Porsea ma tu Jahowa asa Tongtong Mangolu!

 1. Boasa porlu hita diapuli?

GODANG do na mambahen hita gabe marsak, marmetmet ni roha, jala holsoan. Asing ni i, susa do hita alani sahit, lam matua, manang mate halak na tahaholongi. Adong do muse alani pambahenan ni halak na so denggan tu hita. Alani i, sude hita porlu diapuli. Ala lam jahat do angka halak, lam susa ma tahilala. On patuduhon, hita mangolu “di ari parpudi”. Alai ndang sadia lelengnai, bahenon ni Debata ma portibi on gabe tano na imbaru. (2 Tim. 3:1) Nang pe lam susa tahilala, sabar ma hita paimahon janji ni Jahowa. Molo songon i, songon dia asa boi tarapul rohanta?

2, 3. (a) Aha do lapatan ni goar ni si Habakuk? (b) Boasa ingkon taparsiajari buku Habakuk?

² Saonari, taulas ma alus ni sungkun-sungkun i sian buku Habakuk. Nang pe ndang sude dipaboa di Bibel taringot si Habakuk, alai buku on boi patoguhon hita. Ra, lapatan ni goar ni si Habakuk, i ma “Dihaol Gomos”. Boi do muse lapatanna, diapuli Jahowa hita huhut dihaol gomos. Manang, hita na maniop gomos tangan ni Jahowa. Mangkatai do si Habakuk dohot Jahowa jala disungkun ibana do Jahowa. Dung i, disuru Jahowa ma si Habakuk asa manurat pangkataion ni nasida i. Boasa ingkon disurat i? Ala diboto Jahowa adong do labana tu hita saonari.​—Hab. 2:2.

³ Holan taringot pangkataion ni si Habakuk dohot Jahowa do na dipaboa di buku Habakuk. Alai buku Habakuk on bagian sian Hata ni Debata naung “tarsurat hian” do. Jala marhite buku on, “tadapot ma apul-apul dohot pangkirimon. Ai diurupi na tarsurat i do hita asa margogo jala sabar”. (Rom 15:4) Jadi, songon dia do hata na disurat di buku on boi mangurupi hita? Diurupi do hita asa mangantusi lapatan ni porsea tu Jahowa. Jala dipapos do rohanta, asa tongtong dame pingkiranta nang pe godang hasusaan na taadopi.

 4. Boasa marsak si Habakuk?

⁴ Jaha Habakuk 1:2, 3. Mansai susa do parngoluan di tingki ni si Habakuk ala godang parjahat. Diida ibana kejam do halak Israel jala olo do nasida mangoto-otoi angka donganna. Gabe marsak ma rohana alani i. Gabe sungkun-sungkun ma rohana, ‘Andigan do salpu on sude? Jala boasa leleng dipasombu Jahowa on?’ Mandele ma ibana alani i. Dipangido ma tu Jahowa asa disalpuhon sude angka hajahaton i. Ra ninna rohana, boasa dipasombu Jahowa na masa on jala boasa ndang dipardulihon Jahowa be angka naposona. Hea do dihilala hamu songon i?

 5. Aha do na boi taparsiajari sian buku Habakuk? (Ida gombar di mula ni parsiajaran.)

⁵ Na so porsea be si Habakuk tu Jahowa dohot tu janjina? Sasintongna ndang songon i! Didok pe songon i, na porsea do si Habakuk tu Jahowa na boi Jahowa patoguhon ibana. Ndang diboto si Habakuk boasa masa i. Alani i gabe mabiar do ibana. Ndang diantusi ibana boasa leleng dipasombu Jahowa masa i. Jala boasa dipaloas Jahowa susa ibana. Diurupi Jahowa do si Habakuk asa manurat pangkataion ni nasida i, laho paboahon parsiajaran na ringkot tu hita. Alani i, unang ma mabiar hita pasahathon holso ni rohanta tu Jahowa. Dijujui Ibana do hita asa martangiang laho paboahon na di bagas rohanta. (Ps. 50:15; 62:9) Poda 3:5 patoguhon rohanta. Didok, “Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri.” On ma na diulahon si Habakuk.

 6. Boasa ringkot martangiang?

⁶ Porsea do si Habakuk tu Jahowa, i ma na gabe Ale-ale dohot Bapakna. Dipajonok do dirina tu Jahowa. Ndang holan holso ni rohana na sai dipingkiri ibana. Jala ndang marpos ni roha ibana tu dirina. Gariada, martangiang do ibana paboahon holso ni rohana. Sitiruon na denggan do on tu hita. Alana, Jahowa do sitangihon tangiang. Dijujui do hita asa paboahon holso ni rohanta marhite tangiang. (Ps. 65:3) Molo taulahon on, boi ma taida songon dia Jahowa mangalusi tangiangta. Tahilala ma songon na dihaol Jahowa hita tingki diapuli jala ditogu-togu Ibana. (Ps. 73:23, 24) Diurupi Ibana do hita asa taboto songon dia Ibana mangalusi tangiangta. Martangiang ma cara na dumenggan patuduhon na porsea hita tu Jahowa.

 7. Songon dia do pangkilalaan ni Jahowa tingki dipaboa si Habakuk holso ni rohana?

⁷ Jaha Habakuk 1:5-7. Dung dipaboa si Habakuk holso ni rohana, sungkun-sungkun do rohana songon dia do cara ni Jahowa mangalusi i. Ala Debata parholong do Jahowa, diantusi do songon dia pangkilalaan ni si Habakuk. Diboto do na susa si Habakuk jala porlu diurupi. Ndang muruk Jahowa tu si Habakuk ala dipaboa holso ni rohana. Gariada, dipaboa Jahowa do tu si Habakuk aha na laho bahenonna tu halak Jahudi na so setia. Jadi, tu si Habakuk do parjolo sahali dipaboa Jahowa na laho ripashononna parjahat.

 8. Songon dia do Jahowa mangalusi tangiang ni si Habakuk?

⁸ Dipaboa Jahowa do tu si Habakuk laho uhumonna do angka halak na jahat di Juda. Didok Jahowa, laho masa do i “di angka arimuna”. Tutu do masa panguhuman i di tingki ni si Habakuk. Dialusi Jahowa do tangiang ni si Habakuk i, alai ndang songon na di rohana. Umjahat do halak Kasdim manang halak Babel sian halak Israel, ala ndang sisomba Jahowa nasida. Jadi, boasa dipangke Jahowa halak na so manomba Ibana laho manguhum bangsona? Alana boi do on mambahen nasida tamba susa. Songon dia do pangkilalaanmuna molo hamu gabe si Habakuk?

 9. Aha do muse sungkun-sungkun ni si Habakuk?

⁹ Jaha Habakuk 1:12-14, 17. Diboto si Habakuk do laho dipangke Jahowa halak Babel laho manguhum halak Israel na jahat. Alai, ndang diantusi ibana boasa dipangke Jahowa nasida. Nang pe songon i, serep do rohana. Jala tongtong do ibana porsea tu Jahowa. Tarida do i sian hatana tingki didok, Jahowa do “Dolok Batu” di ahu. (5 Mus. 32:4; Jes. 26:4) Tongtong do porsea si Habakuk tu Debata na parholong jala burju. Ndang mabiar ibana manungkun tu Jahowa. Ra sungkun-sungkunna songon on do: Boasa dipaloas Jahowa lam sursar situasi di Juda? Boasa ndang pintor diurupi Ibana naposona? Boasa dipasombu Jahowa angka parjahat tongtong mangolu? Hape, “na sun badia” do Jahowa i jala pabadia hu do matana mangida angka na jahat.

10. Sipata, boasa sarupa pangkilalaanta songon si Habakuk?

¹⁰ Sipata, olo do ra pangkilalaanta songon si Habakuk. Tatangihon do Jahowa. Porsea do hita tu Ibana, tajaha jala taparsiajari do Bibel na mambahen hita marpangkirimon. Taboto do muse, adong janjina marhite parsiajaran na dilehon organisasi tu hita. Alai olo dope sungkun-sungkun rohanta, ‘Andigan do salpu sitaonon on?’ Taulas ma aha do muse na diulahon si Habakuk.

11. Aha do na tongtong diulahon si Habakuk?

¹¹ Jaha Habakuk 2:1. Pangkataion ni si Habakuk dohot Jahowa mambahen dame pingkiran dohot roha ni si Habakuk. On mambahen ibana tongtong sabar paimahon Jahowa mangurupi ibana. Dipatudu si Habakuk do i tingki didok, “Hohom do ahu paimaimahon tingki na naeng masa.” (Hab. 3:16, Bibel siganup ari) Naposo ni Jahowa na asing pe, tongtong do sabar paimahon Jahowa mangurupi nasida. Gabe sitiruon do nasida di hita. Alani i, tongtong ma sabar hita paimahon Jahowa mangurupi hita.​—Mik. 7:7; Jak. 5:7, 8.

12. Aha do na boi taparsiajari sian si Habakuk?

¹² Aha do parsiajaran na boi tatiru sian si Habakuk? Na parjolo, tongtong ma hita martangiang nang pe godang sitaononta. Paduahon, tangihon ma na diajarhon Jahowa tu hita marhite Bibel dohot organisasina. Patoluhon, tongtong ma sabar paimahon Jahowa mangurupi hita. Jala pos ma rohanta na urupanna do hita di tingki na pas. Molo tatiru si Habakuk, boi ma dame pingkiran dohot rohanta jala boi ma hita martahan mangadopi sitaononta. Pangkirimon, mangurupi hita asa tongtong marlas ni roha jala sabar nang pe godang sitaonon. Pos ma rohanta, sai urupan ni Jahowa do hita.​—Rom 12:12.

13. Songon dia do Jahowa mangapuli si Habakuk?

¹³ Jaha Habakuk 2:3. Taboto, las do roha ni Jahowa ala tongtong sabar si Habakuk paimahon Jahowa mangurupi ibana. Tangkas do diboto Jahowa songon dia pangkilalaan ni si Habakuk. Diapuli jala dipapos do rohana, na laho alusan ni Jahowa do sungkun-sungkunna i. Alani i, gabe ndang holsoan be si Habakuk. Didok Jahowa do tu si Habakuk, “Sabar ma ho jala porsea ma tu ahu. Nang pe songon na leleng, alai alusanku do tangiangmi.” Dipaboa Jahowa do tu si Habakuk, nunga ditontuhon Jahowa tingki na pas laho pasauthon janjina i. Alani i, dipatogu do roha ni si Habakuk asa sabar paimahon. Jala ndang ditadingkon Jahowa ibana.

14. Aha do na ingkon taulahon tingki mangadopi hasusaan?

¹⁴ Saonari pe, ingkon porsea jala sabar ma hita paimahon Jahowa laho mangurupi hita. Molo tatangihon hatana, boi ma dame pingkiranta nang pe godang sitaononta. Ndang dipaboa Debata tu hita taringot “tingki manang masa” naung ditontuhon i. Alani i, dipaingot Jesus ma hita asa unang sai mamingkiri i. (Ul. 1:7) Pos ma rohanta, diboto Jahowa do tingki na pas laho mangurupi hita. Alani i, marserep ni roha ma hita, sabar, jala porsea ma tu Debata. Andorang so ro dope tingkina, marbisuk ma hita mamangke tingkinta. Jala ulahon ma na dumenggan tu Jahowa sian nasa gogonta.​—Mrk. 13:35-37; Gal. 6:9.

15, 16. (a) Aha do janji ni Jahowa na disurat di buku Habakuk? (b) Aha do na boi taparsiajari sian janjina i?

¹⁵ Didok Jahowa, “Anggo halak partigor i mangolu do binahen ni parsihohotna marhaporseaon” jala “gok parbinotoan di hamuliaon ni Jahowa do sogot tano on.” (Hab. 2:4, 14) Tutu, marjanji do Jahowa na lehononna do hangoluan saleleng ni lelengna tu sude halak na tongtong sabar jala porsea tu Ibana.

¹⁶ Mansai ringkot do Janji ni Jahowa na disurat di Habakuk 2:4. Alani i, disurat si Paulus do on muse sampe tolu hali. (Rom 1:17; Gal. 3:11; Heb. 10:38) Nang pe gok sitaononta, pos ma rohanta na boi do idaonta saut janji ni Jahowa i molo porsea hita tu Ibana. Jadi, lomo do roha ni Jahowa asa tongtong taingot janjina i.

17. Songon dia do Jahowa paposhon rohanta molo porsea hita tu Ibana?

¹⁷ Di tingkinta saonari on, godang do na boi taparsiajari sian buku Habakuk. Marjanji do Jahowa laho lehononna hangoluan na salelengna tu sude halak na tigor jala na porsea tu Ibana. Alani i, nang pe godang hasusaanta, tongtong ma tapatogu haporseaonta tu Debata. Hata ni Jahowa tu si Habakuk paposhon rohanta, na urupan ni Jahowa do hita jala paluaonna. Dijujui Jahowa do hita asa tongtong porsea jala sabar paimahon Harajaonna saut di tano on. Ujungna, sude halak na manomba Jahowa mangkilala hadameon jala marlas ni roha.​—Mat. 5:5; Heb. 10:36-39.

18. Dung diboto si Habakuk hata ni Jahowa, songon dia do pangkilalaanna?

¹⁸ Jaha Habakuk 3:16-19. Godang do laba na didapot si Habakuk sian hata ni Jahowa tu ibana. Dirimangi si Habakuk do sude angka na denggan naung dibahen Jahowa tu naposona najolo. Alani i, gabe lam togu do haporseaon ni si Habakuk. Pos do roha ni si Habakuk, na laho pasauton ni Jahowa do janjina. Nang pe ingkon mangadopi sitaonon, alai tarapul do roha ni si Habakuk. Jala pos do rohana na urupan ni Jahowa do ibana. Tarida do i sian hatana na disurat di ayat 18, na patuduhon mansai las situtu do roha ni si Habakuk. Piga-piga peneliti mandok, hatana i boi do lapatanna, “Sampe naeng marinjaki jala naeng marjogeti do ahu alani las ni rohangku tu hata ni Debata.” Aha do parsiajaranna tu hita? Pos ma rohanta, ndang sadia leleng nai, pasauton ni Jahowa do janjina i. Alana, godang do naung dibahen Ibana sahat tu saonari laho pasauthon janjina i.

19. Songon si Habakuk, aha do na ingkon taulahon asa diapuli Jahowa?

¹⁹ Buku Habakuk mangajari hita taringot ringkot ni porsea tu Jahowa. (Hab. 2:4) Asa boi tongtong porsea tu Jahowa, ingkon tapatogu do parale-aleonta tu Ibana. Songon dia carana? (1) Tongtong martangiang, jala pasahat ma sude na adong di bagas roha. (2) Parrohahon ma aha na didok Bibel jala ihuthon ma tudu-tudu sian organisasina tu hita. (3) Porsea jala sabar ma paimahon saut janji ni Jahowa i. Songon i ma na diulahon si Habakuk. Nang pe mulana marsak ibana, alai ujungna gabe dipatogu jala marlas ni roha do ibana. Molo tatiru si Habakuk, boi do tarapul rohanta jala songon na dihaol Debata Jahowa ma hita. Tontu, tarapul do rohanta nang pe mangolu di portibi na jahat on!