37
Dikubur di kuburan ni halak na mora	Jesaya 53:9	Mateus 27:57-60
Dipahehe	Psalmen 16:10	Ulaon ni Apostel 2:29-31
Na menghianati ibana gabe digantihon	Psalmen 109:8	Ulaon ni Apostel 1:15-20
Hundul di siamun ni Debata	Psalmen 110:1	Ulaon ni Apostel 2:34-36

a Didok di Cyclopedia ni si McClintock dohot si Strong, “Boi do dipastihon, catatan taringot silsilah ni halak Jahudi nungnga mago dung ditaluhon halak Rom kota Jerusalem. Alai andorang so masa i, adong dope catatan i.”

b Molo di bahasa Heber, lapatan ni Immanuel, “Debata Rap dohot Hita”. On manggombarhon Jesus i sahalak Messias. Ro ibana tu tano on lao mangurupi akka jolma. On patuduhon, didongani Debata do akka halak na manomba Ibana.—Lukas 2:27-32; 7:12-16.

c Istilah “halak Nasaret” ra dibuat sian hata Heber netser. Lapatanna “tunas”.

d Asa lam takkas diboto hamu hatorangan taringot haroro ni Messias di taon 29 M, ida ma artikel “Nubuat Daniel tentang Kedatangan Mesias”.

e Sasittongna surirang on disurat di bukku Sakaria. Alai didok si Mateus do surirang on dipaboa marhite panurirang Jeremia. (Mateus 27:9) Ra bukku ni si Jeremia do na parjolo sian akka bukku na digoari “na Sinurat ni Angka Panurirang”. (Lukas 24:44) Ra, didok si Mateus pe goar ni si Jeremia lao manaringoti akka bukku i do, termasuk ma bukku ni si Sakaria.