Torus ma Mardalan di “Dalan na Badia”

1-2. Keputusan aha do na ikkon dibahen halak Jahudi na tinggal di Babel? (Esra 1:2-4)

NUNGNGA dibahen raja be sada boa-boa! Sude halak Jahudi naung ditawan di Babel saleleng 70 taon boi mulak tu huta ni nasida di Israel. (Jaha Esra 1:2-4.) Holan Jahowa do na boi pasautton i. Boasa boi tadok songon i? Alana halak Babel dang olo paluahon tawananna. (Jes. 14:4, 17) Alai di tikki i nungnga ditaluhon be Babel, jala pamaretta na baru pe mandok nungnga boi be halak Jahudi maninggalhon negara i. Alani i, ikkon dibahen halak Jahudi khususna kepala keluarga do keputusan: Tetap do di Babel manang kaluar sian i. Dang keputusan na mura on. Boasa?

² Godang do halak Israel naung matua. Pasti maol do di nasida menempuh pardalanan na dao. Asing ni i, godangan halak Jahudi tubu di Babel jala dang hea dope tinggal di inganan na asing. Jadi menurut nasida huta ni oppungna do luat Israel i. Adong do muse piga-piga halak Jahudi na marhasil di Babel. Adong do jabu ni nasida na nyaman dohot parkarejoan ni nasida disi. Alani i pasti maol do dihilala nasida maninggalhon i jala pinda tu inganan na baru na so ditanda nasida dope.

 3. Manfaat aha do na boi didapot halak Jahudi na mulak tu Israel?

³ Alai diboto halak Jahudi na setia do unggodang do manfaat na boi dapot ni nasida molo mulak tu Israel sian pengorbanan na dibahen nasida. Manfaat na umbalga adong hubunganna tu ibadat ni nasida tu Jahowa. Di Babel adong lobi sian 50 inganan panombaon tu debata na so sittong jala dang adong inganan panombaon tu Jahowa di kota i. Dang adong langgatan na boi dipakke halak Israel lao mangalehon pelean songon na diparettahon di Patik ni si Musa. Jala dang adong akka malim na boi mangurupi nasida mamelehon pelean i. Asing ni i, unggodang do di kota i halak na manomba debata na so sittong sian halak na manomba Jahowa jala na mangoloi parettana. Alani i, marpulu ribu halak Jahudi na makkaholongi Jahowa tarpaima do mulak muse tu hutana asa boi nasida padenggatton ibadat na sittong disi.

 4. Aha do janji ni Jahowa tu halak Jahudi na mulak tu Israel?

⁴ Maol do pardalanan sian Babel tu Israel jala saleleng opat bulan ma pardalanan i. Alai marjanji do Jahowa mambolokkon akka abbat-abbat di dalan Panurirang Jesaya paboahon, “Parade hamu ma dalan ni Jahowa! Parade hamu ma dalan na tigor di gurun lao tu Debatanta. . . . Padosdos hamu ma tano na marbatu-batu, jala bahen hamu ma tano na marbuttul-buttul gabe tano na dosdos.” (Jes. 40:3, 4) Bayakkon ma adong sada jalan raya na dosdos di padang gurun na dikalilingi akka dolok. Pasti las do roha ni halak mangalewati dalan i. Alana ummura jala ukkatop do mardalan di dalan na dosdos daripada mardalan mangalewati dolok-dolok manang rura.

 5. Aha do goar ni jalan raya na sian Babel tu Israel?

⁵ Saonari godang do jalan raya na dibahen goarna manang nomorna. Jalan raya na dipaboa si Jesaya pe adong do goarna. Bibel mandok, “Adong do disi jalan raya, dalan na digoari Dalan na Badia. Dang lewat sian i halak na ramun.” (Jes. 35:8) Aha do lapatan ni hata on tu halak Israel najolo? Jala aha do lapatanna tu hita saonari?

 6. Boasa didok badia dalan i?

⁶ “Dalan na Badia” do goar ni dalan i. Massai uli do goarna. Boasa didok badia do dalan i? Alana dang boi halak Israel “na ramun” lewat sian i. Misalna halak na mangulahon seks na so patut, na manomba debata na so sittong, dohot na mangulahon dosa na asing. Gabe “bangso na badia” do halak Israel na mulak i di jolo ni Debata. (5 Mus. 7:6) Alai on dang berarti na so porlu be nasida mambahen perubahan lao palasson roha ni Debata.

 7. Perubahan aha do na porlu dibahen halak Jahudi? Paboa ma contohna.

⁷ Songon na dipaboa nakkin, godangan halak Jahudi tubu di Babel jala godang sian nasida nungnga terpengaruh tu cara marpikkir dohot standar ni halak Babel. Hampir 70 taon dung mulak halak Jahudi tu Israel, diboto si Esra ma adong piga-piga sian nasida naung menikah tu boru-boru na sian bangso na asing. (2 Mus. 34:15, 16; Esr. 9:1, 2) Jala longang do roha ni Gubernur Nehemia dung mamboto dang boi gelleng ni nasida na tubu di Israel mangattusi bahasa Heber. (5 Mus. 6:6, 7; Neh. 13:23, 24) Songon dia ma akka gellengna i boi makkaholongi jala manomba Jahowa molo dang diboto nasida bahasa Heber, hape i do bahasa na dipakke lao manuratton Hata ni Debata? (Esr. 10:3, 44) Takkas ma ikkon dibahen halak Jahudi i do perubahan na balga di ngolu ni nasida. Alai ummura ma nasida mambahen perubahan molo tinggal nasida di Israel. Alana disi do ibadat na sittong secara bertahap dipadenggan.​—Neh. 8:8, 9.

 8. Adong do pengaruh ni na masa tu halak Jahudi najolo tu hita saonari? (Ida gambar sampul.)

⁸ Piga-piga halak mungkin marpikkir, ‘Hal na menarik do on. Alai adong do pengaruh ni na masa tu halak Jahudi najolo tu hita saonari?’ Adong, alana saonari pe hita mardalan di “Dalan na Badia” do. Dang soal hita na miniahan manang ‘biru-biru na asing’ ikkon mardalan do hita di “Dalan na Badia” i, asa boi hita toktong manomba Jahowa saonari jala mandapot pasu-pasu di Harajaon ni Debata haduan. b (Joh. 10:16) Mulai taon 1919 M, marjuta bawa, borua, dohot dakdanak nungnga maninggalhon Babel na Balga, i ma sude agama na so sittong, jala mardalan ma nasida di “Dalan na Badia” i. Termasuk do hamu disi. Nungnga mulai akka halak mardalan di dalan i hira-hira 100 taon na salpu. Alai sasittongna marratus taon sebelum i pe, nungnga adong do akka halak na mampersiappon dalan i.

 9. Sesuai tu Jesaya 57:14, songon dia do “Dalan na Badia” dipersiappon?

⁹ Tikki kaluar halak Jahudi sian Babel didok Jahowa bolokkononna do sude abbat-abbat na adong di dalan i. (Jaha Jesaya 57:14.) Boha do taringot “Dalan na Badia” di tikkitta saonari? Marratus taon sebelum taon 1919, dipakke Jahowa do piga-piga bawa na makkabiari Ibana lao mangurupi akka halak kaluar sian Babel na Balga. (Bandingkon tu Jesaya 40:3.) Halak i ma na mampersiappon manang padenggatton dalan i. Lapatanna diurupi nasida do akka halak na tigor marroha kaluar sian Babel na Balga asa boi manomba Jahowa. Saonari tabahas ma jo piga-piga ulaon mampersiappon dalan i na marhasil dibahen nasida.

10-11. Songon dia do ulaon mancetak dohot manerjemahon Bibel mangurupi akka halak mangattusi isi ni Bibel? (Ida gambar.)

¹⁰ Mancetak. Sebelum taon 1450, disalin pakke tangan do Bibel. Godang do habis tikki mangulahon i. Salinanna pe terbatas jala massai arga. Alai dung adong masin cetak, lam mura ma Bibel dicetak jala lam godang dibagihon tu akka halak.

¹¹ Manerjemahon. Saleleng marratus taon godangan terjemahan ni Bibel tersedia di bahasa Latin jala holan akka parsikkola na timbo do boi mangattusi i. Alai dung adong masin cetak, lam marsitutu ma akka halak na makkabiari Debata manerjemahon Bibel tu bahasa na somal dipakke akka halak. Gabe boi ma akka panjaha Bibel boi mambandikkon sandiri aha na diajarhon pamimpin agama ni nasida tu na sasittongna diajarhon Bibel.

12-13. Paboa ma songon dia piga-piga bawa na mamparsiajari Bibel mulai taon 1835 patuduhon ajaran na sala na diajarhon akka gareja.

¹² Mambahen alat bantu marsiajar Bibel. Godang do dapot ni akka parsiajar Bibel sian Hata ni Debata. Alai gabe muruk do akka pemimpin agama tikki mulai akka parsiajar Bibel i paboahon na diparsiajari nasida tu na asing. Sian taon 1835, adong do piga-piga bawa na mambagihon risalah na patuduhon ajaran na sala na diajarhon gareja.

¹³ Hira-hira taon 1835, adong ma sahalak bawa na makkabiari Debata na margoar si Henry Grew. Diterbitton ibana ma sada risalah na mambahas taringot halak na mate. Di tikki i akka gareja mangajarhon mulai sian na tubu, nungnga adong di sasahalak tondi na so boi mate. Alai di risalahna i dipatudu si Henry Grew ma sian Bibel, holan Debata do na boi mangalehon hangoluan salelengna. Dung i di tahun 1837 adong ma sahalak penginjil na margoar si George Storrs. Dapot ni ibana ma salinan ni risalah ni si Grew i tikki markareta api. Dijaha ibana ma i jala pos rohana nga dapotna be hasittongan. Diputusson ibana ma lao mambagihon na diparsiajarina i. Di taon 1842 dipasahat ibana ma rangkaian jamita na marjudul “Sada Sukkun-Sukkun​—Na So Boi do Mate Akka Parjahat?” (“An Inquiry​—Are the Wicked Immortal?”) Balga do pengaruh ni akka na disurat si George Storrs na tu sahalak bawa na poso margoar si Charles Taze Russell.

14. Aha do manfaatna tu donganta si Russel dohot akka donganna ala nungnga dipersiappon dalan i di tikki naung salpu? (Ida gambar.)

¹⁴ Aha do manfaatna tu donganta si Russel dohot akka donganna, ala nungnga dipersiappon dalan i di tikki naung salpu? Gabe boi ma nasida mangida kamus ni Bibel, konkordansi (indeks Alkitab), dohot terjemahan ni Bibel naung adong hian sebelum jaman ni nasida. Dimanfaatton nasida do muse sude riset sian Bibel na dibahen si Henry Grew, si George Storrs, dohot akka na asing. Parsidohot do si Russel dohot akka donganna mampersiappon dalan i. Dibahen nasida do godang bukku dohot risalah na mambahas taringot aha do na didok Bibel.

15. Aha do na masa tu naposo ni Debata di taon 1919?

¹⁵ Di taon 1919, nungnga malua be naposo ni Debata sian Babel na Balga. Alana di taon i, nungnga mulai “naposo haposan jala na marbisuk” mangulahon tugasna. Diurupi nasida do akka halak na tigor marroha mardalan di “Dalan na Badia”. (Mat. 24:45-47) Ulaon na dibahen nasida di tikki naung salpu lao mampersiappon dalan i mangurupi akka halak lao marsiajar taringot Jahowa dohot sakkapna. (Poda 4:18) Boi ma nasida mangulahon lomo ni roha ni Jahowa di ngolu ni nasida. Dang dibahen Jahowa akka naposona pittor mambahen perubahan di tikki i, alai secara bertahap do. (Ida kotak “Dipabadia Jahowa do Naposona Secara Bertahap.”) Pasti las do rohatta ala boi tabahen las roha ni Jahowa di sude na taulahon.​—Kol. 1:10.

16. Mulai taon 1919, songon dia do “Dalan na Badia” i torus dipadenggan? (Jesaya 48:17; 60:17)

¹⁶ Setiap dalan porlu do taratur dipadenggan. Songon i do tong “Dalan na Badia” i. Mulai taon 1919 torus do dibahen ulaon padenggatton dalan i, lao mangurupi akka halak kaluar sian Babel na Balga. Mulai ma naposo haposan jala na marbisuk mangulahon tugasna. Di taon 1921 diterbitton nasida ma bukku na dirancang lao mangurupi akka halak mananda hasittongan. Goar ni bukku i The Harp of God (Harpa ni Debata). Jala adong do hira-hira onom juta bukku naung diterbitton di 36 bahasa. Godang do halak na mananda hasittongan mamakke bukku i. Baru-baru on diterbitton do muse bukku lao memandu parsiajaran Bibel na marjudul Mangolu Saleleng ni Lelengna! Di akka ari parpudi on, dipakke Jahowa do organisasina lao paradehon akka publikasi lao mangurupi hita asa toktong mardalan di “Dalan na Badia” i.​—Jaha Jesaya 48:17; 60:17.

17-18. Aha do upa na dapot ni akka halak na mardalan di “Dalan na Badia” i?

¹⁷ Boi do tadok molo olo sasahalak marsiajar Bibel, dilehon ma tu ibana kesempatan lao mardalan di “Dalan na Badia” i. Adong do piga-piga halak na holan satokkin mardalan disi dung i maninggalhon dalan i. Na asing toktong mardalan di dalan i sahat tu tujuan. Tudia do tujuan ni nasida?

¹⁸ Molo tu akka halak na lao mangolu di surgo, “Dalan na Badia” i mambahen nasida mandapot hangoluan “di paradeiso ni Debata” di surgo. (Pgk. 2:7) Molo tu akka halak na harapanna mangolu di tano on, “Dalan na Badia” i mambahen nasida sempurna di ujung ni pamarettaon 1.000 taon ni Kristus. Molo nungnga mardalan di dalan i hamu saonari, unang be mangida tu pudi manang mamikkirhon sude naung ditinggalhon hamu. Jala unang ma kaluar sian dalan i, sahat tu na sahat hamu di tujuanmuna di tano na imbaru. Sai anggiat ma hamu toktong aman di pardalanan i!