“Tondi Parbadia i ma na Paposhon Rohanta”

1-2. Aha do na masa di ari Pentakosta taon 33 M?

DI TAON 33 M di ari Minggu manogot, marpungu ma hira-hira 120 sisean ni Jesus di sada jabu di kamar parginjang. Ari Pentakosta ma di tikki i. (Ul. 1:13-15; 2:1) Piga-piga ari andorang so i, diparettahon Jesus do nasida asa toktong tading di Jerusalem. Alana lao dijalo nasida ma silehon-lehon na massai arga. (Ul. 1:4, 5) Aha do na masa di tikki i?

² Tikki i, “tompu ma tarbege soara sian langit, songon soara ni alogo na gogo”. Boi ma tarbege soara na gogo i di jabu i. Dung i, tarida ma “na suman songon dila ni api” songgop tu akka sisean i. Gabe “digohi tondi parbadia ma nasida sude”. (Ul. 2:2-4) Marhite tanda halongangan i, dilehon Jahowa ma tondi parbadiana tu nasida. (Ul. 1:8) Nasida ma na parjolo sahali dimiahi tondi parbadiab jala marpakkirimon lao mamaretta rap dohot Jesus di surgo.

 3. Tikki ari Pentakosta, boasa pos roha ni akka sisean molo nasida naung dimiahi tondi parbadia?

³ Molo hamu gabe sada sian sisean na marpungu di kamar parginjang i, tontu dang tarhalupahon hamu na masa di tikki i. Disonggopi na songon dila ni api ma hamu, jala gabe boi hamu makkatai di bahasa na asing! (Ul. 2:5-12) Tontu gabe pos do rohamuna naung dimiahi tondi parbadia hamu. Alai, sude do halak na dimiahi tondi parbadia dimiahi dohot cara na sarupa? Daong. Sian dia taboto?

 4. Di tikki na sarupa do sude akka halak Kristen di abad na parjolo dimiahi tondi parbadia? Patorang ma.

⁴ Saonari, taulas ma andigan do sasahalak dimiahi tondi parbadia. Di Ari Pentakosta taon 33 M, dang holan 120 sisean ni Jesus i na dimiahi tondi parbadia. Di tikki i, adong do muse hira-hira 3.000 halak na dimiahi tondi parbadia. Dimiahi do nasida tikki tardidi. (Ul. 2:37, 38, 41) Di taon na mangihut, dang sude halak Kristen dimiahi tondi parbadia tikki tardidi. Adong piga-piga halak Samaria na dimiahi tondi parbadia dang leleng dung tardidi. (Ul. 8:14-17) Asing ni i, si Kornelius dohot akka halak na adong dijabuna dimiahi tondi parbadia andorang so tardidi.​—Ul. 10:44-48.

 5. Hombar tu 2 Korint 1:21, 22, aha do na masa tikki sasahalak dimiahi tondi parbadia?

⁵ Lao taulas ma muse taringot aha na masa tikki sasahalak dimiahi tondi parbadia. Ra didok roha ni piga-piga halak, dang tama nasida dimiahi. Olo do ra sukkun-sukkun rohana, ‘Boasa au na dipillit Debata?’ Alai na asing, dang songon i pakkilalaanna. Songon dia pe pakkilalaan ni nasida, dipatorang si Paulus do taringot aha na masa tu sude halak Kristen na miniahan. Didok, “Dung porsea hamu, dimateraihonc ibana do hamu marhite tondi parbadia naung dijanjihon i. On ma jaminan na dohot do hita manjalo janji ni Debata.” (Eps. 1:13, 14) Dipakke Jahowa do tondi parbadiana lao paposson roha ni halak Kristen na miniahan, naung dipillit Ibana do nasida. Marhite cara on, tondi parbadia gabe “jaminan [manang janji]” na paposhon roha ni nasida, na lao mangolu di surgo do nasida, dang di tano on.​—Jaha 2 Korint 1:21, 22.

 6. Aha do na ikkon diulahon halak Kristen na miniahan asa mandapot upa lao mangolu di surgo?

⁶ Tikki dimiahi tondi parbadia sahalak Kristen, naung pasti do ibana lao mangolu di surgo? Daong. Diboto ibana do, naung dipillit ibana lao mangolu di surgo. Alai, ikkon diingot ibana do sipaingot on, “Ala nunga dijou jala dipillit Debata hamu, marsitutu ma hamu mampartahanhon i. Molo diulahon hamu i, dang mago haporseaonmuna i.” (2 Ptr. 1:10) Alani i, nang pe halak Kristen na miniahan nungnga dipillit lao mangolu di surgo, ikkon toktong do ibana setia asa mandapot upa i.​—Plp. 3:12-14; Heb. 3:1; Pgk. 2:10.

 7. Songon dia sahalak Kristen mamboto molo ibana dipillit lao mangolu di surgo?

⁷ Songon dia sahalak Kristen mamboto molo ibana dipillit lao mangolu di surgo? Taboto ma alusna sian hata ni si Paulus tu halak Rom “na tarjou gabe akka halak na badia”. Didok ibana, “Ndang bahenon ni tondi parbadia hita gabe hatoban manang gabe mabiar. Alai marhite tondi parbadia, bahenonna do hita gabe anak ni Debata. Jala marhite tondi parbadia, taronjar ma rohatta mandok, ‘Abba, Ale Amang!’ Tondi parbadia i ma na paposhon rohanta molo hita anak ni Debata.” (Rom 1:7; 8:15, 16) Marhite tondi parbadia takkas do dipaboa Debata tu halak Kristen na miniahan, na dijou do nasida lao mangolu tu surgo.​—1 Tes. 2:12.

 8. Songon dia 1 Johannes 2:20, 27 patuduhon molo halak Kristen na miniahan dang porlu mamastihon tu halak na asing molo nasida dimiahi tondi parbadia?

⁸ Dipapos Jahowa do roha ni akka na miniahan molo nasida dijou lao mangolu tu surgo. (Jaha 1 Johannes 2:20, 27.) Tontu porlu dope nasida diajari Jahowa di huria dos songon na asing. Alai dang porlu halak na asing na paposhon roha ni nasida molo nasida dimiahi tondi parbadia. Dipakke Jahowa do huaso na massai gogo, i ma tondi parbadiana lao paposson roha ni nasida naung dijou nasida lao mangolu tu surgo!

 9. Songon na dipaboa di Epesus 1:18, aha do na muba tikki sasahalak dimiahi tondi parbadia?

⁹ Godangan naposo ni Debata saonari maol do mangantusi aha na dihilala halak na dimiahi tondi parbadia. Boasa? Alana dang hea nasida dimiahi tondi parbadia. Di mulana, lao mangolu salelengna di tano on do jolma ditoppa Debata, dang di surgo. (1 Mus. 1:28; Ps. 37:29) Alai, dipillit Jahowa do piga-piga halak lao mangolu di surgo. Alani i tikki dimiahi nasida, dipauba Debata do pakkirimon dohot cara marpikkir ni nasida. Gabe tarpaima ma nasida lao mangolu di surgo.​—Jaha Epesus 1:18.

10. Aha do lapatanna ‘ditubuhon muse’? (Ida surat na di toru.)

¹⁰ Tikki sahalak Kristen dimiahi tondi parbadia, nasida gabe ‘ditubuhon muse’ manang “tubu sian ginjang”.d Didok Jesus, dang boi diattusi halak na so hea dimiahi tondi parbadia taringot pakkilalaan ni halak na ‘ditubuhon muse’ manang “tubu sian tondi parbadia”.​—Joh. 3:3-8; surat na di toru.

11. Aha do na muba dung dimiahi tondi parbadia sasahalak?

¹¹ Aha do na muba dung dimiahi tondi parbadia sasahalak? Andorang so dimiahi, marpakkirimon do nasida lao mangolu salelengna di tano on. Jala tarpaima do nasida lao bahenon ni Jahowa saluhut tano on gabe paradeiso jala pasidingonna sude hajahaton. Ra nungnga dibayakkon nasida lao pajumpang muse dohot keluarga manang dongan naung mate. Alai, dung dimiahi tondi parbadia, gabe muba ma cara marpikkir ni nasida. Boasa songon i? Ala na massai borat do hasusaan na diadopi nasida umbahen na so lomo be rohana mangolu di tano on? Manang didok roha ni nasida bosan do mangolu salelengna di tano on? Dang songon i. Alai, ala na dipauba Jahowa do cara marpikkir dohot pakkirimon ni nasida marhite tondi parbadiana.

12. Hombar tu 1 Petrus 1:3, 4, songon dia do pakkilalaan ni halak Kristen na miniahan tu pakkirimonna?

¹² Sasahalak na dimiahi tondi parbadia ra makkilala dang tama dirina manjalo i. Alai pos do rohana molo Jahowa nungnga mamillit ibana. On mambahen massai las rohana jala mandok mauliate tu Debata ala pakkirimon lao mangolu tu surgo.​—Jaha 1 Petrus 1:3, 4.

13. Songon dia do pakkilalaan ni halak Kristen na miniahan taringot ngolu ni nasida di tano on?

¹³ Alai, na lomo do roha ni halak Kristen na miniahan asa hatop mate? Dialusi apostel Paulus ma sukkun-sukkun i. Dibandikkon ibana ma daging ni jolma songon kemah jala didok, “Sasintongna, marhoi-hoi do hita jala manaon sitaonon na borat di kemahta sisaonari on. Dang lomo ni rohanta manadingkon kemahta on songon na paluahon pangkeanta. Alai na lomo do rohanta manjalo inganan na di banua ginjang i asa dipauba dagingta na boi mate i tu hangoluan na saleleng ni lelengna.” (2 Kor. 5:4) Alani i, dang na bosan halak Kristen na miniahan mangolu di tano on jala dang lomo rohana asa hatop mate. Alai, las do roha ni nasida mangolu jala ganup ari dipakke nasida do tikki lao manomba Jahowa rap dohot keluarga dohot akka dongan. Manang aha pe na diulahon nasida, sai diingot nasida do pakkirimonna di ari na naeng ro.​—1 Kor. 15:53; 2 Ptr. 1:4; 1 Joh. 3:2, 3; Pgk. 20:6.

14. Aha do na patuduhon molo sasahalak dang dimiahi tondi parbadia?

¹⁴ Ra didok rohamuna, dipillit Jahowa do hamu lao mangolu di surgo. Molo songon i, pikkirhon ma jolo akka sukkun-sukkun on: Massai lomo do rohamu mangulahon lomo ni roha ni Debata? Ringgas situtu do hamu di ulaon marbarita? Massai las do rohamu marsiajar Bibel manang mamboto “angka na buni di bagasan diri ni Debata?” (1 Kor. 2:10) Dihilala hamu do pasu-pasu ni Jahowa tikki marbarita na uli? Marsitutu do hamu mangurupi akka halak asa manomba Jahowa? Dihilala hamu do songon dia Jahowa mangurupi hamu di parngoluonmuna? Molo i do na dihilala hamu tu sude sukkun-sukkun on, na patuduhon naung dipillit Jahowa do hamu lao mangolu tu surgo? Daong. Boasa? Alana sude do naposo ni Jahowa boi makkilala songon i, nang pe nasida dimiahi manang na dang. Jala marhite tondi parbadiana, dilehon Jahowa do huasona tu sude naposona manang didia pe pakkirimon ni nasida. Sasittongna, molo sai sukkun-sukkun do rohamu na lao tu surgo do hamu manang na dang, on patuduhon dang dijou hamu lao tu surgo. Dang ganggu roha ni akka halak na miniahan molo nasida nungnga dipillit Jahowa!

15. Sian dia do taboto dang sude halak na mandapot tondi parbadia dijou Debata asa mangolu di surgo?

¹⁵ Di Bibel, godang do contoh akka naposo ni Debata na setia na mandapot tondi parbadia, alai dang marpakkirimon tu surgo. Umpamana, si Daud. Ditogu-togu tondi parbadia do ibana. (1 Sam. 16:13) Diurupi tondi parbadia do ibana mangantusi pikkiran ni Jahowa jala manurat piga-piga bagian ni Bibel. (Mrk. 12:36) Alai didok apostel Petrus do, “ndang nangkok si Daud tu banua ginjang”. (Ul. 2:34) Si Johannes Pandidi pe “digohi tondi parbadia” do. (Luk. 1:13-16) Didok Jesus, dang adong na umbalga sian si Johannes Pandidi. Alai dang dohot ibana rap dohot Jesus lao mamaretta di surgo. (Mat. 11:10, 11) Dipakke Jahowa do tondi parbadiana lao mangurupi nasida mangulahon akka ulaon na rikkot. Alai dang dipakke Ibana tondi parbadiana lao mamillit nasida asa mangolu tu surgo. Na hurang do haporseaon ni nasida umbahen dang dipillit asa mangolu tu surgo? Dang songon i. Alai, lao paheheon ni Jahowa do nasida asa mangolu di paradeiso di tano on.​—Joh. 5:28, 29; Ul. 24:15.

16. Aha do upa na dipaima godangan naposo ni Debata saonari?

¹⁶ Godangan naposo ni Debata saonari dang marpakkirimon lao mangolu tu surgo. Songon si Abraham, si Sara, si Daud, si Johannes Pandidi dohot akka halak na asing na disurat di Bibel, tarpaima do nasida lao mangolu di tano on tikki mamaretta Harajaon ni Debata.​—Heb. 11:10.

17. Sukkun-sukkun aha do na lao taulas di parsiajaran na mangihut?

¹⁷ Saonari, adong dope akka halak Kristen na miniahan na rap dohot hita di tano on. Ra, gabe adong ma sukkun-sukkun di rohatta. (Pgk. 12:17) Umpamana, ikkon songon dia do halak na miniahan mangida dirina sandiri? Molo adong di huriamu na mangallang roti manang na manginum anggur tikki Borngin Parningotan, songon dia do hamu maradoppon nasida? Jala, songon dia do molo lam godang na mangakku dirina na miniahan? Porlu do hamu marsak alani i? Lao taalusi ma akka sukkun-sukkun i di parsiajaran na mangihut.