Jesus Maminsang Halak Parise

Dileai siboto surat dohot halak Parise do tondi parbadia. Ai didok nasida do na so marhite huaso ni Debata Jesus mangusir suru-suruan na jahat. Antong ise do na niihuthon ni nasida? Debata do manang Sibolis? Jesus mandok, “Molo hau na denggan sinuan, denggan ma parbuena. Molo hau na so denggan sinuan, ndang hasea parbuena, ai sian parbuena do tandaon hauna.”​—Mateus 12:33.

Tontu ndang tutu molo didok nasida, sian Sibolis ulaon ni Jesus i. Songon jamita ni Jesus di dolok, sian hau na denggan do ro parbue na denggan, ndang sian hau na so denggan. Alani i, hata ni halak Parise i patuduhon na so denggan do pangalaho ni nasida. Didok Jesus ma, “Hamu pinompar ni ulok, songon dia ma hamu mangkatahon na denggan, ai na jahat do hamu? Ai nasa na adong di roha, i do hatahonon ni pamangan.”​—Mateus 7:16, 17; 12:34.

Hata na kaluar sian pamanganta patuduhon na di rohanta, jala marhite i do hita diuhumi. Alani i do didok Jesus, “Hudok ma tu hamu, di Ari Panguhuman, ingkon maralus do jolma tu ganup hata ni nasida na so marguna. Marhite hatamuna do paboaonna na sintong hamu jala marhite hatamuna do uhumonna hamu.”​—Mateus 12:36, 37.

Nunga godang dibahen Jesus mukjizat manang tanda halongangan. Alai didok siboto surat dohot halak Parise ma tu Jesus, “Guru, naeng idaonnami do tanda halongangan na sian ho.” Sasintongna, nang pe adong sian nasida na so mangida tanda halongangan na binahen ni Jesus, alai boi do i botoon ni nasida sian angka halak na asing. Alani i, didok Jesus ma, “Na jahat jala ndang marsihohot sundut on. Sai mangido tanda halongangan do nasida, alai ndang adong be tanda halongangan silehonon asing ni tanda halongangan sian panurirang Jona.”​—Mateus 12:38, 39.

Dung i didok Jesus ma, “Songon si Jona di bagasan butuha ni dengke na balga tolu ari tolu borngin, dos songon i ma Anak ni jolma i di bagasan kuburan tolu ari tolu borngin.” Dibondut dengke na balga do si Jona, alai diutahon dengke i do muse. Dos songon na mulak mangolu ma si Jona. Dipaboa Jesus ma, na laho mate do ibana jala dung tolu ari, mulak mangolu do ibana muse. Alai nang pe mulak mangolu ibana, ndang olo muba halak Parise i. Tangkas ma, ndang dijalo nasida “tanda halongangan sian panurirang Jona”. (Mateus 27:63-66; 28:12-15) Nasida ndang songon “halak Ninive” na muba dung dipasingot. Dipaboa Jesus ma muse taringot tu Ratu Seba. Ro do ibana sian luat na dao laho manangihon habisuhon ni si Salomo. Alai nang pe umbalga Jesus sian si Salomo, ndang olo halak Parise i manangihon ibana. Ai didok Jesus do, “Adong do dison na umbalga sian si Salomo.”​—Mateus 12:40-42.

Dipatudos Jesus do sundut na jahat i songon sahalak baoa na hea sinonggopan ni suru-suruan na jahat. (Mateus 12:45) Ala ndang marsitutu baoa i mangulahon ulaon na denggan, gabe disonggopi suru-suruan na jahat i ma muse ibana. Jala ditogihon suru-suruan na jahat i do pitu nai suru-suruan na jahat songgop tu baoa i. Dos songon baoa i, nunga dipaias jala dipaimbaru hian bangso Israel. Alai saonari, nunga umjahat nasida sian na parjolo i. Ai ndang dijalo nasida angka panurirang dohot Jesus. Jala dialo nasida do Jesus, naung tangkas diurupi tondi parbadia ni Debata.

Tingki na mangkatai i Jesus, nunga sahat ina ni Jesus dohot angka anggina. Jongjong do nasida di pudi ni angka jolma i. Didok halak na disi ma tu Jesus, “Jongjong do di luar ina dohot angka anggim naeng pajumpang dohot ho.” Alai didok Jesus ma, “Na manangihon dohot na mangulahon hata ni Debata do inangku dohot angka anggingku.” (Lukas 8:20, 21) Tangkas ma, dipatuduhon Jesus do na solhot parale-aleonna tu angka siseanna i. Nunga songon ina dohot hahaanggina nasida. Nang pe arga di ibana keluargana, alai ummarga do di Jesus parale-aleonna dohot angka siseanna. Saonari, adong do halak na so porsea manang na sogo rohana tu ulaonta na denggan. Alai nang pe songon i, las do rohanta boi solhot dohot angka dongan di huria.