Ampuna ni Jahowa do Hita

 1. Boasa tadok molo Jahowa nampunasa sasudena? (Ida gombar di mula ni parsiajaran.)

JAHOWA do nampunasa sasude! “Langit ni langitan, nang tano on ro di nasa isina” Ibana do nampuna i. (5 Mus. 10:14; Pgk. 4:11) Jahowa do nampuna hita, ala Ibana do na manompa hita. (Ps. 100:3) Alai ndang sude jolma dipillit Ibana gabe naposoNa.

 2. Angka ise do na dipillit Jahowa?

² Umpamana di Psalmen 135 didok do, “Ibana nampunasa” halak Israel najolo. (Ps. 135:4) Jala, songon na disurirangkon si Hosea adong do piga-piga na so halak Israel gabe naposo ni Jahowa. (Hos. 2:25) Masa ma i tingki mulai dipillit Jahowa angka na so halak Israel laho mamarenta raphon Kristus. (Ul. 10:45; Rom 9:23-26) Marhite tondi parbadia do nasida dipillit. Jala dijou ma nasida “bangso na badia” manang “bangso ni Debata”. (1 Ptr. 2:9, 10) Alai songon dia do angka na marpangkirimon di paradeiso? Nasida pe dijou Jahowa do “bangsongku” dohot “halak na hupillit”.​—Jes. 65:22.

 3. (a) Di tingkinta saonari, ise do na marale-ale tu Jahowa? (b) Aha do na laho taulas di parsiajaran on?

³ Saonari rap manomba Jahowa jala gabe “sada punguan” do “punguan na metmet” na marpangkirimon tu surgo, dohot ‘biru-biru na asing’ na marpangkirimon di tano on. (Luk. 12:32; Joh. 10:16) Jadi, tapatudu ma hamauliateonta tu Jahowa ala hita nunga marale-ale tu Ibana. Jadi di parsiajaran on, taulas ma songon dia caranta mandok mauliate tu Jahowa ala nunga dipillit hita gabe naposoNa.

 4. Songon dia do caranta mandok mauliate tu Jahowa jala songon dia do Jesus mangulahon na sarupa?

⁴ Tingki marjanji hita tu Jahowa jala tardidi, na patuduhon hamauliateon do i tu Ibana. Gabe diboto na asing ma, molo hita dipillit Jahowa jala rade mangoloi Ibana. (Heb. 12:9) Suang songon i ma tingki tardidi Jesus. Nang pe ibana nunga gabe bagian sian bangso ni Debata, alai olo do ibana marjanji jala mangalehon dirina tu Jahowa. Jala hira na didok ibana do, “Dipangido rohangku do patupahon lomo ni roham.”​—Ps. 40:8, 9.

5, 6. (a) Aha do na didok Jahowa tingki Jesus tardidi? (b) Paboa ma tudosan taringot pangkilalaan ni Jahowa molo rade hita mangulahon lomo ni rohaNa?

⁵ Songon dia do pangkilalaan ni Jahowa tingki Jesus tardidi? Didok di Bibel, “Dung tardidi, kaluar ma Jesus sian aek, bungka ma langit jala diida si Johannes ma tondi parbadia ni Debata na songon darapati ro tu ginjang ni Jesus. Dung i tarbege ma soara sian langit na mandok, ‘On do Anakku, haholonganki, halomoan ni rohangku do ibana.’” (Mat. 3:16, 17) Mansai las hian do roha ni Jahowa. Alana, nang pe Jesus anakNa, alai rade do Jesus mangulahon lomo ni roha ni Jahowa saleleng ngoluna. Suang songon i ma las ni roha ni Jahowa tingki tardidi hita. Jala dipasu-pasu Ibana ma hita.​—Ps. 149:4.

⁶ Molo Jahowa do nampunasa sasudena, jadi aha ma na boi talehon tu Ibana? Bayangkon ma, molo adong sahalak ama nampuna porlak jeruk. Jadi sada tingki diputik boruna i ma jeruk i, jala dilehon ma tu amana. Las do roha ni amana i manjalo i, nang pe jeruk i dibuat sian porlakna sandiri. Alana, jeruk na dilehon boruna i, na patuduhon holong ni boruna i do tu amana. Tontu umlomo do rohana mangallang jeruk na dilehon boruna i sian angka jeruk na adong di porlakna. Suang songon i ma las ni roha ni Jahowa, molo hita rade mangulahon lomo ni rohaNa saleleng ngolunta.​—2 Mus. 34:14.

 7. Songon dia si Maleaki paboahon pangkilalaan ni Jahowa ala rade hita mangoloi Ibana?

⁷ Jaha Maleaki 3:16. Boasa ringkot marjanji tu Jahowa, jala tardidi? Ala Ibana do na manompa hita, tontu sian mulai tubu, Ibana do nampunasa hita. Mansai las hian do rohaNa molo rade jala sai taoloi Ibana! (Poda 23:15) Ditanda Jahowa do manang ise na rade mangulahon lomo ni rohaNa, jala disurat do goar ni nasida di “buku parningotan”.

8, 9. Aha do na dipangido Jahowa asa tongtong tarsurat goarta di “buku parningotan”?

⁸ Songon dia carana asa tongtong goarta tarsurat di “buku parningotan” i? Si Maleaki mandok, ingkon tongtong ma tapasangap goar ni Jahowa. Alana molo ndang taoloi jala tapasangap Ibana, gabe disesa ma goarta sian buku i!​—2 Mus. 32:33; Ps. 69:29.

⁹ Ndang sae holan marjanji tu Jahowa jala tardidi. Alai ingkon taulahon do lomo ni rohaNa saleleng ngolunta. Alani i, ingkon tarida do sian parniulaonta ganup ari, na unduk do hita tu Jahowa.​—1 Ptr. 4:1, 2.

10. Aha do imbar ni halak sisomba Jahowa dohot na so manomba Ibana?

¹⁰ Di parsiajaran naung salpu nunga taulas taringot si Kain, si Salomo dohot halak Israel na so marsihohot tu Jahowa. Sian pengalaman ni nasida, taboto ma ndang sae holan tadok sisomba Jahowa do hita. Alai, ingkon tahasogohon do angka na so denggan. Jala ingkon taulahon ma angka na denggan. (Rom 12:9) Alani i didok Jahowa, tangkas do imbar ni ‘halak partigor martimbangkon halak parjahat, halak sioloi Debata, martimbangkon halak na so mangoloi Ibana’.​—Mal. 3:18.

11. Boasa ingkon tangkas diida halak molo hita mangulahon lomo ni roha ni Jahowa?

¹¹ Tontu mandok mauliate do hita ala nunga dipillit Jahowa gabe naposoNa! Jadi ingkon tangkas do diida halak molo hita mangulahon lomo ni roha ni Jahowa. (Mat. 5:16; 1 Tim. 4:15) Alani i, boi tasungkun dirinta, ‘Tarida do sian parniulaonku na mangoloi Jahowa do ahu? Las do rohangku paboahon tu halak na Sitindangi Ni Jahowa do ahu?’ Tontu mansai hansit do roha ni Jahowa, molo maila hita paboahon na Sitindangi Ni Jahowa do hita.​—Ps. 119:46; jaha Markus 8:38.

12, 13. Aha do na mambahen sasahalak gabe songon na so Sitindangi Ni Jahowa?

¹² Adong do piga-piga Sitindangi na tongtong mangihuthon “pingkiran ni halak na di portibi on”. Gabe songon na sarupa ma nasida tu angka na so sisomba Jahowa. (1 Kor. 2:12) Somalna “pingkiran ni halak na di portibi on”, holan mangkaringkothon dirina sandiri do. (Eps. 2:3) Umpamana, nunga dipaboa tu hita taringot pangkean na tama. Hape, adong dope na mamangke pangkean na paketathu manang patipishu. Gariada dipangke do pangkean sisongon i tu parpunguan. Manang asing-asing do dibahen gaya ni obukna. (1 Tim. 2:9, 10) Gabe songon na so Sitindangi Ni Jahowa do nasida.​—Jak. 4:4.

¹³ Adong do muse na mambahen sasahalak gabe ndang imbar sian angka na so sisomba Jahowa. Umpamana, tingki adong acara, piga-piga Sitindangi marjoget na so tama di halak Kristen. Adong do muse na mambahen poto manang komentar na so denggan tu media sosial. Ra, tongtong do nasida ro tu parpunguan jala marbarita. Alai tingki mangida nasida, gabe ganggu do roha ni angka dongan na marsitutu ndang mangihuthon pingkiran ni halak di portibi on.​—Jaha 1 Petrus 2:11, 12.

14. Aha do na ingkon taulahon asa tongtong solhot tu Jahowa?

¹⁴ Sude na adong di portibi on mambahen hita gabe mangkaringkothon, “hisap-hisap ni daging, hisap-hisap ni mata dohot manganggarhon” hamoraon. (1 Joh. 2:16) Ala hita nunga dipillit Jahowa, tontu ingkon imbar do hita. Ingkon “tapasiding pangalaho na so pasangaphon Debata dohot hisap-hisap ni portibi on. Alani i, boi ma torang pingkiranta, boi ma taulahon na sintong dohot lomo ni roha ni Debata di tingki on”. (Tit. 2:12) Manang aha pe na taulahon, ingkon tangkas do idaon ni halak molo hita dipillit Jahowa.​—Jaha 1 Korint 10:31, 32.

15. Boasa ingkon burju jala tahaholongi angka donganta di huria?

¹⁵ Molo burju hita tu angka dongan di huria, on patuduhon na taargai do parale-aleonta tu Jahowa. Alana nasida pe dipillit Jahowa do. Molo taingot i, gabe tahaholongi jala burju ma hita tu nasida. (1 Tes. 5:15) Mansai ringkot do on. Alana didok Jesus do tu angka siseanna, “Molo masihaholongan hamu, botoon ni sude jolma ma na siseanku hamu.”​—Joh. 13:35.

16. Sian Patik ni si Musa aha do na taboto taringot holong ni Jahowa tu naposoNa?

¹⁶ Sada contoh sian Patik ni si Musa mangurupi hita mangantusi ringkot ni burju tu angka dongan di huria. Umpamana, dibahen do tudu-tudu tu halak Lepi laho mamangke angka barang na di bagas joro ni Jahowa. Jadi molo ndang diihuthon tudu-tudu i, diuhum mate do nasida. (4 Mus. 1:50, 51) Gari cara ni halak laho mamangke barang na di bagas joro diparrohahon Jahowa, tontu caranta maradophon angka dongan di huria pe diparrohahon Ibana do! Jadi mansai arga do angka naposoNa di Ibana. Didok di Bibel, ‘Ai manang ise na manjama hamu, anak ni mataKu jinamana disi.’​—Sak. 2:12.

17. Aha do na ‘ditatap jala ditangihon’ Jahowa?

¹⁷ Didok si Maleaki, ‘ditatap jala ditangihon’ Jahowa do songon dia angka naposoNa maradophon angka donganna. (Mal. 3:16) Jadi “ditanda Jahowa” do angka naposoNa. (2 Tim. 2:19) Sai diparrohahon Jahowa do manang aha na taulahon dohot tahatahon. (Heb. 4:13) Alani i, molo ndang burju hita tu angka dongan, diboto Jahowa do i. Alai, diparrohahon Jahowa do muse molo rade hita manjalo angka dongan, burju, jala sai rade manalpuhon hasalaan.​—Heb. 13:16; 1 Ptr. 4:8, 9.

18. Songon dia do caranta mandok mauliate ala nunga dipillit Jahowa?

¹⁸ Tontu, las do rohanta patuduhon hamauliateon tu Jahowa ala nunga dipillit gabe naposoNa. Jadi, sada haputusan na dumenggan do, molo marjanji hita tu Jahowa. Alani i, nang pe hita mangolu “di tonga-tonga ni sundut na pargabus jala na jahat”, boi do tongtong ‘ias rohanta jala ndang marsala’, jala gabe “siboan panondang tu portibi on”. (Plp. 2:15) Jadi ingkon tapasiding ma sude na dihasogohon Jahowa. (Jak. 4:7) Marsitutu ma hita burju jala mangkaholongi sude donganta, ala nasida pe na dipillit Jahowa do.​—Rom 12:10.

19. Songon dia do Jahowa mamasu-masu sude naposoNa?

¹⁹ Disurat do di Bibel janji ni Jahowa. Didok, “ndang tagamon bolongkonon ni Jahowa anggo bangsona”. (Ps. 94:14) Jadi manang aha pe na masa, sai donganan ni Jahowa do hita. Nang pe mate hita, ndang na laho lupahononNa hita. (Rom 8:38, 39) “Molo mangolu hita, mangolu ma laho pasangaphon Jahowa. Jala molo mate, mate laho pasangaphon Jahowa. Alani i, molo mate manang mangolu hita, ampuna ni Jahowa ma hita.” (Rom 14:8) Tarpaima-ima do hita tingki dipahehe Jahowa sude naposoNa na naung mate. (Mat. 22:32) Jala saonari pe, nunga tahilala godang pasu-pasu sian Ibana. Alani i didok do di Bibel, “Martua ma bangso na mardebatahon Jahowa, bangso na pinillitna laho [naposoNa].”​—Ps. 33:12.