PASAL DUA
Bibel Buku na sian Debata
1, 2. Boasa Bibel sada hadiah na sumurung sian Debata?
MOLO dijalo hamu sada hadiah sian alealemuna, songon dia do pangkilalaanmu? Ra, mansai las do rohamu ala diingot ibana hamu. Dohononmu ma mauliate tu ibana.
2 Bibel, sada hadiah sian Debata. Hatorangan na adong di bagasan Bibel ndang adong dapotta di buku na asing. Dipaboa do di Bibel, Debata manompa langit, tano dohot jolma na parjolo. Dipatorang do muse angka prinsip na boi mangurupi hita tingki marsitaonon. Di Bibel, taparsiajari do songon dia Debata manggohi sude sangkapNa laho padengganhon tano on. Jadi, Bibel sada hadiah na sumurung sian Debata.
3. Aha do na boi botoonmu tingki marsiajar Bibel?
3 Tingki marsiajar Bibel, botoonmu ma na lomo do roha ni Debata hamu gabe alealeNa. Lam godang diparsiajari hamu taringot Debata, lam jonok ma hamu tu Ibana.
4. Aha do hasurungan ni Bibel sian buku na asing?
4 Bibel nunga diterjemahon lobi sian 2.600 bahasa jala nunga marmiliar dicetak. Lobi sian 90 persen jolma di portibi on, boi manjaha Bibel di hata ni nasida be. Jala, lobi sian sajuta halak boi mandapot Bibel ganup minggu. Tutu ma, ndang adong buku na songon Bibel.
5. Boasa boi tadok Bibel i buku na sinihathon ni Debata?
5 Bibel, buku na ”sinihathon ni Debata do”. (Jaha 2 Timoteus 3:16.) Alai deba mandok, ”Boasa didok Bibel i sian Debata, hape jolma do na manurat?” Bibel mangalusi, ”Alai tinogihon ni Tondi Parbadia do, umbahen na marsoara angka jolma, disuru Debata.” (2 Petrus 1:21) On boi tapatudos tu sahalak kepala desa, tingki disuru sekretarisna mambahen surat. Sian ise do surat i? Sian kepala desa i, ndang sian sekretarisna. Songon i ma, Debata do pangarang ni Bibel, alai disuru Ibana do jolma laho manurathon. Debata manogunogu panurat ni Bibel laho manurathon isi ni pingkiranNa. Tutu ma Bibel i ”hata ni Debata”.—1 Tessalonik 2:13; ida Lampiran 2.
Kitab Suci Terjemahan Dunia Baru nunga dipatupa di bagasan godang bahasa
SUDE ISI NI BIBEL TUTU
6, 7. Boasa tadok isi ni Bibel i ndang adong na maralo?
6 Bibel on disurat lobi sian 1.600 taon. Angka panurat ni Bibel mangolu di tingki na marasingasing. Adong sian nasida na timbo singkolana, alai na deba nai ndang. Sahalak sian nasida dokter. Na asing muse partani, panjala dengke, parmahan, panurirang, hakim, dohot raja. Nang pe na sinurat ni nasida i marasingasing, alai sada do na tinujuna. Ndang adong na maralo sian buku na sada tu buku na asing.a
7 Buku na parjolo di Bibel i ma 1 Musa, patorangkon songon dia mula ni hasusaan i masa di tano on. Di buku Pangungkapon dipaboa, hasusaan i laho pasohoton ni Debata jala bahenonNa tano on gabe Paradeiso. Isi ni Bibel paboahon sejarah ni jolma naung marribu taon jala paboahon songon dia Debata manggohi angka sangkapNa.
8. Lehon ma tudosan na patuduhon molo Bibel boi diparhatutu tu pengetahuan ilmiah.
8 Bibel, ndang buku ilmu pengetahuan songon na diparsiajari di singkola. Alai, tingki mangulas parsiajaran ilmiah, boi do Bibel taparhatutu. Tutu ma, buku on ro sian Debata. Umpamana, buku 3 Musa marisi parenta ni Debata tu bangso Israel asa nasida manjaga diri sian sahit na boi bali. Nunga disurat hian on, andorang so diantusi jolma dope songon dia bakteri manang virus boi mambahen sahit. Dipaboa di Bibel, gantung do tano on di na soada. (Job 26:7) Tingki i, godang halak na porsea molo portibi on dosdos. Alai, nunga disurathon di Bibel molo tano on tingko songon bola.—Jesaya 40:22.
9. Aha do na boi taantusi sian hajujuron ni panurat ni Bibel?
9 Sude sejarah na disurat di Bibel hatoranganna sintong. Alai, godang do panurat ni buku sejarah ndang paboahon saluhut na masa tu bangsona. Songon, partalu ni nasida di parporangan. Molo panurat ni Bibel, sude do dipaboa na masa tu bangso Israel tingki monang manang na talu marporang. Jala, dipaboa panuratna do hagaleon ni nasida sandiri. Umpamana, di buku 4 Musa, dipaboa si Musa do hasalaanna na balga. (4 Musa 20:2-12) Hajujuron ni panurat ni Bibel on patuduhon, molo Bibel i sian Debata. Lapatanna, boi do tahaporseai isi ni Bibel.
BUKU NA MARISI PODA
10. Boasa tadok poda na sian Bibel boi mangurupi hita ganup ari?
10 Bibel, na ”sinihathon ni Debata do; jala hasea mamodai, maminsang, pauliulihon”. (2 Timoteus 3:16) Poda na disurat di Bibel boi mangurupi hita sahat tu saonari. Diboto Jahowa do pingkiran dohot rohanta, ala Ibana do na manompa hita. Umbotoan do Debata na dumenggan tu hita sian dirinta sandiri. Jala, lomo rohaNa asa marlas ni roha hita.
11, 12. (a) Aha do poda na dilehon Jesus di Mateus bindu 5 sahat 7? (b) Prinsip aha do na taparsiajari sian Bibel?
11 Di buku Mateus bindu 5 sahat 7, dipodahon Jesus do songon dia asa boi martua jala marlas ni roha. Songon dia marsaor dohot dongan, isara martangiang jala asa unang holongan di hepeng. Nang pe nunga 2.000 taon naung salpu disurat poda on, alai mansai denggan dope mangurupi hita saonari on.
12 Di Bibel, dilehon Jahowa do angka prinsip na boi mangurupi hita asa denggan di keluarga, asa gabe parkarejo na burju jala boi mardame dohot angka dongan jolma. Angka prinsip ni Bibel on, boi mangurupi hita sude, didia pe hita maringanan jala aha pe hasusaanta.—Jaha Jesaya 48:17; ida Lampiran 3.
HITA BOI PORSEA TU SURIRANG NI BIBEL
Si Jesaya manurirangkon halelengse ni kota Babel
13. Aha do na disurirangkon ni si Jesaya taringot na laho masa tu kota Babel?
13 Nunga godang surirang ni Bibel naung digohi. Songon surirang ni si Jesaya taringot kota Babel na laho dilengsehon. (Jesaya 13:19) Dipatorang do songon dia kota i ditaluhon. Nang pe timbo tembok ni kota Babel jala dihaliangi sunge. Alai, nunga disurirangkon si Jesaya, marsik do sunge i jala pasombuon ni halak Babel do harbangan ni kotana bungka. Ndang pola marporang nasida masuk tu huta i. Jala disurirangkon do goar ni na manaluhon kota Babel, i ma si Sirus.—Jaha Jesaya 44:27–45:2; ida Lampiran 4.
14, 15. Songon dia do surirang ni si Jesaya digohi?
14 Dung salpu 200 taon disurat surirang on, ro ma angka tentara laho mamorangi kota Babel. Ise do na manguluhon? Si Sirus, songon naung disurirangkon ni si Jesaya.
15 Di borngin halelengse ni kota Babel, marpesta do halak Babel marlas ni roha. Ndang dihabiari nasida manang aha pe, ala pos do rohanasida tu tembok na timbo dohot sunge na mangkaliangi kota i. Hape di luar ni tembok, nunga dipamarsik si Sirus dohot tentarana sunge i. Gabe boi nasida mardalan tu kota. Alai, timbo do tembok ni kota i, songon dia ma nasida masuk? Songon naung disurirangkon ni si Jesaya, bungka do harbangan ni kota Babel. Jadi, ndang pola ingkon marporang nasida manaluhon kota Babel.
16. (a) Aha dope surirang ni si Jesaya taringot kota Babel? (b) Sian dia taboto digohi do surirang ni si Jesaya on?
16 Surirang ni si Jesaya paboahon muse, ndang adong be na laho mangingani kota Babel. Disurat muse, ”Ndang be hainganan jolma salelengna, jala ndang be ebatanna marsundutsundut.” (Jesaya 13:20) Tutu do masa surirang on? Nuaeng, kota Babel on hirahira 80 kilometer di selatan ni Baghdad, Irak. Holan angka tembok na marumpak nama disi. Sahat tu sadari on, ndang adong na maringanan di kota i. Didok Jahowa, ”Salpuhononku ma Babel, sampe so adong be na tinggal.”—Jesaya 14:22, 23, Bibel siganup ari.b
Kota Babel naung dilengsehon
17. Boasa boi hita porsea tu sude janji ni Debata?
17 Nunga digohi godang surirang ni Bibel. On mambahen hita boi porsea tu surirang ni Bibel taringot tu ari na naeng ro. Pos ma rohanta, pasauton ni Jahowa do janjiNa laho mambahen tano on gabe Paradeiso. (Jaha 4 Musa 23:19.) Jala, pos ma rohanta tu ”pangkirimon di hangoluan na so ra suda, naung sian mula ni mulana i diparbagabaga Debata, na so margabus i”.—Titus 1:2.c
BIBEL BOI MAMBAHEN DENGGAN NGOLUNTA
18. Aha do na dipatorang si Paulus taringot Bibel?
18 Nunga taparsiajari ndang adong buku na songon Bibel. Sude isina domu jala ndang maralo tu pengetahuan ilmiah dohot tu sejarah. Adong do poda na denggan jala godang surirang na laho digohi. Apostel Paulus manurat, ”Ai na marngolu do hata ni Debata jala marpangkorhon.” Aha do lapatan ni hata on?—Jaha Heber 4:12.
19, 20. (a) Songon dia do Bibel boi mangurupi hita? (b) Songon dia do hamu patuduhon na diargai hamu Bibel?
19 Bibel boi mambahen denggan ngolunta. Bibel boi mangurupi hita manulingkit aha na adong di bagasan pingkiran dohot rohanta. Boi do hita mandok tahaholongi Debata. Alai, molo tahaholongi Debata ingkon taulahon do aha na nidok ni Bibel.
20 Tutu ma, Bibel sada buku sian Debata. Lomo roha ni Debata asa tajaha jala taparsiajari Bibel. Molo taargai do buku on, tongtong ma taparsiajari. Dung i, lam taantusi ma sangkap ni Debata tu jolma. Di parsiajaran na mangihut, lam godang ma taboto hatorangan taringot tu sangkap ni Debata.
a Adong halak mandok isi ni Bibel i maralo, alai ndang sintong i. Ida ma pasal 7 sian buku Alkitab—Firman dari Allah atau dari Manusia? Dipabinsar Sitindangi Ni Jahowa.
b Molo naeng botoonmu gumodang surirang ni Bibel, jaha hamu ma di halaman 27-29 sian Buku bagi Semua Orang, na dipabinsar ni Sitindangi Ni Jahowa.
c Halelengse ni kota Babel, sada sian surirang ni Bibel naung digohi. Boi idaonmuna muse surirang taringot Jesus Kristus di Lampiran 5.