Pillit ma Manomba Debata

1, 2. Sungkunsungkun aha do na ingkon tarimangi jala boasa ringkot on?

DUNG marsiajar Bibel hita, nunga taboto godang do halak na mandok manomba Debata, alai sasintongna mangajarhon jala mangulahon ulaon na dihasogohon Debata. (2 Korint 6:17) I do alana, diparentahon Jahowa hita asa ruar sian agama palsu, i ma “Babel na balga”. (Pangungkapon 18:​2, 4) Aha ma na ingkon taulahon? Ingkon tapillit jala tasungkun ma dirinta, ‘Husomba do Debata mangihuthon cara na sintong? Manang songon na hubahen saleleng on dope na huihuthon?’

² Molo nunga tatadingkon agama palsu, denggan do i. Alai, olo do pe adong ulaon manang hasomalan ni agama palsu na so pola sala di rohanta. Saonari, taparsiajari ma pigapiga ulaon dohot hasomalan on. Jala boasa ringkot mangkasogohon na dihasogohon Jahowa.

 3. (a) Boasa asing dihilala pigapiga halak molo ndang mamangke patung laho manomba Debata? (b) Aha do didok Bibel taringot mamangke patung laho manomba Debata?

³ Adong do halak naung somal mamangke patung manang pamelean di jabu ni nasida laho manomba Debata. Molo songon i hian diulahon hamu, olo do ra gabe songon na asing pangkilalaanmu molo ndang be mamangke i. Alai ingot ma, dipaboa Jahowa do tu hita songon dia laho manomba Ibana. Jala, tangkas do dipaboa di Bibel, ndang lomo roha ni Jahowa hita manomba Ibana mamangke patung.​—Jaha 2 Musa 20:​4, 5; Psalmen 115:​4-8; Jesaya 42:8; 1 Johannes 5:21.

 4. (a) Boasa ndang jadi hita manungkun tu halak na mate? (b) Boasa diorai Jahowa halak Israel manungkun tu halak naung mate?

⁴ Adong do halak na gabe loja jala habis hepengna laho pasonangkon tondi ni halak na mate. Alai songon naung taparsiajari, ndang adong be halak naung mate jala ndang boi be nasida mangurupi manang manggugai hita. Sasintongna, sala do molo hita manungkun tu halak na mate. Alana, boi do tona manang tudutudu na tajalo i ro sian angka begu. Alani i do umbahen diparentahon Jahowa halak Israel asa unang manungkun tu halak na mate manang mardatu.​​—⁠5 Musa 18:​10-12; ida Lampiran 26 dohot 31.

 5. Aha do na boi mangurupi hita manomba Debata ndang mamangke patung manang pasonangkon halak naung mate?

⁵ Asa boi hita manomba Debata ndang mamangke patung manang mangulahon aha pe laho pasonangkon halak naung mate, aha do na boi mangurupi hita? Jaha ma Bibel jala rimangi ma songon dia do pangkilalaan ni Jahowa tu ulaon sisongon on. Ulaon sisongon on sada “hagigian”, do i di Jahowa. (5 Musa 27:15) Martangiang ma tu Jahowa ganup ari, asa boi hita manomba Ibana jala asa diurupi hita mangulahon lomo ni rohaNa. (Jesaya 55:⁠9) Pos ma rohanta, lehonon ni Jahowa do gogo tu hita laho manadingkon saluhut hasomalan ni agama palsu.

 6. Boasa 25 Desember dipillit laho mangarayahon ari hatutubu ni Jesus?

⁶ Ari Natal ma ari raya na umbalga na dirayahon di liat portibi on. Godang halak mandok, ari Natal ari hatutubu ni Jesus. Alai sasintongna, sian hasomalan ni halak na so manomba Debata do i. Sada ensiklopedia patorangkon, tanggal 25 Desember, i ma ari raya ni halak Rom (sipelebegu) laho manomba dewa matahari. Asa olo halak sipelebegu gabe halak Kristen, dibahen angka pemimpin gereja ma 25 Desember gabe ari hatutubu ni Jesus. (Lukas 2:​8-12) Alai sasintongna, ndang di ari i Jesus tubu. Ndang hea sisean ni Jesus mangarayahon ari Natal. Sada buku patorangkon, 200 taon dung tubu Jesus, “ndang adong sahalak pe na mamboto jala na mangkaringkothon ari hatutubu ni Jesus”. (Sacred Origins of Profound Things) Dung pe marratus taon muse asa dirayahon ari Natal i.

 7. Boasa halak Kristen na tutu mangihuthon Jesus, ndang mangarayahon ari Natal?

⁷ Godang do naung mamboto ari Natal i dibuat sian hasomalan ni halak na so manomba Debata, i ma ari raya pesta pora dohot tukar hadiah. Di Inggris dohot di deba inganan di Amerika, hea do diorai mangarayahon ari Natal, ala diboto nasida, ari raya on sian perayaan ni halak sipelebegu. Diuhum do tingki i molo adong na mangarayahon ari raya i. Alai, ndang sadia leleng dirayahon angka jolma ma muse ari Natal. Alai halak Kristen na tutu mangihuthon Jesus, ndang mangarayahon ari Natal. Boasa? Rumingkot do di nasida mangulahon lomo ni roha ni Debata.

8, 9. Boasa ndang dirayahon halak Kristen na parjolo ari hatutubu ni Jesus manang ari ulang tahun ni nasida?

⁸ Na jotjot muse dirayahon godang halak, i ma ari ulang tahun. Boi do halak Kristen mangarayahon ulang tahun? Di Bibel dipaboa, holan halak na so manomba Jahowa do na mangarayahon ari ulang tahun. (1 Musa 40:20; Markus 6:21) Perayaan ari ulang tahun diulahon laho pasonangkon roha ni angka dewa. Sada buku paboahon, “Hasomalan ni halak sipele begu do perayaan ulang tahun di halak Kristen na parjolo.”​​—⁠The World Book Encyclopedia.

⁹ Porsea do halak Rom dohot halak Junani najolo, adong sada tondi na ro mandongani sasahalak tingki tubu. Saleleng mangolu, tondi on ma mangaramoti ibana. Buku The Lore of Birthdays mandok, “Adong do hubungan gaib ni tondi on dohot dewa na sarupa ari hatutubuna tu halak na baru tubu.”

10. Boasa ndang dirayahon halak Kristen saonari ari ulang tahun?

¹⁰ Dihalomohon Jahowa do perayaan na sian hasomalan ni agama palsu? (Jesaya 65:​11, 12) Tontu ndang. Alani i ma boasa ndang tarayahon ari ulang tahun manang perayaan aha pe na sian hasomalan ni agama palsu.

11. Boasa torop na mangarayahon angka ari raya? Jala aha do na rumingkot di hita?

¹¹ Adong do halak na tongtong mangarayahon ari Natal dohot ari raya na asing, nang pe diboto nasida ari raya i dibuat sian ari raya ni halak na so manomba Debata. Didok roha nasida, tingki ari raya sisongon on do boi rap marpungu jala marlas ni roha dohot keluarga. Songon i do didok rohamu? Denggan do marpungu rap dohot keluarga. Jahowa do mula ni angka keluarga jala lomo rohaNa asa marsaor hita dohot keluarganta. (Epesus 3:​14, 15) Alai, rumingkot do pasonangkon roha ni Jahowa sian pasonangkon roha ni keluarga. I do alana didok apostel Paulus, “Tangkasi hamu ma, manang dia lomo ni roha ni Tuhan i.”​—⁠Epesus 5:⁠10.

12. Aha do na mambahen ndang lomo roha ni Jahowa mangida angka ari raya?

¹² Torop halak mandok, ndang soal sian dia haroro ni perayaan i. Alai, ndang songon i na dihalomohon Jahowa. Ndang lomo rohaNa mangida perayaan na dibahen laho pabadiahon lambang ni negara manang perayaan na dibuat sian agama palsu. Umpamana, godang do perayaan ni halak Mesir na dibahen tu debata nasida. Dung ruar halak Israel sian Mesir, dibahen nasida ma sada perayaan jala didok nasida ma i “ari raya di Jahowa”. Alai, diuhum Jahowa do nasida ala mangulahon perayaan i. (2 Musa 32:​2-10) Panurirang Jesaya mandok, “unang jama hamu na ramun!”​​—⁠Jaha Jesaya 52:⁠11.

13. Sungkunsungkun aha do na ro tu rohamu ala ndang be mangarayahon angka ari raya?

¹³ Ala ndang dohot be hita tu angka ari raya sisongon i, olo do gabe tubu sungkunsungkun di rohanta. Umpamana, ‘Aha do dohononku tu dongan sakarejo ala ndang dohot be ahu mangarayahon ari Natal? Aha do dohononku molo adong na mangalehon hadiah Natal? Songon dia do dohononku molo ditogihon dongan saripengku ahu mangarayahon angka ari raya? Songon dia do mangurupi ianakhonku asa unang lungun roha nasida ala ndang mangarayahon angka ari raya manang ulang tahun?’

14, 15. Songon dia do molo adong na mandokkon “selamat” manang mangalehon hadiah tingki adong ari raya?

¹⁴ Marbisuk ma hita laho mamingkiri songon dia mangalehon alus tu angka donganta. Umpamana, molo adong mandokkon, “Selamat” tu hita tingki adong ari raya, unang pola taorai nasida. Boi do tadok, “Mauliate”. Molo adong na manungkun, boi do patorangonmu boasa ndang dohot hita mangarayahon perayaan i. Alai, tongtong ma lambok jala marbisuk ma mangalusi nasida. Bibel mandok, “Sai tong ma lambok hatamuna, songon na siniraan, asa botoonmuna alus na patut tu ganup jolma.” (Kolosse 4:⁠6) Boi do tadokkon, olo do hita manjalo manang mangalehon hadiah, alai ndang olo hita mangalehon hadiah tingki adong ari raya.

¹⁵ Songon dia do dohononta molo adong na mangalehon hadiah tingki ari ari raya? Ndang adong daftar peraturan di Bibel. Alai Bibel mandok, ingkon jagaonta do panggora ni rohanta asa tongtong denggan. (1 Timoteus 1:​18, 19) Adong do na mangalehon hadiah na so mamboto molo hita ndang mangarayahon angka ari raya. Manang adong na mandok, “Lehononku do tu ho hadiah on nang pe ndang dirayahon hamu ari raya on.” Di situasi sisongon on, hamu do na mamillit jaloonmu manang na ndang hadiah i. Alai aha pe na tabahen, ingkon jagaonta do panggora ni rohanta. Unang ma taulahon na mambahen sogo roha ni Jahowa.

16. Songon dia do bahenonmu molo lomo roha ni keluargamu mangarayahon sada ari raya?

¹⁶ Songon dia do bahenonmu molo keluargamu mangarayahon sada ari raya? Unang pola marsoal dohot nasida. Ingot ma, nasida pe marhak do laho mamillit aha siulahononna. Lomo do rohanta molo diargai nasida hita, alani i argai ma ulaon ni nasida. (Jaha Mateus 7:12.) Alai, molo dipangido keluargamu rap marpungu hamu tingki adong ari raya, songon dia do bahenonmu? Andorang so dioloi hamu, martangiang ma tu Jahowa mangido pangurupion laho mamillit na dumenggan. Manat ma pingkiri jala lului ma hatorangan na hombar tu situasi i. Ingot ma, roha ni Jahowa do na ingkon tapasonang.

17. Songon dia do mangurupi ianakhonmuna tingki diida ibana donganna mangarayahon ari raya?

¹⁷ Songon dia do mangurupi ianakhonmuna tingki diida ibana donganna mangarayahon ari raya? Di tingki na asing, boi do hamu rap marpungu manang mangalehon hadiah. Alai na rumingkot, lehon ma tingkimu jala patuduhon ma holong tu nasida.

18. Boasa ingkon ro hita tu parpunguan?

¹⁸ Asa las roha ni Jahowa, ingkon tatadingkon do hasomalan dohot angka ari raya ni agama palsu. Dung i, ingkon taihuthon do panombaon na sintong. Carana? Ringgas ma ro marpungu. (Jaha Heber 10:​24, 25.) Ringkot do parpunguan tu panombaon na sintong. (Psalmen 22:22; 122:⁠1) Di parpunguan, boi do hita dipatogu jala patoguhon angka donganta.​​—⁠Rom 1:⁠12.

19. Boasa ringkot paboahon hasintongan na taparsiajari sian Bibel?

¹⁹ Na ringkot muse tu panombaonta na sintong, i ma paboahon na taparsiajari sian Bibel tu dongan. Godang do halak na holsoan alani hajahaton dohot angka na masa di tano on. (Hesekiel 9:⁠4) Adong do ra na tinandamu na mangkilala songon i. Paboa ma pangkirimon taringot ari na naeng ro. Molo ro hita tu parpunguan jala tapaboa hasintongan tu dongan na asing, lam pos ma rohanta laho manadingkon agama palsu dohot angka hasomalanna. Boi ma hilalaonta las ni roha jala pasupasuon ni Jahowa ma hita ala marsitutu manomba Ibana mangihuthon cara na sintong.​—⁠Maleaki 3:⁠10.