Aha do Lapatanna “Suru-suruan na Opat Bohina I”?

1, 2. Boasa dipakke Jahowa parnidaan lao mangajari naposona?

ADONG ma sada keluarga na hundul di meja makan lao marsiajar Bibel. Dipatudu bapakna ma akka gambar lao mangurupi anakna asa mura diattusi parsiajaranna i. Ekkel ni anakna dohot semangat ni nasida mangalean komentar tu gambar i patuduhon massai denggan do cara ni bapakna mangajari. Marhite akka gambar i, mura ma diattusi akka anakna hasittongan taringot Jahowa. Hape anggo sian umur ni nasida, maol dope diattusi i.

² Dos songon i ma nang Jahowa. Lomo do rohana, akka jolma na dipatudos songon akka anakna i mangattusi akka na so boi diida. Alani i, dibahen Ibana ma jolma i boi mandapot parnidaan. Umpamana, asa boi godang diajarhon Debata taringot tu dirina, dibahen Ibana ma si Hesekiel mandapot parnidaan na luar biasa. Nungnga tabahas sada sian parnidaan i di Pasal 3. Saonari, tabahas ma muse sada bagian sian parnidaan i. Molo taattusi lapatanna, boi ma hita lam jonok tu Jahowa.

 3. (a) Sesuai tu Hesekiel 1:4, 5, aha do na diida si Hesekiel? (Ida gambar di mula ni parsiajaran.) (b) Aha do na boi taboto sian cara ni si Hesekiel patorakkon parnidaan i?

³ Jaha Hesekiel 1:4, 5. Si Hesekiel mandok, adong diida ibana “opat na songon suru-suruan”. Bohi ni ganup sian nasida adong na songon suru-suruan, jolma, dohot binatang. Lao patorakkon na niidana i, dipakke si Hesekiel do hata, ‘huida ma na songon’. Tikki dijaha hamu parnidaan ni si Hesekiel di bindu 1, boi do diida hamu na jotjot dipakke panurirang on hata, ‘adong na songon’, jala ‘bentukna songon’. (Hes. 1:13, 24, 26) Jadi diboto si Hesekiel do takkas molo na diida i holan gambaran, lao patuduhon akka na so boi diida na adong di surgo.

 4. (a) Songon dia do pakkilalaan ni si Hesekiel tikki mandapot parnidaan i? (b) Aha do na diboto si Hesekiel taringot kerubim?

⁴ Pasti longang do roha ni si Hesekiel mangida jala mambege akka na adong di parnidaan i. Suru-suruan na opat i songon “gara ni api na galak do”. “Songon sillam” do hatop ni nasida habang tusan tuson. “Songon aek na doras” do soara ni habong ni nasida, jala “songon pasukan tentara” do soara ni nasida tikki mardalan. (Hes. 1:13, 14, 24-28; ida kotak “Opat Suru-suruan na Diida si Hesekiel”.) Sian parnidaan ni si Hesekiel na asing, digoari do opat suru-suruan i “akka kerubim”, manang suru-suruan na gogo. (Hes. 10:2) Ala pinoppar ni malim do si Hesekiel, pasti diboto ibana do molo akka kerubim, i ma akka suru-suruan na marhobas di jolo ni Jahowa jala adong hubunganna tu haroro ni Jahowa.​—1 Kron. 28:18; Ps. 18:10.

 5. (a) Songon dia do opat bohi ni kerubim i manggombarhon hamuliaon dohot huaso ni Jahowa? (b) Songon dia do bohi ni akka kerubim na di parnidaan on paingotton hita tu lapatan ni goar ni Debata? (Ida surat na di toru.)

⁵ Jaha Hesekiel 1:6, 10. Diida si Hesekiel do muse setiap kerubim i adong opat bohina, bohi songon jolma, singa, lombu jantan, dohot lali. Tikki diida si Hesekiel bohi ni kerubim i, pasti heran do ibana mangida huaso dohot hamuliaon ni Jahowa na luar biasa. Boasa? Alana, bohi ni setiap kerubim i manggombarhon sifat na jago, na gogo, jala na massai hebat. Umpamana songon singa, binatang buas na hebat do i. Binatang na gogo jala na dipiaro halak do lombu jantan. Pidong na jago do lali, jala toppaan na sangap do anggo jolma na dilehon mangarajai sude toppaan na adong di tano on. (Ps. 8:4-6) Sian bohi ni kerubim i, boi ma diida si Hesekiel na massai hebat opat suru-suruan i. Alai nang pe massai hebat, di toru ni tahta ni Jahowa do nasida sude. Cocok ma on manggombarhon Jahowa Parhuaso na untimbo di alam semesta na boi mamakke toppaanna lao mangulahon lomo ni rohana!a Songon na dipaboa panurat Psalmen, “Ibana do raja ni saluhutna.”​—Ps. 103:19; 148:13.

 6. Aha do na porlu dirimangi si Hesekiel asa boi diboto ibana manggombarhon aha opat bohi ni kerubim i?

⁶ Di pudian ni ari, dung dirimangi si Hesekiel na niidana i, mungkin diingot ibana ma akka naposo ni Debata najolo na hea mambahen binatang gabe tudosan. Umpamana songon si Jakkob, dipatudos ibana do si Juda anakna i tu singa. Jala si Benjamin tu serigala. (1 Mus. 49:9, 27) Boasa? Ai na lao tarida do akka parange ni singa dohot serigala i tu nasida dohot tu akka pinopparna di ari na naeng ro. Jadi tikki dirimangi si Hesekiel akka contoh na disurat di bukku ni si Musa, boi ma dibuat ibana kesimpulan, molo bohi ni akka kerubim i manggombarhon akka parange na luar biasa. Alai akka parange aha do i?

7, 8. Akka parange aha do na digombarhon singa, lali, lombu jantan, dohot jolma i?

⁷ Akka panurat ni Bibel na mangolu andorang so di tikki ni si Hesekiel, jotjot do mamakke singa, lali, dohot lombu jantan lao manggombarhon parange ni sasahalak. Umpamana, adong do didok di Bibel, “Anggo halak na tigor marroha, barani do songon singa.” (2 Sam. 17:10; Poda 28:1) Anggo lali ‘timbo do habang’ jala “ditatap ibana do sian i sahat tu inganan na dao”. (Job 39:27, 29) “Godang do hasil ni panen alani gogo ni lombu jantan.” (Poda 14:4) Songon naung jotjot dipaboa di publikasitta, bohi ni singa manggombarhon halak na barani mambela na sittong. Bohi ni lali manggombarhon halak na marbisuk na mangida sian na dao. Jala bohi ni lombu jantan manggombarhon parange na massai gogo.

⁸ Jadi manggombarhon aha do “bohi ni jolma” i? (Hes. 10:14) Pasti manggombarhon parange na adong di jolma, na so adong di binatang. Ai jolma do na ditoppa Debata tudos songon Ibana. (1 Mus. 1:27) Holan jolma do na patuduhon parange sisongon i di tano on. Diparettahon Debata do tu nasida, “Ikkon haholonganmuna do Jahowa Debatamuna sian nasa rohamuna.” Didok do muse, “Ikkon haholonganmuna do donganmuna jolma doshon dirimuna.” (5 Mus. 6:5; 3 Mus. 19:18) Molo tapatudu holong sian ias ni rohatta, na tatiru do Jahowa. Jala disurat Apostel Johannes do, ‘Tahaholongi pe halak na asing, ala naung parjolo do Debata patuduhon holongna tu hita.’ (1 Joh. 4:8, 19) Jadi manggombarhon holong do “bohi ni jolma” na di parnidaan i.

 9. Akka parange ni ise do na digombarhon bohi ni kerubim i?

⁹ Akka parange ni ise do na digombarhon i? Ala bohi ni kerubim do na tabahas nakkin, jadi parange na digombarhon bohi ni kerubim i, i ma parange ni keluarga ni Jahowa na setia na di surgo. (Pgk. 5:11) Ala Jahowa do na mangalehon hangoluan tu akka kerubim, jadi Debata do na mangalehon akka parange i tu nasida. (Ps. 36:9) Alani i, bohi ni akka kerubim i pe dohot do manggombarhon akka parange ni Jahowa. (Job 37:23; Ps. 99:4; Poda 2:6; Mik. 7:18) Songon dia do Jahowa patuduhon akka parangena on?

10, 11. Aha do laba na boi tadapot sian hatigoran, habisukon, huaso, dohot holong ni Jahowa i?

¹⁰ Hatigoran. Dihaholongi Jahowa do “akka ulaon na tigor”, jala Debata na so paimbar-imbarhon halak do Ibana. (Ps. 37:28; 5 Mus. 10:17) Jadi manang na songon dia pe statusta, na mora manang na pogos, boi do hita sude gabe naposona, jala mandapot pasu-pasu sian Ibana saleleng ni lelengna. Habisukon. Ala Debata na “marbisuk” do Ibana, dilehon Jahowa do tu hita bukku na ‘manippan bisuk’. (Job 9:4; Poda 2:7) Poda na sian Bibel boi mangurupi hita marhasil mangadopi parsoalan siganup ari jala mambahen marlapatan ngolutta. Huaso. ‘Balga do huaso’ ni Debata jala dipakke Ibana do tondi parbadia lao patoguhon hita. Dilehon Ibana do ‘lobi sian gogo ni sahalak jolma’ tu hita, asa boi taadopi parsoalan na songon dia pe taho boratna.​—Nah. 1:3; 2 Kor. 4:7; Ps. 46:1.

¹¹ Holong. Ala “gok do holong ni roha” ni Debata, dang na lao hea ditinggalhon akka naposona na setia. (Ps. 103:8; 2 Sam. 22:26) Mungkin ala marsahit, manang ala matua, olo do gabe lungun rohatta ala dang boi be melayani Jahowa songon na hea taulahon. Alai tamba do semangatta, ala taboto na diingot Jahowa do holong dohot sude na hea taulahon tu Ibana. (Heb. 6:10) Takkas ma, godang do akka na denggan na boi tahilala alani hatigoran, habisukon, huaso, dohot holong ni Jahowa. Jala torus dope tadapot laba sian opat sifat ni Debata na massai denggan i.

12. Boi do diattusi jolma sude parange ni Jahowa?

¹² Porlu do taingot, holan saotik do parange ni Jahowa na boi diattusi akka jolma. (Job 26:14) “Dang boi taattusi parbinotoan ni Pargogo na So Hatudosan i”, ai “balga situtu do hasangaponna”. (Job 37:23; Ps. 145:3) Jadi dang taretong godangna parange ni Jahowa jala dang boi dipisahon i sian akka parangena na asing. (Jaha Rom 11:33, 34.) Sasittongna, takkas do i dipatudu di parnidaan ni si Hesekiel. (Ps. 139:17, 18) Bagian na dia do sian parnidaan i na patuduhon i?

13, 14. Aha do na digombarhon sude bohi ni kerubim na opat i, jala boasa boi tadok songon i?

¹³ Diida si Hesekiel do, ganup sian kerubim i dang holan sada bohina alai opat. Aha do lapatanna? Taingot ma jotjot do angka opat dipakke di Bibel lao paboahon na lengkap sude na dipaboa i. (Jes. 11:12; Mat. 24:31; Pgk. 7:1) Di parnidaan on pe, mulak-hulak do didok si Hesekiel angka opat. (Hes. 1:5-18) Aha ma kesimpulan na boi tabuat sian on? Dos songon opat kerubim na manggombarhon sude suru-suruan na setia, bohi ni akka kerubim na opat i pe manggombarhon sude parange ni Jahowa.b

¹⁴ Asa boi taboto molo sude bohi ni kerubim na opat i manggombarhon lobi sian opat parange ni Debata, ikkon tabandingkon do i tu opat roda na di parnidaan on. Molo taida sada-sada roda i, luar biasa do jagona. Alai tikki rap taida sude roda i, dang holan sekedar roda na jongjong di inganan na marasing-asing roda i. Molo taida sahali sude, gabe mambentuk fondasi kareta ni Debata do roda na opat i. Dos songon i ma, molo sahali sude taida bohi ni kerubim na opat i, dang holan opat parange na marasing-asing na dipatudu. Alai, sude parange na dipatudu bohi ni kerubim i gabe songon fondasi lao pataridahon akka parange ni Jahowa na asing.

15. Aha do na boi patoguhon roha ni si Hesekiel sian parnidaan na parjolo i?

¹⁵ Sian parnidaan na parjolo on, adong do sada parsiajaran na petting dapot ni si Hesekiel na patoguhon rohana lao marale-ale tu Jahowa. Aha ma i? Molo taparrohahon hata na parjolo disurat panurirang on, dipaboa ibana do molo ibana adong “di luat ni halak Kasdim”. Didok ibana do muse, “Di inganan i, dihilala ibana ma huaso ni Jahowa.” (Hes. 1:3) Si Hesekiel paboahon, ibana mandapot parnidaan i, di luat i do, di Babel, dang di Jerusalem.c On ma na patoguhon rohana. Dipatuduhon Jahowa do tu si Hesekiel, nang pe ibana dianggap tawanan na so marguna di Babel, dao sian Jerusalem dohot sian bagas joro, alai dang na gabe dao ibana sian Jahowa jala gabe dang boi manomba Debata. Dang soal songon dia ibana dianggap halak, manang didia pe ibana tinggal, toktong do ibana boi mangulahon ibadat na sittong, asal ma tulus rohana jala marsitutu lao manomba Jahowa.

16. (a) Boasa parnidaan ni si Hesekiel i boi patoguhon rohatta? (b) Aha do na mangonjar rohamuna lao manomba Jahowa sian nasa rohamuna?

¹⁶ Boasa parsiajaran na didapot si Hesekiel i patoguhon rohatta? Alana sian i taboto ma, molo tasomba Jahowa sian nasa rohatta toktong do Ibana jonok tu hita, dang soal didia hita tinggal, sadia borat parsoalatta, manang songon dia situasitta. (Ps. 25:14; Ul. 17:27) Dang na lao hea pasombuon ni Debata manang tinggalhononna hita, sabar do Ibana ala gok holong ni roha do Jahowa. (2 Mus. 34:6) Jadi, dang adong na boi manirang hita sian holong ni Jahowa na manoktong i. (Ps. 100:5; Rom 8:35-39) Asing ni i, dipatuduhon parnidaan i do na badia Jahowa jala na massai balga situtu huasona. On paposson rohatta, holan Jahowa do na tama tasomba. (Pgk. 4:9-11) Mandok mauliate do hita ala dilehon Jahowa parnidaan sisongon i tu naposona. Gabe boi do taboto taringot dirina dohot parangena. Molo lam godang taboto taringot parange ni Jahowa, lam jonok ma hita tu Ibana, taronjar ma rohatta lao mamuji jala manomba Ibana sian nasa roha dohot sian nasa gogotta.​—Luk. 10:27.

17. Aha do sukkun-sukkun na lao dibahas di pasal na mangihut?

¹⁷ Alai dang badia be ibadat na sittong i di tikki ni si Hesekiel. Songon dia do i boi masa? Songon dia do pakkilalaan ni Jahowa? Songon dia do i berpengaruh tu hita saonari? Na lao dibahas ma i di akka pasal na mangihut.