“Dang Pasombuokku Ho”!

 1. Andigan do sude halak na miniahan diangkat tu surgo?

PIGA-PIGA taon naung salpu, sukkun-sukkun do roha ni naposo ni Jahowa, ‘Andigan do diangkat tu surgo akka halak na miniahan na mangolu dope di tano on?’ Najolo hea do tapikkir adong piga-piga halak na miniahan i na toktong mangolu di Paradeiso di tano on dung sae porang Armagedon. Alai songon na dibahas di Menara Pengawal 15 Juli 2013, taboto ma sude halak na miniahan na mangolu dope di tano on lao diangkat ma tu surgo andorang so dimulai dope porang Armagedon.—Mat. 24:31.

 2. Sukkun-sukkun aha do na olo ro tu rohatta? Jala aha do na lao tabahas di artikel on?

² Alai olo do sukkun-sukkun rohatta: Boha ma annon ‘biru-biru na asing’ saleleng “hasusaan bolon”? (Joh. 10:16; Mat. 24:21) Adong do piga-piga sian biru-biru na asing i na mabiar, gabe dang adong annon na mangurupi nasida dukkon nakkok akka na miniahan i tu surgo. Saonari tabahas ma dua cerita na adong di Bibel na mambahen nasida gabe marpikkir songon i. Dung i tabahas ma alasanna boasa hita dang porlu mabiar.

NA SO MASA TU BIRU-BIRU NA ASING HADUAN

3-4. Aha do na dihabiari piga-piga naposo ni Jahowa, jala boasa?

³ Adong do sian hita na mabiar gabe dang manomba Jahowa be annon biru-biru na asing ala dang adong be Punguan na Mangaradoti na manogu-nogu nasida. Olo do ra dirippu nasida songon i ala diingot nasida piga-piga cerita di Bibel. Taida ma dua contohna. Na parjolo taringot Sintua Malim Jehoyada. Naposo ni Jahowa na setia do si Jehoyada. Berupaya do ibana dohot istrina si Jehoseba manjaga si Jehoas. Diurupi nasida do si Jehoas asa gabe raja na burju jala na setia tu Jahowa. Saleleng mangolu si Jehoyada akka na denggan do na diulahon si Jehoas. Alai dung mate si Jehoyada, gabe diulahon si Jehoas ma akka na jahat. Ditangihon ibana do akka pejabat na murtad jala dang manomba Jahowa be ibana.—2 Kron. 24:​2, 15-19.

⁴ Contoh na paduahon, i ma taringot halak Kristen na di abad na paduahon. Si Johannes ma apostel na parpudi mate di tikki i. Saleleng mangolu ibana, diurupi ibana do godang halak Kristen asa toktong setia tu Jahowa. (3 Joh. 4) Songon akka apostel na asing, marsitutu do Apostel Johannes manjaga huria sian ajaran ni halak na murtad. (1 Joh. 2:18; 2 Tes. 2:7.) Alai dung mate si Johannes, godang ma huria na mangihutton ajaran ni halak na murtad. Piga-piga taon dukkon i, sude ma na di huria gabe murtad.

 5. Aha do na boi tasimpulhon sian dua cerita on?

⁵ Aha do na boi tasimpulhon sian dua cerita on? Na lao songon i do annon biru-biru na asing dung nakkok halak na miniahan tu surgo? Na lao murtad do nasida songon si Jehoas manang songon halak Kristen na di abad na paduahon i? Daong! Pos ma rohatta dung nakkok halak na miniahan tu surgo, torus do annon biru-biru na asing mangulahon ibadat na sittong. Jala sai jagaon ni Jahowa do nasida. Boasa boi tadok songon i?

TOKTONG DO ANNON DIULAHON NAPOSO NI JAHOWA IBADAT NA SITTONG

 6. Paboa ma tolu jaman na lao tabahas di artikel on.

⁶ Boasa pos rohatta dang na lao sega ibadat na sittong tikki masa hasusaan bolon? Alana nungnga taboto sian Bibel taringot jamanta saonari. Asing do situasi di jamanta saonari tu jaman ni halak Israel najolo dohot jaman ni halak Kristen di abad na paduahon. Saonari tabahas ma taringot tolu jaman on. Na parjolo, jaman ni halak Israel najolo. Na paduahon, jaman ni halak Kristen di abad na paduahon. Na patoluhon di jamanta, i ma ‘tikki dipadenggan saluhutna’.—Ul. 3:21.

 7. Tikki diida halak Israel na setia raja dohot bangso ni nasida mangulahon na jahat, boasa dang gabe metmet roha ni nasida?

⁷ Jaman ni halak Israel najolo. Andorang so mate si Musa didok ibana do tu halak Israel, “Takkas do huboto molo dung mate au, ulahononmuna do na jahat jala manirpang do hamu sian dalan na huparettahon tu hamu.” (5 Mus. 31:29) Dipaingot si Musa do tong halak Israel molo dang dioloi nasida Jahowa, bahenon ni Jahowa ma bangso i gabe tawanan ni bangso na asing. (5 Mus. 28:​35, 36) Jala i do na masa. Saleleng marratus taon, godang do raja ni Israel na mangulahon na jahat. Gabe godang ma halak Israel na maniru nasida manomba Debata na so sittong. Akibatna, dihukum Jahowa ma halak Israel na jahat i jala marujung ma pamarettaon ni Israel. (Hes. 21:​25-27) Tikki diida halak Israel na setia sai saut do sude na didok Jahowa, gabe lam bertekad ma nasida asa toktong manomba Ibana.—Jes. 55:​10, 11.

 8. Boasa dang longang rohatta mamboto nga gabe murtad be halak Kristen di abad na paduahon? Patorang ma.

⁸ Jaman ni halak Kristen di abad na paduahon. Tottu dang longang rohatta ala mamboto nga gabe murtad sude halak Kristen di abad na paduahon. Alana nungnga dipaboa Jesus hian unggodang do annon halak Kristen na murtad sian halak Kristen na setia tu Jahowa. (Mat. 7:​21-23; 13:​24-30, 36-43) Apostel Paulus, Petrus, dohot Johannes pe mandok, nungnga saut surirang na didokkon Jesus i di abad na parjolo. (2 Tes. 2:​3, 7; 2 Ptr. 2:1; 1 Joh. 2:18) Dang leleng dukkon i, gabe murtad do halak Kristen di abad paduahon. Jala gabe bagian sian Babel na Balga ma nasida, i ma akka agama palsu di portibi on. Takkas ma saut do surirang na didokkon Jesus i.

 9. Boasa boi tadok dang sarupa situasi di jamanta saonari sian situasi di jaman ni halak Israel najolo dohot halak Kristen di abad na paduahon?

⁹ “Tikkina lao padenggatton saluhutna.” Asing do situasi di jamanta saonari sian situasi di jaman ni halak Israel najolo dohot jaman ni halak Kristen di abad na paduahon. Molo di jamanta saonari, didok Bibel na mangolu “di ari parpudi” do hita sian pamarettaon ni Sibolis. (2 Tim. 3:1) Alai di jamanta saonari dimulai do tong ‘tikki lao padenggatton saluhutna’. (Ul. 3:21) Jala Bibel paboahon, umbalga do pengaruhna i jala ulleleng do i masa sian ari parpudi. Dimulai do i sian taon 1914. Jala lao marujung nama i tikki Harajaon ni Debata mambahen sude jolma gabe sempurna jala mambahen tano on gabe Paradeiso. Aha do na dipadenggan Jahowa? Na parjolo, dipillit Ibana do raja sian pinoppar ni si Daud na mewakili pamarettaonna di surgo, i ma Jesus. Alai dang holan pamarettaon i na dipadenggan Jahowa. Dang leleng dung dipajongjong Harajaon i, mulai ma dipadenggan ibadat na sittong. (Jes. 2:​2-4; Hes. 11:​17-20) Alai na lao sega do muse ibadat na sittong i?

10. (a) Aha do na didok Bibel taringot ibadat na sittong di tikkitta saonari? (Jesaya 54:17) (b) Boasa akka surirang i paposson rohatta?

¹⁰ Jaha Jesaya 54:17. Tarimangi ma ayat on, “Dang na lao marhasil sinjata manang aha pe na dibahen lao mangalo ho.” Saut do di tikkitta saonari surirang na didok di ayat on. Jala saut do muse hata na mandok, “Na lao diajari Jahowa ma sude anakkonmu, jala gok situtu ma dame di akka anakkonmu. Hot ma ho dibangun marhite ulaon na sittong. . . . Dang adong be na dihabiari ho, jala dang adong na mambahen ho mabiar, ai dang na lao ro i tu ho.” (Jes. 54:​13, 14) Haru Sibolis “debata ni portibi on”, dang na lao marhasil pasohon naposo ni Jahowa mangajari na asing taringot Jahowa. (2 Kor. 4:4) Pos ma rohatta ibadat na sittong nungnga dipadenggan jala dang na lao sega be i muse. Lao denggan nama i saleleng ni lelengna. Jadi sinjata manang aha pe dang adong na lao marhasil mangalo hita.

NA LAO MASA

11. Boasa pos rohatta dang na lao dipasombu Jahowa hita dung nakkok halak na miniahan tu surgo?

¹¹ Aha do na lao masa dung nakkok halak na miniahan tu surgo? Asa boi taboto alusna, taingot ma Jesus do Parmahanta. Ibana do na manguluhon huria Kristen. Takkas do didok Jesus, “Holan sada do Pamimpinmuna, i ma Kristus.” (Mat. 23:10) Nungnga mamaretta be Jesus di surgo. Jala pasti sai jagaonna do sude na mangihutton ibana. Ala Jesus do na manogu-nogu hita dang porlu hita mabiar. Memang dang taboto sude songon dia annon Kristus manguluhon hita dung nakkok akka halak na miniahan i. Alai adong do piga-piga contoh di Bibel na boi paposson rohatta. Tabahas ma taringot i.

12. Songon dia do Jahowa manjaga naposona (a) dung mate si Musa? (b) dung mandapot tugas na baru si Elia? (Ida gambar.)

¹² Andorang so masuk halak Israel tu Tano na Dijanjihon, nungnga mate si Musa. Gabe songon dia ma naposo ni Jahowa? Gabe dipasombu Jahowa do nasida? Daong. Molo setia nasida tu Jahowa, toktong do dijaga Jahowa nasida. Andorang so mate si Musa, disuru Jahowa do ibana asa mangalantik si Josua gabe pamimpin ni bangsona. Nungnga dilatik si Musa ibana saleleng martaon-taon. (2 Mus. 33:11; 5 Mus. 34:9) Asing ni i, godang do akka bawa na malo na dipillit gabe pamimpin ni na sasaribu, pamimpin ni na sasaratus, pamimpin ni na lima pulu, dohot pamimpin ni sappulu halak. (5 Mus. 1:15) Toktong do denggan dijaga naposo ni Jahowa. Contoh na asing, i ma si Elia. Marsitutu do ibana saleleng martaon-taon mangurupi halak Israel lao manomba Jahowa. Alai sada tikki ditugasson Jahowa ma ibana tu Juda. (2 Raj. 2:1; 2 Kron. 21:12) Gabe songon dia ma bangso Israel na sappulu marga? Gabe dipasombu Jahowa do nasida? Daong. Alana nungnga dilatik si Elia si Elisa saleleng martaon-taon. Asing ni i, adong do muse “akka pinoppar ni panurirang” naung dilatik lao mangurupi bangsona. (2 Raj. 2:7) Sian i gabe taboto ma, godang do bawa na togu haporseaonna na boi mamimpin naposo ni Jahowa. Jadi toktong do dipasaut Jahowa tujuanna lao manjaga naposona na setia.

13. Aha do janji ni Jahowa na dipaboa di Heber 13:5b? (Ida gambar.)

¹³ Sian akka contoh on, aha ma na boi tasimpulhon? Sukkun-sukkun dope rohatta aha na lao masa dung nakkok halak na miniahan tu surgo? Daong. Dipaboa Bibel do janji na paposson rohatta, dang na lao pasombuon ni Jahowa akka naposona na di tano on. (Jaha Heber 13:5b.) Songon si Musa dohot si Elia, diboto Punguan na Mangaradoti Organisasi do na massai penting mangalatik halak na asing. Alani i, saleleng martaon-taon dilatik nasida do akka donganta bawa sian biru-biru na asing lao mandalatton tanggung jawab di organisasi. Contohna dibahen nasida do akka sikkola lao mangalatik sintua, pengawas wilayah, anggota Panitia Cabang, pengawas di Betel, misionaris, dohot na asing. Asing ni i dibahen do akka panitia lao mangurupi Punguan na Mangaradoti. Dilatik Punguan na Mangaradoti do akka dongan na mangurupi di panitia i. Saonari gabe boi ma denggan diulahon akka donganta on tanggung jawab ni nasida di organisasi. Jala gabe rade ma nasida asa toktong manjaga biru-biru ni Kristus saleleng hasusaan bolon haduan.

14. Aha do parsiajaran na tadapot sian artikel on?

¹⁴ Jadi parsiajaranna, tikki naeng marujung hasusaan bolon nakkok ma halak na miniahan tu surgo. Alai toktong do naposo ni Debata na di tano on setia manomba Jahowa. Songon na taboto, di tikki i lao ro ma akka bangso, i ma na digoari Gog na sian Magog lao mangalo naposo ni Debata. (Hes. 38:​18-20) Alai dang na lao marhasil nasida mangorai naposo ni Debata manomba Jahowa. Tottu lao paluaon ni Jahowa do naposona. Jala di sada parnidaan, diida Apostel Johannes do “sada punguan bolon” i ma biru-biru na asing. Di parnidaan i dipaboa do tu si Johannes “na malua sian hasusaan bolon” do punguan bolon i. (Pgk. 7:​9, 14) Jadi taboto ma, pasti dipalua Jahowa do naposona!

15-16. Songon na disurat di Pangungkapon 17:​14, aha do na lao diulahon akka halak na miniahan saleleng Armagedon? Jala boasa on patoguhon rohatta?

¹⁵ Alai aha do na lao diulahon akka halak na miniahan i dung nakkok nasida tu surgo? Dipaboa Bibel do alusna. Di tikki i, ‘marporang ma akka pamaretta ni portibi on mangalo Anak ni Biru-Biru i’. Alai talu do nasida. Bibel mandok, “Taluhonon ni Anak ni Biru-Biru i do nasida.” Ise do na mangurupi Anak ni Biru-Biru i? I ma “akka halak na tarjou, na tarpillit, dohot akka halak na setia i”. (Jaha Pangungkapon 17:14.) Nasida ma akka halak na miniahan naung dipahehe tu surgo. Andorang so marujung hasusaan bolon, nungnga diangkat be halak na miniahan i tu surgo. Jala pittor marporang do nasida annon rap dohot Jesus. Tugas na luar biasa do on. Adong do piga-piga sian nasida na hea mambalbali halak andorang so gabe Saksi Jahowa. Adong do muse na hea gabe tentara. Alai dung gabe Saksi Jahowa, marsiajar do nasida asa mardame dohot halak na asing. (Gal. 5:22; 2 Tes. 3:16) Jala dang olo be nasida marporang. Alai dung nakkok annon nasida tu surgo, lao marporang ma nasida rap dohot Jesus dohot suru-suruanna lao mangalo musu ni Debata.

¹⁶ Tabayakkon ma, saonari piga-piga donganta na miniahan i nungnga matua jala gale. Alai dung nakkok nasida annon tu surgo, gabe margogo ma nasida jala mardaging na so boi mate. Marporang ma nasida raphon dohot Jesus. Dung sae porang Armagedon, rap ma nasida dohot Jesus lao mangurupi akka halak asa gabe sempurna. Takkas ma, unggodang do na boi diulahon nasida annon lao mangurupi akka dongan di tano on, sian tikki di tano on dope nasida.

17. Sian dia do taboto pasti aman do sude naposo ni Jahowa saleleng Armagedon?

¹⁷ Sada sian biru-biru na asing do hamu? Molo ido, aha do na porlu diulahon hamu tikki dimulai porang Armagedon i? Pos ma rohamuna tu Jahowa jala ihutton ma petunjukna. Aha do contohna petunjuk sian Jahowa? Bibel mandok, “Masuk ma hamu tu akka kamarmuna, jala tutup hamu ma pintu na di pudimuna. Martabuni ma hamu satokkin, sahat tu na salpu rimas i.” (Jes. 26:20) Saleleng Armagedon pasti dijaga Jahowa do sude naposona na setia, di surgo nang di tano on. Songon Apostel Paulus, pos do rohatta dang boi “akka pamaretta, akka na adong saonari manang na adong di ari na naeng ro, . . . manirang hita sian holong ni Debata”. (Rom 8:​38, 39) Ingot ma massai holong do roha ni Jahowa tu hamu, jala dang pasombuonna hamu!