Boasa Ndang Marpuasa Sisean ni Jesus?

Ndang sadia leleng dung Paska taon 30 M, dipenjarahon ma si Johannes Pandidi. Lomo do roha ni si Johannes asa gabe sisean ni Jesus angka siseanna i. Alai ndang sude dope siseanna mangulahon i.

Dung naeng Paska taon 31 M, ro ma sisean ni si Johannes Pandidi mandapothon Jesus, ninna ma, “Boasa ndang marpuasa angka siseanmu songon hami dohot halak Parise?” (Mateus 9:14) Ai dibahen halak Parise do marpuasa gabe ulaon laho manomba Debata. Hea do dibahen Jesus tudosan taringot tu halak Parise na marginjang ni roha tingki martangiang. Didok halak Parise i do di tangiangna, “Mauliate do hudok tu ho ale Debata, ala ndang dos ahu songon angka na so mangulahon na sintong. . . . Marpuasa do ahu dua hali saminggu.” (Lukas 18:11, 12) Asing ni i, somal do sisean ni si Johannes marpuasa. Ra, laho patuduhon lungun ni roha ni nasida ala nunga dipenjara si Johannes. Alani i, gabe sungkun-sungkun ma roha ni halak boasa ndang dohot sisean ni Jesus marpuasa songon sisean ni si Johannes.

Dialusi Jesus ma nasida marhite sada tudosan, “Ndang tagamon marsak angka ale-ale ni pangoli saleleng rap dope nasida dohot pangoli i, ndang i? Alai na ro ma tingkina buatonna ma pangoli i sian nasida, dung pe i asa marpuasa nasida.”​—Mateus 9:15.

Si Johannes sandiri do mandok Jesus ma pangoli i. (Johannes 3:28, 29) Alani i, saleleng rap dope Jesus dohot angka siseanna, ndang porlu nasida marpuasa. Alai tingki mate Jesus, lungun do roha ni nasida jala ndang lomo roha ni nasida mangan. Dung hehe Jesus, ndang lungun be roha ni nasida jala ndang porlu be nasida marpuasa. Ai nunga las roha ni nasida.

Dipaboa Jesus ma muse dua tudosan on: “Ndang adong halak na mandungkaphon abit na imbaru tu abit naung buruk, ai molo songon i lam ribakkonon ni pandungkap na baru i ma abit i, jala lam bidang ma na maribak i. Dung i, ndang adong halak na mambahen anggur na baru tu inganan naung buruk. Ai gabe ribak do ingananna i, use ma anggur i jala sega ma inganan ni anggur i. Alai, tu inganan na imbaru do disimpan anggur na baru.” (Mateus 9:16, 17) Aha do na nidok ni Jesus disi?

Diurupi Jesus do angka sisean ni si Johannes marhite tudosan. Sian tudosan i, diboto nasida ma ndang ingkon marpuasa sisean ni Jesus. Jala, ndang ingkon ihuthonon ni angka siseanna sude ulaon ni halak Jahudi. Ndang na laho mangihuthon adat ni halak Jahudi Jesus umbahen na ro tu tano on. Ai sian jolma do adat ni halak Jahudi i. Dos do ulaon ni halak Jahudi i songon abit na buruk na so boi be pangkeon. Alani i, molo diihuthon sisean ni Jesus do ulaon ni nasida, dos ma i songon mandungkaphon abit na baru tu abit naung leleng. Manang, mambahen anggur na baru tu inganan naung leleng.