“Sai Lomo ni Roha ni Jahowa ma na Saut”

1-4. Boasa ikkon lao si Paulus tu Jerusalem, jala aha do na lao masa tu ibana disi?

MASSAI borat do roha ni si Paulus dohot si Lukas maninggalhon akka sintua na sian Epesus di Miletus. Tarida do massai balga holong ni nasida. Masuk ma si Paulus dohot si Lukas tu kapal. Diboan nasida do na dihaporluhon nasida saleleng di pardalanan. Diboan do muse hepeng sumbangan tu akka dongan na di Judea, jala harap do roha ni nasida pittor hatop dipasahat sumbangan i.

² Adong do pitu halak nai na mandongani si Paulus dohot si Lukas di pardalanan i. Huhut mardalan kapal i, diida jala didada nasida ma akka dongan na di pelabuhan, lungun do roha ni nasida.—Ul. 20:4, 14, 15.

³ Hira-hira tolu taon ma lelengna si Paulus kerja sama dohot akka sintua na di Epesus. Saonari, marhite petunjuk sian tondi parbadia ikkon borhat ma ibana tu Jerusalem. Mungkin diboto si Paulus do aha na lao masa tu ibana, alana didok ibana do tu akka sintua i, “Marhite tondi parbadia, nungnga dijujui au lao tu Jerusalem, nang pe dang huboto aha na lao masa tu au disi. Sasittongna di ganup kota, nungnga mulak-ulak dipaboa tu au marhite tondi parbadia na lao dipenjara au jala na lao manaon hasusaan.” (Ul. 20:22, 23) Nang pe diboto si Paulus na lao masa na haccit tu ibana, alai rela do ibana lao tu Jerusalem ala mangihutton petunjuk ni “tondi parbadia”. Sebenarna holong do roha ni si Paulus tu dirina, alai uppetting do di ibana mangulahon lomo ni roha ni Debata.

⁴ Sarupa do perasaanmuna tu si Paulus? Tikki tabaktihon diritta tu Jahowa, marjanji do hita mambahen lomo ni roha ni Debata na uppetting di ngolutta. Jadi godang do na boi taparsiajari sian teladan ni si Paulus.

 5. Jalur na dia do na dilewati si Paulus dohot akka donganna tikki naeng tu Tirus?

⁵ Markapal ma si Paulus dohot akka donganna i “tu Kos”. Boi do nasida sahat disi di ari na sarupa ala denggan do cuaca. (Ul. 21:1) Berlabuh do kapal i disi saborngin sebelum berlayar tu Rodos dohot Patara. Dung di Patara, di pesisir selatan Asia Kecil, nakkok ma muse akka dongan i tu sada kapal barang na balga, kapal on ma na mamboan nasida tu Tirus, Penisia. Dilewati nasida do “Pulo Siprus di sabola kiri”. (Ul. 21:3) Boasa pola disurat si Lukas hatorangan taringot inganan on di Ulaon ni Apostel?

 6. (a) Boha do perasaan ni si Paulus tikki diida ibana Pulo Siprus? (b) Aha do gunana molo taingot pasu-pasu na sian Jahowa dohot carana mangurupi hita?

⁶ Tikki diida si Paulus pulo i, gabe diingot ibana do ra pengalamanna disi jala diceritahon ma i tu akka dongan. Hira-hira sia taon sebelumna, di pardalanan utusan injilna na parjolo, hea do ibana lao tusi rap dohot si Barnabas dohot si Johannes Markus. Adong do datu na margoar si Elimas na mangabbati nasida marbarita disi. (Ul. 13:4-12) Jadi tikki diingot si Paulus pengalamanna i, lam dipatogu ma rohana menghadapi aha na lao masa. Hita pe songon i do, dipatogu do rohatta molo taingot akka pasu-pasu naung dilehon Jahowa tu hita dohot carana mangurupi hita menghadapi tantangan. Sarupa do perasaanta tu si Daud na mandok, “Godang do hasusaan ni halak na tigor marroha, alai paluaon ni Jahowa do ibana sian i sude.”—Ps. 34:19.

 7. Aha do na diulahon si Paulus dohot akka donganna dung sahat di Tirus?

⁷ Massai las do roha ni si Paulus bergaul dohot akka dongan di huria. Tarida ma i sian aha na diulahon nasida dung sahat di Tirus. Si Lukas manurat, “Dilului hami ma akka sisean na disi.” (Ul. 21:4) Jadi tikki diboto adong akka dongan di Tirus, lao ma nasida mangalului jala rap tinggal ma nasida dohot akka sisean i. Dung gabe naposo ni Jahowa hita, tudia pe hita lao boi do hita pajuppang dohot akka dongan sahaporseaon. Nang pe dang tatanda, alai las do roha ni nasida menyambut hita. Jadi molo tahaholongi Debata, jala taulahon ibadat na sittong, pasti godang do donganta di liat portibi on.

 8. Aha do arti ni Ulaon ni Apostel 21:4?

⁸ Saleleng pitu ari ma nasida tinggal di Tirus. Si Lukas manurat, “Mulak-ulak do didok [akka dongan na di Tirus i] tu si Paulus asa unang lao ibana tu Jerusalem. Ai nungnga diurupi tondi parbadia nasida lao mamboto i.” (Ul. 21:4) Mungkin bingung do hita, naung muba do petunjuk ni Jahowa tu si Paulus? Naung diorai do ibana lao tu Jerusalem? Daong. Dipatuduhon tondi parbadia do tu akka dongan na disi na lao dianiaya si Paulus di Jerusalem, dang na diorai Debata ibana lao tu kota i. Jadi diboto akka dongan na di Tirus ma na lao susa ngolu ni si Paulus di Jerusalem. Ala khawatir nasida, diorai ma ibana lao tu Jerusalem. Wajar do molo naeng dilindungi nasida si Paulus sian bahaya. Alai nang pe songon i, ditorusson si Paulus do pardalananna tu Jerusalem, ala i do lomo ni roha ni Debata.—Ul. 21:12.

9, 10. (a) Aha do na diingot si Paulus dung dibege ibana hata ni akka dongan na di Tirus? (b) Songon dia do cara marpikkir ni akka halak saonari on, jala boasa dang sesuai i tu hata ni Jesus?

⁹ Tikki diida si Paulus na khawatir akka donganna i, diingot do ra aha na masa tu Jesus. Tikki dipaboa Jesus tu akka siseanna na lao dianiaya jala dipamate ibana di Jerusalem, didok si Petrus ma tu Jesus, “Asi ma roham tu dirim Tuan. Dang na lao masa i tu ho.” Alai didok Jesus do, “Lao ma ho tu pudikku Bolis! Batu partuktukan do ho di au, ai dang pikkiran ni Debata dipikkirhon ho, pikkiran ni jolma do.” (Mat. 16:21-23) Rela do Jesus mate lao mangulahon tugas sian Debata. Songon Jesus do perasaan ni si Paulus jala songon Apostel Petrus do perasaan ni akka dongan na di Tirus. Sebenarna dipangido nasida pe i alani holongna do tu si Paulus, alai dang sesuai i tu lomo ni roha ni Debata.

¹⁰ Godang do halak saonari holan makkaholongi dirina sandiri. Dilului do cara na ummura na mambahen nasida aman, nang pe dang i cara na dumenggan. Dilului nasida do agama na sesuai tu lomo ni rohana, na so godang peraturanna. Alai berbeda do cara marpikkir na dipatuduhon Jesus. Ibana mandok tu akka siseanna, “Manang ise na naeng mangihutton au, ikkon disoadahon do dirina jala ikkon dituhuk ibana do hau partinaonan i jala toktong ma diihutton au.” (Mat. 16:24) Mangihutton Jesus do cara na dumenggan, alai dang mura mangulahon i.

11. Aha do na diulahon akka sisean na di Tirus tikki naeng borhat si Paulus?

¹¹ Naeng borhat nama si Paulus, si Lukas, dohot akka donganna manorusson pardalananna. Tarida do na massai holong roha ni akka dongan na di Tirus tu si Paulus. Ro do akka bawa, borua, dohot dakdanak paborhatton si Paulus. Tikki sahat nasida di topi ni laut, marsinggang ma nasida sude jala martangiang. Dung i, nakkok ma si Paulus, si Lukas, dohot akka donganna tu kapal, ditorusson ma pardalananna tu Ptolemais. Pajuppang ma nasida dohot akka dongan na disi jala tinggal ma nasida disi sadari.—Ul. 21:5-7.

12, 13. (a) Aha do bukti na patuduhon toktong setia si Pilippus? (b) Songon dia do si Pilippus gabe teladan tu akka ama saonari?

¹² Disurat si Lukas do muse na borhat si Paulus dohot akka donganna tu Kaesarea. Dung sahat disi, ‘lao ma nasida tu jabu ni si Pilippus, parbarita na uli i’.a (Ul. 21:8) Pasti las situtu do roha ni nasida pajuppang dohot si Pilippus. Hira-hira 20 taon sebelumna, dohot do si Pilippus ditugasson akka apostel mangurus pembagian sipanganon tu huria Kristen di Jerusalem. Sian najolo, ditanda do ibana sahalak parbarita na ringgas. Alai tikki adong penganiayaan, gabe lari do akka sisean sian Jerusalem. Lari ma si Pilippus tu Samaria jala marbarita disi. Marbarita ma ibana tu sahalak pejabat na sian Etiopia, jala tardidi do ibana. (Ul. 6:2-6; 8:4-13, 26-38) Jadi terbukti do torus setia si Pilippus!

¹³ Saonari di Kaesarea do si Pilippus tinggal jala tetap do semangat marbarita na uli. Alani i ma didok si Lukas do ibana “sahalak parbarita na uli”. Adong do opat boru ni si Pilippus jala manurirangi do nasida. Diihutton nasida do semangat ni bapakna i.b (Ul. 21:9) Pasti diurupi si Pilippus do asa jonok hubungan ni keluargana tu Jahowa. Saonari pe, porlu do ditiru akka ama teladan ni si Pilippus. Ikkon gabe teladan do nasida marbarita, jala ikkon diurupi do asa lomo roha ni anakkonna marbarita.

14. Aha do hasilna ala ro si Paulus makkunjungi akka dongan sahaporseaon, jala aha do na boi tatiru sian i?

¹⁴ Manang tudia pe si Paulus lao, sai dilului do dongan sahaporseaonna, jala bergaul do ibana dohot nasida. Pasti las do roha ni akka dongan menyambut si Paulus tu jabu ni nasida, jala “masipatoguan” ma nasida. (Rom 1:11, 12) Saonari on pe adong do kesempatan na sarupa tu hita. Dang soal balga jabutta manang gelleng, molo las rohatta mangundang pengawas wilayah dohot istrina tu jabutta, pasti dipatogu do hita.—Rom 12:13.

15, 16. Barita aha do na dipasahat si Agabus, jala boha do tanggapan ni akka halak dung mambege i?

¹⁵ Tikki di jabu ni si Pilippus dope si Paulus tinggal, ro ma si Agabus manjuppangi ibana. Respek do sude halak na di jabu ni si Pilippus i tu si Agabus. Hea do ibana manurirakkon taringot kelaparan di liat portibi on na masa saleleng pamarettaon ni si Klaudius. (Ul. 11:27, 28) Sukkun-sukkun do ra nasida, ‘Boasa ro si Agabus? Aha do na lao dipasahat ibana?’ Diparrohahon nasida ma si Agabus. Dibuat ibana ma ikat pinggang ni si Paulus, i ma kain na ganjang na dipakke lao manippan hepeng dohot barang na asing. Dipakke si Agabus ma kain i mangikkat pat dohot tanganna. Dung i didok ma, “On ma hata na didok marhite tondi parbadia, ‘Na lao ditali halak Jahudi na di Jerusalem ma nappuna ikat pinggang on. Songon on ma ibana ditali jala pasahaton ni nasida ma ibana tu bangso na asing.’” (Ul. 21:11) Pasti tarsonggot do nasida mambege i.

¹⁶ Surirang i patuduhon pasti lao do si Paulus tu Jerusalem. Jala sian i taboto ma na lao ditakkup halak Jahudi nama ibana jala ‘dipasahat tu bangso na asing’. Alani i disurat si Lukas do, “Dung hubege hami hata i, rap ma hami dohot akka dongan na disi mangelek-elek si Paulus asa unang lao ibana tu Jerusalem. Dung i didok si Paulus ma, ‘Boasa sai tangis hamu? Gabe marsak do au dibahen hamu. Pos ma rohamuna, dang mabiar au ditali di Jerusalem. Dang holan i, mate pe nungnga rade au alani Tuan Jesus.’”—Ul. 21:12, 13.

17, 18. Aha do buktina na togu pendirian ni si Paulus, jala boha do tanggapan ni akka donganna i?

¹⁷ Bayakkon ma situasina. Sude dongan termasuk si Lukas mangelek-elek si Paulus asa unang lao tu Jerusalem. Bahkan adong do piga-piga na sappe tangis. Diboto si Paulus do na parduli nasida tu ibana. Alani i lambok ma didok ibana, “Gabe marsak do au dibahen hamu.” Di terjemahan na asing didok “gabe malala [rohana]”. Alai togu do pendirian ni si Paulus. Sarupa songon sikapna tu akka dongan di Tirus, dang olo tong ibana manguba keputusanna nang pe sai dielek-elek akka dongan di Kaesarea ibana asa unang lao. Justru dipatorang do boasa ikkon lao ibana tu Jerusalem! Songon Jesus, tetap do ibana barani lao tu Jerusalem. (Heb. 12:2) Dang na lomo roha ni si Paulus mate alani haporseaonna. Alai molo tung pe terjadi i, siap do ibana mate ala mangihutton Jesus Kristus.

¹⁸ Boha do tanggapan ni akka dongan? Di Ulaon ni Apostel didok, “Ala dang tarbahen hami be manang aha lao mangorai, dang hupaksa hami be ibana. Alai hudok hami ma, ‘Sai lomo ni roha ni Jahowa ma na saut.’” (Ul. 21:14) Jadi dang dipaksahon akka dongan i pandapot ni nasida. Ditangihon do si Paulus jala mengalah do nasida. Nang pe borat, diihutton nasida do lomo ni roha ni Jahowa. Taboto do pasti maol do on di si Paulus. Boi didok mandapotton hamatean do ibana tu Jerusalem. Alai pasti ummura do di ibana menghadapi i molo dang berupaya akka donganna i mangabbati ibana.

19. Aha do parsiajaran na boi tadapot sian si Paulus?

¹⁹ Adong do parsiajaran na denggan na tadapot sian si Paulus: Tikki taboto ikkon dibahen sasahalak pengorbanan na balga lao melayani Jahowa, unang ma taabbati manang taelek-elek ibana asa unang mangulahon i. Contohna, lungun do roha ni akka natua-tua tikki lao gellengna sian jabu ala ikkon melayani di inganan na dao. Alai nang pe songon i, dang diabbati nasida gellengna i manang diorai. Misalna, songon si Phyllis na tinggal di Inggris paboahon songon dia perasaanna tikki gabe utusan injil boruna di Afrika, hape holan i do gellengna. Didok ibana, “Lungun hian do rohakku. Borat do huhilala ikkon dao sian ibana. Nang pe songon i tetap do au bangga tu ibana. Jadi sering do hutangiakkon ibana. Huargai do keputusanna i, jala dang berupaya au manguba i. Apalagi au do na sai mangajarhon tu ibana ikkon mangutamahon Harajaon ni Debata. Nungnga melayani ibana di luar negeri saleleng 30 taon, jala mandok mauliate do au tiap ari tu Jahowa ala tetap do borukki setia.” Jadi massai denggan do molo tapuji akka donganta na rela berkorban!

20, 21. Sian dia do taboto na lomo roha ni si Paulus sai rap dohot akka dongan sahaporseaonna, jala boasa lomo rohana?

²⁰ Nga siap-siap be si Paulus naeng borhat tu Jerusalem. Adong do akka dongan na sai mandongani jala mendukung ibana. Jala saleleng pardalanan tu Jerusalem, sai dilului si Paulus dohot akka donganna i do dongan sahaporseaon. Tikki di Tirus, dilului nasida do akka sisean jala rap tinggal do nasida disi saleleng pitu ari. Di Ptolemais, dijuppangi nasida do akka dongan jala tinggal ma nasida disi saleleng sadari. Di Kaesarea, tinggal do nasida piga-piga ari di jabu ni si Pilippus. Adong do piga-piga sisean na sian Kaesarea manaruhon si Paulus dohot akka donganna i tu Jerusalem. Tikki i marborngin do nasida di jabu ni si Manason. Nungnga leleng si Manason gabe sisean. Dung sahat nasida di Jerusalem, songon na didok si Lukas, “las do roha ni akka dongan na disi manjalo [nasida]”.—Ul. 21:17.

²¹ Takkas ma, lomo do roha ni si Paulus sai rap dohot akka dongan sahaporseaonna. Alana sai dipatogu akka dongan i do ibana, songon na tahilala saonari on. Jadi sude dukungan na dilehon akka dongan i mambahen si Paulus gabe lam barani menghadapi akka halak na berupaya mambunu ibana.