Fluwa nɲɔn su nga Pɔlu klɛli Korɛntifuɛ mun’n

3 ?Ɔ fata kɛ e kan e su ndɛ e kle amun ekun? ?Annzɛ ɔ fata kɛ e man amun fluwa wie mɔ be kan e wun ndɛ kpa nun’n kɛ sran wie’m be yo’n sa? ?Annzɛ amun yɛ ɔ fata kɛ amun fa fluwa sɔ mun man e-ɔ? 2 Amun bɔbɔ yɛ amun ti e fluwa’n niɔn.+ Fluwa sɔ’n i nun ndɛ’n ti klɛwa e awlɛn’n nun. Yɛ sran’m be kwlaa be si i, kpɛkun be kanngan nun. 3 Nanwlɛ, amun yɛ amun ti Klisi i fluwa nga e mɔ e ti Ɲanmiɛn i sufuɛ’n e klɛli’n niɔn.+ Sanngɛ nán like nga sran’m be fa klɛ fluwa’n yɛ be fa klɛli-ɔ. Ɲanmiɛn m’ɔ lafiman’n i wawɛ’n yɛ be fa klɛli-ɔ. Kusu nán yɔbuɛ su yɛ be klɛli-ɔ,+ sanngɛ be awlɛn’n nun yɛ be klɛli-ɔ.+

4 Klisi ti yɛ e lafi Ɲanmiɛn su sɔ-ɔ. 5 Nán kɛ e bɔbɔ e bu e wun kɛ e kwla like yo ti-ɔ. Sanngɛ Ɲanmiɛn ti yɛ e kwla like yo-ɔ.+ 6 Nanwlɛ, i yɛ maan e kwla di aenguɛ uflɛ kun i junman’n niɔn.+ Junman sɔ’n, e nianman mmla wie mɔ be klɛli’n+ su naan y’a di. Sanngɛ Ɲanmiɛn wawɛ’n yɛ ɔ kle e atin’n naan y’a kwlɛ i di-ɔ. Afin mmla nga be klɛli’n bu sran fɔ naan sran wu.+ Sanngɛ Ɲanmiɛn wawɛ’n yo maan sran ɲan nguan.+

7 Mmla mɔ be klɛli i yɔbuɛ’n su’n,+ ɔ yo maan sran wu. Yɛ kɛ bé fá mán’n, lika’n kpajali dan kpa. I sɔ’n ti’n, Izraɛlifuɛ’m b’a kwlá nianman Moizi i ɲrun, afin i ɲrun’n yoli ɲanɲanɲan.+ Kusu nn i ɲrun ɲanɲanɲan sɔ’n ɔ́ wíe. 8 ?Sɛ Mmla’n i fa manlɛ’n yoli aɲrunɲan like’n,+ ɔ fataman kɛ Ɲanmiɛn wawɛ’n i fa manlɛ’n, ɔ yo aɲrunɲan like tra su lele?+ 9 Afin sɛ Mmla’n mɔ i ti yɛ be bu sran fɔ’n+ ɔ le ɲrun’n,+ i sɔ’n kle kɛ like nga be yo naan b’a uka sran mun naan b’a yo nanwlɛfuɛ’n, ɔ le ɲrun trɛ i lele!+ 10 I yo, like ng’ɔ le ɲrun laa bɔbɔ’n, w’a ɲanman ɲrun kun. Afin like uflɛ wa ɲannin ɲrun trɛli i.+ 11 Sɛ like ng’ɔ su kaman lɛ titi’n ɲannin ɲrun’n,+ ɔ kle kɛ like ng’ɔ́ ká lɛ titi’n ɔ́ ɲán ɲrun trɛ́ i lele!+

12 Kɛ mɔ e wla o like sɔ’n su’n ti’n,+ kɛ é kán ndɛ’n e klun titiman e. 13 Ɔ maan e yoman like nga Moizi yoli’n wie. Ɔ fali tannin kɛtɛli i ɲrun+ naan Izraɛlifuɛ’m b’a wunman like ng’ɔ su kaman lɛ titi’n i agualiɛ’n. 14 Sanngɛ b’a kwlá wunman sa wlɛ.+ Ɔ maan lele nin andɛ’n, kɛ be kanngan aenguɛ laa’n nun kle be’n, like ng’ɔ kata be ɲin’n te o lɛ.+ Afin Klisi kunngba yɛ maan like sɔ’n kwla tu lɛ-ɔ.+ 15 Lele nin andɛ bɔbɔ’n, like kun kata be ɲin.+ I sɔ’n ti’n, blɛ kwlaa nga be kanngan Moizi i fluwa’m be nun kle be’n,+ be wunmɛn i wlɛ. 16 Sanngɛ sran ng’ɔ kpɛ i ɲin Zoova* wun lɔ’n, like fi kɛtɛmɛn i ɲrun kun.+ 17 Kusu Zoova* ti aolia nun sran.+ Yɛ lika kwlaa nga Zoova i wawɛ’n wo lɛ’n, alaje o lɛ.+ 18 E kwlaa nga like fi kataman e ɲrun kun’n, e ti kɛ niannun sa. E yi Zoova* i aɲrunɲan’n i nglo. Yɛ e kaci, kpɛkun e fɛ i. Ɔ maan e yi i aɲrunɲan’n i nglo kpa ekun, kɛ nga Zoova* m’ɔ ti aolia nun sran’n ɔ kunndɛ’n sa* cɛ.+