“Ro ma Ho tu Makedonia”

1-3. (a) Aha do arahan na dijalo si Paulus dohot akka donganna sian tondi parbadia? (b) Aha do na lao tabahas?

ADONG ma piga-piga borua na lao sian Kota Pilippi na di Makedonia tu sada sunge na gelleng na margoar Gangites. Songon na somal, hundul ma nasida di topi ni sunge i martangiang tu Debata ni Israel. Diparrohahon Jahowa do nasida.—2 Kron. 16:9; Ps. 65:2.

² Lobi sian 800 kilometer di sabola timur ni Kota Pilippi, adong ma piga-piga bawa na mardalan maninggalhon Kota Listra na di selatan ni Galatia. Dung piga-piga ari, sahat ma nasida di jalan raya na menuju tu luat na paling padat pendudukna di Provinsi Asia. Akka bawa on i ma si Paulus, si Silas, dohot si Timoteus. Dang sabar be nasida naeng marbarita taringot Kristus tu Epesus dohot tu kota na asing na disi. Alai sebelum berangkat, diorai tondi parbadia ma nasida marbarita di Asia. Memang dang dipaboa songon dia cara ni tondi parbadia mangorai nasida. Alai boasa diorai? Alana Jesus naeng mangarahon si Paulus dohot akka donganna marbarita tu akka borua na di Gangites. Asa boi sahat tusi, dilewati nasida ma luat Asia Kecil jala diseberangi ma Laut Aegea.

³ Luar biasa do cara ni Jesus mangarahon si Paulus dohot akka donganna i asa boi sahat tu Makedonia. Adong do parsiajaranna tu hita, alani i tabahas ma peristiwa na masa saleleng pardalanan utusan injil ni si Paulus na paduahon na dimulai hira-hira taon 49 M.

4, 5. (a) Aha do na masa tu si Paulus dohot akka donganna tikki naeng sahat di Bitinia? (b) Ujungna gabe tudia do nasida lao jala aha do hasilna?

⁴ Ala dang diloas marbarita di Asia, gabe tu utara ma si Paulus dohot akka donganna i marbarita, tu akka kota na di Bitinia. Asa boi nasida sahat tusi, ikkon mardalan do nasida piga-piga ari mangalewati Prigia dohot Galatia. Otik do halak di luat i. Tikki naeng sahat di Bitinia, marhite tondi parbadia diorai Jesus do muse nasida lao tusi. (Ul. 16:6, 7) Pasti bingung do halak i. Ai diboto nasida do aha na lao dibaritahon jala songon dia paboahon barita i, alai dang diboto tudia nasida ikkon marbarita. Nungnga tarbukka nian kesempatan marbarita tu Asia, hape dang jadi. Tarbukka do muse kesempatan marbarita tu Bitinia, hape dang boi. Jadi mardalan ma nasida tu sabola barat, daona hira-hira 550 kilometer. Dang singgah be nasida di akka kota sappe sahat di pelabuhan Troas, pintu gerbang tu Makedonia. (Ul. 16:8) Memang hira na so masuk akkal do keputusan i, alai disi do dilehon kesempatan tu nasida marbarita.

⁵ Dohot do si Lukas mandongani si Paulus sahat tu Troas. Disurat ibana ma aha na masa dukkon i, “Di borngin i, mandapot parnidaan ma si Paulus. Diida ibana ma sahalak bawa sian Makedonia jongjong huhut mangelek-elek tu ibana. Didok ma, ‘Ro ma ho tu Makedonia, jala urupi ma hami.’ Dung mandapot parnidaan si Paulus, pittor hatop ma dibahen hami rencana naeng lao tu Makedonia. Ai dihilala hami, Debata do na manjou hami asa marbarita tu nasida.”a (Ul. 16:9, 10) Ujungna, diboto si Paulus ma tudia nasida ikkon lao marbarita. Pasti las do roha ni si Paulus ala dang menyerah ibana saleleng on. Jadi pittor lao ma bawa na opat i markapal tu Makedonia.

6, 7. (a) Aha do parsiajaran na tadapot sian pardalanan ni si Paulus? (b) Songon pengalaman ni si Paulus i, boasa dang boi pittor menyerah hita?

⁶ Aha do na taparsiajari sian i? Molo taparrohahon, dung borhat do si Paulus tu Asia baru pe diurupi tondi parbadia ni Debata nasida. Dung borhat do ibana tu Bitinia, baru pe dilehon Jesus petunjuk tu nasida. Jala dung sahat do si Paulus di Troas, baru pe diarahon Jesus nasida tu Makedonia. Saonari pe, Jesus Ulu ni huria i, olo do ra mamakke cara na sarupa lao manogu-nogu hita. (Kol. 1:18) Mungkin adong do rencanatta lao merintis manang pinda tu daerah na makkaporluhon parbarita. Alai bisa jadi ikkon jolo tadalatton do rencana i, baru pe ditogu-togu Jesus hita marhite tondi parbadia. Boasa? Pikkirhon ma on: Dang boi mobil dipabelok tu kiri manang tu kanan molo dang jolo bergerak mobil i. Suang songon i ma hita, ikkon jolo bergerak do hita mandalatton rencanatta i, asa boi Jesus manogu-nogu hita di ulaon marbarita.

⁷ Alai, boha do molo dang pittor marhasil upayatta i? Pittor menyerah do hita? Taanggap do dang diurupi tondi parbadia hita? Unang ma songon i. Taingot ma, si Paulus pe godang do tantangan na dihadapi, alai torus do dilului ibana cara lao marbarita. Jadi yakin ma hita, molo berupaya hita mangalului ‘dalan na balga lao mangulahon ulaon ni Tuan i’, pasti dipasu-pasu do upayatta i.—1 Kor. 16:9.

 8. (a) Songon dia do Kota Pilippi i? (b) Aha do hasil na didapot si Paulus ala marbarita di “inganan martangiang” i?

⁸ Dung sahat si Paulus dohot akka donganna di Makedonia, mardalan ma nasida tu Pilippi. Bangga do penduduk ni kota on gabe warga negara Rom. Jala adong do akka pensiunan prajurit ni Rom tinggal disi. Menurut nasida, mirip do kota on songon Kota Rom alai unggelleng. Dung i lao ma si Paulus dohot akka donganna tu topi ni sunge na di luar gerbang ni kota. Dibege nasida do adong disi “inganan martangiang”.b Di tikki ari Sabat, lao ma nasida tu inganan i jala pajuppang dohot piga-piga borua na marpungu lao martangiang. Hundul ma nasida jala makkata-hatai dohot akka borua i. Adong ma sahalak borua na margoar si Lidia. “Ditangihon ibana do [nasida], jala dibukka Jahowa do rohana.” Hona do tu rohana sude na diajarhon i, gabe tardidi ma ibana dohot donganna sajabu. Dung i dielek-elek ibana ma si Paulus dohot rombonganna i asa manginap di jabuna.c—Ul. 16:13-15.

 9. Songon dia akka donganta saonari maniru teladan ni si Paulus, jala aha do pasu-pasu na didapot nasida?

⁹ Bayakkon ma las ni roha ni si Paulus ala tardidi si Lidia. Las ma rohana ala nungnga diihutton paretta lao ‘ro tu Makedonia’, apalagi dipakke Jahowa do ibana dohot akka donganna i mangalusi tangiang ni akka borua na makkaholongi Debata i. Saonari godang do donganta na matua, na poso, na lajang, manang naung menikah pinda tu daerah na makkaporluhon parbarita. Memang adong do tantangan ni nasida, alai dang sadia i dibandingkon las ni roha na didapot ala pajuppang dohot halak na olo marsiajar Bibel songon si Lidia. Boi do hamu mambahen penyesuaian asa pinda tu daerah na makkaporluhon parbarita? Pasti godang do pasu-pasu dapotmuna! Misalna, pengalaman ni donganta si Aaron na marumur 20-an, na pinda tu sada daerah di Amerika Tengah. Ibana mandok, “Dung melayani au di negara na asing, gabe lam togu do haporseaokku jala lam jonok hubunganku tu Jahowa. Tabo do marbarita dison, adong ualu studikku!” Pasti godang do halak na makkilala na sarupa songon si Aaron.

10. Songon dia do akka suru-suruan na jahat mangabbati ulaon ni si Paulus dohot akka donganna?

¹⁰ Pasti muruk situtu do Sibolis ala lam rarat barita na uli di daerah i. Diabbati akka suru-suruan na jahat ma ulaon ni si Paulus dohot akka donganna i. Tikki ro muse nasida tu inganan martangiang i, adong ma hatoban borua na disonggopi suru-suruan na jahat sai mangihutton si Paulus. Peramal do ibana jala godang do hepeng na diparo ibana tu akka majikanna. Gogo ma didok ibana, “Ai akka naposo ni Debata Natumimbul i do halak on, na paboahon dalan haluaon i do nasida tu hamu.” Bisa jadi sengaja do suru-suruan na jahat mambahen borua i mandok songon i, asa dianggap halak na sarupa huaso ni borua i tu huaso ni si Paulus. Boi do on mempengaruhi cara marpikkir ni akka halak asa unang mambege na diajarhon si Paulus. Alani i, diusir si Paulus ma suru-suruan na jahat i sian borua i, gabe so ma ibana.—Ul. 16:16-18.

11. Dung diusir suru-suruan na jahat sian borua i, aha do na masa tu si Paulus dohot si Silas?

¹¹ Tikki diboto akka majikan ni borua i na so boi be ibana mangaramal jala parohon hepeng, muruk ma nasida. Disarat ma si Paulus dohot si Silas tu pasar, tu jolo ni pejabat pengadilan na mewakili pamarettaon ni Rom. Dipengaruhi ma pikkiran ni akka hakim i, ditudu ma na jahat tujuan ni si Paulus. Nasida mandok, “Guttur do dibahen nasida akka halak na di kota on. Halak Jahudi do nasida, diajarhon nasida do akka hasomalan na maralo tu aturanta. Dang boi tajalo manang taihutton hasomalan ni nasida i, ai halak Rom do hita.” Gabe muruk ma akka halak mambege i. “Dohot do akka jolma [na di pasar i] mangalo [si Paulus dohot si Silas].” Disuru akka pejabat pengadilan i ma asa ‘dipukkuli nasida pakke hau’ sappe lukka. Dung i, diboan ma si Paulus dohot si Silas tu penjara. Disappatton ma nasida tu penjara na massai ketat dijaga, jala dipasung ma pat ni nasida. (Ul. 16:19-24) Ditutup panjaga ma pintu ni penjara i gabe holom ma ruangan i. Dang boi be si Paulus dohot si Silas mangida manang aha pe, alai diparrohahon Jahowa do nasida.—Ps. 139:12.

12. (a) Boha do tanggapan ni akka sisean ni Kristus molo masa penganiayaan tu nasida? (b) Aha do na dibahen Sibolis dohot akka suru-suruan na jahat lao mangabbati ulaonta saonari?

¹² Piga-piga taon sebelumna, nga didok Jesus tu akka siseanna, ‘Bahenon ni nasida do na haccit tu hamu.’ (Joh. 15:20) Jadi tikki ro si Paulus dohot akka donganna tu Makedonia, nga siap be nasida mangadopi tantangan. Tikki dianiaya nasida, diboto nasida do dang na muruk Jahowa tu nasida, alai Sibolis do na muruk. Saonari sarupa do cara na dipakke Sibolis dohot suru-suruan na jahat lao mangabbati ulaonta. Dipakke do akka penentang paroa-roahon hita di sikkola manang di parkarejoan asa sogo roha ni halak tu hita. Di piga-piga negara, bahkan di jolo ni pengadilan ditudu akka pamimpin agama do hita mangulahon na jahat. Hira na didok nasida ma, ‘Gabe gaor do halak dibahen Saksi Jahowa on. Maralo do na diajarhon nasida tu adat istiadat naung taulahon sian akka oppungta najolo.’ Adong do muse akka donganta na sappe dipukkuli jala dipenjarahon, alai diparrohahon Jahowa do i sude.—1 Ptr. 3:12.

13. Boasa sappe didokkon panjaga ni penjara i, “Aha do sibahenokku asa diselamatton Debata au?”

¹³ Pasti haccitan dope si Paulus dohot si Silas ala na dipukkuli i. Alai dung tonga borngin, ‘martangiang do nasida jala marende mamuji Debata’. Dung i toppu ma ro gempa na gogo jala humutur ma penjara i. Tikki dungo panjaga ni penjara i, diida ma nga tarbukka be sude pintu ni penjara i. “Disittak ma podangna, naeng bunu diri ma ibana”, ala dirippu nga lari sude tahanan jala mabiar ibana hona hukum. Alai didokkon si Paulus ma, “Unang ulahon i! Ai dison do hami sude!” Hitir-hitir ma panjaga ni penjara i, didok ma, “Aha do sibahenokku asa diselamatton Debata au?” Didok nasida ma, “Porsea ma ho tu Tuan Jesus, asa selamat ho dohot sude donganmu sajabu.” Dipaboa si Paulus dohot si Silas do na so boi nasida menyelamatton ibana, holan Jesus do na boi.—Ul. 16:25-31.

14. (a) Songon dia do si Paulus dohot si Silas mangurupi panjaga ni penjara i? (b) Aha do pasu-pasu na dijalo nasida ala tetap sabar menghadapi penganiayaan?

¹⁴ Tulus do roha ni panjaga penjara i naeng diselamatton Debata? Nang pe panjaga ni penjara i dang halak Jahudi jala dang mananda Surat na Badia, alai dang ragu si Paulus tu ibana. Memang sebelum gabe halak Kristen, ikkon jolo marsiajar do ibana jala ikkon porsea tu na diajarhon Bibel. Alani i dilehon si Paulus dohot si Silas ma tikkina paboahon “hata ni Jahowa tu ibana”. Alani tabona marbarita, dang fokus be nasida tu haccit ni dagingna i. Alai diida panjaga ni penjara i do lukkana i, jala dipaias ibana ma i. “Laos di tikki i, tardidi ma ibana dohot sude donganna sajabu.” Pasti las do roha ni si Paulus dohot si Silas. Ai nang pe dianiaya nasida, adong do halak na manangihon barita na uli.—Ul. 16:32-34.

15. (a) Songon dia do donganta saonari maniru si Paulus dohot si Silas? (b) Boasa ikkon torus hita sabar makkunjungi akka halak di inganatta?

¹⁵ Godang do akka donganta saonari maniru si Paulus dohot si Silas. Tetap do nasida marbarita nang pe dipenjarahon, jala denggan do hasilna. Misalna di sada negeri na mangorai ulaonta marbarita, hea do dilaporhon 40 persen Saksi disi mananda hasittongan tikki dipenjarahon. (Jes. 54:17) Di peristiwa nakkin, jolo terjadi do gempa bumi baru dipangido panjaga ni penjara i bantuan. Songon i ma saonari, sipata ikkon jolo adong do masalah ni sasahalak baru pe olo ibana manjalo barita na uli. Jadi torus ma hita sabar marbarita jala makkunjungi akka halak di inganatta. Molo taulahon i, berarti hita siap mangurupi nasida manang sadihari pe.

16. Aha do na terjadi sadari dukkon dipukkuli si Paulus dohot si Silas?

¹⁶ Sadari dukkon dipukkuli si Paulus dohot si Silas, disuru pejabat pengadilan i ma petugas ni penjara paluahon nasida. Alai didok si Paulus ma, “Nungnga dipukkuli nasida hami di jolo ni godang halak, hape dang jolo diadili hami. Nungnga dipamasuk hami tu penjara, hape halak Rom do hami. Saonari naeng sipsip ma hami dipalua? Dang boi songon i! Ikkon nasida do ro paluahon hami.” Tikki dipaboa akka petugas i na warga negara Rom nasida, “mabiar” ma pejabat pengadilan i. Ai nungnga dilanggar nasida hak ni si Paulus dohot si Silas.d Gabe tarbalik ma na masa. Nakkin diattuki do akka sisean i di jolo ni godang halak. Saonari ikkon minta maaf ma pejabat pengadilan i di jolo ni godang halak. Dung i dipangido ma asa lao si Paulus dohot si Silas sian Pilippi. Olo do nasida, alai jolo dipatogu do akka sisean na baru tardidi i sebelum lao.

17. Aha ma na boi ditiru akka sisean na baru tardidi i sian si Paulus dohot si Silas?

¹⁷ Seandaina pittor dipangido si Paulus dohot si Silas hakna sebagai warga negara Rom tu pejabat i, mungkin dang pola sappe dipukkuli nasida. (Ul. 22:25, 26) Alai boi do gabe dianggap akka sisean na Pilippi molo si Paulus dohot si Silas memanfaatton hakna asa bebas sian penganiayaan. Jala on boi do mambahen gale haporseaon ni akka sisean na so warga negara Rom, ala dang adong hukum na boi melindungi nasida. Jadi tikki dianiaya si Paulus dohot si Silas, boi ma diida akka sisean na baru tardidi i, molo sisean ni Kristus boi do tetap togu haporseaonna nang pe dianiaya. Asing ni i, tikki dituntut si Paulus dohot si Silas hakna sebagai warga negara Rom, on mambahen ikkon diakkui pejabat pengadilan i ma di jolo ni godang halak na marsala nasida. Hasilna, gabe dang dianiaya nasida be halak Kristen na disi. Jala on gabe perlindungan hukum molo adong muse halak Kristen na dianiaya.

18. (a) Songon dia do akka sintua maniru si Paulus? (b) Songon dia do hita mamakke hukum ni pamaretta lao mambela barita na uli?

¹⁸ Saonari gabe teladan do akka sintua tikki mangalehon petunjuk di huria. Nasida dang holan mangalehon petunjuk, alai nasida sandiri pe rela do mangulahon i. Songon si Paulus, manat ma tapikkirhon songon dia jala andigan tapakke hukum ni pamaretta lao melindungi hakta. Molo porlu, boi do tamanfaatton pengadilan daerah, nasional, bahkan internasional lao mandapot perlindungan hukum tu ibadatta. Tujuanta dang lao mengubah na ditottuhon pamaretta, alai lao mamakke hukum ni nasida do mambela barita na uli i. Ai songon i do na disurat si Paulus tu huria na di Pilippi hira-hira sappulu taon dukkon dipenjara nasida disi. (Plp. 1:7) Alai dang soal songon dia keputusan ni pengadilan, songon si Paulus dohot akka donganna, torus ma hita berupaya “marbarita” tu manang ise pe.—Ul. 16:10.