Dungo ma Hamu!​—Ai Maotaot do Sibolis Laho Mambondut Hamu

 1. Patorang ma songon dia sada surusuruan gabe Sibolis.

MULANA, surusuruan na maraleale do ibana dohot Jahowa. Alai di pudian ni ari dihalomohon rohana asa disomba jolma ibana. Ndang na ditundalhon ibana giotgiot na sala i. Alai dipasombu ibana giotgiot ni rohana i gabe tubu ma dosa. (Jakobus 1:14, 15) Sasintongna ndang taboto ise goarna. Alai na taboto, digoari do ibana Setan. ”Ndang tindang ibana di hasintongan.” Dialo ibana Jahowa jala ujungna gabe ”ama ni gapgap” ibana.​—Johannes 8:44.

2, 3. Songon dia do panjouon ”Setan,” ”Sibolis,” ”ulok,” dohot ”naga” patuduhon molo ibana musu ni Debata na umjahat?

² Dung mangalo Sibolis, gabe alo ni Jahowa dohot alo ni jolma ma ibana. Boi ma taboto jorbut ni hajahaton ni Sibolis on sian aha na digombarhon di bagasan Bibel taringot ibana. Setan lapatanna ”Pangalo,” na patuduhon molo surusuruan na jahat on manghasogohon pamerantaon ni Debata jala marsitutu laho mangalo sian nasa gogona. Lomo roha ni Sibolis asa mansohot pamarentaon ni Jahowa.

³ Di Pangungkapon 12:9, Setan didok do muse Sibolis, lapatanna ”Pargapgap.” Ndang dipasangap Sibolis Debata, tarida sian hatana na mandok pargabus do Jahowa. Hata ”ulok na robi” paingothon hita tu isara ni Sibolis mamangke ulok laho mangotootoi si Hawa. ”Naga na balga i” pe panjouon na pas tu Sibolis. Alana jorbut, ndang marasi roha, jala na sai jahat do sangkap ni rohana. Martahi do Sibolis laho pasohon sangkap ni roha ni Debata na sintong jala mangaripashon sude naposo ni Debata.

 4. Aha do na laho taulas di parsiajaran on?

⁴ Toho ma, Sibolis on ma musu na umbalga na boi manegai haporseaonta tu Debata. I do alana boasa Bibel pasingothon hita: ”Torang ma roha muna, dungo ma hamu!; Na maotaot do alo muna, Sibolis i, songon babiat na marauang, mangalului sibondutonna.” (1 Petrus 5:8) Alani i, parsiajaran on laho mangulas tolu pangalaho ni Sibolis. Jala mangulas boasa porlu hita mangondingi dirinta sian musu ni Jahowa dohot musu ni naposoNa i.

5, 6. (a) Bahen ma tudosan na patuduhon molo Sibolis i ”ulubalang na gogo.”(b) Boasa didok Sibolis i ”sibunu jolma”?

⁵ Angka surusuruan i ma ”Ulubalang na gogo.” (Psalmen 103:20) Ummalo jala umgogo do nasida sian nasa jolma. Alai, angka surusuruan na sai marsihohot mamangke haboion ni nasida tu angka na denggan. Umpamana, sada surusuruan ni Jahowa mambunu 185.000 parangan ni Assur. Ndang na boi on ulahonon ni jolma, parangan naung tarlatik pe maol mangulahon i. (2 Rajaraja 19:35) Di tingki na asing sada surusuruan mamangke gogona laho paluahon apostel ni Jesus sian hurungan. Nang pe mansai jonok ndang diida angka sijaga pintu naung dibungka surusuruan pintu ni hurungan jala dipalua ma apostel i. Dung i ditutup ma muse pintu ni hurungan i!​—Ul. 5:18-23.

⁶ Angka surusuruan ni Debata, mamangke gogo nasida laho mangulahon angka na denggan. Alai Sibolis mamangke gogona laho mangulahon hajahaton. Margogo situtu do Sibolis jala sai mangelaela. Dipatudos Bibel do ibana songon ”raja ni portibi on” jala ”debata ni portibi on.” (Johannes 12:31; 2 Korint 4:4) Didok do ibana muse ”marhuaso mambahen mate.” (Heber 2:14) Ndang na pintor dipamate ibana jolma. Jadi aha do lapatan ni i? Parjolo, portibi on gok hosom dohot hajahaton na marharoroan sian Sibolis. Paduahon, ala si Hawa porsea tu Sibolis jala si Adam ndang mangoloi Debata, ujungna sude jolma gabe mardosa jala mate. Didok Jesus do Sibolis ”sibunu jolma.” (Johannes 8:44) Sasintongna ibana ma musu na marhagogoon.

 7. Songon dia do angka begu patuduhon molo na margogo do nasida?

⁷ Molo taalo Sibolis, hita pe mangalo angka na mangihuthon ibana jala na mangalo pamarentaon ni Debata. Dohot ma i tu angka surusuruan na mangalo tu Debata na digoari angka begu. (Pangungkapon 12:3, 4) Saleleng on patar ma molo nasida umgogo sian angka jolma jala nasida parohon parungkilon tu sude jolma. (Mateus 8:28-32; Markus 5:1-5) Unang lupa hita marhagogoon do angka begu jala adong na manguluhon nasida. (Mateus 9:34) Molo ndang alani pangurupion ni Jahowa, ndang na tolap hita laho mangalo Sibolis i.

 8. (a) Aha na tinuju ni Sibolis? (Ida gombar di mula ni parsiajaran.) (b) Songon na taida saonari on, songon dia do portibi on manggombarhon Sibolis na so marasi roha?

⁸ Dipatudos si Petrus do Sibolis on songon ”babiat na marauang.” Sada buku na asing patoranghon molo hata Junani ”marauang” lapatanna ”auang ni babiat na mansai male.” Suman ma i manggombarhon Sibolis na so marasi roha dohot pangalahona na mansai jahat! Nunga dirajai ibana nasa portibi on, alai ndang sae dope i di ibana. Songon babiat na mansai male do Sibolis na sai hurangan sibondutonna. (1 Johannes 5:19) Sibonduton ni Sibolis na sasintongna i ma angka halak na nimiahan ni tondi na adong dope di tano on, na diurupi ”birubiru na asing.” (Johannes 10:16; Pangungkapon 12:17) Na tinuju ni Sibolis i ma laho mangaripashon sude angka naposo ni Jahowa. Pangarupaon na dibahen Sibolis tu halak Kristen abad parjolo sahat tu nuaeng patuduhon molo ibana ndang marasi roha.

9, 10. (a) Songon dia do Sibolis mangaroro halak Israel? (Bahen tudosan.) (b) Aha do siala na rumingkot umbahen diroro Sibolis halak Israel? (c) Ninna roha muna, songon dia do panghilalaan ni Sibolis molo adong sahalak naposo ni Debata mangulahon dosa na balga saonari on?

⁹ Dipatudu Sibolis na so marasi roha ibana sian isara na asing. Sada babiat na male ndang asi rohana mangida na laho sibondutonna. Ndang adong otik pe asi ni rohana andorang so mambondut jala ndang manolsoli ibana di pambahenanna i. Suang songon i ma Sibolis, laos so adong otik pe asi ni rohana tu jolma na dirorona. Pingkiri ma, songon dia panghilalaan ni Sibolis mangida tingki bangso Israel mangulahon dosa songon parmainanon dohot pangahution? Boi do tarimangi songon dia balga ni roha ni Sibolis tingki mangida panghorhon ni parmainanon na diulahon si Simri dohot pangahution na diulahon si Gehasi?​—4 Musa 25:6-8, 14, 15; 2 Rajaraja 5:20-27.

¹⁰ Adong do siala na rumingkot na mambahen Sibolis mangaroro halak Israel najolo. Taingot ma Mesias marharoroan sian bangso i, jala holan ibana do na boi mangaripashon Sibolis jala na boi patuduhon holan Jahowa do na marhak mamarenta. (1 Musa 3:15) Ndang lomo roha ni Sibolis asa dihalomohon Debata halak Israel. Marragam isara do diulahon Sibolis laho manegai halak Israel asa mangulahon dosa. Ndang manolsoli Sibolis tingki dibahen ibana mangalangkup si Daud. Ndang asi roha ni Sibolis tingki ndang saut bongot si Musa tu tano parjanjian. Gariada marlas ni roha situtu do Sibolis tingki adong sada sian naposo ni Debata na mangulahon dosa na balga. Sasintongna tingki marhasil ibana mangotootoi, dibahen ibana ma i gabe dalanna laho mamburai Jahowa.​—Poda 27:11.

11. Boasa diroro Sibolis si Sara?

¹¹ Sogo do roha ni Sibolis tu keluarga haroroan ni Mesias. Umpamana, rimangi ma tingki didok Jahowa molo si Abraham laho gabe ”bangso na bolon.” (1 Musa 12:1-3) Tingki si Abraham dohot si Sara laho tu Misir, lomo roha ni si Firaun tu si Sara jala diboan tu jabuna asa gabe tunggani boruna. Alai, ondingan ni Jahowa do si Sara sian situasi na borat on. (Jaha 1 Musa 12:14-20.) Masa do muse sisongon i di huta Gerar andorang so tubu dope si Isak. (1 Musa 20:1-7) Sibolis do na mambahen angka na masa on? Taingot ma jo si Sara nunga manadinghon hutana di Ur jala tading di undungundung. Hirim do roha ni Sibolis asa tarelaela si Sara alani hamoraon di harajaon ni si Firaun dohot si Abimelek? Na tubu do di pingkiran ni Sibolis tadinghonon ni si Sara tunggani dolina dohot Jahowa gabe mardongan saripe tu sada sian angka raja on? Ndang dipatorang Bibel taringot i. Alai, balga situtu roha ni Sibolis molo sundat ro Mesias sian pinompar ni si Sara. Ndang na manolsoli Sibolis molo parsaripeon, parange dohot paralealeon ni si Sara tu Jahowa gabe sega. Tutu ma Sibolis on ndang marasi roha!

12, 13. (a) Songon dia do Sibolis patuduhon na so marasi roha ibana dung tubu Jesus? (b) Ninna roha muna songon dia do panghilalaan ni Sibolis molo adong naposo na mangoloi Jahowa jala na mangulahon lomo ni rohaNa?

¹² Dung marratus taon sian si Abraham tubu ma Jesus. Ndang adong otik pe asi ni rohana mamereng bagak ni posoposo na baru tubu i. Diboto Sibolis posoposo on na laho gabe Mesias. Jesus ma pinompar ni si Abraham na rumingkot, na laho ”manegai angka ulaon ni Sibolis.” (1 Johannes 3:8) Na so asi do roha ni Sibolis molo dipamate ibana sada posoposo? Daong. Ndang ringkot di rohana tu na sintong manang na so sintong. Pintor marsitutu do ibana laho mambunu Jesus tingki posoposo dope. Songon dia dalanna?

¹³ Tingki diboto Raja Herodes sian angka sijujur ari naung tubu do sada raja di halak Jahudi, marrimas situtu ibana naeng mambunu posoposo i. (Mateus 2:1-3, 13) Diparentahon ibana ma asa dibunu nasa posoposo di Betlehem na marumur dua taon tu toru. (Jaha Mateus 2:13-18.) Malua do Jesus sian pambunuon i. Alai aha do na boi taparsiajari sian on taringot musunta Sibolis? Ndang arga di Sibolis hangoluan ni jolma. Ndang asi rohana tu posoposo. Tutu ma Sibolis i ”babiat na marauang.” Sai ingot ma ndang adong asi ni roha di Sibolis!

14, 15. Songon dia Sibolis mangotootoi angka na so porsea?

¹⁴ Sada dalan ni Sibolis mangotootoi jolma asa mangalo tu Debata Jahowa na tahaholongi, i ma marhitehite gabus. (1 Johannes 4:8) Diotootoi Sibolis do jolma asa ndang mauas male di partondion. Ndang diantusi nasida ringkot ni paralealeon tu Debata. (Mateus 5:3) ”Dipapitung debata ni portibi on (Sibolis) do pingkiran ni angka na so porsea” asa ndang ditanda nasida hasintongan taringot Jahowa.​—2 Korint 4:4.

¹⁵ Sada dalan ni Sibolis laho papitunghon angka jolma, i ma marhite ugamo na so sintong. Diboto Sibolis do molo Jahowa ndang olo ”patudoson dohot na asing.” (2 Musa 20:5, Bibel Siganup Ari) Pingkiri ma las ni roha ni Sibolis tingki diida ibana angka jolma manomba tondi ni ompungna, bona ni hau, ganaganaan manang jolma manang na aha pe na adong di portibi on asing ni Jahowa. Asi roha mangida nasida, dirimpu nasida panombaon nasida i dijangkon Debata, hape haporseaon dohot ulaon na marisuang do i. Halak Israel di tingki ni si Jesaya hea mangulahon sisongon i. Disungkun Jahowa tu nasida: ”Boasa tung tuhorhonon muna hepeng tu na so sipanganon? Boasa dipasuda hamu gaji muna hape tong do hamu male? Tangihon ma hatangku jala ulahon ma na hudok, gabe dapot hamu ma angka sipanganon na tabo.”​—Jesaya 55:2, Bibel Siganup Ari

16, 17. (a) Boasa didok Jesus tu si Petrus: ”Laho ma ne ho, Sibolis”? (b) Songon dia do Sibolis mangotootoi hita asa unang dungo hita?

¹⁶ Sibolis pe boi mangotootoi naposo ni Debata na girgir mangulahon lomo ni rohaNa. Sada sian i, taingot ma jo tingki Jesus paboahon tu angka siseanna na laho dipamate na ma ibana. Si Petrus na manghaholongi Jesus mandok: ”Asi ma roha ni Debata di ho Tuhan; unang ma i songgop i tu ho.” Jesus mangalusi si Petrus: ”Laho ma ne ho, Sibolis!” (Mateus 16:22, 23) Boasa Jesus manjou si Petrus ”Sibolis”? Ala sasintongna diboto Jesus do aha na laho masa. Ndang sadia leleng nai mate na ma Jesus gabe tobusan, jala patuduhon Sibolis i pangotootoi. On ma tingki na rumingkot tu sude jolma, ndang tingkina be di Jesus asa ”marasi ni roha” tu dirina sandiri. Las situtu roha ni Sibolis molo ndang jaga Jesus.

¹⁷ Nunga jonok be ajal ni portibi on. Alani i, saonari hita nunga mangolu di ari parpudi na gok hasusaan. Lomo roha ni Sibolis molo hita ”marasi roha” tu dirinta sandiri jala mangalului hasangapon di portibi on. Ibana pe lomo do rohana asa ndang taingot na mangolu di ari parpudi jala ndang jaga be hita. Unang ma paloas on masa tu hita, balik sian i ”dungo ma hamu.” (Mateus 24:42) Unang ma tarimpu dao dope ajal ni portibi on jala ndang na pintor laho ro ari i.

18, 19. (a) Songon dia Sibolis mangotootoi hita jala mambahen hita marpingkir na so tama hita mandapot holong ni Jahowa? (b) Songon dia Jahowa mangurupi asa sai tongtong dungo hita?

¹⁸ Marusaha do Sibolis laho mangotootoi hita sian dalan na asing. Lomo rohana molo tahilala na so tama do hita dihaholongi Debata jala ndang tarhalupahonon ni Debata angka dosanta. Alai gabus ni Sibolis do i. Pingkirhon ma, ise do sasintongna na so tama dihaholongi Jahowa? I ma Sibolis. Dosa ni ise do na so boi sesaon ni Debata? I ma Sibolis. Bibel paposhon rohanta: ”Ai ndang na geduk Debata, tung halupahononna ma na niula muna dohot holong ni roha na pinatuduhon muna tu goarna.” (Heber 6:10) Arga do di Jahowa nasa na taulahon na pasonanghon rohaNa, jala ulaon marbarita na taulahon ndang na laho marisuang. (Jaha 1 Korint 15:58.) Alani i unang olo hita diotooti Sibolis.

¹⁹ Songon naung taparsiajari, Sibolis i marhagogoon, ndang marasi ni roha jala pangotootoi. Songon dia hita boi monang mangalo musunta on? Jahowa mangalehon pangurupion tu hita. Diurupi Bibel do hita asa mangantusi angka tahi ni Sibolis ”Ai ndang na so taboto angka tinahina i.” (2 Korint 2:11) Molo nunga taboto ragam ni tahi ni Sibolis laho mangotootoi hita, on mangurupi asa sai tongtong dungo hita. Alai ndang sae holan mamboto angka tahi ni Sibolis. Bibel mandok: ”Alo hamu ma Sibolis i, dung i maporus ma ibana sian hamu.” (Jakobus 4:7) Di parsiajaran na mangihut, laho taulas ma tolu situasi na boi monang hita mangalo Sibolis.