Nasehat na Boi Mambahen Keluarga Bahagia

“Ikkon haholongan ni suami do istrina songon makkaholongi diri ni nasida. Manang ise na makkaholongi istrina, na makkaholongi dirina do ibana. Dang adong bawa na marsogo ni roha tu dirina. Dilehon ibana do dirina mangan jala dihaholongi do i.”​—EPESUS 5:28, 29.

Suami do na gabe kepala di keluarga. (Epesus 5:23) Alai suami na burju, dang kasar manang dang holan na menuntut. Diargai ibana do istrina, jala dilehon do kebutuhanna, jala berupaya do ibana mambahen las roha ni istrina, jala toktong dihaholongi. Jala dang dipaksahon ibana asa lomo ni rohana na ikkon saut. (Pilippi 2:4) Dipaboa ibana do aha na di bagas roha dohot pikkiranna, jala olo do ibana manangihon istrina i tikki makkatai. Dang mura-mura ibana muruk tu istrina, dang olo ibana mamukkul istrina, jala dang olo mandok hata na kasar manang mambahen na so denggan tu istrina.​—Kolosse 3:19.

“Ikkon sangap do bahenon ni istri tu suamina.”​—EPESUS 5:33.

Molo dipasangap sahalak istri suamina, jala didukung keputusan na dibahen suamina, boi ma dame keluargana. Molo adong kesalahan na dibahen suamina, dang dipaila ibana suamina i, alai ikkon lambok do ibana jala toktong dipasangap suamina. (1 Petrus 3:4) Molo adong sada masala na lao dipaboa ibana tu suamina, dilului do tikki na cocok lao paboahon i, jala denggan ma i dipaboa tu suamina.​—Parjamita 3:7.

‘Ikkon rap do bawa dohot istrina jala gabe sada daging ma nasida.’​—1 MUSA 2:24.

Tikki menikah sahalak bawa dohot sahalak borua, gabe sada keluarga ma nasida. Alani i, asa boi tetap denggan perkawinan ni nasida, ikkon jotjot do nasida paboahon aha na di bagasan roha ni nasida jala ikkon dipatudu do i sian tindakan ni nasida. Ikkon setia do nasida tu pasangan ni nasida, jala unang ma selingkuh. Alana, molo adong sian nasida na selingkuh, on mambahen haccit roha ni pasanganna jala boi do gabe sursar keluargana.​—Heber 13:4.

“Ajar-ajari ma anakmu asa mardalan ibana di dalan na ikkon sidalananna, Dang na lao manirpang ibana sian i sahat tu na matua.”​—PODA 22:6.

Dilehon Debata do tu natua-tua tanggung jawab lao mangajar-ajari ianakkonna. Ikkon diajari nasida do ianakkonna songon dia asa denggan pangalahona jala ikkon gabe contoh na denggan do natua-tua tu ianakkonna. (5 Musa 6:6, 7) Tikki adong kesalahan na dibahen ianakkonna, natua-tua na bijak dang pittor muruk, ‘alai ikkon hatop manangihon, manat makkatai, lambat tarrimas’. (Jakobus 1:19) Molo naeng mendisiplin ianakkonna natua-tua, ikkon alani holongna ma nasida mendisiplin dang alani murukna.

“Hamu akka dakdanak, oloi hamu ma natua-tuamuna . . . .”​—EPESUS 6:1, 2.

Ikkon dioloi jala ikkon dipasangap dakdanak do natua-tuana. Molo dipasangap jala dioloi nasida natua-tuana, gabe boi ma bahagia keluarga ni nasida jala dame. Molo dung dewasa akka ianakkon, ikkon tetap do dipasangap nasida natua-tuana. Cara ni nasida pasangappon natua-tuana i ma, ikkon disarihon nasida do natua-tuana termasuk ma i mangurupi, mangurus jabu ni nasida manang mangalehon akka kebutuhan ni nasida.​—1 Timoteus 5:3, 4.