Holong dohot Hatigoran ni Jahowa di Huria Kristen (Bagian 2 Sian 4)

 1. Aha do na boi taboto taringot pangkilalaan ni Jahowa?

TONGTONG do dihaholongi Jahowa angka naposona. Jala holong do rohana tu hatigoran. (Ps. 33:5) Alani i, adong dua na boi taboto taringot pangkilalaan ni Jahowa: (1) Hansit do roha ni Jahowa tingki dibahen na so tigor tu naposona. (2) Marjanji do Ibana laho uhumonna do angka halak na mambahen na so tigor tu naposona. Di bagian na parjolo,b nunga taulas songon dia Patik ni Debata na dilehon tu bangso Israel marhite si Musa patuduhon holong dohot hatigoran tarlumobi tu halak na gale. (5 Mus. 10:18) Jala Patik i muse patuduhon na disarihon Jahowa do naposona.

 2. Sungkun-sungkun aha do na laho taalusi?

² Di taon 33 M dung dibahen huria Kristen, ndang marlangku be Patik ni si Musa. Alai, na gabe so adong be patik tu halak Kristen na patuduhon holong dohot hatigoran? Tontu adong do. Dibahen do patik do na baru tu halak Kristen, i ma patik ni Kristus. Di parsiajaran on, parjolo laho taulas ma aha do lapatan ni patik ni Kristus. Jala taalusi ma sungkun-sungkun on: Boasa boi tadok patik i dibahen marhite holong jala patuduhon hatigoran? Hombar tu patik on, songon dia do halak na adong tanggung jawabna maradophon halak na asing?

 3. Songon na dipaboa di Galatia 6:2, aha do na dohot tu “patik ni Kristus”?

³ Jaha Galatia 6:2. Sude halak Kristen ingkon mangihuthon “patik ni Kristus”. Ndang disurat Jesus daftar ni patik tu angka siseanna, alai dilehon ibana do tudu-tudu tu nasida, parenta, dohot prinsip na boi mangurupi. “Patik ni Kristus” dohot do i sude na diajarhon Jesus. Asa lam tangkas taboto taringot patik on, taulas ma on di paragraf na mangihut.

4-5. Songon dia jala andigan do Jesus mangajari angka siseanna?

⁴ Songon dia do cara ni Jesus mangajari? Jesus mangajari halak marhite sian aha na dihatahon ibana. Marlaba do hata ni Jesus, ala dipaboa ibana do taringot hasintongan ni Debata, tujuan ni ngolu on, dohot Harajaon ni Debata na boi manalpuhon sude hasusaan ni jolma. (Luk. 24:19) Jala dibahen Jesus do sitiruon laho mangajari halak. Sian parngoluonna, dilehon Jesus do sitiruon tu siseanna laho diihuthon nasida.​—Joh 13:15.

⁵ Tingki di tano on Jesus, diajari ibana do angka halak. (Mat. 4:23) Dung dipahehe, diajari Jesus do muse angka siseanna. Umpamana, dipataridahon ibana do dirina tu lobi sian 500 siseanna. Jala diparentahon ibana do angka siseanna i asa mambahen sisean. (Mat. 28:19, 20; 1 Kor. 15:6) Dung mulak Jesus tu surgo, gabe pamimpin ni huria do ibana na mangalehon tudu-tudu tu angka siseanna. Umpamana, taon 96 M, dilehon ibana do tudu-tudu tu apostel Johannes laho patoguhon jala mangalehon sipaingot tu halak Kristen na miniahan.​—Kol. 1:18; Pgk. 1:1.

6-7. (a) Didia do disurat ajaran ni Jesus? (b) Songon dia do hita boi unduk tu patik ni Kristus?

⁶ Angka ajaran ni Jesus on, disurat do di opat buku Injil. Disi, dipaboa do angka na dihatahon dohot na diulahon Jesus tingki di tano on. Angka buku Junani na asing disurat angka baoa na ditogu-togu tondi parbadia. Jala adong di nasida “pingkiran ni Kristus” na mangurupi nasida mangantusi aha do pingkiran ni Jesus di piga-piga situasi.​—1 Kor. 2:16.

⁷ Parsiajaranna: Marlaba do ajaran ni Jesus di parngoluonta siganup ari. Jala tarida do i sian aha na taulahon di keluarga, di parkarejoan manang singkola, dohot di huria. Boi do taparsiajari patik i marhite manjaha dohot mangarimangi Angka Buku Junani Kristen. Molo taihuthon tudu-tudu, parenta, dohot prinsip na adong di Bibel, on patuduhon na unduk do hita tu patik ni Kristus i. Jala dos do i songon na unduk tu Jahowa alana sude na diajarhon Jesus ro sian Ibana.​—Joh. 8:28.

 8. Aha do fondasi ni patik ni Kristus?

⁸ Molo togu dibahen fondasi ni jabu, tontu gabe pos jala dame do roha ni halak na tading di jabu i. Suang songon i ma, patik na dibahen di fondasi na togu mambahen pos jala dame roha ni halak na mangihuthon patik i. Patik ni Kristus dibahen di fondasi na mansai denggan, i ma holong. Boasa boi tadok songon i?

9-10. Aha do contohna molo sude na diulahon Jesus alani holong, jala songon dia hita boi maniru ibana?

⁹ Na parjolo, sude na diulahon Jesus alani holong. Asi ni roha, i ma sada tanda ni holong. Ala marasi ni roha, olo do Jesus mangajari godang halak, pamalumhon na marsahit, mangalehon mangan torop halak, dohot pahehehon halak naung mate. (Mat. 14:14; 15:32-38; Mrk. 6:34; Luk. 7:11-15) Nang pe gabe suda tingki dohot gogona, alai rade do Jesus mangkaringkothon na dihaporluhon halak na asing. Jala holong na balga na hea dipatudu ibana, i ma mangalehon dirina gabe tobusan laho humongkop sude jolma.​—Joh. 15:13.

¹⁰ Parsiajaranna: Boi do tatiru Jesus marhite mangkaringkothon angka na dihaporluhon dongan na asing. Asing ni i, lam tapatudu ma asi ni roha di ulaon marbarita. Tingki laho hita marbarita alani asi ni roha, on patuduhon hita unduk tu patik ni Kristus.

11-12. (a) Aha do na patuduhon na parduli do Jahowa tu hita? (b) Songon dia hita boi maniru holong ni Jahowa?

¹¹ Na paduahon, Jesus pataridahon holong ni Amana. Tingki di tano on, sai dipatudu Jesus do na parduli do Jahowa tu sude na manomba Ibana. Asing ni i, dipaboa Jesus do muse na mararga do ganup halak di adopan ni Debata. (Mat. 10:31) I do alana, rade do Jahowa manjangkon angka halak na manimbil sian Ibana molo marhamubaon jala mulak muse tu huria. (Luk. 15:7, 10) Dipatudu Jahowa do muse holongna tu hita marhite mangalehon Anakna gabe tobusan laho humongkop hita.​—Joh. 3:16.

¹² Parsiajaranna: Songon dia hita boi maniru holong ni Jahowa? (Eps. 5:1, 2) Ingkon taargai do angka donganta ganup marsada-sada jala rade manjangkon “birubiru na mago” na mulak muse tu Jahowa. (Ps. 119:176) Hita pe, boi do patuduhon holong tu angka donganta marhite rade mangalehon tingki dohot gogo laho mangurupi nasida, tarlumobi tingki dihaporluhon. (1 Joh. 3:17) Molo tapatudu holong tu angka dongan, on patuduhon na unduk do hita tu patik ni Kristus.

13-14. (a) Songon na disurat di Johannes 13:34, 35, aha do na diparentahon Jesus tu angka siseanna, jala boasa on parenta na imbaru? (b) Songon dia hita mangihuthon parenta na baru on?

¹³ Na patoluhon, diparentahon Jesus do angka siseanna asa patuduhon holong na so mangkaringkothon diri. (Jaha Johannes 13:34, 35.) Boi do didok parenta ni Jesus on parenta na imbaru, alana ndang adong parenta on dipaboa di Patik na dilehon Debata tu bangso Israel. Ingkon tahaholongi do Debata songon Jesus na mangkaholongi hita. Laho mangulahon i, porlu do tapatudu holong na so mangkaringkothon diri.c Ingkon tahaholongi donganta lobi sian dirinta sandiri. Lapatanna, ingkon tahaholongi do nasida jala rade mate songon naung diulahon Jesus tu hita.

¹⁴ Parsiajaranna: Songon dia hita boi mangihuthon parenta na baru on? Marhite mambahen pengorbanan tu angka donganta. Tutu, ala holong do rohanta tu angka dongan umbahen na olo hita rade mate humongkop nasida. Alai boi do tabahen pengorbanan na asing. Umpamana, boi do taalap angka donganta naung matua asa boi ro tu parpunguan, mangalehon tingkinta mangurupi angka dongan na hona bencana, manang ndang holan mangulahon na tahalomohon. Molo taulahon i, on patuduhon na unduk do hita tu patik ni Kristus. Jala boi do taurupi ganup dongan di huria asa mangkilala hadameon.

15-17. (a) Songon dia do Jesus patuduhon hatigoran sian parniulaonna? (b) Songon dia do hita boi maniru Jesus?

¹⁵ Di Bibel, hata “hatigoran” dipangke laho paboahon aha na sintong na didok Debata jala ndang mardingkan. Boasa boi tadok molo patik ni Kristus i patuduhon hatigoran?

¹⁶ Na parjolo, parrohahon ma songon dia Jesus patuduhon hatigoran sian parniulaonna. Di tingki i, sogo do roha ni angka pamimpin ni agama Jahudi tu na so halak Jahudi, leas do roha ni nasida tu halak Jahudi na so diajari di singkola agama, jala ndang diargai nasida angka borua. Alai molo Jesus, tigor do jala ndang mardingkan tu sude halak. Dijangkon Jesus do halak na so Jahudi na porsea tu ibana. (Mat. 8:5-10, 13) Marbarita do Jesus tu sude halak, na mora manang na pogos. (Mat. 11:5; Luk. 19:2, 9) Ndang hea kasar Jesus maradophon angka borua. Alai lambok do ibana maradophon nasida, dohot ma i tu angka borua na so hasea.​—Luk. 7:37-39, 44-50.

¹⁷ Parsiajaranna: Boi do tatiru Jesus, marhite marbarita tu sude halak na olo manangihon. Ndang soal na mora manang na pogos manang na asing agamana. Angka donganta baoa pe, boi do maniru Jesus marhite lambok maradophon angka borua. Molo taulahon i, on patuduhon na unduk do hita tu patik ni Kristus.

18-19. Aha do na diajarhon Jesus taringot hatigoran, jala aha do na boi taparsiajari sian i?

¹⁸ Na paduahon, pingkirhon ma aha na diajarhon Jesus taringot hatigoran. Diajarhon Jesus do angka prinsip na mangurupi angka siseanna asa mambahen na tigor tu na asing. Umpamana, songon Aturan Emas. (Mat. 7:12) Tontu lomo do rohanta molo dibahen na tigor tu hita. Alani i, ingkon taulahon do na sarupa tu nasida. Molo taulahon songon i, ra gabe taronjar do roha ni nasida laho mambahen na tigor tu hita. Alai songon dia do molo dibahen na so tigor tu hita? Diajarhon Jesus do tu angka siseanna asa pos roha ni nasida, na laho “bahenon ni Debata do na tigor tu halak na pinillitna na jou-jou tu Ibana arian dohot borngin”. (Luk. 18:6, 7) Hata on paboahon janji ni Debata, i ma na diparrohahon Ibana do hasusaan na taadopi di ari parpudi on. Ala tigor do Debata, laho uhumonna ma angka halak na parohon hasusaan tu hita.​—2 Tes. 1:6.

¹⁹ Parsiajaranna: Molo taihuthon prinsip na diajarhon Jesus, tontu tabahen do na tigor tu na asing. Di portibi ni Sibolis on, susa do tahilala ala dibahen na so tigor tu hita. Alai boi do tarapul rohanta ala taboto laho patuduhonon ni Jahowa do hatigoranna tu hita.

20-21. (a) Songon dia do halak na adong tanggung jawabna maradophon halak na asing? (b) Songon dia do sahalak suami patuduhon holong na so mangkaringkothon diri, jala ingkon songon dia do sahalak ama maradophon anakna?

²⁰ Hombar tu patik ni Kristus, songon dia do halak na adong tanggung jawabna maradophon halak na asing? Holong do fondasi ni patik i. Alani i, ingkon lambok jala burju do nasida maradophon halak na asing. Ingkon diingot nasida do, lomo do roha ni Jesus do asa tongtong tapatudu holong.

²¹ Di keluarga. Sahalak suami ingkon mangkaholongi istrina “dos songon na niulahon ni Kristus tu huria i”. (Eps. 5:25, 28, 29) Ingkon ditiru nasida do holong ni Jesus na so mangkaringkothon diri marhite manjumolohon aha na dihaporluhon istrina. Ra, maol do di piga-piga baoa mangulahon i ala ndang somal di luat nasida patuduhon holong sisongon i tu halak na asing. On mambahen nasida maol mambolongkon hasomalan na roa. Alai ingkon marhamubaon do nasida laho patuduhon unduk tu patik ni Kristus. Molo dipatudu suami holong na so mangkaringkothon diri, gabe dipasangap istrina ma ibana. Jala, sahalak ama na holong tu ianakhonna ndang olo mambahen hansit roha ni anakna marhite pangkataion manang parniulaonna. (Eps. 4:31) Alai, patuduhononna do holong tu ianakhonna marhite mambahen pos jala dame roha ni anakna. Molo diulahon ibana songon i, gabe dihaholongi anakna ma ibana.

22. Songon na didok di 1 Petrus 5:1-3, ampuna ni ise do “biru-biru” i, jala ingkon songon dia maradophon nasida?

²² Di huria. Ingkon diingot angka sintua do molo “biru-biru” i ndang ampuna ni nasida. (Joh. 10:16; jaha 1 Petrus 5:1-3.) Hata songon “biru-biru ni Debata”, “songon lomo ni roha ni Debata”, dohot “biru-biru na pinasahat ni Debata” paingothon angka sintua, molo biru-biru i ampuna ni Jahowa. Jala lomo rohana asa burju sintua jala lambok maradophon angka biru-biruna. (1 Tes. 2:7, 8) Las do roha ni Jahowa mangida angka sintua na patuduhon holong tingki mamparmahani biru-biruna. Jala gabe lam holong do angka dongan tu ibana.

23-24. (a) Aha do na ingkon diulahon sintua molo adong na mangulahon dosa na balga? (b) Aha do na ingkon diingot angka sintua tingki pasaehon parsoalan di huria?

²³ Aha do na ingkon diulahon sintua molo adong na mangulahon dosa na balga? Ndang sarupa tanggung jawab ni nasida songon angka hakim dohot sintua di tingki ni Israel najolo. Di Patik ni si Musa, angka sintua ndang holan mangaradoti taringot ibadat tu Jahowa, alai dohot do muse parsoalan songon pelanggaran hukum dohot na asing. Alai angka sintua saonari holan mangaradoti parsoalan taringot ibadat tu Jahowa do. Diboto nasida do na diloas Debata do angka pamarenta laho pasaehon parsoalan, songon pelanggaran hukum dohot na asing. Jala boi do angka pamarenta mambahen hukuman songon denda manang dipenjara.​—Rom 13:1-4.

²⁴ Songon dia do angka sintua pasaehon parsoalan molo adong na mangulahon dosa na balga? Ingkon dipangke nasida do prinsip ni Bibel laho pasaehon parsoalan i jala mambahen keputusan. Ingkon tongtong do diingot, holong do fondasi patik ni Kristus. Alani i, ingkon dipingkirhon nasida do: Aha do na ingkon diulahon laho mangurupi sahalak dongan di huria na gabe korban dosa na balga? Taringot halak na mangulahon dosa na balga i, ingkon dipingkirhon angka sintua do, olo do ibana marhamubaon? Boi do hami mangurupi ibana laho padengganhon parale-aleonna tu Jahowa?

25. Aha do laho taulas di parsiajaran na mangihut?

²⁵ Tontu mandok mauliate do hita ala dilehon patik ni Kristus tu hita! Saonari hita mangolu di tingki halak na jahat gabe “lam tu jahatna”. (2 Tim. 3:13) Alai nang pe songon i, molo marsitutu hita mangihuthon patik i, on mambahen ganup dongan di huria mangkilala hadameon, diargai, jala dihaholongi. Alani i, ingkon tongtong ma hita jaga. Di parsiajaran na mangihut, laho taulas ma songon dia huria Kristen boi patuduhon hatigoran ni Debata molo adong na mangulahon pelecehan seksual tu dakdanak.