Nungnga Rade be Hamu Tardidi?

 1. Aha do na ikkon diulahon sasahalak molo naeng mambangun jabu?

BAYAKKON ma adong halak na naeng mambangun jabu. Diboto ibana do jabu na songon dia na naeng dibangun ibana. Pittor dituhor ibana do bahan bangunan, jala pittor dibangun ibana do jabu i? Daong. Andorang so mambangun, adong do na porlu ulahononna. Porlu do dietong ibana sadia godang hepeng tusi. Boasa? Asa diboto ibana, cukkup do hepengna lao mambangun jabu i manang na dang. Molo dietong ibana sadia godang hepeng na porlu, boi ma denggan dibangun ibana jabu i.

 2. Songon na didok di Lukas 14:27-30, aha do na ikkon dipikkirhon hamu molo naeng tardidi?

² Aha do na mangonjar rohamuna lao tardidi, holong dohot pangargaion tu Jahowa do? Molo songon i, sarupa ma situasimuna songon sasahalak na naeng mambangun jabu. Boasa? Parrohahon ma na didok Jesus di Lukas 14:27-30. (Jaha.) Ditaringoti Jesus do aha lapatanna gabe siseanna. Adong do ambat-ambat molo naeng gabe sisean ni Jesus. Jala adong do pengorbanan na ikkon tabahen. (Luk. 9:23-26; 12:51-53) Jadi molo naeng tardidi hamu, porlu do pikkirhononmu aha do na lao diadopi hamu dung gabe sisean ni Jesus. Dung i gabe rade ma hamu lao manomba Debata sian nasa roha jala tardidi.

 3. Aha do na lao taulas di parsiajaran on?

³ Adong do labana molo tabahen pengorbanan lao gabe sisean ni Jesus? Adong. Molo tardidi hita, dapotta ma pasu-pasu saonari dohot tu ari na naeng ro. Alai taulas ma jo akka sukkun-sukkun taringot pandidion. Dung taulas i, boi ma diboto hamu, nga rade be hamu tardidi manang na dang.

 4. (a) Aha do lapatanna mangalehon diri tu Debata? (b) Aha do lapatanna ‘mansoadahon diri’, songon na tarsurat di Mateus 16:24?

⁴ Aha do lapatanna mangalehon diri tu Debata? Andorang so tardidi hamu, ikkon rade do hamu mangalehon dirimuna tu Debata. Tikki mangalehon diri tu Debata, paboa ma di bagasan tangiangmuna, holan Jahowa do na lao sombaonmu saleleng ngolumuna. Tikki dilehon hamu ngolumuna tu Jahowa, gabe ‘disoadahon hamu ma dirimuna’. Lapatanna, marjanji ma hamu tu Jahowa, holan Ibana ma na urrikkot di ngolumuna, dang be dirimuna sandiri. (Jaha Mateus 16:24.) Gabe ampuna ni Jahowa ma hamu. Sada hasangapon na massai arga do i. (Rom 14:8) On ma janji na dibahen hamu tu Debata. Dang olo Jahowa mamaksa hita lao marjanji tu Ibana. Alai, molo nga marjanji hita tu Jahowa, ikkon taulahon do i.​—Ps. 116:12, 14.

 5. Aha do imbar ni mangalehon diri tu Jahowa dohot pandidion?

⁵ Aha do imbar ni mangalehon diri tu Jahowa dohot pandidion? Tikki mangalehon diri tu Jahowa, holan hamu dohot Jahowa do na mamboto i. Alai molo tardidi, di jolo ni halak do hamu mangulahon i, somalna tikki di kebaktian. Tikki tardidi hamu, dipatudu hamu ma tu akka halak, nungnga dilehon hamu dirimuna tu Jahowa.b Gabe diboto nasida ma, na dihaholongi hamu do Jahowa sian nasa roha, ngolu, pikkiran dohot gogomuna. Jala diboto nasida ma, nungnga rade be hamu manomba Jahowa saleleng ni ngolumuna.​—Mrk. 12:30.

6-7. Songon na didok di 1 Petrus 3:18-22, boasa ikkon tardidi hita?

⁶ Ikkon tardidi do hita? Parrohahon ma aha na didok di 1 Petrus 3:18-22. (Jaha.) Songon si Noak, tarida do na togu haporseaonna, tikki dibahen ibana parau. Jadi molo tardidi hamu, i ma na gabe bukti naung dilehon hamu dirimuna tu Jahowa. Alai memang ikkon tardidi do hita? I do. Boasa? Dipaboa si Petrus do alasanna. Na parjolo, boi do pandidion i ‘paluahon hita’. Carana, sian parniulaotta tapatudu ma na porsea do hita molo Jesus i nungnga mate humokkop hita, dipahehe, jala saonari hundul “di siamun ni Debata”.

⁷ Na paduahon, molo tardidi hita dapotta ma “panggora ni roha na denggan”. Molo talehon diritta tu Debata jala tardidi, gabe boi ma hita marale-ale tu Ibana. Ala marsitutu do hita asa muba jala porsea tu tobusan ni Jesus, gabe disesa Debata ma dosatta. Ujungna, gabe denggan ma panggora ni rohatta.

 8. Aha do na terutama mangonjar rohamuna lao tardidi?

⁸ Aha do na terutama mangonjar rohamuna lao tardidi? Ala nungnga marsiajar Bibel hamu, gabe diboto hamu ma parange ni Jahowa dohot akka naung diulahon Ibana. Hona do i tu rohamuna jala gabe holong ma rohamuna tu Ibana. Holongmuna tu Jahowa i ma na mangonjar rohamuna lao tardidi.

 9. Aha do lapatanna tardidi di bagasan goar ni Ama, Anak, dohot tondi parbadia, songon na didok di Mateus 28:19, 20?

⁹ Asing ni i, na mangonjar rohamuna asa tardidi i ma ala porsea do hamu tu hasittongan na diparsiajari hamu sian Bibel. Parrohahon ma aha na diparettahon Jesus tu akka siseanna. (Jaha Mateus 28:19, 20.) Didok Jesus, ikkon tardidi do sasahalak “di bagasan goar ni Ama, Anak, dohot tondi parbadia.” Aha do lapatan ni i? Ikkon porsea do hamu tu hasittongan na adong di Bibel taringot Jahowa, Jesus Kristus, dohot tondi parbadia. Massai rikkot do ajaran on, jala boi do on hona tu rohamuna. (Heb. 4:12) Taparrohahon ma piga-piga contoh.

10-11. Aha do hasittongan taringot Debata na diparsiajari jala dihaporseai hamu?

¹⁰ Ingot ma muse tikki diparsiajari hamu taringot Debata. Diboto hamu do, goarna “Jahowa”, Ibana do “natumimbul gumomgom liat portibi on”, jala Ibana do “Debata ni hasintongan”. (Ps. 83:19; Jer. 10:10) Ibana do na manoppa hita, jala sian Ibana do ro “haluaon”. (Ps. 3:9; 36:10) Diurupi do hita asa malua sian dosa dohot hamatean jala asa boi mangolu saleleng ni lelengna. (Joh. 17:3) Molo dilehon hamu dirimuna tu Jahowa jala tardidi, gabe Sitindangi Ni Jahowa ma hamu. (Jes. 43:10-12) Gabe rap ma hamu marsada dohot akka halak na las rohana mamakke goar ni Debata, huhut paboahon i tu halak na asing.​—Ps. 86:12.

¹¹ Tontu sada hasangapon do di hita ala boi taattusi akka na diajarhon Bibel taringot Debata. Molo dihaporseai hamu hasittongan na massai arga i, gabe taronjar ma rohamuna lao mangalehon diri tu Jahowa jala tardidi.

12-13. Aha do hasittongan taringot Jesus na diparsiajari jala dihaporseai hamu?

¹² Boha do pakkilalaanmuna tikki mamboto hasittongan taringot Jesus? Nungnga diboto hamu Jesus i ma toppaan ni Jahowa na umsangap sian sude nasa na adong. Molo tapatudu sian parniulaotta na porsea do hita tu tobusan ni Jesus i, salpuhonon ni Debata ma dosatta jala gabe marale-ale ma hita tu Ibana. Ujungna, boi ma hita mangolu saleleng ni lelengna. (Joh. 3:16) Jesus do na gabe Sintua ni Malim di hita. Lomo do rohana mangurupi hita asa mandapot laba sian tobusan jala marale-ale tu Debata. (Heb. 4:15; 7:24, 25) Jesus do Raja di Harajaon ni Debata. Ibana do na dipakke Jahowa lao pabadiahon goar ni Debata, lao mangaripashon akka parjahat jala mangalehon gok pasu-pasu tu akka jolma di Paradeiso. (Mat. 6:9, 10; Pgk. 11:15) Jesus do na gabe sitiruon di hita. (1 Ptr. 2:21) Dipakke ibana do saluhut ngoluna lao mangulahon lomo ni roha ni Debata, jala i ma na ikkon taihutton.​—Joh. 4:34.

¹³ Tikki dijalo hamu hasittongan sian Bibel taringot Jesus, gabe holong ma rohamuna tu ibana. Holong i ma na mangonjar rohamu asa mamakke ngolumuna lao mangulahon lomo ni roha ni Debata, songon naung diulahon Jesus. Ujungna, gabe olo ma hamu mangalehon diri tu Jahowa jala tardidi.

14-15. Aha do hasittongan taringot tondi parbadia na diparsiajari jala dihaporseai hamu?

¹⁴ Boha do pakkilalaanmu tikki marsiajar taringot tondi parbadia? Nungnga diboto hamu tondi parbadia i, dang na bagian sian debata si tolu sada, alai gogo na sian Debata do i. Tondi parbadia i do na dipakke Jahowa lao manogu-nogu panurat ni Bibel. Tondi i do na mangurupi hita asa mangattusi jala mangulahon aha na tajaha sian Bibel. (Joh. 14:26; 2 Ptr. 1:21) Marhite tondi parbadia do dilehon Jahowa, ‘hagogoon na sumurung’ tu hita. (2 Kor. 4:7) Tondi i do tong na mambahen hita barani marbarita na uli, mangadopi ela-ela, patoguhon hita tikki marmet-met ni roha, dohot tikki mangadopi pangunjunan. Jala i do na mangurupi hita asa patuduhon “parbue ni tondi”, i ma akka parange na denggan. (Gal. 5:22) Lehonon ni Debata do tondi parbadia i tu manang ise na porsea tu Ibana, jala na marsitutu mangido i sian Ibana.​—Luk. 11:13.

¹⁵ Tontu gabe tarapul do rohatta, ala taboto adong do tondi parbadia na mangurupi hita asa toktong manomba Jahowa. Tikki dijalo hamu hasittongan taringot tondi parbadia, gabe lam taronjar ma rohamuna mangalehon diri tu Jahowa jala tardidi.

16. Aha do naung taulas di parsiajaran on?

¹⁶ Sada keputusan na rikkot do mangalehon diri tu Debata jala tardidi. Songon naung taparsiajari, ikkon rade do hamu mangadopi tantangan jala mambahen pengorbanan asa boi gabe sisean ni Jesus. Alai, dao do unggodang pasu-pasu na boi didapot hamu, sian pengorbanan naung dibahen hamu. Molo tardidi hamu boi do i paluahon hamu, jala dapotmuna ma panggora ni roha na denggan. Ikkon holong tu Jahowa do na terutama mambahen hamu mamillit lao tardidi. Ikkon porsea do hamu tu hasittongan naung diparsiajari hamu taringot Ama, Anak dohot tondi parbadia. Dung taulas sudena i, saonari boha do pakkilalaanmu, nungnga rade be hamu lao tardidi?

17. Akka aha do na ikkon diulahon sasahalak molo naeng tardidi?

¹⁷ Molo rade do hamu lao tardidi, tontu nungnga diulahon hamu akka na di toru on asa boi marale-ale tu Jahowa.c Dung marsiajar Bibel hamu, gabe godang ma na diboto hamu taringot Jahowa dohot Jesus. Gabe lam tamba ma haporseaonmuna. (Heb. 11:6) Porsea do hamu tu janji ni Jahowa na disurat di Bibel. Jala porsea do hamu molo tobusan ni Jesus i boi paluahon hamu sian dosa dohot hamatean. Ditinggalhon hamu jala disolsoli hamu do akka dosamuna najolo. Dipangido hamu do tu Jahowa asa disesa dosamuna i. Nungnga muba be parngoluonmuna, dang songon najolo be. Saonari dipakke hamu do ngolumuna lao pasonangkon roha ni Debata. (Ul. 3:19) Marsitutu do hamu paboahon haporseaonmuna tu halak na asing. Nungnga marbarita na uli hamu rap dohot akka dongan. (Mat. 24:14) Bangga do Jahowa molo diulahon hamu i sude. Massai las do rohana tu akka naung diulahon hamu.​—Poda 27:11.

18. Aha do muse na ikkon ulahononmuna andorang so tardidi?

¹⁸ Adong muse na ikkon ulahononmuna andorang so tardidi. Songon naung taparsiajari, ikkon rade ma hamu mangalehon dirimuna tu Debata. Martangiang ma hamu, jala marjanji lao mangulahon lomo ni roha ni Debata di ngolumuna. (1 Ptr. 4:2) Dung i, paboa ma tu koordinator badan penatua, adong rencanamuna lao tardidi. Annon dipangido ibana ma piga-piga sintua asa manjuppangi hamu. Unang pola mabiar hamu pajuppang dohot nasida. Ditanda jala dihaholongi nasida do hamu. Annon rap ma hamuna mangulas akka ajaran dasar sian Bibel naung diparsiajari hamu. Porlu do dipastihon nasida nungnga diattusi hamu akka ajaran i, jala serius do hamu mambahen keputusan lao tardidi. Molo diida nasida nungnga rade be hamu, paboaonna ma na lao tardidi hamu di kebaktian na naeng ro.

19-20. Dung tardidi, aha do na ikkon ulahononmuna, jala boha caramuna mangulahon i?

¹⁹ Dung tardidi hamu, aha ma na ikkon ulahononmuna?d Ingot ma janjimuna lao mangalehon diri tu Jahowa. Las do roha ni Jahowa molo toktong ditiop hamu janjimuna i. Jadi dung tardidi, ulahon ma aha naung dijanjihon hamu tu Ibana. Boha carana?

²⁰ Toktong ma jonok tu akka dongan di huria. Ala nungnga tardidi hamu, gabe marsada ma hamu dohot “sude dongan sahaporseaon”. (1 Ptr. 2:17) Keluargamuna do sude akka dongan di huria. Molo toktong ringgas hamu marpungu, lam solhot ma hamu tu nasida. Jaha ma Bibel ganup ari. Dung dijaha hamu piga-piga ayat sian Bibel, lehon ma tikki lao mangarimangi i, asa hona i tu rohamuna. (Ps. 1:1, 2) “Tongtong ma hamu . . . martangiang”. (Mat. 26:41) Molo martangiang hamu sian roha, gabe lam jonok ma hamu tu Jahowa. Jala “Sai jumolo ma lului Harajaon ni Debata”. (Mat. 6:33) Lapatanna, ikkon dibahen hamu do ulaon marbarita on na umpenting di ngolumuna. Molo ringgas hamu marbarita, toktong ma togu haporseaonmuna, jala boi ma diurupi hamu akka halak mandapot pakkirimon asa mangolu salelengna.​—1 Tim. 4:16.

21. Aha do na boi dapotmuna molo tardidi?

²¹ Sada keputusan na massai rikkot do mangalehon diri tu Jahowa jala tardidi. Memang, ikkon tabahen do pengorbanan. Alai, marguna do sude pengorbananmuna i! Sude hasusaan na diadopi hamu di portibi saonari on, holan “parsatongkinan do i jala ndang borat”. (2 Kor. 4:17) Alai molo tardidi hamu, boi ma gabe lam denggan ngolumuna, jala haduan dapotmuna ma “hangoluan na saleleng ni lelengna.” (1 Tim. 6:19) Alani i, sai manat ma pikkiri hamu jala tangiakkon ma, asa boi dialusi hamu sukkun-sukkun on, “Nungnga rade be au tardidi?”