Na disurat si Mateus

9 Masuk ma Jesus tu parau jala menyeberang ma ibana mulak tu hutana.+ 2 Diboan ma tu ibana sahalak bawa na lumpu na peak di tandu. Dung diida Jesus haporseaon ni nasida, didok ma tu na lumpu i, “Pos ma roham anakku! Nungnga disesa be dosam.”+ 3 Alai adong do piga-piga siboto surat* disi, didok nasida ma di bagasan rohana, “Na mangaleai Debata do bawa on.” 4 Diboto Jesus do na di bagasan pikkiran ni nasida, ninna ma, “Boasa na jahat dipikkiri hamu di bagasan rohamuna?+ 5 Dia do ummura dohonon tu bawa on, ‘Nungnga disesa be dosam’ manang, ‘Hehe ma ho jala mardalan ma ho’?+ 6 Alai, paloas ma hupatudu tu hamu na marhuaso do Anak ni jolma i di tano on lao manesa dosa.” Dung i didok ibana ma tu na lumpu i, “Jongjong ma ho, boan ma tandumi jala mulak ma ho tu jabum.”+ 7 Dung i, jongjong ma ibana jala mulak tu jabuna. 8 Tikki diida nasida na masa i, longang ma roha ni nasida. Dipuji nasida ma Debata ala dilehon Ibana do huaso sisongon i tu jolma.

9 Dung i lao ma Jesus sian i, diida ibana ma sahalak bawa na hundul di kantor pajak, goarna si Mateus. Didok Jesus ma tu ibana, “Ihutton ma au.” Jongjong ma ibana jala diihutton ma Jesus.+ 10 Di pudian ni ari, mangan ma Jesus di jabu ni si Mateus. Marroan ma tusi akka sijalo pajak dohot akka pardosa. Jala mangan do nasida raphon Jesus dohot akka siseanna.+ 11 Marnida i, didok halak Parise ma tu akka sisean ni Jesus, “Boasa rap mangan gurumuna i rap dohot sijalo pajak dohot akka pardosa?”+ 12 Didok Jesus ma, “Dang porlu pangubati tu halak na sehat, tu na marsahit do.+ 13 Lao ma hamu, parsiajari ma lapatan ni hata on, ‘Unlomo do rohakku tu halak na patuduhon asi ni roha sian tu halak na mangalehon pelean.’+ Ai dang na lao manjou halak na mangulahon na sittong au umbahen na ro, alai manjou pardosa i do.”

14 Dung i, ro ma akka sisean ni si Johannes mandapotton Jesus. Didok nasida ma tu ibana, “Boasa dang marpuasa+ akka siseanmi songon hami dohot halak Parise?” 15 Didok Jesus ma tu nasida, “Saleleng rap dope pangoli+ dohot akka ale-alena, pasti dang marsak akka ale-alena i. Alai na ro ma tikkina buatonna ma pangoli i sian nasida.+ Dung masa i, marpuasa ma nasida. 16 Dang adong halak na mandukkappon abit na baru tu abit naung buruk. Ai molo dibahen songon i, lam maribak do abit i dibahen pandukkap na baru i.+ 17 Asing ni i, dang adong halak na mambahen anggur na baru tu inganan* ni anggur naung leleng. Ai molo dibahen songon i, gabe ribak do ingananna i, use ma anggur i jala dang tarpakke be inganan ni anggur i. Alai, tu inganan na baru do dibahen anggur na baru asa denggan duassa.”

18 Tikki makkatai dope Jesus tu nasida, ro ma sahalak ketua ni sinagoga* tu labbungna. Marsinggang ma ibana jala ninna ma, “Tikki hutinggalhon borukku, nungnga naeng mate ibana, jala nungnga mate be ra ibana saonari. Alai ro ma jo ho mangida ibana, jama ma ibana asa mangolu muse.”+

19 Dung i, hehe ma Jesus dohot siseanna mangihutton ibana. 20 Jala ro ma sian pudi sahalak borua na marsahit manjonoki Jesus. Nungnga 12 taon ibana pendarahan.+ Didapotton ma Jesus sian pudi jala dijama ibana ma rambu ni abit luarna.+ 21 Ai sai didok ibana do di bagas rohana, “Holan abitna i pe hujama, malum do sahitton.” 22 Dung i, dibereng Jesus ma tu pudi jala diida ma borua i, ninna ma, “Pos ma roham borukku! Haporseaonmi do mambahen ho malum.”+ Jala satokkin i malum ma borua i.+

23 Masuk ma Jesus tu jabu ni ketua ni sinagoga i. Diida ibana ma disi akka parsuling jala godang halak na mangandungi.+ 24 Dung i didok Jesus ma, “Kaluar ma hamu sian on, dang na mate dakdanak i alai na modom do.”+ Gabe diparekkeli nasida ma Jesus. 25 Dung kaluar akka jolma i, masuk ma Jesus, ditiop ma tangan ni dakdanak i.+ Dung i, dungo ma dakdanak i.+ 26 Ujungna, sahat ma barita taringot tu na masa i di sude luat i.

27 Tikki lao Jesus sian i, adong ma dua halak bawa na mapitung+ mangihutton ibana. Sai didok nasida do, “Anak ni si Daud, asi ma roham tu hami.” 28 Dung masuk Jesus tu sada jabu, didapotton akka bawa na mapitung i ma ibana. Disukkun Jesus ma nasida, “Porsea do hamu na boi au pamaluppon hamu?”+ Dialusi nasida ma, “Porsea do hami Tuan.” 29 Dung i dijama Jesus ma mata ni nasida+ huhut ma didok, “Alani haporseaonmuna i, boi ma hamu marnida.” 30 Gabe marnida ma nasida. Alai dipasingot Jesus ma nasida, ninna ma, “So tung adong manang ise na mamboto on.”+ 31 Alai disi kaluar nasida, dipaboa-boa nasida ma taringot tu Jesus di sude luat i.

32 Dung lao nasida, diboan halak ma tu Jesus sahalak bawa na bisu ala disonggopi suru-suruan na jahat ibana.+ 33 Dung dipalao Jesus suru-suruan na jahat i, boi ma bawa na bisu+ i makkatai. Alani i, longang ma akka halak na disi. Didok nasida ma, “Dang hea dope masa na songon on di Israel.”+ 34 Alai didok halak Parise i ma, “Ai boi pe dipalao ibana suru-suruan na jahat i, na dijalo ibana do huaso sian pamimpin ni suru-suruan na jahat.”+

35 Didalani Jesus do sude kota dohot huta. Mangajari do ibana di akka sinagoga na disi. Dibaritahon ibana do barita na uli taringot tu Harajaon jala dipamalum ibana do sude sahit ni jolma.+ 36 Diida Jesus ma godang halak marpungu jala asi ma rohana mangida nasida.+ Ai disusai do nasida jala dang disarihon,* dos songon biru-biru na so adong parmahanna.+ 37 Dung i ninna Jesus ma tu siseanna, “Bidang do nian sisabion, alai otik do akka panabi.+ 38 Alani i, pangido ma tu Nappuna sisabion i asa disuru akka panabi tu sisabionna i.”+